ᑮᓇᐅᔭᓕᐅᕐᕕᒃ ᓴᖅᑭᑎᑦᑎᕗᖅ ᓄᑖᒥ ᑑᓂᒥ ᐃᓱᒪᒋᓪᓗᒋᑦ ᐃᓄᐃᑦ ᐅᓂᒃᑳᐅᓯᖏᑦ
ᓄᑖᖅ $2 ᓴᕕᕋᔭᒃ ᖁᕕᐊᓲᑎᖃᕈᑎ ᐃᓄᐃᑦ ᓄᓇᖓᓂ ᓴᖅᑭᑲᑕᓕᓚᐅᕐᑐᖅ ᓄᕕᐱᕆ 7-ᒥ
ᑖᒪᓯ ᒪᖏᐅᒃ, ᑕᓕᕐᐱᐊᓂ, ᑎᒍᒥᐊᖅᑐᖅ ᐃᕐᓂᖓᓂᒃ ᐃᓄᐊᒥ, ᐊᒻᒪ ᒪᖏᐅᒃ ᐊᓈᓇᖓ ᐹᓴ ᐊᔾᔨᓕᐅᖅᑕᐅᑎᓪᓗᒋ $2.00 ᑑᓂᐅᑉ ᐊᔾᔨᖓᑕ ᓵᑦᑎᐊᖓᓂ ᑖᓐᓇ ᐃᓄᐃᑦ ᓄᓇᖓᓂ ᐃᓕᓴᖅᓯᓯᒪᓂᕐᒧᑦ ᓴᓇᔭᐅᓚᐅᕐᑐᖅ ᓴᓇᙳᐊᖅᑎᓂᒃ ᐃᕗᔨᕕᒃᒥᐅᑕᓂ ᐃᑲᔪᓚᐅᕐᑐᓂ ᖃᓄᐃᓕᖓᓂᐊᕐᓂᖓᓂᒃ ᐅᑯᐊ ᕈᐃᐅᓪ ᑲᓃᑎᐊᓐ ᒥᓐᑦ (Royal Canadian Mint) ᑮᓇᐅᔭᓕᐅᕐᑎᑦ ᓴᖅᑭᓚᐅᖅᑕᖓᓐᓂ ᐋᑐᕚᒥ ᑕᑯᔭᒐᖃᕐᕕᒃᒥ National Arts Centre ᓄᕕᐱᕆ 5-ᖑᑎᓪᓗᒍ, ᑐᙵᓱᒃᑎᑦᑎᔨᐅᖃᑕᐅᓪᓗᑎᒃ ᐃᓄᐃᑦ ᑕᐱᕇᑦ ᑲᓇᑕᒥ. ᒪᖏᐅᒃ ᐊᒻᒪ ᐊᓯᖏ ᐱᖓᓱᑦ ᐃᓄᐃᑦ ᓴᓇᙳᐊᖅᑎᑦ — ᓄᓇᖃᖅᑐᓂ ᐊᑐᓂ ᐊᕕᒃᑐᖅᓯᒪᓂᐅᔪᓂᒃ ᐃᓄᐃᑦ ᓄᓇᖓᓂ — ᓵᓚᑦ ᖃᕆᑕᒃ, ᑏᒐᓐ ᕗᐊᐃᓯ ᐊᒻᒪ ᒥᐊᓕ ᐅᕼᐄᓇ ᑮᓇᐅᔭᐅᑉ ᖄᖓᓃᑦᑐᒥ ᓴᓇᓚᐅᕐᑐᑦ. (ᐊᔾᔨᓕᐅᕆᔨ ᑰᕆ ᓚᐅᕌᒃ)
For English version, see Mint unveils new coin commemorating Inuit storytelling and culture
ᓄᓕᐊᔪᒃ, ᑕᕆᐅᕐᒥᐅᑕᖅ, ᐊᑐᕐᑐᖅ ᐊᑎᒋᒥ, ᑖᓐᓇᓗ ᓯᐊᕐᓇᐅᓂᖓ ᐊᒻᒪ ᕿᕐᓂᖅᑕᐅᓂᖓ ᓇᑦᑎᐅᑉ ᐸᒥᐊᖓᑎᑐᑦ ᐸᒥᐅᖃᖅᖢᓂ ᐳᐃᔾᔪᕋᖃᑎᒋᔪᓐᓇᕐᓂᐊᕐᒪᒋᑦ ᑕᕆᐅᕐᒥᐅᑕᐃᑦ — ᐊᐃᕕᖅ, ᕿᓚᓗᒐᖅ ᑑᒑᓕᒃ, ᒪᕐᕉᒃ ᕿᓚᓗᒑᒃ, ᓇᑦᑎᖅ ᐊᒻᒪᓗ ᐃᖃᓗᒃ — ᑐᖑᔪᖅᑑᑉ ᐊᖕᒪᓗᕐᓯᓯᒪᔫᑉ ᐃᓗᐊᒎᖓᓪᓗᑎᒃ.
