ᒥᐊᓗ ᐲᖅᑕᐅᔪᖅ ᒐᕙᒪᒃᑯᑦ-ᓄᓇᖃᖅᑳᖅᑐᓄᓪᓗ ᐱᓕᕆᐊᓄᑦ ᒥᓂᔅᑕᐅᓂᖓᓂᒃ

ᒥᓂᔅᑕᐃᑦ ᐊᓯᐊᓅᖅᑕᐅᑲᑕᖕᓂᖏᑦ ᐊᒃᑐᐃᓂᐊᖅᑐᒥ ᓄᓇᕗᒥᑦ ᐊᒻᒪ ᓄᓇᕕᒃᒥ, ᒫᒃ ᒥᐊᓗ ᒥᓂᔅᑕᐅᔪᓐᓃᖅᑐᖅ ᒐᕙᒪᒃᑯᓐᓄᑦ-ᓄᓇᖃᖅᑳᖅᑐᓄᓪᓗ ᐱᓕᕆᐊᓂᒃ ᒥᓂᔅᑕᒐᓚᐃᑦ ᐊᓯᐊᓅᖅᑕᐅᑲᑕᒃᑎᓪᓗᒋᑦ ᔪᓚᐃ 26ᒥ ᐆᒧᖓ ᑲᓇᑕᐅᑉ ᐊᖓᔪᖅᑳᕐᔪᐊᖓᓄᑦ ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑ.

ᑭᒪᒡᓗᓂᐅᒃ ᑲᒪᒋᓯᒪᔭᖓ ᐱᒋᐊᖅᖢᓂ ᐅᒃᑑᐱᕆ 2021ᒥ, ᒥᐊᓗ ᒥᓂᔅᑕᐅᖏᓐᓇᕐᓂᐊᖅᑐᖅ ᐅᑯᓄᖓ ᑲᓇᑕᒧᐊᖅᐸᓪᓕᐊᔪᓕᕆᓂᕐᒧᑦ ᒥᓂᔅᑕᐅᓕᕐᓗᓂ.

ᒥᓂᔅᑕᐅᓂᐊᓕᕐᑐᕐᓕ ᒐᕙᒪᒃᑯᓐᓄᑦ-ᓄᓇᖃᖅᑳᖅᑐᓄᓪᓗ ᐱᓕᕆᐊᓂᒃ ᐅᓇ ᒋᐅᕆ ᐊᓇᓐᑕᓴᖓᕇ, ᑐᕌᑐᒥ ᒪᓕᒐᓕᐅᖅᑎᐅᔪᖅ.

ᓯᕗᓪᓕᖅᐹᒥ ᓂᕈᐊᕆᔭᐅᓚᐅᕐᓯᒪᓪᓗᓂ 2015ᒥ ᐃᓚᒋᔭᐅᓪᓗᓂ ᑐᕉᑑ ᒐᕙᒪᖏᓐᓄᑦ, ᐊᓇᓐᑕᓴᙵᕇ ᑲᑎᒪᔨᕋᓛᓂ ᑲᑎᒪᔨᐅᖃᑕᐅᓯᒪᔪᖅ ᐊᒻᒪ ᐱᓕᕆᐊᖃᓵᓚᐅᖅᖢᓂ ᒪᓕᒐᓕᕆᕝᕕᒃᒧᑦ ᑎᑎᕋᖅᑎᐅᓪᓗᓂ ᒪᓕᒐᓕᕆᔨᒧᑦ ᒥᓂᔅᑕᒧᑦ.

