ᒪᓕᒐᓕᐅᖅᑎᐅᔪᑦ ᕿᒥᕐᕈᔭᐅᓂᖃᖁᔨᕗᑦ ᐸᖅᓴᐃᔩᑦ ᐊᒻᒪ ᓴᐳᔾᔨᓂᕐᒥ ᖃᓄᐃᓐᓂᐅᔪᒥ

For the English version of this story, please see MLAs want independent review of search and rescue incident.

ᒪᕐᕉᖕᓂ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ ᒪᓕᒐᓕᐅᖅᑏᑦ ᐱᔪᒪᕗᑦ ᐃᒻᒥᒃᑰᖅᑐᒥ ᕿᒥᕐᕈᔭᐅᓂᖓᓂ ᐸᖅᓴᐃᔩᑦ ᐊᒻᒪ ᓴᐳᔾᔨᓂᕐᒥ ᐊᐅᓚᑕᐅᓂᐅᔪᒥ ᐊᖑᒻᒥ ᓇᓂᔭᐅᓚᐅᖅᑎᓪᓗᒍ ᑐᖁᖓᓪᓗᓂ ᐊᐃᑉᕆᓕ 21−ᒥ.

ᖃᒪᓂᑦᑐᐊᒥ ᒪᓕᒐᓕᐅᖅᑎ ᑯᕋᐃᒡ ᓯᒪᐃᓚᒃ ᓴᖅᑭᑎᑦᑎᓚᐅᖅᐳᖅ ᐊᑲᐅᙱᓕᐅᕈᑕᐅᔪᒥ ᒪᓕᒐᓕᐅᕐᕕᖕᒥ ᒪᐃ 30−ᒥ, ᐊᐱᕆᓪᓗᓂ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᒥᓂᔅᑕᖓᓂ ᑕᐃᕕᑦ ᔪᐊᓇᓯᒥ ᐸᖅᓴᐃᓂᐅᔪᒥ ᐊᓯᐅᖅᑲᔪᒥ ᓯᑭᑑᖅᑎᐅᔪᒥ ᔭᐃᓴᓐ ᐸᓂᑲᒥ.

“ᐱᖓᔪᒋᓕᖅᑕᖓᓂ, ᐊᐱᕆᓂᐊᖅᐳᖓ ᐆᒥᖓ ᒥᓂᔅᑕᐅᔪᒧᑦ, ᐱᖓᔪᒋᓂᐊᓕᖅᐸᖓ ᐊᐱᕆᔭᐅᓂᖓᓂ: ᐊᖏᖅᓯᒪᓂᐊᖅᐸ ᑎᓕᐅᕆᓂᕐᒥ ᐃᒻᒥᒃᑰᖅᑐᒥ ᕿᒥᕐᕈᔭᐅᓂᖓᓂ ᐆᒧᖓ ᑭᖑᓪᓕᖅᐹᖑᔪᒥ ᐸᖅᓴᐃᓂᐅᓚᐅᖅᑐᒥ ᖃᒪᓂᑦᑐᐊᕐᒥ ᐃᓱᓕᓚᐅᖅᑐᒥ ᐱᓂᕐᓗᒡᔪᐊᕐᓂᐅᔪᒥ ᑎᒥᖓ ᓇᓂᔭᐅᓚᐅᕐᓂᖓᓂ?”

ᓯᒪᐃᓚᒃ ᓇᓗᓇᐃᖅᓯᓚᐅᖅᐳᖅ ᐊᐃᑉᕆᓕ 22−ᒥ, ᐊᐱᕆᓚᐅᖅᐳᖅ ᔪᐊᓇᓯᒥ ᐅᐸᒃᖢᓂᐅᒃ ᕿᒥᕐᕈᔭᐅᓂᖃᕐᓂᕐᒥ ᐸᖅᓴᐃᓂᐅᔪᒥ. ᐊᐃᕕᓕᖕᒥ ᒪᓕᒐᓕᐅᖅᑎ ᓵᓚᒪᓐ ᒪᓕᑭ ᐊᔾᔨᐸᓗᐊᓂ ᑐᒃᓯᕋᓕᐅᓚᐅᕆᕗᖅ ᒪᐃ 29−ᒥ ᒪᓕᒐᓕᐅᕐᕕᖕᒥ.

