ᒪᓕᒐᓕᐅᖅᑎ ᓄᓇᕗᒻᒥ ᒐᕙᒪᒃᑯᓐᓂᑦ ᐃᑲᔪᖁᔨᕗᖅ ᐃᓇᖏᖅᓯᓂᖓᓂ ᐃᒡᓗᓕᖕᒥ ᐊᓐᓂᑭᑕᕐᕕᖓᒥ

For the English version of this story, please see MLA wants GN to assist in replacing Igloolik arena destroyed by fire.

ᐱᓇᓱᐊᕈᓯᕐᒥ ᑭᖑᓂᐊᒍᑦ ᐃᑭᑦᑐᒥ ᓱᔪᐃᓚᐅᖅᑎᓪᓗᒍ ᑭᑉᓯᒐᖅ ᐊᓐᓂᑭᑕᕐᕕᖓᓂ ᐃᒡᓗᓕᖕᒥ, ᐊᒡᒍᒥ ᒪᓕᒐᓕᐅᖅᑎ ᔪᐊᓇ ᖁᐊᓴ ᖃᐃᖁᔨᓂᖃᖅᐳᖅ ᓄᓇᕗᒻᒥ ᒐᕙᒪᒃᑯᓐᓂᑦ ᐃᑲᔪᖅᓱᐃᓂᕐᒥ ᓄᑖᒥ ᐃᒡᓗᖁᑕᐅᔪᒥ.

“ᐊᓐᓂᑭᑕᕐᕕᒃ ᓄᑖᙳᕆᐊᖅᑎᑕᐅᔪᓐᓇᙱᑦᑎᐊᖅᐳᖅ,” ᖁᐊᓴ ᐅᖃᓚᐅᖅᐳᖅ ᕕᕗᐊᕆ 20−ᒥ ᐊᐱᖅᓱᖅᑕᐅᓂᐅᔪᒥ.

“ᐱᐅᑦᑎᐊᕋᔭᖅᐳᖅ ᓄᓇᕗᒻᒥ ᒐᕙᒪᒃᑯᑦ ᐃᑲᔪᖅᓱᐃᔪᓐᓇᕈᑎᒃ ᕼᐋᒻᓚᒃᑯᑦ ᐱᔭᕆᐊᖃᕐᓂᖏᓐᓂ ᑮᓇᐅᔭᖃᖅᑎᑕᐅᓂᕐᒥ ᐅᕝᕙᓘᓐᓃᑦ … ᑭᓱᑐᐃᓐᓇᓂ ᐃᑲᔪᕈᑎᒃᓴᓂ ᐱᓯᒪᑐᐃᓐᓇᕆᐊᖃᖅᑕᒥᓂᑦ ᐃᑲᔪᕈᓐᓇᕈᑎᒃ ᓄᓇᓕᖕᓂ ᓴᓇᒃᑲᓐᓂᕐᓂᖏᓐᓂ ᐊᓐᓂᑭᑕᕐᕕᖕᒥ.”

ᐃᒡᓗᓕᖕᒥ ᖃᑦᑎᕆᔩᑦ ᐊᑐᓚᐅᖅᐳᑦ ᕕᕗᐊᕆ 12−ᖏᓐᓇᐸᓗᖕᒥ ᖃᒥᑎᑦᑎᓇᓱᐊᖅᖢᑎᒃ ᐃᑭᑦᑐᒥ ᑭᑉᓯᒐᖅ ᐊᓐᓂᑭᑕᕐᕕᖓᓂ, ᐃᒡᓗᖃᖅᑎᑦᑎᓚᐅᕐᒥᔪᒥ ᐊᖅᓯᒃᑯᑦ BlackBox ᐱᓕᕆᕝᕕᖓᓂ.

ᓄᓇᕘᑉ ᑲᓇᑕᒥ ᐸᓖᓯᒃᑯᑦ ᐊᖏᔪᓂ ᐱᕋᔭᒃᑕᐅᓂᑯᓂ ᐱᓕᕆᕝᕕᖓ ᐊᒻᒪ ᓄᓇᕗᒻᒥ ᖃᑦᑎᕆᔨᕐᔪᐊᖓ ᐅᖃᓚᐅᖅᐳᑦ ᖃᐅᔨᓴᕐᓂᐅᔪᓂ ᐃᑭᓚᐅᖅᑐᒧᑦ. ᒫᓐᓇᒧᑦ ᑎᑭᖦᖢᒍ, ᐱᑎᑕᐅᓂᖓᓂ ᐃᑭᑦᑐᒧᑦ ᐅᖃᐅᓯᐅᓯᒪᙱᓚᑦ.