ᐊᓇᓐᑕᓴᙵᕇ ᑲᓇᑕᒧᐊᓚᐅᕐᓯᒪᔪᖅ ᓱᕆ ᓛᓐᑲᒥ 1983ᒥ. ᐃᖅᑲᓇᐃᔭᕐᓯᒪᔪᖅ ᓗᐊᐃᔭᐅᓪᓗᓂ ᐊᒻᒪ ᑭᒃᑯᓕᒫᓄᑦ ᐱᔪᓐᓇᐅᑎᓕᕆᓂᕐᒧᑦ ᐃᑲᔪᖅᑐᐃᔨᐅᓯᒪᓪᓗᓂ ᐊᒻᒪᓗ ᑐᕌᓐᑐ ᓯᑖᒧᑦ (Toronto Star) ᑎᑎᕋᖅᑎᐅᖃᑕᐅᕙᒃᖢᓂ.

“ᐃᓱᒪᔪᖓᓕ ᖃᓄᐃᓕᐅᕈᓐᓇᕋᓱᒋᓪᓗᖓ ᐊᔾᔨᒌᙱᑦᑑᑎᓂ ᐊᒻᒪᓗ ᓲᖃᐃᒻᒪ ᖃᐅᔨᑲᓐᓂᕆᐊᖃᕐᓂᐊᖅᖢᖓ ᑕᒪᑐᒥᖓ ᐊᒻᒪᓗ ᐱᓇᓱᐊᕈᓯᕐᓂ ᐊᒡᒋᖅᑐᓂᒃ ᐱᓕᕆᔨᒻᒪᕆᑦᑎᓐᓂ ᐱᓕᕆᖃᑎᖃᑲᑕᖕᓂᐊᖅᖢᖓ ᐊᒻᒪᓗ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓂᒃ ᓄᓇᓕᖕᓂᓪᓗ ᑲᓇᑕᒥ ᑲᑎᖃᑎᖃᖅᐸᒡᓗᖓ,” ᐅᖃᓚᐅᕐᑐᖅ ᐊᖏᖅᑎᑕᐅᕌᓂᒃᑎᓪᓗᒍ.

7 ᒪᓕᒐᓕᕆᔩᑦ ᒥᓂᔅᑕᐅᕝᕕᓖᑦ ᐊᒃᑐᖅᑕᐅᓚᐅᙱᑦᑐᑦ ᐊᓯᐊᓅᖅᑕᐅᑲᑕᒃᑐᓂᒃ, ᐃᓚᒋᔭᐅᓪᓗᓂ ᒥᓂᔅᑕ ᐅᑭᐅᕐᑕᖅᑐᕐᒥ ᐱᓕᕆᐊᒃᓴᓄᑦ ᑖᓂᐅᓪ ᕚᓐᑐᓪ ᐊᒻᒪᓗ ᒥᓂᔅᑕ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓄᑦ ᐹᑎ ᕼᐊᐃᑐ, ᑖᒃᑯᐊ ᓱᓕ ᐱᓕᕆᐊᖏᓐᓃᑦᑑᒃ.

ᒥᓂᔅᑕᐅᓂᖓᓂᒃ ᒐᕙᒪᒃᑯᓐᓄᑦ-ᓄᓇᖃᖅᑳᖅᑐᓄᓪᓗ ᐱᓕᕆᐊᓄᑦ ᐊᒻᒪᓗ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓂᒃ ᒥᓂᔅᑕᐅᓪᓗᓂ ᒥᐊᓗ ᐃᓄᐃᑦ ᓄᓇᖏᓐᓅᖃᑦᑕᓚᐅᕐᑐᖅ.

ᐅᐱᕐᖔᖑᓚᐅᕐᑐᖅ ᑰᔾᔪᐊᖅᒧᐊᓚᐅᕐᓯᒪᓪᓗᓂ ᐊᒻᒪᓗ ᓇᐃᓐᒧᑦ, ᓄᓇᑦᓯᐊᕗᑦᒥ.

