ᒥᑭᑦᑐᓂ ᓄᓇᓕᖕᓂ ᖃᓄᐃᓕᐅᓗᐊᖅᑐᓂᒃ ᓄᖅᑲᖅᑎᑦᑎᑲᑕᖕᓂᐊᖅᑐᓂᒃ ᐱᒋᐊᖅᐳᑦ ᑰᔾᔪᐊᕐᒥ

For the English version of this story, please see Mobile crisis intervention team launches in Kuujjuaq.

ᐱᓕᕆᐊᒃᓴᖅ ᐱᓕᕆᖃᑎᒌᓕᕐᑎᑦᑎᓯᒪᔪᖅ ᓄᓇᓕᖕᓂ ᓴᓇᔨᒥ ᐸᓖᓯᒥᓪᓗ ᑭᐅᑲᑕᖕᓂᐊᖅᑐᓂ 911-ᒧ ᐅᖃᓗᒍᑎᐅᔪᓂ ᐊᖏᒡᓕᒋᐊᕐᐳᖅ ᑰᔾᔪᐊᕐᒥ.

ᓄᓇᓕᖕᓂ ᖃᓄᐃᓕᐅᓗᖅᑐᓂ ᐱᓕᕆᐊᒃᓴᖅ ᐊᐅᓚᑕᐅᔪᖅ ᐅᑯᓇᙵᑦ ᓴᕿᔪᖅ, ᓄᓇᕕᒃᒥ ᑲᑐᔾᔨᖃᑎᒌᑦ ᓄᓇᓕᖕᓂ ᐊᑦᑕᓇᖅᑐᒦᑎᑦᑎᑦᑕᐃᓕᓂᕐᒧᑦ.

ᐱᓕᕆᔪᑦ ᐱᓕᕆᖃᑎᖃᕐᓯᒪᔪᑦ ᓄᓇᕕᒃᒥ ᐸᓖᓯᒃᑯᓐᓂ ᑰᔾᔪᐊᕐᒥ ᐱᒋᐊᖅᖢᑎᒃ ᐋᒐᓯ 25-ᒥ ᑭᐅᔨᐅᕙᒃᖢᑎᒃ ᒪᑯᓂᖓ ᐃᓱᒪᒃᑯᑦ ᐋᓐᓂᐊᖃᕐᓂᕐᒧᑦ ᖃᓄᐃᓕᐅᕈᑎᓂᒃ, ᐱᑦᑎᐊᖃᑦᑕᐅᑎᙱᓐᓂᕐᒧᑦ, ᐃᒻᒥᓃᕐᑎᑦᑎᑦᑕᐃᓕᓂᕐᒧᑦ ᐊᒻᒪ ᓱᕈᓯᕐᓂ ᐃᓅᓱᒃᑐᓂᓪᓗ ᐅᓗᕆᐊᓇᖅᑐᒦᑦᑐᓂᒃ.

ᐸᓖᓯᒃᑯᑦ ᐱᓕᕆᖃᑎᒌᒃᑐᑦ ᐃᓚᖃᖅᖢᑎᒃ ᒪᕐᕉᖕᓂ ᐃᓄᓕᕆᔩᖕᓂ, ᑐᑭᒧᐊᖅᑎᑦᑎᔨᒥ ᐊᒻᒪ ᐸᓖᓯᓂ ᓂᑭᑦᑖᑲᑕᒃᐸᒃᖢᑎᒃ.

“ᐃᑲᔪᑲᑕᒃᓯᒪᒐᑦᑕ ᐊᒻᒪ ᐃᑲᔪᕐᑐᐃᑲᑕᒃᓯᒪᓪᓗᑕ ᑲᑉᐱᐊᓵᕆᓐᓇᙱᑦᑐᒃᑯᑦ ᐊᑐᕐᖢᑕ ᓄᖃᖅᐸᓪᓕᐊᒍᑎᒃᓴᓂᒃ ᖃᓄᕐᓗ ᓄᓇᓕᖕᓂ ᑕᒪᓐᓇ ᑕᐃᒪᐃᑦᑐᓐᓃᕋᔭᕐᒪᖔᑕ ᑎᒍᔭᐅᑲᑕᙱᓐᓂᕐᓴᐅᓗᑎ ᐅᕝᕙᓘᓐᓃᑦ ᐋᓐᓂᐊᕐᕕᓕᐊᙱᓐᓂᕐᓴᐅᓗᑎᒃ,” ᐅᖃᕐᑐᖅ ᒫᑦ-ᐊᒪᓕ ᑐᕈᓚᑦ, ᓴᕿᔪᖅ ᐱᓕᕆᐊᖓᓄᑦ ᐱᕙᓪᓕᐊᔪᓕᕆᓂᕐᒧᑦ ᐊᐅᓚᑦᑎᔨ.

