ᒥᓂᐅᑉ ᓂᕆᐅᖕᓂᖓ (Minnie’s Hope) ᒪᑐᐃᕐᓯᒍᑎᐅᔪᖅ ᓄᑖᓂ ᓱᕈᓯᓕᕆᕝᕕᒃᓴᒥᑦ ᐋᓐᓂᐊᖅᑕᐃᓕᓂᕐᒧᑦ ᑰᔾᔪᐊᕌᐱᒃᒥ

For English version, see Minnie’s Hope opens new social pediatric centre in Kuujjuaraapik

ᒥᓂᐅᑉ ᓂᕆᐅᖕᓂᖓ (Minnie’s Hope), ᓱᕈᓯᓕᕆᕝᕕᒃᓴᖅ ᐅᕙᓂ ᑰᔾᔪᐊᕌᐱᒃ/ᕗᐊᑉᒪᒎᔅᑐᐃ, ᖁᕕᐊᓲᑎᖃᕐᒪᑕ ᓄᒃᑎᓚᐅᕐᓂᖏᓐᓂ ᓄᑖᒧᑦ ᐃᒡᓗᒧ ᐊᒻᒪᓗ ᖃᓄᐃᓕᐅᕈᑎᒃᓴᖃᐅᖅᖢᑎᒃ ᓄᑖᓂᒃ.

ᖁᕕᐊᓲᑎᖃᓚᐅᕐᑐᑦ ᔭᓄᐊᕆ 21-ᒥ ᓄᓇᓕᖕᓂ ᐊᒻᒪ ᔭᓄᐊᕆ 28-ᒥ ᐅᕙᓂ ᒪᓐᑐᕆᐊᒥ ᓱᕈᓯᕐᓄᑦ ᐋᓐᓂᐊᕕᐊᓗᒃᒥ.

ᓘᒃᑖᖅ ᔪᐊᓐ ᒧᕆᐊᓪ ᐅᖃᓪᓚᒃᑐᖅ ᔭᓄᐊᕆ 28-ᒥ ᐃᓄᒋᐊᓄᑦ ᒪᓐᑐᕆᐊᒥ ᓱᕈᓯᕐᓄᑦ ᐋᓐᓂᐊᕕᐊᓗᒃᒥ ᐅᕙᓂ P.K. Subban Atrium, ᑐᓴᖅᑎᑦᑎᓪᓗᓂ ᒪᑐᐃᖅᑕᐅᓂᖓᓂ ᐅᓇ ᓄᑖᖅ ᒥᓂᐅᑉ ᓂᕆᐅᖕᓂᖓ (Minnie’s Hope) ᓱᕈᓯᓕᕆᕝᕕᒃᒥ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)

ᓄᒃᑎᓚᐅᕐᑐᑦ ᐃᑲᔫᑎᖃᖅᖢᑎᒃ $5 ᒥᓕᐊᓐ ᑖᓚᓂ ᑐᓐᓂᖅᑯᓯᐊᓂᒃ 2020-ᒥ ᐅᑯᓇᙵᑦ ᑮᓇᐅᔭᒃᑯᕕᓕᕆᔨᓄᑦ BMO Financial Group ᐊᒻᒪᓗ ᓄᓇᓯᐅᑎᓕᐅᖅᑎᓄᑦ Hewitt Foundation.

“ᐅᐱᒍᓱᑦᑎᐊᖅᑐᖓ,” ᓘᒃᑖᖅ ᔪᐊᓐ ᒧᕆᐊᓪ ᐅᖃᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᐃᕖᑐᑦ ᖁᕕᐊᓲᑎᖃᖅᑎᓪᓗᒋᑦ ᒪᓐᑐᕆᐊᒥ. ᒧᕆᐊᓪ ᓱᕈᓯᕐᓄᑦ ᓘᒃᑖᖑᔪᖅ ᐅᕙᓂ ᐃᖅᑲᓇᐃᔭᖅᖢᓂ ᐄᔭᐅ ᐃᑦᓯ ᐊᒻᒪ ᓄᓇᕕᒃᒥ ᐊᕐᕌᒍᑦ 40 ᖃᓂᒋᔭᖓᓂ.

“ᐅᒃᐱᕐᓇᙱᑦᑐᖅ ᖃᓄᑎᒋ ᐱᓕᕆᔪᓐᓇᕐᒪᖔᑕ ᐊᔪᙱᑦᑐᓂᒃ ᐊᒥᓱᓂ ᐃᓄᖕᓂ ᑲᑎᑎᑦᑎᓪᓗᑕ.”

