ᒪᓕᒐᓕᐅᖅᑎᑦ ᑐᓴᕈᒪᔪᑦ ᖃᓕᐃᓕᕐᒪᖔᑦ ᖁᒡᓗᖅᑑᖅ ᐆᒻᒪᖅᑯᑎᖃᕐᕕᖓ

ᒪᕐᕉᒃ ᒪᓕᒐᓕᐅᖅᑏ ᑭᐅᔭᐅᔪᒪᒻᒪᕆᓚᐅᕐᑑᒃ ᒫᔅᓯ 7ᒥ ᒪᓕᒐᓕᕆᕕᒡᔪᐊᕐᒥ ᖁᒡᓗᖅᑑᖅᒥ ᐆᒻᒪᖅᑯᑎᓕᕆᕝᕕᒃ ᓴᓇᔭᐅᔭᕆᐊᖃᓚᐅᕐᓯᒪᔪᖅ 2021ᒥ ᒥᒃᓵᓄᑦ.

ᖁᒡᓗᖅᑑᖅᒧᑦ ᒪᓕᒐᓕᐅᖅᑎ ᐹᐱ ᐊᓇᕕᓗᒃ ᐊᒻᒪ ᐊᕐᕕᐊᑦ-ᓂᒋᐊᓄᑦ ᒪᓕᒐᓕᐅᖅᑎ ᔫ ᓴᕕᑲᑖᖅ ᔮᓐ ᒪᐃᓐᒥ ᐊᐱᕐᓱᑲᑕᒻᒪᕆᓚᐅᖅᑑᒃ, ᒥᓂᔅᑕ ᑲᒪᒋᔭᓕᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂᒃ, ᐱᓕᕆᐊᒃᓴᖅ ᖃᓄᐃᓕᖓᓕᕐᒪᖔᑦ ᐊᒻᒪᓗ ᐊᑭᑦᑐᕋᐅᑎᓂᕐᒧᑦ ᐱᓕᕆᔾᔪᑎᐅᕙᓪᓕᐊᔪᖅ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑐᓴᖅᑎᑦᑎᓚᐅᕐᓯᒪᖕᒪᑕ ᐸᕐᓇᐅᑎᓂᒃ 2018ᖑᑎᓪᓗᒍ ᓴᓇᓂᐊᕐᓂᖏᓐᓂᒃ ᓄᑖᒥ ᐆᒻᒪᖅᑯᑎᖃᕐᕕᒃᓴᒥᒃ ᕿᑎᕐᒥᐅᑦ ᓄᓇᓕᖓᓂ. ᑕᐃᒪᙵᓪᓕ ᑕᒪᓐᓇ ᑭᖑᕙᕆᐊᖅᑕᐅᑲᑕᒃᓯᒪᔪᖅ, ᐱᔪᑎᖃᓗᐊᖅᖢᑎᒃ ᒪᕐᕉᒃ ᐊᑭᑦᑐᕋᐅᑎᒍᑎᐅᔫᒃ ᐊᐅᓚᑕᐅᔾᔪᑎᒃᓴᖓᓂᒃ ᖄᖏᐅᑎᓯᒪᓗᐊᓚᐅᕐᓂᖏᓐᓄᑦ.

ᖁᒡᓗᖅᑑᖅ ᐆᒻᒪᖅᑯᑎᖃᕐᕕᖓ ᓴᓇᔭᐅᓚᐅᕐᓯᒪᖕᒪᑦ 50 ᐊᕐᕌᒍᑦ ᐅᖓᑖᓂ 1968ᖑᑎᓪᓗᒍ. ᑖᓐᓇ ᐊᐅᓚᑕᐅᔪᓐᓇᕐᓂᕋᖅᑕᐅᓚᐅᕐᓯᒪᔪᖅ ᐊᕐᕌᒍᓂᒃ 40ᓂ.

2018ᒥ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᖃᓚᐅᕐᓯᒪᔪᑦ ᒫᓐᓇ ᐆᒻᒪᖅᑯᑎᓕᕆᕝᕕᒃ ᖁᐊᕐᓵᕐᓇᕐᓂᖓᓂᒃ ᐃᑭᑐᐃᓐᓇᕆᐊᖃᕐᓂᖓᓄᑦ, ᐱᕐᕈᓗᐊᕿᑦᑕᐃᓕᓂᕐᒧᑦ ᐊᒻᒪ ᐊᕙᑎᒋᔭᐅᔪᒧᑦ. ᐅᓇ 1.5 ᑭᓛᒥᑕᓂ ᑕᑭᓂᓕᒃ ᐅᕐᓱᐊᓗᖃᐅᑎᖓᓄᑦ ᐊᖅᑯᑎ ᒪᓕᒃᓯᒪᙱᒻᒪᑦ ᒪᓕᒋᐊᖃᖅᑐᓂᒃ ᐊᒻᒪ ᐱᖁᔭᓂᒃ ᒫᓐᓇᓕᓴᕐᓂᒃ.

