ᓄᑖᖅ ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᒃᓴᖅ ᒥᑦᑎᒪᑕᓕᒃᒥ ᐊᑐᐃᓐᓇᐅᓕᕐᓂᐊᖅᑐᖅ 2024 ᐊᐅᔭᖓᓂᒃ

For English version, see New men’s shelter in Pond Inlet could be ready by summer 2024

ᒥᑦᑎᒪᑕᓕᒃ ᓄᑖᒥ ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᒃᑖᓐᓂᐊᓯᔪᑦ.

ᒐᕙᒪᑐᖃᒃᑯᑦ ᑐᓴᖅᑎᑦᑎᔪᑦ ᑐᓴᒐᒃᓴᓕᐅᖅᖢᑎᒃ ᕕᕝᕗᐊᕆ 14 ᑐᓂᓯᓂᐊᕐᓂᕋᖅᖢᑎᒃ $2 ᒥᓕᐊᓐ ᑖᓚᐃᑦ ᐅᖓᑖᓂ ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᒃᓴᒧᑦ ᐊᒻᒪᓗ ᐃᑲᔪᕈᑎᒃᓴᓂᒃ ᒪᒥᓴᕐᕕᐅᓂᐊᖅᑐᒥᒃ ᑕᕝᕙᓂ ᕼᐋᒻᒪᓚᒥ. ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᖃᐅᓯᖃᓚᐅᕐᓯᒪᔪᑦ ᑮᓇᐅᔭᓂᒃ ᒪᒥᓴᕐᕕᒃᓴᒧᑦ ᔭᓄᐊᕆᐅᑎᓪᓗᒍ.

“ᐅᓇ ᐱᐅᓪᓚᕆᖕᓂᐊᕐᑐᖅ,” ᐅᖃᕐᑐᖅ ᕼᐋᒻᒪᓚᒃᑯᓐᓄᑦ ᐊᐅᓚᑦᑎᔨ ᑕᐃᕕᑦ ᓯᑖᒃᓕ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

“ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᒃᑕᖃᕆᐊᖃᕐᒪᑦ.”

ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᒃ ᓴᓇᔭᐅᓂᐊᕐᑐᖅ ᐃᒡᓗᒥ ᓴᓇᓯᒪᕙᒌᖅᑐᒥ ᒥᑦᑎᒪᑕᓕᒃᒥ. ᓄᑖᙳᕆᐊᖅᑕᐅᓂᐊᖅᖢᓂ ᐃᓚᖓᒍᑦ ᐊᒻᒪ ᓱᓪᓗᓕᕐᓱᖅᑕᐅᓗᓂ, ᐅᖅᑰᓴᐅᑎᓕᕆᔭᐅᓗᓂ, ᐃᒐᓛᓕᕐᓱᖅᑕᐅᓗᓂ, ᐃᒡᓘ ᖁᓕᐊ ᓴᓇᔭᐅᓗᓂ, ᐊᓇᕐᕕᖏᑦ ᐊᒻᒪ ᓂᕿᓕᐅᕐᕕᖓ, ᐅᖃᕐᓯᒪᓚᐅᕐᑐᖅ ᑐᓴᒐᒃᓴᓕᐊᕆᔭᐅᔪᑦ.

ᒫᓂᒃ $1.5 ᒥᓕᐊᓐ ᑖᓚᓂ ᐋᖅᑭᒃᓯᓯᒪᔪᑦ ᐊᖑᑎᓄᑦ ᐊᖏᕐᕋᖃᙱᑦᑐᒃᑯᕕᒃᓴᒧᑦ, ᑖᓐᓇᓗ ᐃᓂᒋᔭᐅᔪᓐᓇᕐᓗᓂ “ᐅᓗᕆᐊᓇᙱᓪᓗᓂ” ᐊᖑᑎᓄᑦ ᒪᒥᓴᕋᓱᒃᑐᓄᑦ. ᐃᓚᖃᕐᓂᐊᕐᒥᔪᖅ ᓄᓇᐃᓐᓇᕐᒧᑦ ᐊᐅᓪᓚᕈᔾᔨᖃᑦᑕᕐᓂᕐᒥᒃ ᐊᒻᒪᓗ ᐃᓅᓱᓕᕆᓂᕐᒥ ᐃᓐᓇᑐᖃᕐᓂ.

