ᒥᓂᔅᑕ ᑲᑉᐱᐊᓵᕆᕗᖅ ᑐᓂᓯᓂᐊᕐᓂᖓᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᐊᖑᔪᒥ ᐋᑐᕚᒧᑦ

For the English version of this story, please see Health minister threatens to turn Non-Insured Health Benefits program over to Ottawa.

ᓄᓇᕘᑉ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᐅᖃᖅᐳᖅ “ᐊᓯᐊᒎᕐᕕᒃᓴᖃᔾᔮᕈᓐᓃᕐᓂᖓᓂ” ᑭᓯᐊᓂ ᓄᓇᕗᒻᒥ ᑐᓂᓯᒃᑲᓐᓂᖁᔨᓂᕐᒥᑦ ᐊᓪᓚᕝᕕᓕᕆᓂᐅᔪᒥ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑕᐅᔪᒥ ᓇᓪᓕᐅᒃᑯᒫᖃᙱᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᖅ ᐱᓕᕆᐊᒃᓴᐅᔪᒥ ᑕᐅᑯᖓ ᒐᕙᒪᑐᖃᒃᑯᓐᓄᑦ ᐱᓕᕆᐊᒃᓴᐅᔪᖅ ᑕᒪᒃᑭᐅᒪᔪᒥ ᑮᓇᐅᔭᖃᖅᑎᑕᐅᙱᒃᑯᓂ ᐋᑐᕚᒥ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕ ᔮᓐ ᒪᐃᓐ ᑐᓂᓯᓚᐅᖅᐳᖅ ᓄᑖᙳᕆᐊᖅᑎᑕᐅᓂᐅᔪᒥ ᕕᕗᐊᕆ 22−ᒥ ᒪᓕᒐᓕᐅᕐᕕᖕᒥ ᓄᓇᕘᑉ ᐅᖃᓪᓚᖕᓂᕆᔭᖏᓐᓂ ᒐᕙᒪᑐᖃᒃᑯᓐᓄᑦ ᑮᓇᐅᔭᖃᖅᑎᑦᑎᓂᐅᔪᒥ ᓇᓪᓕᐅᒃᑯᒫᖃᙱᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᖅ ᐱᓕᕆᐊᒃᓴᐅᔪᒥ.

ᑕᐃᓐᓇ ᐱᓕᕆᐊᒃᓴᖅ, ᑮᓇᐅᔭᖃᖅᑎᑕᐅᔪᒥ ᒐᕙᒪᑐᖃᒃᑯᓐᓂ ᐊᒻᒪ ᐊᐅᓚᑕᐅᓪᓗᓂ ᓄᓇᕗᒻᒥ ᒐᕙᒪᒃᑯᓐᓄᑦ, ᐊᑭᓖᓲᖑᕗᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ-ᐸᖅᑭᓂᐅᔪᒥ ᐊᑭᖏᓐᓂ ᐊᑭᓕᖅᑕᐅᕙᙱᑦᑐᓂ ᓄᓇᕘᑉ ᓇᖕᒥᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ-ᐸᖅᑭᓂᐅᔪᒥ ᐱᓕᕆᐊᒃᓴᐅᔪᒥ. ᐃᓚᖃᖅᐳᑦ ᑕᐅᑐᖕᓂᕐᒧᑦ ᐊᒻᒪ ᑭᒍᑎᓕᕆᓂᕐᒧᑦ ᐸᖅᑭᔭᐅᓂᐅᔪᓂ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓅᓯᓕᕆᓂᕐᒥ, ᐃᓅᓕᓴᐅᑎᓄᑦ ᓱᓇᒃᑯᑖᓂ ᐊᒻᒪ ᐱᓕᕆᔾᔪᑎᓂ, ᐃᓅᓕᓴᐅᑎᓄᑦ ᐊᒻᒪ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒧᑦ.