ᐊᐃᑉᕆᓕ 19−ᒥ, ᐸᓂᑲ, 21, ᐊᐅᓪᓚᓚᐅᖅᐳᖅ ᓯᑭᑑᒃᑯᑦ ᖃᒪᓂᑦᑐᐊᕐᒥ ᑲᖏᖅᖠᓂᕐᒧᑦ. ᐅᖃᐅᓯᐅᓚᐅᖅᐳᖅ ᐊᓯᐅᖅᑲᓂᖓᓂ ᑭᖑᓂᐊᒍᑦ ᑕᐃᑲᓂᑦᑕᐃᓐᓇᖅ ᐅᓪᓗᖓᓂ

ᐸᖅᓴᐃᔩᑦ ᐊᒻᒪ ᓴᐳᔾᔨᓂᕐᒥ ᑲᑎᙵᓂᐅᔪᓂ ᐊᐅᓪᓚᖅᑎᑕᐅᓚᐅᖅᐳᑦ ᖃᒪᓂᑦᑐᐊᕐᒥ ᐊᒻᒪ ᑲᖏᖅᖠᓂᕐᒥ ᖃᐅᑎᓪᓗᒍ, ᐱᓚᐅᖅᑎᓪᓗᒋᑦ ᐱᓕᕆᐊᒃᓴᐅᔪᓂ ᓈᓴᐅᓯᓂ ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᓐᓂ ᐊᐅᓚᑦᑎᔨᐅᔪᓂ.

ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᓐᓂ ᐊᐅᓚᑦᑎᔨᐅᔪᑦ ᐱᒡᒍᔾᔨᔨᑦ ᐊᑐᓲᖑᕗᑦ ᐱᓕᕆᐊᒃᓴᐅᔪᓂ ᓈᓴᐅᑎᓂ ᖃᐅᔨᓴᕐᓂᕐᒧᑦ ᑐᐊᕕᕐᓇᖅᑐᓂ ᐊᐅᓚᑕᐅᓂᐅᔪᓂ ᐊᒻᒪᓗ ᐱᔪᓐᓇᖅᑎᑦᑎᓂᕐᒥ ᐅᖅᓱᐊᓗᖕᒥ ᐊᒻᒪ ᐊᓯᖏᓐᓂ ᐊᑭᓕᕆᐊᓕᖕᓂ ᐸᖅᓴᐃᔨᐅᔪᓄᑦ. ᑖᒃᑯᓇᓂ ᐱᖃᙱᓪᓗᑎᒃ, ᐸᖅᓴᐃᔩᑦ ᐊᑭᓖᔭᕆᐊᖃᓲᖑᕗᑦ ᑕᒪᒃᑭᓂ ᐊᑭᐅᔪᓂ ᐸᖅᓴᐃᓂᕐᒧᑦ ᐊᐅᓚᑕᐅᓂᐅᔪᓂ ᓇᖕᒥᓂᖅ.

ᓈᓴᐅᑎᖃᙱᓪᓗᑎᒃ, ᐸᖅᓴᐃᔨᐅᓇᔭᖅᑐᑦ ᐊᑭᓖᔪᓐᓇᙱᑦᑐᓂ ᑖᒃᑯᓂᖓ ᐊᑭᐅᔪᓂ ᓄᖅᑲᖅᑎᑕᐅᓲᖑᕗᑦ ᐃᓚᐅᖃᑕᐅᓂᕐᒥ ᐊᐅᓚᑕᐅᓂᐅᔪᓂ.