ᐃᓅᓯᓕᕆᓂᖅᑕᖃᖃᑦᑕᕐᓂᐊᕐᒥᔪᖅ ᑕᑯᔭᒃᓴᓕᕆᓂᒃᑯᑦ, ᓯᑖᒃᓕ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑕᐃᒪᓐᓇ ᐃᓅᓯᓕᕆᔭᐅᔪᑦ ᐊᑕᐅᓯᑦᑕᐃᓐᓇᕐᒥ ᐃᓅᓯᓕᕆᔨᖃᖃᑦᑕᕐᓂᐊᕐᒪᑕ.

“ᐊᓯᐊᓂ ᐃᓅᓯᓕᕆᔨᖃᓕᕐᓗᓂ ᓈᒻᒪᙱᓕᐅᕈᑎᐅᔭᒻᒪᑦ. ᐃᓅᓰᑦ ᐅᖃᐅᓯᕆᒃᑲᓐᓂᕆᐊᖃᓕᕐᒥᓗᒍ ᓄᑖᓄᑦ ᐃᓅᓯᓕᕆᔨᓄᑦ,” ᓯᑖᒃᓕ ᐅᖃᕐᑐᖅ.

ᐊᖏᕐᕋᖃᙱᑦᑐᒃᑯᕕᒃ ᐃᒡᓗᒃᓴᖅ ᐊᐅᔭᖅ ᐅᒥᐊᕐᔪᐊᒃᑯᑦ ᑎᑭᓛᕐᑐᑦ ᐊᒻᒪᓗ ᓴᓇᔭᐅᓇᔭᖅᖢᓂ ᑕᖅᑭᓂᒃ 6-ᓂ 9-ᓄ.

ᐊᖏᕐᕋᖃᙱᑦᑐᒃᑯᕕᒃ 2024 ᐊᐅᔭᖓᓂ ᐊᑐᐃᓐᓇᐅᓕᓛᕐᑐᖅ, ᓯᑖᒃᓕ ᐅᖃᕐᑐᖅ.

ᒪᒥᓴᕐᕕᒃ ᐱᔨᑦᑎᕋᐅᑎᖃᕐᕕᐅᓂᐊᕐᑐᖅ ᐃᑲᔪᕈᑎᒃᓴᓂᒃ ᐊᓈᓇᐅᓕᓵᖅᑐᓄᑦ ᒪᐅᓇ ᓂᕿᓕᐅᕐᓂᕐᒥᒃ ᐃᓕᓐᓂᐊᖅᑎᑕᐅᕙᒡᓗᑎᒃ, ᒥᕐᓱᕐᓂᖅᒥᒃ ᐊᒻᒪᓗ ᐃᓅᓯᓕᕆᔭᐅᕙᒡᓗᑎᒃ ᐊᒻᒪ ᐃᓐᓇᑐᖃᕐᓂᒃ ᐱᓕᕆᖃᑎᖃᕐᐸᒡᓗᑎᒃ.

ᐅᓇ ᐊᕐᓇᓄᑦ ᕿᒫᕝᕕᐅᑉ ᖃᓂᒋᔭᖓᓃᑦᑐᖅ ᐊᒻᒪᓗ ᐊᑐᐃᓐᓇᐅᓕᕐᓂᐊᖅᖢᓂ ᐅᓪᓗᑦ 60 ᓇᓪᓕᕐᐸᑕ, ᓯᑖᒃᓕ ᐅᖃᕐᒥᔪᖅ.