ᑎᑎᕋᐅᔭᖅᑕᐅᓯᒪᔪᖅ ᐅᓂᒃᑳᖅᑐᐊᖅ ᓄᓕᐊᔪᒃ ᑕᑯᔭᒃᓴᐅᔪᖅ ᑕᕐᓴᖃᕐᓂᐊᑕ ᐃᓗᐊᒍᑦ ᓄᑖᑉ $2.00 ᓴᕕᕋᔭᐅᑉ ᓴᖅᑭᑕᐅᓚᐅᕐᑐᖅ ᓄᕕᐱᕆ 5-ᒥ ᕈᐃᐅᓪ ᑲᓃᑎᐊᓐ ᒥᓐᑦᑯᓐᓄᑦ (Royal Canadian Mint).
ᕿᑎᕐᐸᓯᐊᓂ ᑐᖑᔪᕐᓂᐅᔪᖅ ᓄᓕᐊᔪᒃᖑᐊᖑᔪᖅ, ᑕᕆᐅᕐᒥᐅᑕᖅ, ᐊᑎᒋᒥ ᐊᑐᖅᖢᓂ, ᐊᒻᒪ ᑕᓕᕐᐱᐊᓄᙵᐅᕙᓪᓕᐊᓪᓗᓂ ᐊᐃᕕᙳᐊᖅ, ᕿᓚᓗᒐᖅ ᑑᒑᓕᒃ, ᒪᕐᕉᒃ ᑭᓚᓗᒑᒃ, ᓇᑦᑎᖅ, ᐊᒻᒪ ᐃᖃᓗᙳᐊᖅ. ᑕᓕᕐᐱᐊᓂᓪᓕ ᓯᓚᑎᖓᓂ ᑎᓴᒪ ᐊᔾᔨᒌᙱᑦᑐ ᐅᓗᙳᐊᑦ. ᑎᑎᖃᖃᖅᖢᓂ “ᐃᓄᐃᑦ ᓄᓇᖓᑦ” ᓴᐅᒥᐊᓂ. (ᐊᔾᔨᙳᐊᖅ ᕈᐃᐅᓪ ᑲᓃᑎᐊᓐ ᒥᓐᑦ (ᑮᓇᐅᔭᓕᐅᕐᑎᑦ)
“ᐅᓇ ᓴᕕᕋᔭᒃ ᖁᕕᐊᓲᑎᖃᕐᓂᕐᒧᑦ ᐃᓄᐃᑦ ᓄᓇᖓᓂ ᐊᒻᒪᓗ ᐃᓄᐃᑦ ᑲᓇᑕᒦᑦᑐᑦ ᖃᐅᔨᕚᓪᓕᕈᓐᓇᖁᓪᓗᒋᑦ ᐃᓕᖅᑯᓯᕆᔭᐅᔪᓂᒃ ᐊᒻᒪ ᐊᑐᖅᑕᐅᕙᒃᑐᓂᑦ ᐃᓄᖕᓄᑦ ᓄᓇᖏᓐᓃᑦᑐᓄᑦ,” ᒥᓯᐊᓪ ᐅᕆᔅᓱᑦᓴᓐ, ᑮᓇᐅᔭᓕᐅᕐᑎᓄᑦ ᐊᖓᔪᖅᑳᖅ ᐊᒃᑐᐃᔾᔪᑎᓄᑦ, ᐅᖃᓚᐅᕐᑐᖅ ᖁᕕᐊᓲᑎᖃᖅᑎᓪᓗᒋᑦ ᐅᕙᓂ ᑕᑯᔭᒐᖃᕐᕕᒃᒥ National Arts Centre ᐋᑐᕚᒥ.
