ᓴᐃᒪᓐ ᖃᐃᖁᔨᓂᖃᖅᐳᖅ ᑐᙵᓇᕐᓂᐅᔪᒥ ᐊᕐᕌᒎᑉ−ᓄᙳᐊᓂ ᐅᖃᐅᓯᒃᓴᓕᐊᖓᓐᓂ

For English version see Simon calls for kindness and spirit of ajuinnata in year-end message

ᑭᖕ ᑭᒡᒐᖅᑐᖅᑎᖓ ᑲᓇᑕᒥ ᒥᐊᕆ ᓴᐃᒪᓐ ᖃᐃᖁᔨᓂᖃᓚᐅᖅᐳᖅ ᑲᓇᑕᒥᐅᑕᓂ “ᐃᒻᒥᖕᓂᒃ ᐊᖏᖅᓯᒪᖃᓪᓗᓂᒋᑦ ᖃᓄᐃᓕᐅᕐᓂᐅᔪᒧᑦ ᐊᒻᒪ ᑐᙵᓇᕐᓂᕐᒧᑦ” ᐊᕐᕌᒍᑕᒫᒥ ᐊᕐᕌᒎᑉ−ᓄᙳᐊᓂ ᐅᖃᐅᓯᒃᓴᓕᐊᖓᓐᓂ.

ᓂᕆᐅᖕᓂᖃᖅᑐᒥ ᐅᖃᐅᓯᒃᓴᖏᓐᓂ ᑎᑭᓚᐅᖅᐳᑦ ᑎᓯᐱᕆ 29−ᒥ, ᖃᔅᓯᐊᕐᔪᖕᓂ ᐅᓪᓗᓂ ᐱᒋᐊᕐᓂᖓᓂ ᓄᑖᖑᔪᒥ ᐊᕐᕌᒍᔪᒥ ᓇᓗᓇᐃᖅᑕᐅᓯᒪᓂᐊᖅᑐᒥ ᐊᖏᖃᑎᒌᙱᓐᓂᐅᔪᒥ ᐊᑲᐅᙱᓕᐅᕈᑕᐅᔪᓂ, ᐃᓚᖃᖅᑐᒥ ᑲᔪᓰᓐᓇᖅᑐᒥ ᐅᓇᑕᕐᔪᐊᕐᓂᐅᒧᒥ ᒑᓴᒥ ᐅᑯᓇᓂ ᐃᔅᕆᐅᓪᒥ ᐊᒻᒪ ᕼᐊᒪᔅᓂ ᐊᒻᒪ ᑎᑭᑉᐸᓪᓕᐊᔪᒥ ᔫᓇᐃᑎᑦ ᔅᑕᐃᑦᔅᓂ ᐊᖓᔪᖅᑳᕐᔪᐊᖓᓄᑦ ᓂᕈᐊᕐᓂᐅᔪᒥ.

ᑭᖕ ᓴᕐᓕ ᑕᐃᒪᐃᓚᐅᕐᓂᖓᓂ ᖁᕕᐊᓱᒡᕕᖕᒥ ᐅᖃᐅᓯᒃᓴᓕᐊᖓᓐᓂ, ᓴᐃᒪᓐ ᐅᖃᓚᐅᖅᐳᖅ “ᖁᕝᕙᖅᐸᓪᓕᐊᔪᒥ ᖃᓄᐃᓕᐅᖅᐸᓪᓕᐊᓂᐅᔪᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ” ᐃᓚᒋᔭᐅᔪᒥ ᐊᒃᓱᕈᕈᑕᐅᔪᓂ ᑲᓇᑕᒥᐅᑕᑦ ᓵᙵᓯᒪᓂᖏᓐᓂ.

“ᐊᒃᓱᕈᖅᓯᒪᕗᑦ ᐊᒃᑐᐃᓂᐅᔪᓂ ᓯᓚᕐᔪᐊᒥ ᐅᓇᑕᕐᔪᐊᕐᓂᐅᔪᒥ  ᐊᒻᒪ ᐊᔭᐅᕆᓂᐅᔪᒥ ᐆᒪᓇᓱᐊᕐᓂᕐᒥ ᒫᓐᓇᓕᖅᑐᒥ,” ᐅᖃᓚᐅᖅᐳᖅ ᑕᕐᕆᔭᓕᐊᖑᔪᒥ ᐅᖃᐅᓯᒃᓴᓕᐊᖓᓐᓂ.