ᐸᖅᓴᐃᔨᓂ ᑎᑭᕋᕐᔪᐊᕐᒥ ᐊᐱᕆᓚᐅᖅᓯᒪᒋᕗᑦ ᐱᓕᕆᐊᒃᓴᐅᔪᒥ ᓈᓴᐅᑎᒥᒃ ᐃᓚᐅᖃᑕᐅᔪᓐᓇᕐᓂᐊᕐᒪᑕ ᐸᖅᓴᐃᓂᐅᔪᒥ, ᑭᓯᐊᓂ ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᓐᓂ ᐊᐅᓚᑦᑎᔨᐅᔪᑦ ᐊᖏᓚᐅᙱᓚᑦ ᑐᒃᓯᕋᕐᓂᖓᓐᓂ.

ᐸᓂᑲᐅᑉ ᓯᑭᑑᖓ ᓇᓂᔭᐅᓚᐅᖅᐳᖅ 170 ᑭᓛᒥᑐᐸᓗᖕᓂ ᑎᑭᕋᕐᔪᐊᕐᒥ ᐊᐃᑉᕆᓕ 19−ᒥ, ᖃᓂᑦᑐᒥ ᐃᒡᓕᓂᐅᔪᒥ ᐊᑐᖅᑕᐅᕙᒃᑐᒥ ᑎᑭᕋᕐᔪᐊᕐᒥᐅᑕᓄᑦ.

ᑎᒥᖓ ᑎᖑᓂᐊᒍᑦ ᓇᓂᔭᐅᓚᐅᖅᐳᖅ ᕿᑎᖅᐸᓯᐊᓂ ᖃᒪᓂᑦᑐᐊᕐᒥ ᐊᒻᒪ ᑎᑭᕋᕐᔪᐊᒧᑦ.

“ᐃᓄᐃᑦ ᑎᑭᕋᕐᔪᐊᕐᒥ ᓇᖕᒥᓂᖅ ᑮᓇᐅᔭᖅᑖᕋᓱᒋᐊᖃᓚᐅᖅᐳᑦ ᓂᐅᕕᕐᓂᕐᒧᑦ ᐅᖅᓱᕐᒥ ᐊᒻᒪ ᓂᕿᓂᑦ ᐊᒻᒪ ᑕᐅᕗᙵᕐᓗᑎᒃ ᐊᒻᒪ ᐃᑲᔪᕐᓗᑎᒃ ᐸᖅᓴᐃᖃᑎᖃᕐᓂᕐᒥ ᐅᕙᑦᑎᓐᓂ. ᑕᐃᔅᓱᒪᓂ ᒐᕙᒪᒃᑯᑦ ᐅᕙᑦᑎᓐᓄᑦ ᐱᓕᕆᑦᑎᐊᓚᐅᙱᓚᑦ,” ᓯᒪᐃᓚᒃ ᐅᖃᓚᐅᖅᐳᖅ.

ᐅᓄᕐᓂᖅᓴᐅᔪᓂ ᐃᓄᖕᓂ ᐃᓚᐅᖃᑕᐅᔪᓂ ᐸᖅᓴᐃᓂᐅᔪᒥ ᐱᐅᓂᖅᓴᐅᓇᔭᖅᐳᖅ ᐱᓕᕆᑦᑎᐊᕐᓂᐅᔪᒥ, ᑎᑭᕋᕐᔪᐊᑉ ᒪᐃᔭᖓ ᐋᓕᕗᕐ ᓯᑉᑕᓐ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᖏᓐᓄᑦ ᒪᐃ ᐱᒋᐊᕐᓂᐸᓗᐊᓂ.

“ᐅᕙᓐᓄᑦ ᑐᑭᓯᓇᙱᑦᑎᐊᖅᐳᖅ,” ᓯᑉᑕᓐ ᐅᖃᓚᐅᖅᐳᖅ.

ᒪᐃ 31−ᒥ, ᓯᑉᑕᓐ ᐅᖃᓚᐅᖅᐳᖅ ᖁᔭᓕᓂᖓᓂ ᒪᓕᒐᓕᐅᖅᑎᑦ ᖃᐃᖁᔨᓂᐅᔪᒥ ᐃᒻᒥᒃᑰᖅᑐᒥ ᕿᒥᕐᕈᔭᐅᓂᖓᓂ.