ᐊᖏᖅᑎᑕᐅᕌᓂᒃᑎᓪᓗᒋᑦ, ᒥᐊᓗ ᑐᓴᒐᒃᓴᓕᐅᖅᑎᓄᑦ ᐅᖃᓚᐅᕐᑐᖅ ᖁᕕᐊᓱᓚᐅᙱᓐᓂᕋᖅᖢᓂ ᐱᓕᕆᐊᖓᓂ ᕿᒪᐃᔭᕆᐊᖃᕐᓂᖓᓂᒃ ᑭᓯᐊᓂᓕ ᖁᔭᓕᓂᕋᓚᐅᕐᑐᖅ ᖃᓄᐃᓕᐅᖃᑎᖃᕐᓯᒪᓂᖓᓂᒃ.

“ᐱᓇᓱᒍᓐᓇᓕᓚᐅᕐᑐᖓ ᓄᓇᖃᖅᑳᖅᑐᑦ ᐃᓱᒫᓘᑎᒋᕙᒃᑕᖏᓐᓂᒃ ᐱᓕᕆᐊᖃᕋᓱᖕᓂᕐᒥᒃ ᑕᐃᒪᓐᓇᓗ ᐱᓕᕆᔪᓐᓇᓗᐊᓚᐅᙱᑦᑐᖓ ᐊᕐᕌᒍᑦ ᑎᓴᒪᑦ ᓯᕗᓂᐊᓂᒃ.” ᐅᖃᕐᑐᖅ.

ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᐅᖄᓚᐅᑎᒃᑯᑦ ᐅᓇ ᒥᐊᓗ “ᐃᓱᒪᒋᔭᐅᙱᓐᓇᕐᓂᐊᖅᑐᖅ.”

ᐅᖃᓚᐅᕐᒥᔪᖅ ᐱᓕᕆᖃᑎᖃᖃᑦᑕᓚᐅᕐᓂᖓᓂᒃ ᓄᓇᕗᑦ ᑐᙵᕕᒃᑯᓐᓂᒃ ᐊᒻᒪᓗ ᐃᖅᑲᐅᒪᓪᓗᓂᐅᒃ ᓯᕗᓕᐅᕐᑎᐅᓚᐅᕐᓂᖓ ᐃᓄᐃᑦ-ᒐᕙᒪᒃᑯᓪᓗ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᓂᒃ.

ᐅᖃᐅᓯᖃᓚᐅᕐᒥᔪᖅ ᐊᓇᓐᑕᓴᙵᕇᑉ ᐱᓕᕆᐊᕆᓯᒪᔭᖏᓐᓂᒃ ᑭᒃᑯᓕᒫᓄᑦ ᐱᔪᓐᓇᐅᑎᓂᒃ ᐃᑲᔪᖅᑎᐅᕙᖕᓂᖓᓂᒃ ᐊᒻᒪᓗ ᒪᓕᒐᓕᕆᕕᒡᔪᐊᕐᒥ ᑎᑎᕋᖅᑎᐅᓂᖓᓂᒃ, ᐊᒻᒪᓗ ᑕᑯᓛᕐᓂᐊᕐᓂᖓᓂᒃ ᓂᕆᐅᑐᐃᓐᓇᕐᓂᕋᖅᖢᓂ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑐᙵᓱᒃᑎᑦᑎᔾᔪᑎᒥ ᑎᑎᕋᕐᓂᐊᖅᖢᑎᒃ ᑖᔅᓱᒧᖓ.

“ᐊᐱᕆᓛᕐᑕᕗᑦ ᑲᑎᒪᖃᑎᖃᕈᒪᓗᑕ ᐅᖃᐅᓯᖃᕈᓐᓇᕐᓂᐊᕋᑦᑕ ᐱᓕᕆᐊᕆᓯᒪᔭᑦᑎᓐᓂᒃ, ᑕᐃᒪᑐᖅ ᖃᓂᑦᑐᒃᑰᕈᓐᓇᕐᓂᐊᕐᐳᖅ,” ᐅᖃᕐᑐᖅ.

