ᖁᒡᓗᒃᑑᕐᒥ ᐊᓈᓇᐅᔪᖅ ᐱᓱᒃᑐᖅ ᐊᖓᔮᖅᑐᓂᒃ ᐊᖅᑯᖃᑦᑕᖅᑐᓂ ᓄᖅᑲᖅᑎᑦᑎᓇᓱᒃᖢᓂ

ᑯᕆᔅᑏᓐ ᑯᓕᒃᑕᓇ ᐊᑐᕐᑐᖅ ᐆᒥᖓ ᐊᔾᔨᙳᐊᕐᒥ, ᑭᖑᓪᓕᖅᐹᖅ ᐸᓂᖓᑕ ᐋᓐᔨᓚ ᕉᔅ ᐊᔾᔨᓕᐅᕐᓂᑯᖓ ᐃᒻᒥᓂ ᐱᕐᕈᓗᐊᕿᓚᐅᙱᑎᓪᓗᒍ, ᓴᖅᑭᔮᕐᓗᓂ ᐊᑭᓐᓇᕐᒦᑦᑐᓂᒃ ᐊᒻᒪ ᕙᐃᔅᐳᒃᑯᑦ ᐃᖅᑲᐅᒪᖁᔨᓪᓗᓂ ᐱᓱᖕᓂᐊᕐᓂᕐᒥᓂᒃ ᖁᒡᓗᒃᑑᕐᒥ ᓯᑎᐱᕆ 13-ᖑᑎᓪᓗᒍ. (ᐊᔾᔨᙳᐊᖅ ᐅᕙᙵᑦ ᑯᕆᔅᑏᓐ ᑯᓕᒃᑕᓇ)

For English version, see ‘I miss her so much’: Kugluktuk mom plans walk to honour daughter, fight impaired driving

ᐊᕐᕌᒍᙳᕌᖓ ᔪᓚᐃ 21-ᒥ, ᑯᕆᔅᑏᓐ ᑯᓕᒃᑕᓇ ᖁᕕᐊᓲᑎᖃᖃᑦᑕᕐᑐᖅ.

ᐅᐃᑖᕐᕕᒋᓚᐅᕐᓯᒪᔭᖓ ᐊᐃᑉᐸᖓᓄᑦ ᑖᓂᐅᓪᒧᑦ, ᐊᒻᒪᓗ ᐃᕐᓂᖓ ᐊᖓᔪᒃᖠᖅᐹᖅ ᐹᑎ ᐃᓅᓂᑰᓪᓗᓂ ᐊᒻᒪ ᐱᖃᓐᓇᖓᑕ ᓇᐃᑏᓐ ᒪᒃᒪᓇᒥ ᓇᓪᓕᐅᑎᕝᕕᒋᓪᓗᓂᐅᒃ.

“ᑕᐃᒪᓕ ᖁᕕᐊᓲᑎᖃᕐᓇᑦᑎᐊᕐᑐᖅ,” ᑯᓕᒃᑕᓇ ᐅᖃᕐᑐᖅ.

ᔪᓚᐃ 2013-ᒥ, ᐃᓕᖁᓯᕆᓪᓗᓂᐅᒃ, ᐃᓱᒪᒃᓴᕐᓯᐅᕈᑎᖃᕐᑐᖅ ᐅᓪᓗᒐᓴᒻᒪᕆᖕᓂ ᓂᕿᓕᐊᕆᓂᐊᖅᑕᖏᓐᓂᒃ ᑑᑭᒥ ᐊᒻᒪ ᕼᐋᒻ. ᑭᓯᐊᓂᓕ ᑕᕝᕙᓂ ᖁᕕᐊᓲᑎᖃᑲᑕᖕᓂᐊᕐᓂᐅᑉ ᐅᓪᓛᖓᓂ 8:00-ᒥ ᑐᐹᕐᑕᐅᓚᐅᕐᓯᒪᔪᖅ ᐅᖄᓚᐅᑎᒧᑦ ᐃᓅᓯᖓᓗ ᐊᓯᙳᖅᖢᓂ.

