ᒪᓕᒐᓕᐅᖅᑎᑦ ᓴᖅᑭᑎᑦᑎᒃᑲᓐᓂᖅᑐᑦ ᐋᓐᓂᐊᕐᕕᓕᐊᖅᑐᓄᑦ ᑐᔪᕐᒥᕕᒃᓴᒥᒃ ᑲᖏᖅᖠᓂᖅᒥ
ᓵᓚᒪᓐ ᒪᓕᑭ, ᐊᓕᒃᓵᓐᑐᕈ ᓴᒻᒧᕐᑐᒃ ᓂᓪᓕᕈᑎᖃᒃᑲᓐᓂᖅᐳᑦ ᑭᕙᓪᓕᖅᒥ ᐋᓐᓂᐊᕕᓕᐊᕆᐊᖃᕐᓂᕐᒧᑦ ᓈᒻᒪᙱᓕᐅᕈᑎᓂᒃ
ᓵᓚᒪᓐ ᒪᓕᑭ ᐊᒻᒪ ᐊᓕᒃᓵᓐᑐᕈ ᓴᒻᒧᕐᑐᒃ ᐅᖃᓪᓚᒃᑐᑦ ᐊᐱᕐᓱᖅᑕᐅᔾᔪᑎᓄᑦ ᓄᓇᕗᒥᑦ ᒪᓕᒐᓕᕆᕕᒡᔪᐊᕐᒥ ᑲᑎᒪᑎᓪᓗᒋ ᐅᒃᑑᐱᕆ 24ᒥ. (ᔨᐊᕝ ᐱᐊᑦᓯᐄ)
ᒪᕐᕉᒃ ᒪᓕᒐᓕᐅᖅᑏ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᓂ ᔮᓐ ᒪᐃᓐᒥ ᐃᓱᒪᒃᓴᖅᓯᐅᒃᑲᓐᓂᖁᔨᔫᒃ ᐅᒃᑑᐱᕆ 24ᒥ ᓄᓇᕗᒥᑦ ᑲᑎᒪᕕᔾᔪᐊᕐᕕᒃᒥ ᑲᑎᒪᑎᓪᓗᒋ.
ᓵᓚᒪᓐ ᒪᓕᑭ, ᑭᒡᒐᖅᑐᐃᔪᖅ ᐊᐃᕕᓕᒃᒥ, ᐊᒻᒪ ᐊᓕᒃᓵᓐᑐᕈ ᓴᒻᒧᕐᑐᒃ, ᑲᖏᖅᖠᓂᐅᑉ ᐅᐊᖕᓇᖓᓂ-ᐃᒡᓗᓕᒑᕐᔪᒃᒥ, ᐊᐱᕐᓱᓚᐅᕐᑐᒃ ᒪᐃᓐᒥ ᐅᓄᖃᑦᑕᕐᓂᖏᓐᓂᒃ ᐋᓐᓂᐊᕐᕕᓕᐊᖅᑐᑦ ᑭᕙᓪᓕᕐᒥ ᐊᒻᒪᓗ ᐊᑐᖅᐸᒃᖢᑎᒃ ᑲᖏᖅᖠᓂᐅᑉ ᒥᑦᑕᕐᕕᖓᓂ ᐊᒻᒪ ᑭᕙᓪᓕᖅᒥ ᐋᓐᓂᐊᕕᒃᒥ.
“ᑐᔪᕐᒥᕕᒃᑕᖃᓪᓚᕆᓕᖅᐸᑦ ᑲᖏᖅᖠᓂᖅᒥ ᐃᓱᒫᓘᑎᖃᕐᓇᙱᓐᓂᕐᓴᐅᓇᔭᖅᑐᖅ ᐊᖅᑯᓵᖅᐸᒃᑐᓄᑦ,” ᒪᓕᑭ ᐅᖃᕐᑐᖅ.
ᑖᒃᑯᐊ ᒪᕐᕉᒃ ᒪᓕᒐᓕᐅᖅᑏ ᐅᖃᓚᐅᖅᑑᒃ ᑲᖏᖅᖠᓂᐅᑉ ᑐᔪᕐᒥᕕᖏᑦ ᑕᑕᓯᒪᓚᐅᓲᖑᓂᖏᓐᓂᒃ ᑕᐃᒪᓐᓇᓗ ᑕᕝᕗᙵᖅᐸᒃᑐᓂᒃ ᐊᓯᐊᓂᙶᖅᖢᑎ ᑲᒪᒋᔭᐅᔭᖅᑐᖅᖢᑎᒃ ᑭᓯᐊᓂᓕ ᑕᑯᔭᐅᕝᕕᒃᓴᖓ ᐊᑐᕈᓐᓃᖅᑎᑕᐅᑐᐃᓐᓇᖅᖢᓂ.