“ᓱᓕ, ᖁᙱᐊᖅᓯᒪᕗᒍᑦ ᐱᒻᒪᕆᐅᔪᓂ ᐃᖏᕐᕋᓂᐅᔪᓂ ᓴᐃᒻᒪᖃᑎᒌᖕᓂᐅᔪᒥ, ᖁᕕᐊᓱᒍᑎᖃᖅᖢᑕ ᓄᑖᓂ ᑎᑎᕋᖅᑕᐅᓯᒪᓂᐅᔪᓂ ᐊᑐᖅᑕᐅᓂᑯᓂ ᐊᒻᒪ ᐱᓱᖕᓂᖃᓚᐅᖅᐳᑦ ᖃᕋᓴᐅᔭᒃᑰᖅᑎᑦᑎᓂᐅᔪᒥ ᐊᑦᑕᓇᙱᓐᓂᖅᓴᐅᓂᖓᓂ ᐃᓂᐅᓂᖓᓂ ᐊᕐᓇᓄᑦ ᓂᕕᐊᖅᓵᓄᓪᓗ.”

ᕕᕗᐊᕆᒥ, ᓴᐃᒪᓐ ᐱᓚᐅᖅᐳᖅ ᓇᒧᙵᐅᕈᓘᔭᖅᑐᒥ ᓯᐊᒻᒪᖅᑎᑦᑎᓂᐅᔪᒥ ᓴᖅᑭᔮᕐᓂᐅᔪᒥ ᕿᓚᒻᒥᐅᔪᒥ ᓄᖅᑲᕐᓂᖓᓂ ᐅᖃᐅᓯᒃᓴᓕᐅᕐᓂᕐᒧᑦ ᐃᒡᓄᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ ᒪᒃᐱᒐᖓᓐᓂ ᒪᓕᒃᑐᒥ ᑕᐃᔭᖓᓂ ᑕᐃᔅᓱᒪᓂ “ᐊᖏᒡᓕᒋᐊᕐᓂᐅᔪᒥ ᐱᑦᑎᐊᙱᓐᓂᐅᔪᓂ, ᖀᒥᒍᓱᒃᑐᓂ ᐊᒻᒪ ᖃᓄᐃᑦᑑᓂᖏᓐᓂ ᐱᔾᔪᑎᒋᓪᓗᒍ ᐊᑭᕋᖅᑐᐃᓂᐅᔪᒥ” ᑎᑎᕋᕐᓂᐅᔪᓂ.

ᐊᕐᕌᒎᑉ−ᓄᙳᐊᓂ ᐅᖃᐅᓯᒃᓴᓕᐊᖓ ᐱᖅᑯᓯᐅᕗᖅ ᑭᖕ ᑭᒡᒐᖅᑐᖅᑎᐅᔪᓄᑦ ᐊᒻᒪᓗ ᐱᖓᔪᒋᕙᖓ ᓴᐃᒪᓐᒧᑦ ᑕᐃᒪᙵᓂ ᐃᓂᒋᔭᖓᓄᑦ ᔪᓚᐃ 2021−ᒥ.

ᐱᕈᖅᓴᔭᐅᓚᐅᖅᓯᒪᕗᖅ ᓄᓇᕕᖕᒥ ᐊᒻᒪ ᑲᓇᑕᐅᑉ ᓯᕗᓪᓕᖅᐸᐅᓪᓗᓂ ᐃᓅᓪᓗᓂ ᑭᖕ ᑭᒡᒐᖅᑐᖅᑎᖓᓂ ᑲᓇᑕᒥ.

ᑕᐃᒪᐃᓚᐅᕐᓂᖓᓂ ᓯᕗᓪᓕᖅᐹᖑᔪᒥ ᐅᖃᐅᓯᒃᓴᓕᐊᖓᓐᓂ, ᓴᐃᒪᓐ ᐊᑐᓚᐅᖅᐳᖅ ᐃᓄᒃᑎᑐᑦ ᐅᖃᐅᓯᕐᒥ ᐊᔪᐃᓐᓇᑕ, ᑐᑭᖃᖅᑐᒥ ᓴᐱᓕᓚᐅᖅᓯᒪᙱᓐᓂᕐᒧᑦ, ᑕᕐᓂᖃᕐᓂᐅᔪᒥ ᑲᓇᑕᒥᐅᑕᓕᒫᓂ ᑐᕌᕋᓱᐊᕈᓐᓇᕐᓂᖏᓐᓄᑦ.