ᓴᓇᔨᐅᔪᑦ ᐊᑐᖅᐳᑦ ᐅᖁᒪᐃᑦᑐᓂ ᐱᓕᕆᔾᔪᑎᓂ ᐃᓂᐅᔪᒥ ᑭᑉᓯᒐᖅ ᐊᓐᓂᑭᑕᕐᕕᖓᓂ ᐃᒡᓗᓕᖕᒥ, ᓱᔪᐃᔭᐅᓚᐅᖅᑐᒥ ᐃᑭᑦᑐᒧᑦ ᕕᕗᐊᕆ 12−ᒥ. (ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᐊᔾᔨᓕᐅᖅᑕᖓ)

ᖁᐊᓴ ᑐᓂᓯᓚᐅᖅᐳᖅ ᓄᓇᓕᐅᑉ ᐱᓂᕐᓗᒡᔪᐊᕐᓂᖓᓂ ᓇᑎᖓᓄᑦ ᒪᓕᒐᓕᐅᕐᕕᖕᒧᑦ ᕕᕗᐊᕆ 20−ᒥ, ᐅᑭᐅᒃᑯᑦ ᐃᒃᓯᕚᕐᓂᖓ ᐃᖏᕐᕋᓯᑎᓪᓗᒍ.

“ᐅᕙᓂ ᐱᕕᒃᓴᖃᕐᓂᐅᔪᒥ ᐅᖃᕈᒪᕗᖓ ᖁᔭᓕᓂᓐᓂ ᕼᐋᒻᓚᒃᑯᑦ ᖃᑦᑎᕆᔨᖏᓐᓄᑦ ᐊᒃᓱᕈᕐᓂᖏᓐᓂ ᓄᖅᑲᖅᑎᑦᑎᓇᓱᐊᕐᓂᕐᒥ ᐃᑭᑦᑐᒥ,” ᐅᖃᓚᐅᖅᐳᖅ ᐃᓚᒋᔭᐅᔪᒥ ᐅᖃᐅᓯᒃᓴᓕᐊᖓᓐᓂ.

ᐅᓂᒃᑳᕆᓚᐅᖅᐳᖅ ᐊᓐᓂᑭᑕᕐᕕᖕᒥ “ᐊᑦᑕᓇᙱᑦᑐᒥ ᐃᓂᐅᓂᖓᓂ” ᓱᕈᓯᕐᓄᑦ ᐱᙳᐊᕐᓂᖏᓐᓄᑦ, ᐃᓄᐃᑦ ᐱᙳᐊᕈᓯᖏᓐᓂ ᐊᒻᒪ ᖁᙱᐊᖅᑕᐅᕙᒃᑐᓄᑦ ᓴᓇᐅᒐᓂ. ᐊᖅᓯᖅ ᓲᑭᔅᒧᑦ ᐱᓕᕆᐊᖑᓂᐅᕗᖅ ᐱᔪᓐᓇᖅᑎᑦᑎᔪᒥ ᒪᒃᑯᒃᑐᓂ ᐱᕕᖃᕐᓂᖏᓐᓂ ᐃᓕᑦᑎᓂᕐᒥ ᐃᖃᐃᓕᓴᕐᓂᕐᒥ ᐊᒻᒪ ᖁᙱᐊᖅᑕᐅᓂᕐᒥ ᐊᔪᙱᓐᓂᐅᔪᓂ.

ᖁᐊᓴ ᐊᐱᕆᓚᐅᖅᐳᖅ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᒥᓂᔅᑕ ᑕᐃᕕᑦ ᔪᐊᓇᓯᒥ ᐊᐱᖅᓱᕐᓇᐅᑎᓪᓗᒍ ᐱᓕᕆᓂᖓᓂ ᐃᑭᑦᑐᒧᑦ ᒥᒃᓵᓄᑦ ᐊᒻᒪ ᓴᓇᒃᑲᓐᓂᕐᓂᖏᓐᓂ ᐊᓐᓂᑭᑕᕐᕕᖕᒥ ᐃᓚᒋᔭᐅᖕᒪᖔᑦ ᓄᓇᕗᒻᒥ ᒐᕙᒪᒃᑯᓐᓂᑦ ᐸᕐᓇᐅᑎᖏᓐᓂ.