“ᐅᓇ ᑐᙵᓴᐅᑎᐅᕙᒃᑐᖅ ᒐᕙᒪᑐᖃᒃᑯᓐᓄᑦ ᒥᓂᔅᑕᓄᑦ ᓄᓇᕗᒥᑦ ᐳᓛᖁᓪᓗᑎᒍᑦ, ᑕᐃᒪᓕ ᑖᓐᓇ ᑕᐃᒪᐃᓕᐅᕐᓂᐊᖅᑕᕗᑦᑕᐅᖅ.”

ᑰᑦᑎᖅ ᐅᖃᓚᐅᕐᒥᔪᖅ ᑲᑎᖃᑎᖃᓚᐅᕐᓂᖓᓂᒃ ᓄᑖᖅ ᑎᒃᑯᐊᖅᑕᐅᓵᕐᓂᑯ ᒪᓕᒐᓕᕆᓂᕐᒧᑦ ᒥᓂᔅᑕᐅᓕᕐᑐᒥᒃ ᐊᒻᒪᓗ ᒪᓕᒐᓕᕆᔨᕐᔪᐊᕐᒥᒃ ᐋᕆᕝ ᕕᕋᓂ, ᒪᓕᒐᓕᕆᕕᒡᔪᐊᒥᑦ ᑎᑎᕋᖅᑎᐅᓱᖓᖅᑎᓪᓗᒍ.

ᓂᕆᐅᖕᓂᕋᓚᐅᕐᑐᖅ ᐱᓕᕆᖃᑎᒋᖃᑦᑕᕐᓂᐊᕐᓂᖓᓂᒃ ᓄᑖᒥ ᒥᓂᔅᑕᐅᕝᕕᒋᓕᖅᑕᖓᓂᒃ ᐱᓕᕆᐊᖃᓕᕐᑎᓪᓗᒍ.

ᕕᕋᓂ ᐃᓇᖏᕐᓯᔪᖅ ᑕᐃᕕᑦ ᓚᒪᑎᒥ ᑖᓐᓇᓕ ᑐᕉᑑᑉ ᒥᓂᔅᑕᖏᓐᓂ ᐃᓚᐅᔪᓐᓃᑦᑎᐊᒻᒪᕆᖕᒪᑦ.

ᓄᓇᕗᑦ ᒪᓕᒐᓕᕆᔨᕐᔪᐊᖓ ᓘᕆ ᐃᓪᓚᐅᑦ ᐅᖃᐅᓯᖃᓚᐅᕐᒥᔪᖅ ᐅᕘᓇ ᐊᓐᑏᐲᑯᑦ ᓕᐳᕈᓂ ᕿᒥᕐᕈᐊᑲᑕᒃᑎᓪᓗᒋ ᒐᕙᒪᒃᑯᑦ ᖃᓄᐃᓕᐅᕐᓯᒪᔭᖏᓐᓂᒃ ᓄᓇᖃᖅᑳᖅᑐᓄᑦ ᐃᓱᒫᓘᑎᓂᒃ.

ᐃᓪᓚᐅᑦ ᐅᖃᓚᐅᕐᒥᔪᖅ, “ᐊᓇᓐᑕᓴᙵᕇ ᐊᖏᔪᕈᓗᖕᒥ ᐱᓕᕆᐊᒃᓴᖃᓕᒑᔪᖅ.”

“ᑕᑯᓯᒪᒐᒃᑯ ᐱᓇᓱᓪᓚᕆᖕᓂᖓ ᐊᒻᒪ ᒪᓕᒐᓕᕆᓂᕐᒥᒃ ᓄᓇᖃᖅᑳᖅᑐᓄᑦ ᐊᓪᓚᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᓄᑦ ᐱᔭᐅᓯᒪᔭᕆᐊᓕᖕᓂᒃ,” ᐅᖃᓚᐅᕐᑐᖅ.