“ᕼᐊᐃ ᑯᕆᔅᑏᓐ, ᐸᓃᑦ ᐱᕐᕈᓗᐊᕿᖅᑰᕐᒪᓐ ᓄᓇᓯᐅᑏ ᐊᑐᕐᖢᓂᐅᒃ,” ᑯᓕᒃᑕᓇᐅᑉ ᐱᖃᓐᓇᕆᔭᖓᑦᑕᐅᖅ ᐅᖃᖅᖢᓂ ᑖᔅᓱᒧᖓ.

ᐅᖄᓚᐅᑎ ᐃᓕᑲᐅᑎᒋᓪᓗᓂᐅᒃ ᐊᒻᒪᓗ ᓴᓂᓕᕐᓯᑦᑎᐊᖓᑕ ᓄᓇᓯᐅᑎᖓ ᐊᑐᖅᖢᓂᐅᑦ ᖁᒡᓗᖅᑑᑉ ᒥᑦᑕᕐᕕᐅᑉ ᖃᓂᒋᔭᖓᓄᙵᐅᓪᓗᓂ ᑖᓐᓇ ᐊᖓᔪᒃᖠᖅᐹᖁᑎᖓ, ᐋᓐᔨᓚ ᕉᔅ ᑯᓕᒃᑕᓇ ᐱᕐᕈᓗᐊᕿᕝᕕᒋᔭᖓᓄᑦ ᐊᖅᑯᑎᐅᑉ ᓴᓂᑦᑎᐊᖓᓂ ᐱᖃᑎᖃᖅᖢᓂ ᑎᓴᒪᓂ ᐱᖃᓐᓇᕆᔭᖏᓐᓂ.

ᐋᓐᔨᓚ ᐋᖓᔮᓚᐅᕐᓯᒪᒻᒪ ᑕᐃᒪᐃᑎᓪᓗᒍ.

ᑕᒪᕐᒥ ᑕᓪᓕᒪᑦ ᐋᓐᓂᐊᕐᕕᓕᐊᕈᔾᔭᐅᓚᐅᕐᑐᑦ. ᐅᓄᕈᓘᔭᒻᒪᕆᒃᑐᑦ ᖁᒡᓗᖅᑑᕐᒥᐅᑕᑦ ᑖᔅᓱᒪ ᓯᓚᑖᓂ ᐅᑕᖅᑭᓕᕐᑐᑦ.

ᐃᑲᕐᕋᑦ ᐱᖓᓱᑦ ᐊᓂᒍᖅᑎᓪᓗᒋᑦ ᐸᓖᓯᒥ ᐅᐸᒃᑐᖃᖅᖢᓂ ᑯᓕᒃᑕᓇᒧᑦ.

“ᒪᒥᐊᓇᓪᓛᓗᒃ,” ᐅᖃᕐᑐᖅ ᓂᐱᑭᖢᓂ.

ᑯᓕᒃᑕᓇ ᕿᐊᓯᓪᓗᓂ. ᓄᐊᖓ ᑭᖑᓂᐊᒍᑦ ᐅᖃᓕᓚᐅᕐᓯᒪᔪᖅ “ᑐᓴᓚᐅᕐᓯᒪᓂᖓᓂ ᐊᕐᓇᕐᕕᐊ ᐅᖓᓯᑲᓪᓚᒃᑐᒦᖢᓂ.”

ᐋᓐᔨᓚ ᕉᔅ ᐃᓅᔪᓐᓃᖅᑐᑑᓚᐅᕐᑐᖅ ᐱᖃᑎᒋᔭᖏᓐᓂ ᐋᓐᓂᕐᑕᖏᓐᓄᑦ. ᐊᕐᕌᒍᖃᓚᐅᕐᑐᖅ 22-ᓂ.