ᓯᕗᓪᓕᕐᐹᖅ ᓄᖅᑲᖅᑎᑦᑎᓇᓱᒃᑐᓂ ᐱᓕᕆᖃᑎᒌᒃᑐᑦ ᐱᒋᐊᓚᐅᕐᓯᒪᔪᑦ ᐳᕕᕐᓂᑐᕐᒥ 2019-ᖑᑎᓪᓗᒍ. ᑐᕈᓚᑦ ᐅᖃᓚᐅᕐᑐᖅ ᐱᓕᕆᖃᑎᒌᒃᑐᑦ ᐊᒃᑐᐃᓂᖃᑦᑎᐊᓚᐅᕐᓂᖏᓐᓂ ᓈᒻᒪᒃᑐᒃᑯᑦ ᓄᓇᓕᖕᓂ.

2024-ᒥ, ᐅᑯᓇᙵᑦ 595-ᓂ ᓄᖃᖅᑎᑦᑎᓂᖏᓐᓂ, 576 ᐊᓂᒍᕐᑎᑕᐅᔪᓐᓇᓚᐅᕐᑐᑦ ᐋᓐᓂᐊᕕᓕᐊᖅᑐᖃᕋᓂ ᐅᕝᕙᓘᓐᓃᑦ ᑎᒍᔭᐅᔪᖃᙱᖢᓂ, ᐅᖃᕐᑐᖅ.

ᓴᕿᔪᖅ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ ᓘᑲᓯ ᕗᐊᐃᑦᓕ-ᑕᖅᑭᐊᐱᒃ ᐅᖃᓚᐅᕐᑐᖅ ᐱᓕᕆᖃᑎᒌᒃᑐᑦ ᐱᓕᕆᐊᖃᖃᑦᑕᕐᓂᐊᕐᓂᖏᓐᓂ ᐊᑐᓗᐊᖃᑦᑕᕐᓂᕐᒥ ᐊᒻᒪᓗ ᐅᒃᐱᕈᓱᓗᐊᖃᑦᑕᙱᑦᑐᓂ ᓄᓇᓕᖕᓂ.

“ᓴᙱᓂᕐᓵᓗᖕᓂ ᐋᖓᔮᕐᓇᖅᑐᓂ ᓱᐴᕐᑐᒐᕐᓂ ᐱᑕᖃᕐᓂᕐᓴᐅᓕᕐᒪ ᑕᒫᓂ, ᒪᑯᒧᖓᓗ ᐃᓅᖃᑎᒌᖕᓂᒃᑯᑦ ᖃᓄᐃᕈᓘᔭᕈᑎᓄ ᑕᒪᒃᑯᐊ ᐱᒋᐊᖅᑕᐅᒃᑲᓐᓂᕈᑎᐅᓂᐊᖅᖢᑎᒃ ᓴᙱᓂᕐᓴᓂ ᐋᖓᔮᕐᓇᖅᑐᓂ ᑕᒪᐅᙵᕐᐸᓪᓕᐊᔪᓂᒃ,” ᐅᖃᕐᑐᖅ.

ᓴᕿᔪᖅ ᐱᓕᕆᐊᖃᕐᑐᑦ ᓄᓇᓕᖕᓂ ᐅᒃᐱᕆᖃᑎᒌᖕᓂᕐᓴᐅᓕᕈᓐᓇᖅᑎᓐᓇᓱᒃᖢᑎᒃ.