ᔪᐊᓇᓯ ᐅᖃᓚᐅᖅᐳᖅ ᒐᕙᒪᒃᑯᑦ ᐱᓕᕆᖃᑎᖃᖅᐳᖅ ᓇᓪᓕᐅᒃᑯᒫᓕᕆᔨᒃᑯᓐᓂ ᑲᒻᐸᓂᐅᔪᒥ ᐃᓚᐅᖃᑕᐅᔪᒥ.

ᐅᖃᓪᓚᕆᓚᐅᙱᓚᖅ ᓴᓇᔭᐅᒃᑲᓐᓂᕐᓂᖓᓂ ᐊᓐᓂᑭᑕᕐᕕᖕᒥ ᐃᓚᒋᔭᐅᓂᖓᓂ ᐸᕐᓇᐅᑎᒥ.

“ᑕᐃᒪᓐᓇᑎᑐᑦ ᐊᓯᖏᓐᓂ ᐊᖏᔪᓂ ᐊᑭᑐᔫᑎᓂ ᐱᓕᕆᐊᒃᓴᐅᔪᓂ, ᐱᓕᕆᓲᖑᕗᖅ ᐱᓕᖅᑭᒃᑕᕐᓂᕐᒥ ᐃᓱᒪᒋᔭᐅᓂᐅᔪᒥ ᐸᕐᓇᐃᓂᒃᑯᑦ,” ᔪᐊᓇᓯ ᐅᖃᓚᐅᖅᐳᖅ.

“ᐃᓱᒪᕗᖓ ᐅᑯᓄᖓ, ᐱᓕᕆᐊᕆᕙᕗᑦ ᐱᓕᕆᓂᐅᔪᒥ-ᐱᓕᕆᓂᐅᔪᒧᑦ ᑐᙵᕕᐅᔪᒥ ᖃᖓ ᐅᕝᕙᓘᓐᓃᑦ ᖃᓄᖅ ᐱᓕᕆᓂᐊᕐᒪᖔᑕ ᐊᑭᑐᔫᑎᓂ ᐸᕐᓇᐃᓂᕐᒧᑦ ᐊᓐᓂᑭᑕᕐᕕᖕᒧᑦ ᐃᒡᓗᓕᖕᒥ.”

ᖁᐊᓴ ᐊᔭᐅᕆᓚᐅᕆᕗᖅ ᔪᐊᓇᓯᒥ ᓄᑖᙳᕆᐊᖅᑎᑕᐅᓂᖓᓂ ᖃᑦᑎᕆᔨᕐᔪᐊᒃᑯᑦ ᖃᐅᔨᓴᖅᑕᐅᓂᖓᓂ.

“ᒫᓐᓇᒧᑦ ᑎᑭᖦᖢᒍ, ᑐᓴᖅᓯᒪᙱᑦᑎᐊᖅᐳᒍᑦ ᐅᕙᙶᖅᑐᒥ ᑎᑎᕋᕐᕕᐅᔪᒥ ᖃᑦᑎᕆᔨᕐᔪᐊᒃᑯᑦ ᖃᐅᔨᓴᕐᓂᖓᓂ ᐱᑎᑕᐅᓂᐅᔪᒥ ᐃᑭᑦᑐᒧᑦ,” ᐅᖃᓚᐅᖅᐳᖅ.

“ᐅᖃᕈᓐᓇᙱᓚᖓ ᖃᖓ ᑎᑎᕋᕐᕕᐅᑉ ᐅᓂᒃᑳᓕᐊᖓ ᐱᔭᕇᖅᑕᐅᓂᐊᕐᓂᖓᓂ ᐊᒻᒪ ᐅᖃᐅᓯᐅᓗᓂ ᕼᐋᒻᓚᒃᑯᓐᓂ ᐃᒡᓗᓕᖕᒥ.”