ᐊᓇᕕᓗᒃ ᐊᐱᕆᓚᐅᕐᑐᖅ ᖃᓄᐃᓕᕐᒪᖔᑕ ᐋᔩᖃᑎᒌᖕᓂᐅᔪᖅ ᐅᑯᓄᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᒻᒪ ᕿᑎᕐᒥᐅᑦ ᑯᐊᐳᕇᓴᓐᑯᓐᓄᑦ ᖃᓄᖅ ᐋᖅᑭᒃᓯᒪᓂᐊᕐᓂᖓᓄᑦ ᐊᒻᒪ ᓴᓇᔭᐅᓂᐊᕐᓂᖓᓄᑦ ᐆᒻᒪᖅᑯᑎᓕᕆᕝᕕᒃᓴᖅ.

ᒪᐃᓐ ᐅᖃᓚᐅᕐᑐᖅ ᐅᖃᐅᓯᖃᓗᐊᕈᒪᙱᓐᓂᕋᖅᖢᓂ ᐋᔩᖃᑎᒌᖕᓂᐅᔪᒥᒃ ᐊᒻᒪ “ᐱᓕᕆᖃᑎᒌᖕᓂᕐᒥᒃ,” ᑭᓯᐊᓂᓕ ᐅᖃᖅᖢᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ “ᓴᐱᓕᖅᓯᒪᓕᕐᓂᕋᖅᖢᑎᒃ” ᑖᓐᓇ ᐱᓕᕆᐊᒃᓴᖅ ᓯᕗᒧᒃᐸᓪᓕᐊᙱᓐᓂᖓᓄᑦ ᒫᓐᓇᒧᑦ.

“ᐱᓕᕆᖃᑎᖃᐃᓐᓇᖅᑐᑦ ᕿᑎᕐᒥᐅᑦ ᑯᐊᐱᕇᓴᓐᑯᓐᓂᒃ,” ᐅᖃᕐᑐᖅ.

“ᐅᖃᕈᓐᓇᖅᑐᖓᓕ ᓂᕆᐅᖕᓂᖃᓂᑦᑎᓐᓂ ᐅᓇ ᖁᒡᓗᖅᑑᖅ ᐱᓕᕆᐊᖑᕙᓪᓕᐊᓕᕐᓂᐊᕐᓂᖓᓂᒃ ᐊᒻᒪ ᐱᐅᓂᕐᓴᒥᒃ ᐱᕙᓪᓕᐊᔾᔪᑎᐅᓗᓂ ᖃᒥᔭᙱᓐᓂᕐᓴᐅᓗᓂ, ᓴᓗᒪᓂᕐᓴᐅᓗᓂ ᐊᒻᒪ ᐅᓗᕆᐊᓇᙱᓐᓂᕐᓴᐅᓗᓂ ᐆᒻᒪᖅᑯᑎᒋᔭᐅᔪᖅ ᓄᓇᓕᖕᓂ.”

ᓴᕕᑲᑖᖅ ᐅᖃᒃᑲᓐᓂᓚᐅᕐᑐᖅ ᐅᖃᐅᓯᐅᔪᒧᑦ, ᐊᐱᕆᓪᓗᓂ ᖃᓄᐃᒻᒪ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓂᕈᐊᓚᐅᕐᒪᖔᑦ ᕿᑎᕐᒥᐅᑦ ᑯᐊᐳᕇᓴᓐᑯᓐᓂ ᐱᓕᕆᐊᖃᕐᓂᐊᕐᓗᑎᒃ.

ᒪᐃᓐ ᐅᖃᓚᐅᕐᒥᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᑐᕋᓱᖕᓂᖏᓐᓂᒃ ᐱᒻᒪᕆᒋᔭᐅᔪᒥᒃ “ᖃᓄᖅᑑᕐᓂᖅ”, ᑐᑭᖃᖅᖢᓂ ᐋᖅᑭᒋᐊᕈᑎᒃᓴᖅᓯᐅᕐᓂᖅ. ᖃᓄᖅᑑᕐᓂᖅ ᐱᒻᒪᕆᒋᔭᐅᖃᑕᐅᖕᒪᑦ ᒐᕙᒪᒃᑯᑦ ᐱᓇᓱᐊᖅᑕᖏᓐᓄᑦ, ᐅᖃᕐᑐᖅ.

“ᖃᐅᔨᒪᔪᒍᑦ ᖁᒡᓗᖅᑑᖅᒥᐅᑕᑦ ᐅᑕᖅᑭᙳᖅᑐᑦ ᐊᒻᒪᓗ ᑕᐃᒪᐃᓐᓂᖓᓄᑦ ᐊᑐᖅᑎᓐᓇᓱᒃᑕᕗᑦ ᐅᓇ ᖃᓄᖅᑑᕐᓂᖅ,” ᒪᐃᓐ ᐅᖃᕐᑐᖅ.

ᒪᐃᓐ ᐅᖃᓚᐅᕐᒥᔪᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᓕᕆᖃᑎᖓ ᕿᑎᕐᒥᐅᑦ ᑯᐊᐳᕇᓴᓐᑯᓐᓂ ᐅᕘᓈᖓᓂᖓᓂ ᐋᔩᖃᑎᒌᖕᓂᒃᑯᑦ ᐱᓕᕆᑎᑦᑎᔾᔪᑎᑎᒍᑦ ᐊᒻᒪᓗ ᐊᑕᐅᓯᑐᐊᕐᒥ ᐱᑖᕐᕕᐅᕙᒃᑐᑎᒎᖓᙱᖢᓂ ᐱᓕᕆᑎᑦᑎᓂᖅ.