ᒪᓐᑐᕆᐊᒥ ᒪᑐᐃᕐᑐᒥ ᖁᕕᐊᓲᑎᖃᖅᑎᓪᓗᒋ ᐅᖃᓪᓚᑲᑕᓚᐅᕐᑐᑦ ᐱᓕᕆᖃᑕᐅᓯᒪᔪᑦ ᐊᒻᒪᓗ ᑭᐱᓯᓪᓗᑎᒃ ᕿᓯᒃᒥ ᐊᒻᒪ ᐊᒥᕐᒥ ᓴᓇᓯᒪᔪᒥ ᓂᒥᐅᑎᒥ.

ᔫᓕᐊᑦ ᓇᑕᓯᑯᐊᓐ ᓂᒥᐅᑎᒥ ᑭᐱᓯᓚᐅᕐᑐᖅ. ᓇᔭᖃᕐᑐᖅ ᒥᓂ ᓇᑕᓯᑯᐊᓐᓂᒥ, ᑖᓐᓇ ᐊᑎᖃᕈᑎᐅᔪᖅ ᐆᒥᖓ Minnie’s Hope. ᒥᓂ ᓇᑕᓯᑯᐊᓐ 37-ᓂ ᐊᕐᕌᒍᖃᓚᐅᕐᓯᒪᔪᖅ ᓱᕈᓯᓕᕆᔨᐅᓪᓗᓂ ᑐᖁᑕᐅᓂᑰᓪᓗᓂ 2008 ᓱᕈᓯᖏᒡᓗ ᒪᕐᕉᒃ.

ᐅᓇ ᓱᕈᓯᓕᕆᕝᕕᒃ ᓴᓇᔭᐅᓚᐅᕐᓯᒪᔪᖅ 2014-ᒥ ᐃᓅᓱᒃᑐᓄᑦ ᓈᒻᒪᓕᖅᑎᑕᐅᓇᓱᒃᖢᓂ ᑕᒫᓂ ᓄᓇᖃᖅᑐᓂ. ᑖᒃᑯᐊ ᑲᑐᔾᔨᖃᑎᒌᑦ ᓄᑖᖅ ᐃᒡᓗᖓ ᒪᕐᕈᐃᖅᖢᓂ ᐊᖏᓂᕐᓴᐅᓂᕐᓴᖅ ᓯᕗᓪᓕᕐᒥ ᐃᒡᓗᖁᑎᒋᔭᐅᓚᐅᕐᑐᒥ ᓴᓇᔭᐅᓂᑯᒥ ᖁᓕᑦ ᐊᕐᕌᒍᑦ ᖃᓂᒋᔭᖓᓂ.

ᐃᖅᑲᓇᐃᔭᖅᑎᖃᖅᖢᑎᒃ 16-ᓂ, ᓱᕈᓯᓕᕆᕝᕕᒃ ᐋᓐᓂᐊᖅᑕᐃᓕᓂᕐᒧᑦ ᐃᑲᔪᕈᓐᓇᖅᑐᑦ 300-ᓂ ᓱᕈᓯᕐᓂ ᐊᒻᒪ ᐃᓅᓱᒃᑐᓂᒃ ᐊᕐᕌᒍᒥ, ᐅᖃᕐᓯᒪᓚᐅᕐᑐᖅ ᑐᓴᒐᒃᓴᓕᐊᕆᔭᐅᔪᖅ ᐅᑯᓇᙵᑦ ᒪᓐᑐᕆᐊᒥ ᓱᕈᓯᕐᓄᑦ ᐋᓐᓂᐊᕕᐊᓘᑉ ᑐᙵᕕᖓ.