ᓄᓇᕕᒃᒥ ᐸᓖᓯᒃᑯᑦ ᐱᖓᓱᐃᓂᒃ ᐊᔾᔨᒌᙱᑦᑐᓂ ᖃᐅᔨᓴᑲᑕᒃᖢᑎᒃ ᑕᖅᑭᓂ ᖁᓕᐅᓕᕐᑐᓂ ᐃᓅᔪᓐᓃᑦᑐᖃᓚᐅᕐᑎᓪᓗ ᐸᓖᓯᓄ ᑲᒪᒋᔭᐅᔪᖅ ᐃᓅᔪᓐᓃᓚᐅᕐᑎᓪᓗᒍ.

ᖃᖓᑦᑎᐊᓵᖅ ᖃᓄᐃᓕᐅᕐᓂᖅᑕᖃᓚᐅᕐᒪᑦ ᐃᓄᒃᔪᐊᒃᒥ ᔪᓚᐃᖑᑎᓪᓗᒍ. ᓯᕗᓂᐊᒍᓪᓗ ᑲᖏᓱᐊᓗᔾᔪᐊᖅᒥᐅᑕᖅ ᐊᖑᑎ ᐃᓅᔪᓐᓃᖅᖢᓂ ᒪᐃᒥ ᐸᓖᓯᓄ ᐱᓕᕆᐊᖑᑎᓪᓗᒍ. ᐊᒻᒪᓗ ᓄᕕᐱᕆ 2024-ᒥ ᐸᓖᓯᒃᑯᑦ ᖁᑭᖅᓯᓚᐅᕐᓯᒪᔪᑦ ᑐᖂᑦᑎᓪᓗᑎ ᐊᖑᑎᒥ ᓴᓪᓗᐃᓂ ᐊᒻᒪᓗ ᑖᔅᓱᖓ ᒪᕐᕈᓕᐊᖑᖃᑎᖓ ᐋᓐᓂᖅᑎᑕᐅᓪᓗᓂ.

ᓄᓇᕕᒃᒥ ᐸᓖᓯᒃᑯᑦ ᐱᔨᑦᑎᕋᐅᑎᓕᕆᔨᓄ ᐊᖓᔪᖅᑳᖓᑕ ᑐᒡᓕᖓ ᔮᓐ-ᕗᕌᓐᓱᐊ ᒨᕆᓐ ᐅᖃᓚᐅᕐᑐᖅ ᐱᓕᕆᖃᑎᒌᑦᑎᐊᕐᓂᕐᓴᐅᓕᕐᓂᐊᕐᓗᑎᒃ ᐸᓖᓯᒃᑯᑦ ᐊᒻᒪ ᓄᓇᖃᕐᑐᐃ ᐅᕘᓇ ᓄᖅᑲᖅᑎᑦᑎᕚᓪᓕᕈᑎᐅᓇᓱᒃᑐᒃᑯᑦ ᐱᓕᕆᐊᒧᑦ.

“ᐅᖃᖃᑎᖃᖃᑦᑕᕈᒪᓂᕐᒨᙱᑦᑐᖅ ᐃᓄᖕᓄᑦ, ᑭᓯᐊᓂᓕ ᑐᓴᕐᕕᒋᑲᑕᒡᓗᑎᒍᑦ,” ᒨᕆᓐ ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ ᐱᔾᔪᑎᖃᖅᖢᓂ ᖁᐊᕐᓵᕐᓇᖅᑐᓂ ᐅᖄᓚᕝᕕᐅᖃᑦᑕᕐᓂᖏᓐᓂ. “ᐃᒪᓐᓇᑦᑕ ᐱᓕᕆᐊᑦᑎᒍᑦ ᐅᖃᖃᑎᖃᖃᑦᑕᕐᓂᕐᒥ ᓂᙵᐅᒪᔪᓂ ᑐᓵᕙᒃᖢᑕ ᐊᒻᒪᓗ ᐱᑦᑎᐊᖃᑦᑕᐅᑎᙱᓗᐊᖅᑐᐊᓗᖕᓄ ᐋᓐᓂᑐᐃᓐᓇᕆᐊᓕᖕᓄᑦ.