ᓴᕕᕋᔭᒃᒥ ᑎᑎᕋᐅᔭᖅᑎᑦ ᑏᒐᓐ ᕗᐊᐃᓯ, ᑖᒪᓯ ᒪᖏᐅᒃ, ᓵᓚᑦ ᖃᕆᑕᒃ ᐊᒻᒪ ᒥᐊᓕ ᐅᕼᐄᓇ ᐊᑐᓂ ᑎᓴᒪᓂ ᐊᕕᒃᑐᖅᒪᓂᕆᔭᐅᔪᓂᒃ ᓄᓇᖃᖅᑐᑦ ᐃᓄᐃᑦ ᓄᓇᖓᓂᒃ — ᓄᓇᕕᒃ, ᓄᓇᕗᑦ, ᓄᓇᑦᓯᐊᕗᑦ, ᐊᒻᒪ ᐃᓄᕕᐊᓗᐃᑦ ᓄᓇᖓᓂ.
ᐅᑯᐊ ᕗᐊᐃᓯ ᐊᒻᒪ ᒪᖏᐅᒃ ᐋᑐᕚᒧᙵᐅᔪᓐᓇᓚᐅᕐᒪᑕ ᓴᖅᑭᑕᐅᓂᖓᓄᑦ.
ᓴᕕᕋᔭᐅᑉ ᖄᖓᓂ, ᐊᕕᒃᑐᕐᓯᒪᓂᐅᔪᑦ ᐅᔾᔨᕐᓇᑦᑎᐊᖅᑐᑦ ᑎᑎᕋᐅᔭᖅᑕᐅᓯᒪᓂᖏᑦᑎᒍᑦ ᐅᑯᓄᖓ ᑎᓴᒪᓄᑦ ᐅᓗᙳᐊᓄᑦ ᑕᓕᕐᐱᐊᓂ ᑐᖑᔪᖅᑑᑉ ᐃᓗᐊᓂ.
ᑕᒪᐃᓐᓂ ᑮᓇᐅᔭᓕᐅᕐᑎᑦ (Mint) ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᐃᒥ ᐃᓄᐃᑦ ᑲᑐᔾᔨᖃᑎᒌᖓ, ᐃᓚᐅᓚᐅᕐᑐᑦ ᓴᕕᕋᔭᐅᑉ ᖃᓄᐃᓕᖓᓂᐊᕐᓂᖓᓂᒃ.
ᑎᑎᕋᐅᔭᕐᑎᑦ “ᑕᐅᑐᙳᐊᖅᑕᖏᓐᓂ ᓇᒃᓴᖁᔭᐅᓚᐅᕐᑐᒍᑦ” ᑖᔅᓱᒪᓂ ᐱᓕᕆᐊᒥ, ᐅᖃᕐᑐᖅ ᕗᐊᐃᓯ. ᐃᒻᒥᓂᒃ ᐊᔪᕈᓐᓃᖅᑎᓯᒪᓪᓗᓂ, ᓴᕕᕋᔭᖕᒥ ᐃᐊᕕᙳᐊᖑᓂᐊᕐᑐᓂᒃ ᐊᒻᒪ ᕿᓚᓗᒐᖅ ᑑᒑᓕᒃᒥ ᑎᑎᕋᐅᔭᓕᓚᐅᕐᑐᖅ 2023 ᐊᐅᔭᖓᓂ.
ᐊᑐᓂ ᑎᑎᕋᐅᔭᖅᑎ ᑎᑎᕋᐅᔭᓚᐅᕐᑐᑦ ᓄᓇᖏᓐᓃᖢᑎᒃ, ᑕᕐᕆᔭᒐᒃᑯᑦ ᐅᖃᖃᑎᒌᓚᐅᖅᐸᒃᖢᑎᒃ ᑲᑎᒪᓪᓗᑎᒃ.
