ᐋᓐᓂᐊᔪᓕᕆᔾᔪᑏᑦ ᑭᓱᑐᐃᓐᓇᓂᑦ ᐃᒋᑕᐅᔪᑦ ᑰᔾᔪᐊᖅ ᐊᒃᑕᕐᕕᖓᓐᓂ

For the English version of this story, please see Medical equipment discarded at Kuujjuaq landfill.

ᓇᓗᓇᐃᖅᑕᐅᔮᖏᑦᑐᑦ ᑭᓇᒦᖓᕐᒪᖔᑕ ᓴᖅᑭᖅᑕᐅᓯᒪᔪᑦ ᐃᓄᓐᓄᑦ ᑐᓴᕋᒃᓴᓄᑦ ᑕᑯᒃᓴᐅᑎᔪᑦ ᐊᑐᖅᑕᐅᓯᒪᖏᑦᑐᓂᑦ ᐋᓐᓂᐊᖅᑐᓕᕆᓂᕐᒧᑦ ᐱᖁᑎᓂᑦ ᐃᒋᑕᐅᔪᓂᑦ ᑰᔾᔪᐊᖅ ᐊᒃᑕᕐᕕᖓᓂ ᓅᑎᑦᑎᓚᐅᖅᑐᑦ ᐱᖁᑎᓂᑦ ᐊᑦᑕᕐᓇᖏᓂᖅᓴᒧᑦ ᐱᓇᓱᐊᕈᓯᐅᓚᐅᖅᑐᒥᑦ.

ᖃᔅᓯᑲᓪᓚᐃᑦ ᐅᖃᐅᓯᖃᖅᑐᑦ ᐊᒋᓯ 4−ᒥ ᓂᐱᔅᓯᓐᓂ ᓄᓇᕕᒃ Facebook−ᑯᑦ ᐱᓕᕆᖃᑎᖏᓐᓂ ᐅᖃᐅᓯᖃᓚᐅᖅᐳᑦ ᐃᓱᒫᓘᑎᖃᕐᓂᕐᒥᓂᒃ ᖁᐊᖅᓵᕐᓇᖅᑐᓂᒃ ᓄᑕᖅᑲᓄᑦ ᐱᙳᐊᕈᑕᐅᑐᐃᓐᓇᕆᐊᖃᕐᓂᖏᓐᓂᒃ ᐃᒋᑕᐅᓯᒪᔪᓂᒃ ᐱᖁᑎᓂᒃ, ᑕᒪᒃᑯᐊᓗ ᐃᓚᖃᖅᑰᔨᓪᓗᑎᒃ ᑲᐴᑎᓂᒃ, ᓂᐱᓂᒃ, ᐊᐅᖕᒥᒃ ᐴᖏᓐᓂᓪᓗ ᐊᑐᖅᑕᐅᔪᓐᓇᖅᑐᓂᒃ ᓄᕙᒡᔪᐊᕐᓇᖅ-19−ᒧᓪᓗ ᖃᐅᔨᓴᖅᓯᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ.

ᐊᑕᐅᓯᖅ ᐅᖃᓪᓚᒃᑐᖅ ᐅᖃᕐᖢᓂ ᐊᑦᑕᕐᓇᕋᔭᕐᓂᖓᓂᒃ ᓄᑕᖅᑲᑦ ᓇᓂᓯᒃᐸᑕ ᐊᒃᑕᕐᕕᖕᒥᑦ ᐊᑐᕐᓗᒋᓪᓗ “ᑲᐱᖃᑦᑕᐅᑎᑲᑕᒡᓗᑎᑦ.”

ᐊᓯᖏᑦ ᐅᖃᓚᐅᕐᒥᔪᑦ ᐃᓚᖏᑦ ᐴᖅᓯᒪᔪᑦ ᐃᓱᓕᕝᕕᒃᓴᖓᑕ ᐅᓪᓗᖓᓄᑦ ᑎᑭᐅᑎᓚᐅᙱᒻᒪᑕ ᐃᓱᒪᓪᓗᑎᒡᓗ ᖃᓄᐃᒻᒪᑦ ᐃᒋᑕᐅᓚᐅᕐᒪᖔᑕ.

ᓄᓇᑦᓯᐊᖅ ᐱᕙᓪᓕᐊᓕᕆᔨᒃᑯᑦ ᐊᐱᕆᓚᐅᖅᑐᑦ ᑭᒡᒐᖅᑐᐃᔨᓂᒃ ᐅᖓᕙ ᑐᓛᑕᕕᒃ ᐋᓐᓂᐊᕕᖓᓂ ᑭᓱᓪᓚᑦᑖᓂᒃ ᐃᒋᑕᐅᔪᖃᓚᐅᕐᒪᖔᑦ, ᐊᔪᕐᓇᕋᔭᙱᒻᒪᖔᑦ ᐃᓄᖕᓄᑦ ᐋᓐᓂᕐᓗᑎᒃ, ᖃᓄᐃᒻᒪᓪᓗ ᓈᒪᔪᑦ ᐱᖁᑎᑦ ᐃᓚᓕᐅᔾᔭᐅᓚᐅᕐᒪᖔᑕ ᑐᙵᕕᖏᓐᓂ.