ᐅᑯᓄᖓᓕ ᖃᓄᐃᓕᐅᓗᐊᖅᑐᓂ ᓄᖅᑲᖅᑎᑦᑎᓇᓱᖃᑦᑕᖅᑐᓂᒃ, ᐃᖅᑲᓇᐃᔭᖅᑎᑖᕆᐊᖃᓚᐅᕐᒪᑕ ᐱᓕᕆᐊᖃᓕᒪᙱᑦᑐᒥ ᑭᓯᐊᓂᓕ ᖃᐅᔨᒪᓗᓂ ᓈᒻᒪᙱᓕᐅᕈᑎᐅᔭᑦᑐᓂᒃ ᑕᒫᓃᑦᑐᓄᑦ ᐃᓄᖕᓄᑦ, ᓲᕐᓗ ᒪᐅᓇ ᐃᒡᓗᖃᙱᓗᐊᕐᓂᕐᒧᑦ ᐊᒻᒪ ᓱᐴᕐᑐᒐᕐᓄᑦ ᐋᖓᔮᕐᓇᖅᑐᓂᒃ ᐊᑐᓗᐊᕐᓂᕐᒧᑦ, ᕗᐊᐃᑦᓕ-ᑕᖅᑭᐱᒃ ᐅᖃᕐᑐᖅ.

“ᐱᓇᓱᒻᒪᕆᒃᑲᑦᑕ ᑭᓇᑐᐃᓐᓇᖅ ᑕᒪᐅᙵᑐᐃᓐᓇᔾᔮᙱᓪᓗᓂ ᑭᓯᐊᓂᓕ ᖃᐅᔨᒪᔪᓐᓇᕐᓗᓂ ᑕᒪᒃᑯᓂᖓ,” ᐅᖃᕐᑐᖅ.

ᐅᑯᐊ ᐱᓕᕆᖃᑎᒌᒃᑐ ᐅᖃᕐᕕᐅᔪᓐᓇᖅᑐᑦ 911-ᒥ. ᒨᕆᓐ ᐅᖃᓚᐅᕐᑐᖅ ᐃᓱᒪᖕᒪᑕ ᑐᕌᖓᔪᒥ ᐅᖄᓚᕝᕕᐅᔪᓐᓇᕐᓯᓗᑎᒃ ᐳᕕᕐᓂᑐᖅᒥᑦ.

ᓴᕿᔪᖅ ᐃᓱᒪᔪᑦ ᐊᖏᒡᓕᒋᐊᖅᑎᒃᑲᓐᓂᕈᒪᓪᓗᒍ ᐱᓕᕆᐊᕆᔭᖓ ᐊᓯᖏᓐᓄᑦ ᓄᓇᕕᒃᒥ ᓄᓇᓕᖕᓄᑦ, ᑭᓯᐊᓂᓕ ᕗᐊᐃᑦᓕ-ᑕᖅᑭᐊᐱᒃ ᐅᖃᕐᑐᖅ ᑕᒪᓐᓇ ᑕᐃᒪᐃᑦᑐᓐᓇᕐᓂᖓᓂ ᐃᑲᔫᑎᒃᓴᖅᑖᕈᓐᓇᖅᐸᑕ ᐊᒻᒪ ᐃᒡᓗᒃᓴᖃᕈᓐᓇᕐᐸᑕ ᐱᓕᕆᔨᓄᑦ ᓄᓇᓕᖕᓂ.

ᐱᒋᐊᕈᑎᒋᔭᐅᔪᖅ ᑰᔾᔪᐊᖅᒥ ᐃᑲᔫᑎᑖᕐᓯᒪᓚᐅᕐᑐᖅ ᐅᑯᓇᙵᓪᓗᐊᑕᖅ ᑭᒃᑯᓕᒫᓄᑦ ᐊᑦᑕᓇᖅᑐᒦᑎᑦᑕᐃᓕᓂᕐᒧᑦ ᒥᓂᔅᑕᒥ ᐃᑲᔪᖅᑕᐅᓪᓗᑎᒃ ᑲᑎᕕᒃ ᐊᕕᒃᑐᕐᓯᒪᓂᒃᑯᑦ ᒐᕙᒪᒃᑯᓐᓄᑦ ᐊᒻᒪ ᒪᑭᕝᕕᒃᑯᓐᓄᑦ, ᑐᕉᓚᑦ ᐅᖃᕐᑐᖅ.