ᑮᓇᐅᔭᖃᖅᑎᑕᐅᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ-ᐃᑲᔫᓯᐊᖑᔪᒥ ᑕᒪᒃᑭᓗᒃᑖᖅ ᑲᒪᒋᔭᐅᓂᐅᕗᖅ ᒐᕙᒪᑐᖃᒃᑯᓐᓂ, ᒪᐃᓐ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᕕᕗᐊᕆ 23−ᒥ.

ᑭᓯᐊᓂ ᑕᖅᑭᒐᓴᓄᑦ, ᐃᓱᒫᓗᒃᓯᒪᕗᖅ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑕᐅᓂᖓ ᐊᑭᓖᓲᖑᙱᓐᓂᖓᓂ ᑕᒪᒃᑭᓂ ᐊᑭᐅᔪᓂ. ᑕᒪᑐᒪᓂ ᐊᕐᕌᒍᒥᑐᐊᖅ, ᐅᖃᓚᐅᖅᐳᖅ, ᓂᕆᐅᒃᐳᖅ ᓄᓇᕗᒻᒥ ᒐᕙᒪᒃᑯᑦ ᐊᔭᐅᕆᔭᐅᓂᐊᖅᐳᑦ ᐃᑲᔫᓯᖅᑕᐅᔭᕆᐊᖃᕐᓂᐊᕐᓂᖓᓂ ᐱᓕᕆᐊᒃᓴᐅᔪᒥ $25 ᒥᓕᐊᓐᓄᑦ.

ᖁᕝᕙᕆᐊᖅᐳᖅ $4 ᒥᓕᐊᓐᓂ ᓄᕕᐱᕆ 2023−ᒥ ᒪᐃᓐ ᐅᖃᓚᐅᖅᑎᓪᓗᒍ ᓄᓇᕗᒻᒥ ᒐᕙᒪᒃᑯᑦ ᐊᑭᓖᔭᕆᐊᖃᕋᔭᕐᓂᖏᓐᓂ ᐊᒥᒐᓗᐊᕐᓂᐅᔪᒥ $21 ᒥᓕᐊᓐᐸᓗᖕᓂ.

ᒐᕙᒪᒃᑯᑦ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓄᑦ ᐱᖏᐊᖅᑐᒥ ᐊᐃᑉᕆᓕ 1−ᒥ, ᐱᓕᕆᐊᒃᓴᐅᔪᖅ ᓂᕆᐅᒋᔭᐅᕗᖅ ᐊᑭᖃᕐᓂᐊᕐᓂᖓᓂ $136 ᒥᓕᐊᓐᓂ, ᓇᑉᐸᓪᓗᐊᖓᑕ ᐅᖓᑖᓂ ᑕᐃᔅᓱᒥᖓ ᐊᑭᓕᒐᒃᓴᐅᔪᓂ — $70 ᒥᓕᐊᓐᓂ — ᐅᕙᙶᕐᓂᖓᓂ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᑐᐊᖑᔪᒧᑦ.