ᐅᓇ ᓄᑖᖅ ᒥᓂᐅᑉ ᓂᕆᐅᖕᓂᖓ (Minnie’s Hope) ᓱᕈᓯᓕᕆᕝᕕᒃᓴᖅ ᓴᓇᔭᐅᓯᒪᔪᖅ ᕗᐊᑉᒪᒎᔅᑐᐃ ᐊᒻᒪ ᑰᔾᔪᐊᕌᐱᐅᑉ ᑭᒡᓕᖏᓐᓂ. (ᐊᔾᔨᙳᐊᖅ ᐅᑯᓇᙵᑦ ᒪᓐᑐᕆᐊᓕ ᓱᕈᓯᕐᓄᑦ ᐋᓐᓂᐊᕐᕕᐊᓘᑉ ᑐᙵᕕᖓᓂ)

ᒥᓂᐅᑉ ᓂᕆᐅᖕᓂᖓ (Minnie’s Hope) ᐋᖅᑭᒃᑕᐅᓯᒪᔪᖅ ᑎᓴᒪᓂ ᐊᔾᔨᒌᙱᑦᑑᑎᓂ ᑲᒪᒋᔭᖃᕈᑎᓂ ᓱᕈᓯᕐᓂ ᐊᒻᒪ ᐃᓅᓱᒃᑐᓂᒃ ᐅᕙᓂ ᕗᐊᑉᒪᒎᔅᑐᐃᒥ ᐊᒻᒪ ᑰᔾᔪᐊᕌᐱᒃᒦᑐᓂᒃ:

• ᓱᕈᓯᕐᓂ ᐋᓐᓂᐊᖃᖅᑕᐃᓕᓂᕐᒧᑦ ᑲᒪᒋᔭᖃᓗᑎᒃ, ᓲᕐᓗ ᒪᐅᓇ ᐅᖃᓪᓚᒍᓐᓇᑦᑎᐊᙱᑦᑐᓂᒃ, ᐃᓱᒪᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᐊᒻᒪ ᑎᒥᒧᑦ ᐃᑲᔪᕈᑎᒃᓴᓕᕆᓂᕐᒧᑦ;
• ᐃᓕᓐᓂᐊᕈᑎᒃᓴᓂᒃ ᐊᒻᒪ ᐋᓐᓂᐊᖃᖅᑕᐃᓕᓂᕐᒧᑦ ᖃᓄᐃᓕᐅᕈᑎᒃᓴᓂ ᓲᕐᓗ ᒪᑯᓂᖓ ᓱᕈᓯᓛᓂ ᐃᓕᓐᓂᐊᕆᐅᖅᓴᖅᑎᑦᑎᓂᕐᒥᒃ, ᓯᐅᕋᓕᕆᓂᕐᒥᒃ, ᑎᑎᕋᐅᔭᒐᕐᓂᒃ ᐊᒻᒪ ᑎᑕᐅᑎᓕᕆᓂᒃᑯᑦ;
• ᓄᓇᓕᖕᓄᑦ ᑐᕌᖓᓗᐊᕐᑐᓂ ᐱᓕᕆᐊᒃᓴᐃᑦ ᐃᓚᖃᖅᖢᑎᒃ ᓇᔾᔨᔪᓂ ᑲᒪᒋᔭᖃᖃᑦᑕᕐᓂᕐᒥᒃ ᐊᒻᒪ ᐃᕐᓂᓵᖅᓯᒪᔪᓂᒃ, ᐊᓈᓇᐅᔪᑦ-ᐱᓱᓕᓵᖅᑐᓄᓪᓗ ᖃᓄᐃᓕᐅᕈᑎᓂᒃ ᐊᒻᒪ ᐃᓕᓐᓂᐊᕌᓂᒃᑎᓪᓗᒋᑦ ᖃᓄᐃᓕᐅᕈᑎᒃᓴᓂᒃ;
• ᖃᐅᔨᓴᖅᐸᓪᓕᐊᓂᖅ ᐊᒻᒪ ᐊᔪᕈᓐᓃᖅᓴᖅᑎᑦᑎᓂᖅ ᑕᐃᒪᓐᓇ ᐱᓕᕆᐊᖃᕈᒪᓇᔭᖅᑐᓂᒃ.

ᐃᒡᓗ ᐋᓐᓂᐊᕕᐅᓚᐅᕐᓯᒪᔪᖅ, ᓂᕿᓕᐅᕐᕕᖃᖅᖢᓂ ᓴᖅᑭᔮᖅᑐᒥ ᐊᒻᒪᓗ ᑐᓄᐊᓂ ᐱᙳᐊᒐᓚᒡᕕᖃᖅᖢᓂ.

“ᐅᒃᐱᕈᓱᒍᓐᓇᑦᑎᐊᕐᓂᖅ ᐱᒻᒪᕆᐊᓘᒻᒪᑦ,” ᐅᖃᕐᑐᖅ ᒥᐊᓕᐊᓐ ᒫᑎᓐ, ᑐᑭᒧᐊᖅᑎᑦᑎᔨ Minnie’s Hope-ᒥ.

