ᐊᓯᐅᖅᑲᔪᑦ ᓯᑯᒥ ᐃᖃᓪᓕᐊᖅᑏᑦ ᓇᓂᔭᐅᕗᑦ ᑐᖁᖓᓪᓗᑎᒃ ᑭᙵᐃᑦ ᖃᓂᒋᔭᖓᓂ

For English version, see Missing ice fishermen found dead near Kinngait

ᒪᕐᕉᒃ ᓯᑯᒥ ᐃᖃᓪᓕᐊᖅᑏᑦ ᐅᓂᒃᑳᕆᔭᐅᓚᐅᖅᑐᓂ ᑎᑭᕝᕕᒃᓴᖓᓂ ᖄᖏᐅᑎᓂᕐᒥ ᐅᑎᓚᐅᙱᖦᖢᑎᒃ ᖃᐅᔨᒋᐊᕐᓂᕐᒥ ᐃᖃᓗᒐᓱᖕᓂᕐᒥ ᒪᑦᑎᑦᑕᐅᑎᖏᓐᓂ ᑭᙵᐃᑦ ᖃᓂᒋᔭᖓᓂ ᑎᓯᐱᕆ 31−ᒥ ᓇᓂᔭᐅᕗᑦ ᑐᖁᖓᓪᓗᑎᒃ.

ᐸᓖᓯᒃᑯᑦ ᐅᖃᐅᔾᔭᐅᓚᐅᖅᐳᑦ 1:40 ᐅᓪᓛᐸᓗᒃᑯᑦ ᑎᓯᐱᕆ 31−ᒥ 70-ᓂ-ᐅᑭᐅᓕᖕᒥ ᐊᖑᒻᒥ ᐊᒻᒪ 38-ᓂ-ᐅᑭᐅᓕᖕᒥ ᐃᕐᓂᖓ ᓱᓕ ᐊᖏᕐᕋᓚᐅᙱᓐᓂᖏᓐᓂ ᐊᐅᓪᓛᓚᐅᖅᑎᓪᓗᒋᑦ 15 ᑭᓛᒥᑐᐸᓗᖕᓂ ᓄᓇᓕᖕᓂ ᖃᐅᔨᒋᐊᕐᓂᕐᒧᑦ ᒪᑦᑎᑦᑕᐅᑎᖏᓐᓂ, ᑲᓇᑕᒥ ᐸᓖᓯᒃᑯᑦ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᔭᓄᐊᕆ 8−ᒥ.

ᐱᐅᙱᑦᑐᒥ ᐊᒻᒪ ᐊᑦᑕᓇᖅᑐᒥ ᓯᓚᒥ ᖃᓄᐃᓐᓂᐅᔪᓂ ᓯᕗᓪᓕᐅᔪᒥ ᓄᖅᑲᖅᑎᑦᑎᓚᐅᖅᐳᑦ ᐸᑦᓴᐃᔨᓂᑦ ᐊᐅᓪᓚᕐᓂᖏᓐᓂ, ᑐᓴᒐᒃᓴᓕᐊᑦ ᐅᖃᓚᐅᖅᐳᖅ. ᖃᓄᐃᓐᓂᐅᔪᑦ ᐱᐅᓯᒋᐊᕐᒪᑕ ᑭᖑᓂᐊᒍᑦ ᐅᓪᓛᖓᓂ, ᓄᓇᒥᒃ ᐸᖅᓴᐃᓂᐅᔪᒥ ᐱᒋᐊᓚᐅᖅᐳᖅ.

ᐊᖑᑏᑦ ᓯᑭᑑᖓ ᓇᓂᔭᐅᓚᐅᖅᐳᖅ ᑭᖑᓂᐊᒍᑦ ᐅᓪᓗᖓᓂ 11 ᑭᓛᒥᑐᐸᓗᖕᓂ ᑭᙵᕐᓂᑦ, ᑭᓯᐊᓂ ᐸᖅᓴᐃᔩᑦ ᓇᓂᓯᔪᓐᓇᓚᐅᙱᓚᑦ ᐊᖑᑎᓂᑦ.

ᔭᓄᐊᕆ 2−ᒥ, 2 ᐅᓐᓄᓴᐸᓗᖕᒥ, ᑎᒥᐅᔪᓂ ᒪᕐᕉᔪᓂ ᐃᖃᓪᓕᐊᖅᑎᓂ ᓇᓂᔭᐅᓚᐅᖅᐳᑦ 5 ᑭᓛᒥᑐᐸᓗᖕᓂ ᓄᓇᓕᖕᓂ.

ᐱᕋᔭᖕᓂᐅᔪᒥ ᐸᓴᒋᔭᐅᙱᓚᖅ ᐊᒻᒪ ᐸᓖᓯᒃᑯᑦ ᖃᐅᔨᓴᕐᓂᖓᓂ ᐃᓱᓕᑉᐳᖅ, ᑐᓴᒐᒃᓴᓕᐊᖅ ᐅᖃᓚᐅᖅᐳᖅ. ᑐᖁᓂᐅᔪᓂ ᒫᓐᓇ ᖃᐅᔨᓴᖅᑕᐅᕗᑦ ᓄᓇᕗᒻᒥ ᑐᖁᖓᔪᓕᕆᔨᒃᑯᑦ ᑎᑎᕋᕐᕕᖓᓐᓂ.