ᒪᐃᓐ ᐅᖃᓚᐅᖅᐳᖅ ᐃᖏᕐᕋᓂᐊᕐᓂᖓᓂ, ᑭᓯᐊᓂ ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᓄᓇᖃᖅᑳᖅᓯᒪᔪᓂ ᐱᔨᑦᑎᕋᕐᓂᐅᔪᒥ ᑲᓇᑕᒥ, ᒐᕙᒪᑐᖃᒃᑯᑦ ᐱᓕᕆᕝᕕᖓ ᑲᒪᒋᔭᖃᖅᑐᒥ ᑮᓇᐅᔭᖃᖅᑎᑦᑎᓂᕐᒥ ᐱᓕᕆᐊᒃᓴᐅᔪᒥ, ᐊᖏᕈᑎᖃᙱᓯᒪᕗᑦ ᑕᐃᒪᙵᓂ ᐊᐃᑉᕆᓕ 2023−ᒥ, ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᒫᓐᓇᓕᓴᐅᓛᖑᔪᒥ ᓇᓪᓕᐅᒃᑯᒫᖃᙱᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᖅ ᐱᓕᕆᐊᒃᓴᐅᔪᒥ ᑮᓇᐅᔭᖃᖅᑎᑕᐅᓂᐅᔪᒥ ᑐᒃᓯᕋᐅᑕᐅᔪᒥ ᑭᐅᓂᖃᓚᐅᙱᓚᖅ ᐱᔭᕆᐊᖃᖅᑕᑦᑎᓐᓂ 100 ᐳᓴᓐᑎᒥ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒥ ᐊᑭᓕᒐᒃᓴᐅᔪᓂ,” ᒪᐃᓐ ᐅᖃᓚᐅᖅᐳᖅ ᑕᐃᑲᓂ ᕕᕗᐊᕆ 22−ᒥ ᒥᓂᔅᑕᐃᑦ ᐅᖃᐅᓯᒃᓴᓕᐅᕐᓂᖓᓐᓂ ᒪᓕᒐᓕᐅᕐᕕᖕᒥ

ᓄᓇᕗᑦ ᕿᓂᖅᐳᑦ ᐊᕐᕌᒍᒧᑦ−ᑕᓪᓕᒪᓄᑦ ᐊᖏᕈᑕᐅᔪᒥ ᐋᑐᕚᒥ ᑮᓇᐅᔭᖃᖅᑎᑦᑎᓂᕐᒥ ᓇᓪᓕᐅᒃᑯᒫᖃᙱᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᖅ ᐱᓕᕆᐊᒃᓴᐅᔪᒥ.

“ᕿᓂᖅᐳᒍᑦ ᓇᓚᐅᑦᑖᕆᑦᑎᐊᕐᓂᐅᔪᒥ,” ᒪᐃᓐ ᐅᖃᓚᐅᖅᐳᖅ.

ᐊᓯᖏᓐᓂ ᐃᓱᒪᒋᔭᐅᓂᐅᔪᓂ ᐱᓕᕆᐊᒃᓴᐅᔪᒥ ᑕᒪᒃᑭᐅᒪᔪᒥ ᑮᓇᐅᔭᖃᖅᑎᑕᐅᓯᒪᓂᖏᓐᓂ ᐊᕐᕌᒍᒐᓴᓄᑦ, ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒥ ᓱᓕ ᐊᒡᕕᐊᕈᑎᐅᓯᒪᕗᖅ.

ᒫᓐᓇᐅᔪᒥ, ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑕᐅᓂᖓᓂ ᐊᑭᓖᓲᖑᕗᖅ 75 ᐳᓴᓐᑎᒥ ᐃᑲᔫᓯᐊᒥᒃ ᐱᓕᕆᐊᒃᓴᐅᔫᑉ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒥ ᐊᑭᓕᒐᒃᓴᖏᓐᓂ, ᒪᐃᓐ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

ᒐᕙᒪᑐᖃᒃᑯᑦ ᐃᓱᓕᕝᕕᒃᓴᖃᕈᒪᕗᑦ ᐊᖏᓂᖓᓂ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒥ ᑮᓇᐅᔭᓄᑦ ᐊᑐᖅᑕᐅᔪᓄᑦ ᐊᑭᓖᕙᖕᓂᖏᓐᓂ. ᑭᓯᐊᓂ ᒪᐃᓐ ᐅᖃᓚᐅᖅᐳᖅ ᐱᑕᖃᙱᓗᐊᕐᓂᖓᓂ ᑕᒪᒃᑭᐅᒪᔪᒥ ᑮᓇᐅᔭᖃᖅᑎᑕᐅᓂᐅᔪᒥ ᐱᓕᕆᓂᐅᔪᒥ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒥ “ᐊᒃᓱᐊᓗᒃ ᓴᖅᑭᔮᕐᔪᐊᖅᐳᖅ.”

ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒥ ᐊᑭᖏᑦ ᓇᓚᐅᑦᑖᒐᒃᓴᐅᙱᓚᑦ ᐊᒻᒪ ᐱᓪᓚᕆᐅᙱᓚᖅ ᐃᓱᖃᖅᑎᑦᑎᓂᖓᓂ ᑕᐃᔅᓱᒥᖓ ᑮᓇᐅᔭᓂᑦ ᐊᑐᖅᑕᐅᔪᓄᑦ, ᐅᖃᓚᐅᖅᐳᖅ.

“ᐱᔪᓐᓇᙱᑎᑦᑎᔪᓐᓇᙱᓚᒍᑦ [ᐃᓄᖕᓂ] ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒥ,” ᐅᖃᓚᐅᖅᐳᖅ. “ᑕᒪᓐᓇ ᑐᙵᕕᐅᓪᓗᓂ ᓇᓗᓇᕈᑕᐅᕗᖅ ᐊᑲᐅᙱᓕᐅᕈᑕᐅᔪᒥ.”

ᓄᓇᕗᒻᒥᐅᑦ “ᐊᑐᕐᔪᐊᓲᖑᕗᑦ”ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒥ ᐊᒻᒪ ᐊᑭᐅᔪᑦ ᖁᕝᕙᕆᐊᖅᓯᒪᕗᑦ ᖄᖏᖅᓯᒪᔪᓂ ᖃᔅᓯᐊᕐᔪᖕᓂ ᐊᕐᕌᒎᔪᓂ, ᐅᖃᓚᐅᖅᐳᖅ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᑲᓇᑕᒥ ᐅᖃᖅᑎᐅᔪᒥ ᔭᓯᓐᑦ ᒎᓚᐃ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᐋᔩᖃᑎᒌᖕᓂᐅᔪᓂ ᑕᐃᒃᑯᓄᖓ ᐱᓕᕆᕝᕕᐅᔪᒥ ᐊᒻᒪ ᓄᓇᕗᒻᒥ ᐱᓕᕆᕗᑦ ᑭᐅᓂᕐᒥ ᖁᑦᑎᖕᓂᖅᓴᐅᔪᒥ ᐊᑭᐅᔪᓂ “ᑐᑭᓯᐅᒪᓂᐅᔪᒥ ᐃᓄᐃᑦ ᐊᒻᒪ ᐊᓪᓚᐃᑦ ᐊᑐᐃᓐᓇᖃᕐᓂᖏᓐᓂ ᓇᓪᓕᐅᒃᑯᒫᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᒥ ᐊᕕᒃᑕᐅᓯᒪᓂᐅᔪᒥ ᓄᓇᕗᒻᒥ ᐊᒻᒪ ᒐᕙᒪᑐᖃᒃᑯᓐᓂ ᑲᒪᒋᔭᐅᓂᖓᓂ,” ᐅᖃᓚᐅᖅᐳᖅ.

ᕕᕗᐊᕆ 7−ᒥ, ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᒥ ᓗᐊᕆ ᐃᓪᓚᐅᑦ ᓂᓪᓕᐅᑎᒋᓚᐅᖅᐸᖓ ᐱᓕᕆᐊᖑᓂᐅᔪᒥ ᑲᓇᑕᐅᑉ ᒪᓕᒐᓕᐅᕐᕕᖏᑕ ᑲᑎᒪᕝᕕᒡᔪᐊᖓᓂ ᐊᐱᖅᓱᕐᓂᐅᔪᓂ ᐱᓕᕆᓂᐅᔪᓂ.