“ᐊᒃᓱᕈᕐᓇᕐᓂᐅᓚᐅᕐᑐᕐᓕ ᐅᖓᓯᒌᖃᑦᑕᐅᑎᓂᖅ,” ᐅᖃᕐᑐᖅ ᒪᖏᐅᒃ, ᓴᓇᓚᐅᕐᑐᖅ ᓇᑦᑎᙳᐊᕐᒥ ᐊᒻᒪ ᐃᖃᓗᒃᒥ ᑎᑎᕋᐅᔭᖅᖢᓂ ᐊᒻᒪᓗ ᐅᓇ “ᐃᓄᐃᑦ ᓄᓇᖓᑦ” ᑎᑎᕋᕐᓯᒪᔪᖅ ᐊᒻᒪᓗ ᐃᓄᐃᑦ ᓴᓇᐅᒐᖏᑦ ᓯᓚᑖᓃᑦᑐᑦ ᐊᖕᒪᓗᕐᓯᓯᒪᔫᑉ.
“ᐅᖓᓯᒌᒃᑑᑎᐅᓚᐅᕐᕋᑦᑕ ᑕᐅᓴᑲᓪᓚᖕᓂ ᑭᓛᒥᑕᓂ, ᓈᒻᒪᙱᓕᐅᕈᑎᖃᔭᖢᑕ ᖃᕋᓴᐅᔭᕐᒥ ᐊᒻᒪ ᖃᐅᔨᓴᐅᑎᕗᑦ ᐊᔾᔨᒌᙱᑦᑑᑎᐅᓪᓗᑎᒃ.”
ᐱᐊᓂᒃᑎᓪᓗᒍᓕ, ᓲᕐᓗ “ᐊᑕᐅᓯᙳᕐᓯᒪᔪᖅ ᓄᓕᐊᔪᒃᒥ ᐅᓂᒃᑳᖅᑐᐊᖅ,” ᐅᖃᕐᑐᖅ ᐅᕆᔅᓱᑦᓴᓐ.
ᓇᐃᑕᓐ ᐅᐱᐊᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ, ᐅᖃᓪᓚᓚᐅᕐᑐᖅ ᑲᑐᔾᔨᖃᑎᒌ ᐱᓕᕆᖃᑎᖃᕐᓂᖏᓐᓂ ᑭᖕ ᓵᔅᒥ, ᑖᓐᓇᓕ ᐃᒡᓗᐊᒍᑦ ᐊᔾᔨᙳᐊᖃᖅᑐᖅ ᓴᕕᕋᔭᐅᑉ ᐃᖅᑲᐅᒪᔾᔪᑎᐅᑉ.
ᕈᐃᐅᓪ ᑲᓃᑎᐊᓐ ᒥᓐᑦ ᐊᒃᑐᐃᓂᕐᒧᑦ ᐱᓕᕆᔨ ᒥᓯᐊᓪ ᕆᔅᓱᑦᓴᓐ, ᓴᐅᒥᐊᓂ, ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᐃᑕᓐ ᐅᐱᐊᑦ ᓴᖅᑭᑎᑦᑎᕘᒃ ᐊᔾᔨᙳᐊᖓᓂ ᓄᑖᑉ $2.00 ᓴᕕᕋᔭᐅᑉ ᑮᓇᐅᔭᓕᐅᕐᕕᒃᒥ ᓴᓇᔭᐅᓂᑯ ᐃᓱᒪᒋᓪᓗᒋᑦ ᐃᓄᐃᑦ ᓄᓇᖃᑦ — ᐃᓄᐃᑦ ᓄᓇᖓᑦ ᑲᓇᑕᒥ. ᐅᓇ ᓴᕕᕋᔭᒃ ᓴᖅᑭᑕᐅᓚᐅᕐᑐᖅ ᓄᕕᐱᕆ 5-ᒥ ᑕᑯᔭᒐᖃᕐᕕᒃᒥ ᐅᕙᓂ National Arts Centre ᐋᑐᕚᒥ. (ᐊᔾᔨᓕᐅᕆᔨ ᑰᕆ ᓚᐅᕌᒃ)
“ᐅᖃᖃᑎᒌᓚᐅᕐᓯᒪᒐᑦᑕ ᓴᖅᑭᑎᑦᑎᔪᒪᓪᓗᑕ ᐃᓕᖅᑯᓯᒃᑯᑦ ᐱᖁᑎᓂ ᐅᑯᓇᓂ ᔫᓇᐃᑕᑦ ᑭᖕᑕᒻ,” ᐅᐱᐊᑦ ᐅᖃᕐᑐᖅ. “ᑖᓐᓇᓗ ᑮᓇᙳᐊᖅ ᑮᓇᐅᔭᒦᑦᑐᖅ ᓇᓗᓇᐃᒃᑯᑎᐅᕗᖅ ᐊᒃᑐᐊᓂᖃᓪᓚᕆᖕᓂᖓᓂᒃ ᒪᓕᖕᓂᐊᕐᓂᕐᒥᒃ, ᐃᑲᔪᖅᑐᐃᓂᕐᒥ ᐊᒻᒪ ᖁᕕᐊᓲᑎᖃᕐᓂᕐᒥᒃ ᐃᓄᐃᑦ ᐱᓇᓱᒻᒪᕆᖕᓂᖏᓐᓂᒃ.”