ᐋᓐᓂᐊᕕᖕᒥ ᐊᐅᓚᑦᑎᔨᑦ ᑐᓴᖅᑎᑕᐅᓚᐅᖅᐳᑦ ᖃᓄᐃᓕᖓᓂᖓᓂᒃ ᐋᒡᒌᓯ 5-ᒥ ᐅᓪᓛᒃᑯᑦ, ᓈᑕᓕ ᐳᐊᕆᐊ, ᑐᓴᐅᒪᔪᓕᕆᔨᒃᑯᓐᓄᑦ ᐅᖃᐅᔾᔪᐃᔨᒻᒪᕆᒃ ᐋᓐᓂᐊᕕᖕᒥ, ᐃᑭᐊᕐᕕᒃᑯᑦ ᓄᓇᑦᓯᐊᖅ ᐱᕙᓪᓕᐊᔪᖏᓐᓄᑦ ᐅᖃᖅᖢᓂ.

“ᑖᓐᓇ ᑐᑭᓯᒋᐊᕈᑎ ᖃᐅᔨᔭᐅᑐᐊᕐᒪᑦ, ᐱᓕᕆᕝᕕᒃ ᐊᐅᓪᓚᑎᑦᑎᓚᐅᖅᑐᖅ ᐱᓕᕆᔾᔪᑎᓄᑦ ᐱᔨᑦᑎᕋᖅᑎᓂᑦ ᐊᑦᑕᕐᓇᖏᑦᑐᒥᑦ ᐃᒋᐅᖅᑲᐃᓂᕐᒥᑦ ᐱᖁᑎᓂᑦ ᐅᓪᓛᑉ ᕿᑎᐊᓂ,” ᐅᖃᖅᑐᖅ, ᐃᓚᓯᓂᕐᒥᑦ ᐊᑦᑕᑯᓂᑦ ᓅᑕᐅᓚᐅᖅᑐᖅ ᐊᒃᑕᕐᕕᖕᒧᑦ.

ᐳᐊᕆᐊ ᐱᑎᑦᑎᓚᐅᙱᑦᑐᑦ ᑎᑎᕋᖅᓯᒪᔪᓂᒃ ᑭᓱᓂᒃ ᐃᓗᐊᖅᓴᐃᓂᕐᒧᑦ ᐱᖁᑎᓂᒃ ᐃᒋᑕᐅᔪᖃᓚᐅᕐᒪᖔᑦ ᑭᓯᐊᓂ ᐅᖃᖅᖢᓂ ᑕᒪᒃᑯᐊ ᕿᑐᑦᑐᒐᐅᔭᐃᑦ ᐃᓗᓕᖃᕐᓂᖏᓐᓂᒃ “ᖁᐱᕐᕈᐃᔭᐃᔾᔪᑎᓂᒃ ᑎᒥᒥᙶᖅᑐᓂᒃ ᐃᒋᑕᒃᓴᐅᔪᓐᓃᖅᑐᓂᒃ, ᑕᒪᓐᓇᓗ ᖁᐊᖅᓵᕐᓇᖅᑐᒦᑎᑦᑎᓇᔭᙱᖦᖢᓂ ᐃᓄᖕᓂᒃ ᐊᕙᑎᒥᒡᓗ ᖁᐊᖅᓵᕐᓇᖅᑐᒦᑎᑦᑎᔪᓂᒃ,” ᐃᓚᓯᓪᓗᓂ ᑰᔾᔪᐊᑉ ᐋᓐᓂᐊᕕᓕᐊᕐᕕᖓᓂᒃ ᕿᒥᕐᕈᐊᒃᑲᓐᓂᕐᓂᖓᓂᒃ ᑲᔪᓯᓂᕆᕙᒃᑕᒥᓂᒃ ᑕᒪᓐᓇ ᖃᓄᐃᓐᓂᐊᓪᓚᓚᐅᖅᑎᓪᓗᒍ.

ᐅᖃᖅᖢᓂ ᑕᒪᒃᑯᐊ ᐃᒋᑕᐅᔪᑦ ᐃᓱᓕᓐᓂᕐᒪᑕ, ᐅᕝᕙᓘᓐᓃᑦ ᐴᖅᓯᒪᔪᑦ ᓱᓕ ᐃᓱᓕᓚᐅᙱᒻᒪᑕ ᑕᐃᒃᑯᐊ ᑭᓱᓕᒫᖏᑦ ᐋᓐᓂᐊᕐᕕᐅᔪᑦ ᐊᑐᖃᑦᑕᕈᓐᓃᕐᒪᑕ.

ᒪᓕᒃᖢᒋᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓄᓕᕆᔨᒃᑯᓪᓗ ᐊᒃᑕᑯᓄᑦ ᑐᑭᒧᐊᕈᑎᖏᑦ ᐱᑎᑕᐅᔪᑦ ᑯᐸᐃᖕᒥ ᒐᕙᒪᒃᑯᓐᓂ, ᓱᕈᖅᓯᒪᙱᑦᑐᑦ ᐋᓐᓂᐊᕕᖕᒥ ᐃᒋᑦᑐᑦ ᐃᒋᑕᐅᔪᓐᓇᖅᑐᑦ ᐊᒃᑕᕐᕕᖕᒧᑦ.

ᓄᓇᑦᓯᐊᖅ ᐱᕙᓪᓕᐊᔪᑦ ᖃᐅᔨᒋᐊᓚᐅᖅᑐᑦ ᑰᔾᔪᐊᑉ ᓄᓇᖓᓂ ᐊᒃᑕᕐᕕᖕᒧᑦ ᐊᐱᕆᓪᓗᑎᒃ ᐱᑕᖃᕐᒪᖔᑦ Hᐋᒻᒪᓚᒃᑯᑦ ᒪᓕᒐᒃᓴᖏᓐᓂ ᐃᒋᑦᑎᓂᕐᒧᑦ ᐋᓐᓂᐊᕕᓯᐅᑎᓂᒃ ᑭᓯᐊᓂ ᑭᐅᔭᐅᑲᐅᑎᒋᓚᐅᙱᑦᑐᑦ.