ᐃᓕᓐᓂᐊᖅᑐᑦ ᖃᐅᔨᕚᓪᓕᖅᐳᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔨᒻᒪᕇ ᖃᓄᐃᓕᐅᖃᑦᑕᕐᓂᖏᓐᓂᒃ

For an English version of this story, please see From dentists to midwives, Inuit students get a taste of what health professionals do.

ᐃᓄᐃᑦ ᐃᓕᓐᓂᐊᖅᑏᑦ ᓄᓇᕗᓕᒫᒥ ᖃᐅᔨᕚᓪᓕᖅᑎᑕᐅᓚᐅᕐᑐᑦ ᐃᖅᑲᓇᐃᔮᓂ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᑕᖅᑭᖅ ᑕᒪᓐᓇ ᐱᒋᐊᓕᓵᖅᑎᓪᓗᒍ ᐃᖃᓗᖕᓂ.

ᐃᓕᓐᓂᐊᕈᑎᐅᓚᐅᑲᒃᑐᖅ ᐋᖅᑭᒃᑕᐅᓯᒪᓚᐅᕐᑐᖅ ᐅᑯᓇᙵᑦ ᒪᑭᒋᐊᖅᑕ, ᓄᓇᕗᑦ ᑐᙵᕕᒃᑯᑦ ᐱᓕᕆᐊᖓᑦᑕ ᐃᓚᖓᒍᑦ ᐊᒻᒪᓗ ᓄᓇᕗᒥᑦ ᓯᓚᑦᑐᖅᓴᕐᕕᒃᒥ ᐱᓕᕆᐊᖑᓪᓗᓂ, ᑖᒃᑯᐊᓗ 14-ᓄ ᐃᓕᓐᓂᐊᖅᑎᓄᑦ ᐅᖃᓪᓚᓚᐅᖅᖢᑎᒃ ᐃᓅᓕᓴᐅᑎᐅᕙᓚᐅᕐᑐᓂᒃ, ᐃᕐᓂᓱᒃᓰᕙᖕᓂᕐᒥ ᐊᒻᒪ ᒪᒥᓴᕈᑎᐅᕙᒃᑐᓂᒃ.

ᐃᓕᓐᓂᐊᓚᐅᕐᑐᑦ ᒪᐃ 4-ᒥ 7-ᒧ.

“ᐃᓄᓕᕆᔨᒃᑯᑦ ᖃᐃᓚᐅᕐᑐᑦ ᐊᒻᒪ ᐃᓕᓐᓂᐊᖅᑐᓄᑦ ᐅᖃᓪᓚᒃᖢᑎᒃ ᖃᐅᔨᑎᑦᑎᓇᓱᒃᖢᑎᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᑭᓲᖕᒪᖔᑕ,” ᐅᖃᕐᑐᖅ ᐱᓕᕆᐊᒥ ᐱᓕᕆᔨᒋᔭᐅᔪᖅ ᑯᓄᒃ ᑰᑦᑎᖅ ᐊᐱᕐᓱᖅᑕᐅᑎᓪᓗᒍ ᐱᓕᕆᔨᒻᒪᕆᐅᕙᒃᑐᑦ ᐱᓕᕆᐊᕆᔭᖏᓐᓂ ᐅᖃᓪᓚᒃᑎᓪᓗᒋᑦ ᐃᓅᓱᒃᑐᓄᑦ.

“ᐅᑯᓇᙶᕐᑐᑦ ᑎᑎᕋᕐᕕᒃᒥ ᑎᑎᕋᖅᑎᓂ ᐃᓚᒋᔭᐅᔪᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖃᖅᐸᒃᑐᓂᒃ.”

ᐃᓚᐅᖃᑕᐅᔪᑦ 8-ᓂ ᓄᓇᓕᖕᓂ ᓄᓇᕗᒥᑦ ᐱᖓᓱᐃᓕᖓᔪᓂᒃ ᐊᕕᒃᑐᕐᓯᒪᔪᓂ ᐱᓕᕆᖃᑕᐅᓚᐅᕐᑐᑦ.

ᑰᑦᑎᖅ ᐅᖃᓚᐅᕐᑐᖅ ᐋᖅᑭᒃᓯᓯᒪᓂᐊᕈᒪᔪᖅ ᐅᓄᕐᓂᕐᓴᓂ ᐃᓄᖕᓂ ᐃᓚᐅᑎᑦᑎᔪᓐᓇᕐᓗᑎᒃ, ᑭᓯᐊᓂᓕ ᐱᕐᓯᑲᑕᖕᓂᕐᒧᑦ ᑲᖏᖅᖠᓂᖅᒥ ᐊᒻᒪ ᖃᒪᓂᑦᑐᐊᕐᒥ ᐃᓅᓱᒃᑐᓂ ᑎᑭᑦᑐᖃᕈᓐᓇᓚᐅᙱᑦᑐᖅ.

ᑐᕈᐊᐃ ᔫᓇᔅ, ᐃᓕᓐᓂᐊᖅᑎᐅᖃᑕᐅᔪᖅ ᑲᖏᖅᑐᒑᐱᖕᒥ ᖁᓗᐊᖅ ᐃᓕᓐᓂᐊᕐᕕᒃᒥ ᐅᐸᖃᑕᐅᓚᐅᕐᑐᖅ ᐃᓚᒋᔭᐅᓪᓗᓂ ᐃᓕᓐᓂᐊᖅᑎᓂᒃ.