“ᐊᔭᐅᕆᔭᐅᓂᖅᓴᐅᓂᖓᓂ ᒥᓂᔅᑕᒧᑦ, ᐱᐅᓂᖅᓴᐅᕗᖅ,” ᐅᖃᓚᐅᖅᐳᖅ.

ᔪᐊᓇᓯ ᐅᖃᓚᐅᖅᐳᖅ ᐊᐱᕆᓚᐅᕐᓂᖓᓂ ᓄᓇᕗᒻᒥ ᑐᐊᕕᕐᓇᖅᑐᒥ ᐊᐅᓚᑕᐅᓂᐅᔪᓂ ᕿᒥᕐᕈᓂᕐᒥ ᒫᓐᓇᐅᔪᒥ ᐱᓕᕆᐊᒃᓴᒧᑦ ᓈᓴᐅᑎᖓᓂ ᐊᑐᐊᒐᖓᓂ. ᑭᐅᓪᓚᕆᓚᐅᙱᓚᖅ ᓯᒪᐃᓚᖕᒥ ᐅᕝᕙᓘᓐᓃᑦ ᒪᓕᑭᐅᑉ ᑐᒃᓯᕋᕐᓂᖏᓐᓂ ᐃᒻᒥᒃᑰᖅᑐᒥ ᕿᒥᕐᕈᔭᐅᓂᖓᓄᑦ.

ᓯᒪᐃᓚᒃ ᐊᐱᕆᒃᑲᓐᓂᓚᐅᖅᐳᖅ ᒥᓂᔅᑕᒥ ᐊᖏᖅᓯᒪᓂᖓᓂ ᓇᓗᓇᐃᖅᓯᓂᕐᒥ ᐱᓕᕆᕝᕕᖓ ᑲᑎᒪᖃᑎᖃᕐᓂᖏᓐᓂ ᐸᖅᓴᐃᔩᑦ ᐊᒻᒪ ᓴᐳᔾᔨᓂᕐᒥ ᑲᑎᙵᓂᐅᔪᓂ ᖃᒪᓂᑦᑐᐊᕐᒥ, ᑲᖏᖅᖠᓂᖅ ᐊᒻᒪ ᑎᑭᕋᕐᔪᐊᕐᒥ.

ᐊᐱᖅᓱᖅᑕᐅᓂᐅᔪᒥ, ᓯᒪᐃᓚᒃ ᐅᖃᓚᐅᖅᐳᖅ ᒐᕙᒪᒃᑯᑦ ᕿᒥᕐᕈᓂᖃᖅᑎᑦᑎᓛᖅᑑᓂᖏᓐᓂ ᐸᖅᓴᐃᔨᐅᔪᓂ ᐊᐅᓚᑕᐅᓂᐅᔪᓂ ᑕᒪᐃᑎᒍᑦ, ᑭᓯᐊᓂ ᐆᒧᖓᓪᓚᕆᐅᙱᑦᑐᖅ ᑎᑭᕋᕐᔪᐊᕐᒥ ᖃᓄᐃᓐᓂᐅᓚᐅᖅᑐᒧᑦ.

“ᐸᒡᕕᓇᒐᓚᒃᐳᖅ ᐊᒻᒪ ᑲᒪᓇᖅᐳᖅ,” ᐅᖃᓚᐅᖅᐳᖅ. “ᑐᒃᓯᕋᕐᓂᕐᒥ ᐅᕝᕙᓘᓐᓃᑦ ᑐᑭᓯᒋᐊᕐᓂᐅᔪᒥ ᐱᓕᕆᙱᒃᑯᑎᒃ, ᖃᓄᕐᓕ ᑲᑎᖅᓱᐃᓗᑕ ᐱᐅᓯᒋᐊᖅᑎᑦᑎᓂᐊᖅᐱᑕ ᐅᕝᕙᓘᓐᓃᑦ ᐊᔭᐅᕆᓗᑕ ᐱᐅᓯᒋᐊᕈᑕᐅᔪᓂ?”