ᐅᓇ ᓄᑖᖅ $2 ᓴᕕᕋᔭᒃ ᐊᑐᖅᑕᐅᑲᑕᓕᓚᐅᕐᑐᖅ ᓄᕕᐱᕆ 7-ᒥ 3 ᒥᓕᐊᓐᖑᓪᓗᑎᒃ ᓴᓇᔭᐅᓯᒪᔪᑦ.
ᓯᕗᓪᓕᖅᐹᖑᙱᑦᑐᖅ ᐃᖅᑲᐅᒪᔾᔪᑎᒥ ᓴᕕᕋᔭᓕᐅᖅᑎᓪᓗᒋᑦ ᑲᓇᑕᐅᑉ ᐅᑭᐅᕐᑕᖅᑐᖓᓂ ᐊᒻᒪ ᐃᓄᐃᑦ ᓄᓇᖓᓂ.
1999-ᒥ, ᓴᖅᑭᑎᑦᑎᓚᐅᕐᓯᒪᖕᒪᑕ ᐃᖅᑲᐅᒪᔾᔪᑎᒃᓴᒥ ᑑᓂᒥ ᓄᓇᕗᑦ ᐱᒋᐊᕈᑎᐊᓂᒃ ᐊᐃᕆᓕ 1-ᒥ ᑕᕝᕙᓂᑦᑕᐃᓐᓇᖅ ᐊᕐᕌᒍᒥ. ᑐᓄᐊᒍᑦ ᓴᕕᕋᔭᐅᑦ, ᕿᓚᐅᔾᔭᙳᐊᖅᑐᖃᖅᖢᓂ, ᑖᓐᓇᓗ ᑎᑎᕋᐅᔭᖅᑕᐅᓯᒪᓪᓗᓂ ᐃᒡᓗᓕᒃᒥ ᐃᓅᓂᑯᒧᑦ ᑎᑎᕋᐅᔭᖅᑎᒧᑦ ᔨᕐᒪᐃᓐ ᐊᕐᓇᑦᑕᐅᔪᕐᒧᑦ.
ᐃᖅᑲᐅᒪᔾᔪᑎᒃᓴᒥ $2.00 ᓴᕕᕋᔭᒃᒥ ᓴᖅᑭᑦᑎᓚᐅᕐᓯᒪᖕᒥᔪᑦ 2023-ᒥ ᖁᕕᐊᓲᑎᖃᖅᖢᑎᒃ ᑲᓇᑕᒥ ᓄᓇᖃᖅᑳᖅᑐᑦ ᐅᓪᓗᖓᓂ ᐊᒻᒪᓗ ᓴᖅᑭᑎᑦᑎᓯᒪᓪᓗᓂ ᐱᓕᕆᖃᑎᒌᒍᑎᐅᔪᓂᒃ ᐅᑯᓇᙵᑦ ᓄᓇᖃᖅᑳᖅᑐᑦ ᐊᓪᓚᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᓄᑦ ᑎᑎᕋᐅᔭᖅᑎᓄᑦ ᐃᓚᖓᓪᓗ ᐃᓄᕕᐊᓗᐃᑦ ᓄᓇᖓᓂᙶᖅᓯᒪᓪᓗᓂ.
(0) Comments