ᐱᒋᐊᓚᐅᖅᐳᖅ 2 ½ ᒥᓂᑦᒥ ᓯᕗᓂᐊᓂ−ᓂᐱᓕᐅᖅᑕᐅᓂᖓᓂ ᐅᖃᓪᓚᖕᓂᐅᔪᒥ ᖃᔅᓯᐊᕐᔪᖕᓂ ᐅᖃᐅᓯᕐᓂ ᐃᓄᒃᑎᑐᑦ ᐃᖅᑲᐅᒪᓂᖓᓂ ᐱᒋᐊᓚᐅᙱᓐᓂᖓᓂ ᐃᓄᖕᓂ ᐃᓚᖏᓐᓂ ᐹᖅᓯᒪᔭᖏᓐᓂ ᐊᐅᓪᓛᖅᐸᖕᓂᖓᓂ 2023−ᒥ ᐊᒻᒪᓗ ᐅᓂᒃᑳᕆᔭᖏᓐᓂ ᐅᖃᐅᓯᕆᔭᖏᓐᓂ ᐃᒻᒥᓄᑦ. ᖃᐃᖁᔨᓂᖃᓚᐅᖅᐳᖅ ᐃᓄᖕᓂ “ᐱᒋᐊᖅᑎᑦᑎᒃᑲᓐᓂᕐᓗᑕ ᑲᑎᙵᓂᕆᔭᑦᑎᓐᓂ ᐅᕙᑦᑎᓐᓄᓕᒫᖅ.”

ᐅᖃᓪᓚᓚᐅᖅᐳᖅ ᐃᒃᓯᕚᖅᖢᓂ ᑭᐳᒥ Rideau Hall−ᒥ ᐋᑐᕚᒥ, ᐊᒻᒪ ᑕᕐᕆᔭᓕᐊᖅ ᐃᓚᖃᓚᐅᖅᐳᖅ ᑕᑯᒃᓴᐅᓂᐅᔪᓂ ᖃᑦᑎᕆᔨᓂ ᐅᓇᑕᖅᑐᓂ ᓇᐹᖅᑐᖃᕐᓂᐅᔪᓂ ᐃᑭᑦᑐᐊᓗᖕᓂ, ᐊᖏᕐᕋᓂ ᓱᕋᑦᑎᔭᐅᔪᓂ ᓯᒡᔭᖅᐸᓯᖕᒥ ᐊᓄᕌᕐᔪᐊᕐᓂᐅᔪᓂ ᐊᒻᒪ ᑕᑯᒃᓴᐅᓂᐅᔪᓂ ᓴᐃᒪᓐ ᐊᐅᓪᓛᕐᓂᖏᓐᓂ, ᐃᓚᖃᖅᑐᒥ ᐅᐱᒍᓱᖕᓂᖓᓂ ᐃᓚᒋᔭᐅᔪᓂ ᑲᓇᑕᒥ ᐅᓇᑕᖅᑐᒃᓴᐅᔪᓂ.

“ᐱᔪᓐᓇᕐᓂᖃᖅᑐᐃᓐᓇᐅᕗᒍᑦ ᐃᑲᔪᖅᓱᐃᓂᕐᒥ ᖃᓄᐃᙱᑦᑎᐊᕐᓂᐅᔪᒥ ᓄᓇᖁᑎᑦᑎᓐᓂ,” ᓴᐃᒪᓐ ᐅᖃᓚᐅᖅᐳᖅ.

“ᑕᐃᒪᓐᓇ, ᑐᙵᓇᕐᓂᖅ — ᐅᖓᓯᖕᓂᐅᔪᒥ ᐱᔮᖅᑯᒻᒥ ᐱᓕᕆᓂᐅᔪᒥ— ᓴᖅᑭᑉᐳᖅ ᓴᙱᔪᐊᓗᖕᒥ ᐊᒻᒪ ᐱᔾᔪᑎᖃᖅᑐᒥ ᓂᕈᐊᕐᓂᐅᔪᒥ ᓵᙵᓂᐅᔪᒥ ᐊᔪᕐᓇᖅᑐᒃᑰᕐᓂᐅᔪᒥ.”