ᖁᕕᐊᒋᓛᕆᓚᐅᕐᑕᖓᓕ?

“ᐃᑲᓃᖢᑕᖃᐃ ᖃᑦᑎᕆᔨᒃᑯᑦ ᐃᒡᓗᖓᓂ ᐱᓕᕆᔨᓂ ᐅᐸᒃᓯᒪᓪᓗᑕ,” ᔫᓇᔅ ᐅᖃᕐᑐᖅ, ᐅᖃᐅᓯᖃᖅᖢᓂ ᐃᖃᓗᐃᑦ ᖃᑦᑎᕆᔨᖏᑦ ᓱᕋᒃᓯᒪᓕᖅᑐᒥ ᓄᓇᓯᐅᑎᒥ ᐊᓂᑎᑦᑎᓇᓱᙳᐊᖅᑎᓪᓗᒋᑦ.

ᐅᓐᓄᒃᑯ ᐳᓛᖃᑦᑕᖅᑐᖅ ᐊᑦᑕᖕᒥᓂ ᐊᒻᒪ ᕚᖠᐹᕆᐊᖅᐸᒃᖢᓂ, ᐅᖃᕐᑐᖅ.

ᐃᓕᓐᓂᐊᖅᑏᑦ ᑐᓴᖅᑎᑕᐅᓚᐅᕐᒥᔪ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔨᓂ ᑖᒃᑯᐊᓗ ᐋᖅᑭᒃᓱᐃᕙᒃᖢᑎᒃ ᐋᓐᓂᐊᖃᖅᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᖏᓐᓂ ᓄᓇᖏᓐᓂ.

ᐹᑐᕇᓯᐊ ᒪᐃᐅᓪ, ᐅᖅᓱᖅᑑᕐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔨᐅᔪᑦ ᐱᖃᑎᖃᓚᐅᕐᑐᖅ ᐸᓂᖕᒥᓂ ᓂᕝᕕᐊᒥ ᐃᖃᓗᖕᓄᑦ.

“ᐱᓕᕆᕝᕕᒋᕙᒃᑕᓐᓂ ᐱᐅᒃᓴᑦᑎᐊᓕᓚᐅᕐᒪᓐ,” ᓚᐃᐅᓪ ᐅᖃᕐᑐᖅ. “ᖁᕕᐊᒋᑦᑎᐊᖅᖢᓂᐅᒃ ᐊᒻᒪ ᐅᖃᖅᖢᓂ, ‘ᑕᐃᒪᐃᓕᐅᕈᓐᓇᖅᑐᖓ ᐃᓐᓇᕈᒃᑲᓐᓂᕈᒪ.’”

ᓚᐃᐅᓪ ᖁᕕᐊᒋᔭᖃᓕᓚᐅᕐᑐᖅ ᑕᐅᑐᒃᑎᓪᓗᒍ ᐃᓂᓱᒃᓰᓂᕐᒥ ᑕᐅᑐᒃᑎᑕᐅᑎᓪᓗᒋᑦ, ᑖᓐᓇᓗ ᐃᑲᔫᑎᐅᔪᓐᓇᕐᓂᖓᓂ ᐃᓄᖕᓂ ᐊᓈᓇᒋᔭᐅᔪᓂ ᐊᖏᕐᕋᖏᓐᓂ ᐃᕐᓂᓱᒍᓐᓇᕐᓯᓗᑎᒃ. ᐃᓄᖕᒥ ᐃᕐᓂᓱᒃᓰᔨᑕᖃᕈᓐᓃᕐᒪᓐ ᐊᕐᕌᒎᓕᕐᑐᓂ ᑕᓪᓕᒪᓂ ᓄᓇᕗᒥᑦ.

“ᐃᕐᓂᓱᒃᓰᓂᕐᒥ ᖁᕕᐊᒋᔭᖃᓕᓚᐅᕐᑐᖓ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔨᐅᓕᕐᑎᓪᓗᖓ,” ᓚᐃᐅᓪ ᐅᖃᕐᑐᖅ.

“ᐱᓕᕆᐊᒐᕋ ᐱᓕᕆᐊᕆᒻᒪᕆᓚᐅᕐᑕᕋ ᐊᒻᒪ ᐃᓄᖕᓂ ᐃᑲᔪᕈᓐᓇᖅᖢᖓ. ᓄᓇᓕᖕᓃᑦᑐᓂ ᐱᓕᕆᖃᑎᖃᖅᐸᒃᖢᖓ. ᐃᓱᒪᒋᕙᓚᐅᕐᑕᕋ ᓯᕗᓂᐊᓂ ᓲᖃᐃᒻᒪ ᐃᓐᓇᕐᒥ ᐃᒡᓗᖃᑎᖃᕐᑐᖓ ᐊᒻᒪᓗ ᐃᓅᓯᓕᒫᐸᓗᐊᓂ ᐃᕐᓂᓱᒃᓰᔨᐅᕙᒃᖢᓂ.”