ᐊᐱᑎᐱ—ᐸᐃ—ᔭᐃᒻᔅ—ᓄᓇᕕᒃ—ᐄᔭᐅᒧᑦ ᒪᓕᒐᓕᐅᖅᑎ ᓯᐊᓪᕕ ᐱᕉᐱ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᓯᒪᔪᓂᒃ ᐅᐃᕖᑐᑦ ᑖᒃᑯᐊ ᐱᓕᕆᖃᑎᖏᑦ, ᐸᓛᒃ ᑯᐸᑯᐊ (Bloc Québécois) ᖃᐅᔨᓇᓱᖕᓂᐊᖅᑐᑦ ᖃᓄᖅ ᒥᓂᔅᑕᐃ ᐊᓯᙳᖅᑎᑕᐅᑲᑕᖕᓂᖏᑦ ᐊᒃᑐᐃᓂᖃᕐᓂᐊᕐᒪᖔᑕ ᑯᐸᐃᒃᒥ.

“ᒥᓂᔅᑕᓂ ᖃᐅᔨᓴᕐᓂᐊᖅᑐᒍᑦ ᖃᓄᐃᓕᕐᒪᖔᑕ ᐊᒻᒪᓗ ᒐᕙᒪᒃᑯᓐᓂᒃ ᐱᓕᕆᐊᖏᑦᑎᒍᑦ,” ᐅᖃᕐᑐᖅ.

ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᓚᐅᕐᑐᑦ ᖃᐅᔨᑕᐅᑎᑦᑎᔪᓐᓇᕐᓂᖏᓐᓂᒃ ᓄᑖᓂᒃ ᒥᓂᔅᑕᓂᒃ ᐅᑯᓄᖓ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᓄᑦ.

ᒪᑭᕕᒃᑯᑦ ᑭᐅᓚᐅᙱᒻᒪᑕ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᑕᒪᑐᒧᖓ ᑐᓴᕐᕕᐊᓇᓱᒃᑎᓪᓗᒋᑦ.

ᐅᓄᕈᓘᔭᕐᑐᑦ ᒥᓂᔅᑕᖃᕐᕕᐅᔪᑦ ᐊᓯᙳᖅᑎᑕᐅᓚᐅᕐᒥᔪᑦ ᔪᓚᐃ 26ᒥ.

ᓵᓐ ᕗᕇᓱ ᒥᓂᔅᑕᙳᖅᖢᓂ ᐃᒡᓗᓕᕆᓂᕐᒧᑦ, ᓴᓇᕝᕕᒃᓴᓄᑦ ᐊᒻᒪ ᓄᓇᓕᖕᓄᑦ, ᐊᒻᒪᓗ ᑕᐃᐊᓐ ᓕᐳᑎᓕᐄ ᒥᓂᔅᑕᐅᓕᖅᖢᓂ ᐃᖃᓗᓕᕆᔨᒃᑯᓐᓄᑦ, ᑕᕆᐅᕐᒥᐅᑕᓕᕆᔨᒃᑯᓐᓄᓪᓗ ᐊᒻᒪᓗ ᑲᓇᑕᐅᑉ ᓯᒡᔭᒋᓐᓂᒃ ᓴᐳᓐᓂᐊᖅᑎᓄᑦ.

ᐊᓃᑕ ᐊᓈᓐ ᓴᐳᓐᓂᐊᖅᑎᓄᑦ ᒥᓂᔅᑕᐅᔪᓐᓃᓚᐅᕐᒥᔪᖅ ᐊᖓᔪᖅᑳᙳᖅᑎᑕᐅᓪᓗᓂ ᑮᓇᐅᔭᓕᕆᔨᒃᑯᑦ ᑲᑎᒪᔨᖏᓐᓂᒃ. ᐱᐊᓪ ᐱᓕᐅ ᑲᓇᑕᒥ ᓴᐳᓐᓂᐊᖅᑎᓄᑦ ᒥᓂᔅᑕᐅᓕᖅᖢᓂ.