ᐅᖃᓚᐅᖅᐳᖅ ᑕᐃᒪᑐᖅ ᓄᓇᓕᖕᓂ ᐸᖅᓴᐃᔩᑦ ᐊᒻᒪ ᓴᐳᔾᔨᓂᕐᒥ ᑲᑎᙵᓂᐅᔪᑦ ᐅᖃᖃᑎᒋᔭᐅᓛᕐᓂᖏᓐᓂ ᓄᑖᙳᕆᐊᖅᑎᑕᐅᓂᐅᔪᓂ ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᓐᓂ ᐊᐅᓚᑦᑎᔨᐅᔪᓄᑦ.

ᒪᓕᒐᓕᐅᕐᕕᖕᒥ ᐱᓇᓱᐊᕈᓯᐅᓚᐅᖅᑐᒥ, ᔪᐊᓇᓯ ᐅᖃᓚᐅᖅᐳᖅ ᓄᑖᖑᔪᒥ ᑲᑐᔾᔨᖃᑎᒌᖑᔪᒥ ᐸᖅᓴᐃᔩᑦ ᐊᒻᒪ ᓴᐳᔾᔨᓂᕐᒥ ᐊᐅᓚᑕᐅᓂᐅᔪᓄᑦ ᐱᕙᓪᓕᐊᑎᑕᐅᓂᖓᓂ ᐱᓕᕆᖃᑎᖃᖅᖢᑎᒃ ᓄᓇᕗᒻᒥ ᕼᐋᒻᓚᒃᑯᑦ ᑲᑐᔾᔨᖃᑎᒌᖏᓐᓂ, ᑭᓯᐊᓂ ᐅᖃᕈᓐᓇᓚᐅᙱᓚᖅ ᖃᖓ ᐸᕐᓇᒃᓯᒪᓕᕋᔭᕐᓂᖏᓐᓂ.

“ᓂᕆᐅᒃᐳᒍᑦ ᐊᕐᕌᒎᓂᐊᖅᑐᒥ ᑕᐃᒪᓐᓇᒐᓚᒃ ᓂᕆᐅᒃᐳᒍᑦ ᐊᑐᓕᖅᑎᑕᐅᓯᒪᔪᖃᕐᓂᖓᓂ, ᑭᓯᐊᓂ ᒪᓕᒐᓕᐅᖅᑎᐅᖃᑎᒃᑲ ᖃᐅᔨᒪᑎᓐᓂᐊᖅᐸᒃᑲ ᓇᒦᓕᕐᓂᖏᓐᓂ,” ᔪᐊᓇᓯ ᐅᖃᓚᐅᖅᐳᖅ.

“ᕿᓚᒻᒥᐅᓂᖅᓴᒥ ᐱᐅᓂᖅᓴᐅᕗᖅ,” ᓯᒪᐃᓚᒃ ᐅᖃᓚᐅᖅᐳᖅ ᒪᐃ 31,−ᒥ ᓇᓗᓇᐃᖅᓯᓪᓗᓂ ᒥᓂᔅᑕ ᓇᓗᓇᐃᖅᓯᓚᐅᙱᓐᓂᖓᓂ ᐃᓚᐅᖃᑕᐅᓇᔭᕐᓂᖏᓐᓂ ᕼᐋᒻᓚᐅᔪᓂ.

“ᑕᐃᒫᒃ, ᓂᕆᐅᒃᐳᖓ ᑕᒪᓐᓇ ᐱᓕᕆᐊᖑᓂᐊᕐᓂᖓᓂ ᐊᐅᔭᐅᔪᒥ.”

ᔪᐊᓇᓯ ᑭᐅᓚᐅᙱᓚᖅ ᑐᒃᓯᕋᕐᓂᐅᔪᒥ ᐅᖃᐅᓯᒃᓴᓕᐅᕐᓂᕐᒧᑦ.