ᐊᕐᕌᒍᑦ 12 ᐊᓂᒍᕐᑎᓪᓗᒋᑦ, ᑯᓕᒃᑕᓇ ᐱᓱᓚᐅᕐᓯᒪᔪᖅ ᓯᑎᐱᕆ 13-ᒥ ᐃᖅᑲᐅᒪᓪᓗᓂᐅᒃ ᐸᓂᓂ. ᑕᕝᕙᓂ ᐅᓪᓗᕐᒥ ᐸᓂᖓ ᐋᓐᔨᓚ ᕉᔅ 35-ᓂ ᐊᕐᕌᒍᖃᓕᕋᔭᖅᑐᖅ.

ᐱᔾᔪᑎᖃᓗᐊᓚᐅᕐᑐᖅ ᐱᓱᖕᓂᖓ ᐊᓈᓇᒋᔭᐅᔪᑦ ᐱᐅᒃᓴᙱᓐᓂᕋᖅᖢᒋᑦ ᐋᖓᔮᖅᑐᓂᒃ ᐊᖁᖃᑦᑕᖅᑐᓂᒃ.

ᐱᓇᓱᐊᕈᓯᐅᓚᐅᕐᑐᒥ ᑯᓕᒃᑕᓇ ᐊᔾᔭᕐᓯᓚᐅᕐᑐᖅ ᐱᕈᕐᓯᐊᓂ ᑕᕝᕗᖓ ᓴᕕᕋᔭᖕᒥ ᓴᓇᓯᒪᔪᒧᑦ ᐃᖅᑲᐅᒪᔾᔪᑎᒧᑦ ᐊᖅᑯᑎᐅᑉ ᓴᓂᑦᑎᐊᖓᓂ ᒥᑦᑕᕐᕕᓕᐊᖅᑑ, ᐃᓱᒪᓪᓗᓂ ᐃᓄᐃᑦ ᓱᒃᑲᐃᒡᓕᖃᑦᑕᕆᐊᖃᕐᓂᖏᓐᓂ ᑖᓐᓇ ᓴᓂᖅᑯᑕᐅᓕᕌᖓᑦ.

ᐱᓱᓕᓚᐅᕐᑐᖅ ᐋᖓᔮᖅᑐᓂᒃ ᐊᖁᖃᑦᑕᕐᑐᑦ ᐅᓄᕐᓯᓗᐊᕐᓂᖏᓐᓂᒃ ᓄᓇᓕᖕᓂ.

ᐸᓖᓯᒃᑯᑦ ᐅᖃᓚᐅᕐᑐᑦ 7-ᓂ ᐋᖓᔮᖅᑐᓂᒃ ᐊᖅᑯᑦᑐᓂ ᓄᖅᑲᖅᑎᑦᑎᓯᒪᓂᖏᓐᓂᑦ ᐋᒐᓯᐅᑎᓪᓗᓂ — ᐅᓄᓛᖅ ᑕᖅᑭᕐᒥ ᐊᕐᕌᒍᓂ 7-ᓂ ᑕᕝᕙᓂ ᓄᓇᓕᖕᓂ ᐃᓄᓕᖕᒥ 1,382, ᐅᖃᕐᑐᖅ ᒪᒃᒪᓇᒥ, ᕼᐋᒻᒪᓚᒃᑯᓐᓄᑦ ᑲᑎᒪᔨᐅᖃᑕᐅᔪᖅ.

ᐊᒻᒪᓗ ᐅᓄᒃᑲᓐᓂᕐᑐᑦ ᐊᖅᑯᑦᑐᑦ ᓄᖅᑲᖅᑎᑕᐅᓯᒪᙱᑦᑐᑦ, ᐅᖃᒃᑲᓐᓂᕐᑐᖅ.

ᐋᓐᔨᓚ ᕉᔅ ᐃᓕᓐᓂᐊᖅᑐᓂ ᐊᔪᙱᓛᖑᓚᐅᕐᓯᒪᔪᖅ, “ᐃᓄᑦᑎᐊᕚᓗᒃ” ᓇᒡᓕᒋᔭᐅᓪᓗᓂ ᑭᒃᑯᓕᒫᓄᑦ, ᐊᒻᒪᓗ ᐋᖓᔮᓚᐅᕐᓯᒪᙱᖢᓂ ᐊᖁᓐᓂᐊᖅᖢᓂ ᑭᓯᐊᓂ ᑕᕝᕙᓂ ᐅᓐᓄᖕᒥ.