“ᐅᓇ ᐱᓕᕆᖃᑎᒌᒍᓐᓇᕐᓂᕐᒥᒃ ᐋᖅᑭᒃᓱᐃᒍᑎᐅᕙᓪᓕᐊᔪᖅ ᐊᒻᒪ ᑐᐊᕕᐅᑕᐅᓇᓱᒃᓯᒪᙱᖢᓂ.”

ᒫᑎᓐ ᐅᖃᓚᐅᕐᑐᖅ ᐱᓕᕆᖃᑎᒋᓂᐊᖅᑕᖏᑦ ᐱᒋᐊᓚᐅᖅᑎᓐᓇᒋᑦ ᑖᒃᑯᓂᖓ ᑲᒪᒋᔭᐅᓇᔭᖅᑐᓂᒃ ᐸᓚᐅᒑᖅᑐᖃᑎᖃᓚᐅᕐᑐᑦ ᑏᑐᖅᖢᑎᒡᓗ. ᐱᓕᕆᖃᑎᖃᕐᓂᖅ ᐃᓛᓐᓂ ᐃᑲᕐᕋᖅ ᓇᑉᐸᕐᓗ ᐅᕝᕙᓘᓐᓃᑦ ᐃᑲᕐᕋᖕᓂ ᒪᕐᕉᖕᓂ.

ᒥᐊᓕᐊᓐ ᒫᑎᓐ, ᑐᑭᒧᐊᖅᑎᑦᑎᔨ ᐅᕙᓂ Minnie’s Hope, ᐅᖃᓪᓚᒃᑐᖅ ᔭᓄᐊᕆ 28-ᒥ ᐅᐸᒃᓯᒪᑎᓪᓗᒍ ᖃᓄᐃᓕᐅᓚᐅᕐᓂᕐᒥᓂ ᐊᒻᒪᓗ ᓄᑖᒥ ᐱᒋᐊᕐᕕᖃᓕᕐᓂᖏᓐᓂ ᓄᑖᒥ ᐃᒡᓗᒥ. (ᐊᔾᔨᓕᐅᕆᔨ ᓯᑐᕆᒃ ᒑᓚᓐᑦ)

“ᐅᓇ 15 ᒥᓂᑦᑐᐃᓐᓇᕐᒥ ᐱᓕᕆᐊᖃᕐᓇᙱᑦᑐᖅ ᐊᒻᒪᓗ ᐅᓗᕆᐊᓱᖕᓇᙱᖢᓂ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑖᓐᓇ ᐊᖏᕐᕋᑎᑐᑦ ᐱᓕᕆᕝᕕᐅᑎᑕᐅᓇᓱᖕᓂᖓᓂᒃ, ᐋᓐᓂᐊᕕᓪᓚᕆᒃᑎᑑᙱᑦᑐᖅ.

ᐊᖓᔪᖅᑳᕆᔭᐅᔪᖅ ᐸᐃᕆᔨᖃᙱᒃᑲᓗᐊᖅᐸᑦ, ᐅᓇ “ᖃᓄᐃᙱᑦᑎᐊᖅᑐᖅ, ᓱᕈᓯᓕᒫᑎ ᓇᒡᓴᕐᓗᒋᑦ,” ᐅᖃᕐᑐᖅ.

“ᐃᓕᓐᓂᐊᕐᑎᑦᑎᔨᖃᕋᑦᑕ, ᐱᓕᕆᑎᑲᑕᒍᓐᓇᖅᑕᕗᑦ.”

ᐃᖅᑲᓇᐃᔭᖅᑎᒋᔭᐅᔪᑦ ᓄᓇᓕᖕᓂᕐᒥᐅᑕᐃᑦ ᑭᓯᐊᓂ ᒪᑯᐊ ᓘᒃᑖᑦ ᐊᒻᒪ ᐊᔪᕈᓐᓃᕐᓯᒪᓪᓚᕆᒃᑐᑦ ᓄᓇᖃᖅᑳᙱᑦᑐᑦ. ˙

“ᖃᑯᒍᒃᑲᓐᓂᖅ ᑕᐃᒪᐃᑦᑐᖃᓕᓛᖅᑐᒍᑦ ᐃᓄᖕᓂ ᐊᒻᒪ ᑯᕇ ᐊᓪᓚᓂ,” ᒫᑎᓐ ᐅᖃᕐᑐᖅ.