ᓴᒧᕐᑐᒃ ᑕᒪᑐᒥᖓ ᐅᖃᐅᓯᖃᖃᑦᑕᖅᓯᒪᔪᖅ ᒪᓕᒐᓕᕆᕕᒡᔪᐊᕐᒥ ᓯᕗᓂᐊᒍᑦ ᐃᓚᖃᖅᖢᓂ ᑕᒪᓐᓇ ᐊᕐᕌᒍ ᐱᒋᐊᕐᓯᒪᓕᖅᑎᓪᓗᒍ.
ᒪᐃᓐ ᐅᖃᓚᐅᕐᑐᖅ ᒫᓂ 35,000 ᐋᓐᓂᐊᕐᕕᓕᐊᖅᑐᑦ ᖃᖓᑕᓲᒃᑰᖃᑦᑕᕐᒪᑕ ᓄᓇᕗᒥᑦ ᐊᕐᕌᒍ 2022-2023 ᐊᑐᖅᑎᓪᓗᒍ. ᖃᐅᔨᒪᓂᕋᖅᖢᓂᓗ ᑐᔪᕐᒥᕖᑦ ᑕᑖᔭᓐᓂᖏᓐᓂᒃ ᑭᓯᐊᓂᓕ ᐅᖃᓚᐅᕐᑐᖅ ᑕᒪᓐᓇ “ᒫᓐᓇᓕᓵᕈᓗᒃᑯ ᑕᐃᒪᐃᓕᕐᓯᒪᖕᒪᑦ.”
ᐃᓱᒫᓘᑎᒋᔭᐅᔪᑦ ᑕᒪᔾᔭᐅᒐᓗᐊᖅᑎᓪᓗᒋᑦ, ᒪᐃᓐ ᐅᖃᓚᐅᕐᑐᖅ ᐅᓄᙱᓗᐊᖃᑦᑕᕐᓂᖏᓐᓂᒃ ᐋᓐᓂᐊᕐᕕᓕᐊᖃᑦᑕᖅᑐᑦ ᑐᔪᕐᒥᕕᒃᑖᕆᐊᖃᕆᐊᒃᓴᖅ ᑲᖏᖅᖠᓂᖅᒥ.
“ᑕᐃᒪᓐᓇ ᐅᓄᙱᓗᐊᖅᐸᑕ ᐋᓐᓂᐊᕐᕕᓕᐊᖃᑦᑕᖅᑐᑦ ᑕᐃᒪᓕ ᓴᓇᓇᔭᕋᑦᑕ ᑐᔪᕐᒥᕕᒃᒥ — ᒥᑭᑦᑐᑯᓘᓇᔭᕐᑐᕐᓘᓐᓃ ᐅᕝᕙᓘᓐᓃᑦ ᑲᒪᒋᔭᐅᑦᑎᐊᕋᔭᙱᓪᓗᓂ — ᐊᒻᒪᓗ ᐊᔪᕐᓇᕋᔭᖅᖢᑎ ᐅᕙᑦᑎᓐᓂ ᐃᑲᔪᕋᔭᖅᑐᓂᒃ,” ᐅᖃᕐᑐᖅ.
ᑭᓯᐊᓂᓕ ᒪᐃᓐ ᐅᖃᓚᐅᕐᑐᖅ ᕿᒥᕐᕈᐊᕐᓂᐊᕐᓂᕋᖅᖢᓂᒋᑦ ᖃᔅᓯᐅᕙᖕᓂᖏᑦ ᐊᓯᐊᒍᖔᕐᓘᓐᓃ ᓴᖅᑭᔮᕐᓂᖃᖅᐸᑕ. ᑕᐃᒪᓐᓇ ᐊᓯᔾᔨᕈᑎᐅᔪᓐᓇᖅᑐᖅ.
“ᐅᓄᕐᓂᕆᔭᐅᕙᒃᑐᑦ ᑕᕝᕙᐅᒃᐸᑕ ᑕᕝᕗᙵᐅᕙᒃᑐᓂᒃ ᑕᐃᒪᓕ ᑕᒪᑐᒧᖓ ᓯᕗᒧᑦ ᐱᓕᕆᐊᖃᕋᓱᓕᕈᓐᓇᖅᑐᒍᑦ,” ᐅᑲᕐᑐᖅ.
I agree. A medical boarding home is needed in rankin inlet. Travelling through rankin has been difficult. Not much accommodations available and when the patient is bunking with people. The payment process is always very slow. Upto this day. I’ve stayed at a friends place, and to this day. She hasn’t received any funds for allowing me to stay for couple nights because of cancellations. I hope they take this seriously.