“ᓯᕗᓪᓕᖅᐹᒥ ᐋᖓᔮᖅᖢᓂ ᐊᖁᓚᐅᕐᓯᒪᔪᖅ ᑕᐃᒪᐃᖢᓂᓗ,” ᑯᓕᒃᑕᓇ ᐅᖃᕐᑐᖅ.

ᐋᓐᓂᕆᓂᕐᐹᕆᓚᐅᕐᓯᒪᔭᖓᓂ ᑭᖑᓂᐊᒍᑦ ᐃᓄᖕᓄᑦ ᐅᖃᐅᔾᔭᐅᑲᑕᓕᕐᒪᑦ ᐅᔾᔨᕈᓱᓚᐅᕐᓯᒪᓂᕋᖅᖢᓂ ᐋᓐᔨᓚ ᕉᔅ ᐋᖓᔮᖂᔨᓚᐅᕐᓯᒪᓂᖓᓂ ᓄᓇᓯᐅᑎᒧᑦ ᐃᑭᓕᕐᑎᓪᓗᒍ. ᑭᓯᐊᓂᓕ ᑖᔅᓱᒧᖓ ᐸᓖᓯᓄᓪᓗ ᐅᖃᓚᐅᕐᓯᒪᙱᑦᑐᑦ.

ᒫᓐᓇᓕ, ᑕᑯᔭᕌᖓᒥ ᐊᖅᑯᑦᑐᒥ ᐋᖓᔮᖅᑐᒥ ᐸᓖᓯᓄᑦ ᐅᖃᐅᓯᕆᖃᑦᑕᓕᖅᑕᖏᑦ. “ᐃᓅᓯᖏᓐᓂ ᓴᐳᔾᔨᓯᒪᑐᐃᓐᓇᕆᐊᖃᕐᓇᕐᑐᖅ,” ᑯᓕᒃᑕᓇ ᐅᖃᕐᑐᖅ.

ᔪᓚᐃ 21-ᖑᓕᕌᖓᑦ ᑯᕆᔅᑏᓐ ᐃᓚᒌ ᓂᕆᕙᒃᑐᑦ ᑑᑭᒥ ᐊᒻᒪ ᕼᐋᒻ ᖁᕕᐊᓲᑎᒋᓪᓗᒍ ᑲᑎᑎᑕᐅᕝᕕᕕᓂᖓ ᐊᒻᒪ ᓇᓪᓕᐅᑎᔪᑦ. ᑭᓯᐊᓂᓕ ᓄᖃᑲᐃᓐᓇᖅᐸᒃᑐᑦ ᐃᓱᒪᒋᓪᓗᒍ ᐊᖓᔪᒃᖠᖅᐹᖁᑎᒋᓚᐅᕐᑕᖓ. ᕿᐊᖏᓐᓇᐅᔭᖅᑐᑦ.

ᐊᒃᓱᐊᓘᙱᑦᑐ ᑭᓯᐊᓂ. ᑕᐃᒪᓐᓇ ᐋᓐᔨᓚ ᕉᔅ ᑕᑯᔪᒪᒐᔭᓚᐅᙱᒻᒪᑦ.

“ᑕᕝᕙᓃᑉᐸᓪᓕ ᐅᕙᑦᑎᓐᓂ ᐃᕿᑦᑎᓇᔭᕐᑐᖅ, ᖁᕝᕙᖅᐹᓪᓕᖅᑎᑦᑎᓗᓂᓗ,” ᑯᓕᒃᑕᓇ ᐅᖃᕐᑐᖅ.

“ᐊᒃᓱᐊᓗ ᑭᖑᓂᖃᕆᔭᕋ. ᑭᒃᑯᓕᒫᓪᓗ.”