“ᓕᐳᕈᒃᑯᑦ ᑲᒪᒋᔭᕆᐊᓕᖓᓐᓂ ᐃᒃᓯᓐᓇᐃᓯᒪᕗᑦ ᑮᓇᐅᔭᖃᖅᑎᑦᑎᙱᓗᐊᖅᖢᑎᒃ [ᐱᓕᕆᐊᖑᔪᒥ]. ᖃᓄᐃᓕᐅᕐᓂᖏᑦ ᐊᔭᐅᕆᕗᑦ ᓄᓇᕗᒻᒥ ᓴᖑᑎᑦᑎᓂᖏᓐᓂ ᑮᓇᐅᔭᓂᑦ ᐆᒧᖓ ᐱᓕᕆᐊᖑᔪᒧᑦ ᐅᓴᐅᙱᖔᖅᑐᒧᑦ ᓇᖕᒥᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᓄᑦ ᓯᕗᓪᓕᐅᑎᑕᐅᖁᔭᐅᔪᓄᑦ,” ᐅᖃᓚᐅᖅᐳᖅ, ᐸᓯᒃᖠᖅᖢᓂ ᒐᕙᒪᐅᔪᒥ ᑲᒪᒋᔭᕆᐊᖃᖅᑕᖏᓐᓂ ᐱᓕᕆᓂᖃᙱᓐᓂᖏᓐᓂ ᓄᓇᕗᒻᒧᑦ.

ᑲᓇᑕᒥ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᑭᐅᓚᐅᖅᐳᖅ, ᐅᖃᖅᖢᓂ ᒐᕙᒪᖓ “ᑕᐃᑲᓃᖏᓐᓇᕐᓂᐊᖅᐳᑦ ᐃᓄᖕᓄᑦ ᓄᓇᕗᒻᒥ. ᑕᐃᑲᓃᖏᓐᓇᕐᓂᐊᖅᐳᒍᑦ ᐃᓄᖕᓄᑦ ᐅᑭᐅᖅᑕᖅᑐᒥ.”

ᒪᐃᓐ ᐃᔾᔪᐊᕆᓚᐅᖅᐳᖅ ᐃᓪᓚᐅᑦ ᐃᓱᒫᓘᑎᒋᔭᖏᓐᓂ, ᐅᖃᖅᖢᓂ ᑮᓇᐅᔭᐃᑦ ᐊᑐᖅᑕᐅᔪᓂ ᐊᑭᓖᓂᕐᒧᑦ ᒐᕙᒪᑐᖃᒃᑯᑦ ᐊᒥᒐᕐᓂᖏᓐᓂ ᐊᑐᖅᑕᐅᑦᑎᐊᒃᑲᓐᓂᕋᔭᖅᐳᖅ “ᐱᕙᓪᓕᐊᑎᑦᑎᓂᕐᒥ, ᐊᖏᒡᓕᒋᐊᖅᑎᑦᑎᓂᕐᒥ ᐊᒻᒪ ᑐᓂᓯᓂᕐᒥ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ-ᐸᖅᑭᔭᐅᓂᐅᔪᒥ ᐱᔨᑦᑎᕋᕐᓂᐅᔪᒥ ᓄᓇᕗᒻᒥᐅᓄᑦ.”

ᒪᐃᓐ ᐅᖃᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᑦ ᐊᖏᕈᑎᖃᕈᒪᕗᖅ ᐅᓪᓗᖅᓯᐅᑎᐅᑉ ᐊᕐᕌᒍᖓᑕ ᐃᓱᐊᓂ, ᐱᖏᑉᐸᑕ ᓄᓇᕗᑦ ᕿᓂᕆᐊᖃᕐᓂᐊᖅᐳᑦ ᑕᒪᒃᑭᓂ ᓂᕈᐊᒐᒃᓴᐅᔪᓂ ᐃᓚᖃᖅᑐᒥ ᐊᓪᓚᕝᕕᓕᕆᓂᐅᔪᒥ ᐱᓕᕆᐊᒃᓴᐅᔪᒥ ᐅᑎᖅᑎᑕᐅᓗᓂ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᐅᔪᒥ ᑲᓇᑕᒥ, ᓄᓇᕗᒻᒥ ᒐᕙᒪᒃᑯᑦ ᑕᐃᒪᐃᑦᑐᒪᙱᒃᑲᓗᐊᖅᑎᓪᓗᒋᑦ.