ᐅᖓᓯᒃᑐᓂ ᐱᖤᙱᓴᖅᑕᐃᓕᔾᔪᑎᓂᒃ ᐱᓕᕆᐊᖃᖅᑐᑦ ᐅᖅᓱᖅᑐᕐᒧᐊᕐᓂᐊᖅᑐᑦ, ᑕᓗᕐᔪᐊᓄᓪᓗ

For English version, see Mobile rabies clinics coming to Gjoa Haven, Taloyoak

ᐅᖅᓱᖅᑑᖅ ᐊᒻᒪ ᑕᓗᕐᔪᐊᖅᒥᐅᑦ ᐅᐸᒃᑕᐅᓚᐅᕐᑐᑦ ᐅᑯᓇᙵ ᓂᕐᔪᑎᓄᑦ ᐋᓐᓂᐊᓯᐅᖅᑎᓂᒃ (Veterinarians Without Borders) ᑕᒪᑐᒪᓂ ᐱᓇᓱᐊᕈᓯᕐᒥ ᐊᒻᒪ ᐱᓇᓱᐊᕈᓯᐅᓚᐅᕐᑐᒥ ᐱᖤᙱᓴᖅᑕᐃᓕᔾᔪᑎᓂᒃ ᐱᓕᕆᐊᖃᖅᖢᑎᒃ.

ᐅᑯᐊ ᑮᓇᐅᔭᓕᐅᕋᓱᙱᖢᑎᒃ ᑲᑐᔾᔨᖃᑎᒌᑦ ᐱᐅᓯᕚᓪᓕᖅᑎᑦᑎᓂᕐᒥᒃ ᓂᕐᔪᑎᓄᑦ ᖃᓄᐃᑦᑕᐃᓕᑎᑦᑎᓂᕐᒥ ᐅᖅᓱᖅᑑᕐᒦᓚᐅᕐᒪᑕ ᓯᑎᐱᕆ 29-ᒥ ᐅᒃᑑᐱᕆ 2-ᒧ ᐊᒻᒪᓗ ᑕᓗᕐᔪᐊᓃᖢᑎᒃ ᐱᓇᓱᐊᕈᓯᓕᒫᖅ.

ᑖᒃᑯᐊ ᑲᑐᔾᔨᖃᑎᒌᑦ ᑐᕌᒐᖓ ᑐᓴᐅᒪᑎᑦᑎᓕᕈᒪᒪᓪᓗᑎᒃ ᖃᓄᖅ ᑲᐱᓯᖃᑦᑕᕐᓂᕐᒥᒃ ᕿᒧᒃᓯᐅᑎᓂᒃ ᕿᒻᒥᓂᒃ ᐱᖤᙱᓴᖅᑕᐃᓕᔾᔪᑎᓂᒃ ᐊᒻᒪᓗ ᓄᓇᓕᖕᓂ ᐊᔪᕈᓐᓃᖅᓴᖅᑎᑦᑎᓪᓗᑎᒃ ᖃᓄᐃᓕᐅᕈᓐᓇᕐᓂᖏᓐᓂᒃ ᕿᒻᒥᓂᒃ ᑲᒪᒋᔭᖃᕈᓐᓇᕐᓂᕐᒥᒃ, ᐅᖃᓚᐅᕐᑐᖅ ᑲᓇᑕᐅᑉ ᐅᐊᖕᓇᖓᓂᒃ ᐱᓕᕆᐊᒃᓴᓄᑦ ᐊᐅᓚᑦᑎᔨ ᒧᕇᒃ ᕚᓐ ᑐ ᕕᐊᑕᓐ.

“ᖁᕕᐊᒋᒐᒃᑯ ᐱᓕᕆᖃᑎᖃᕈᓐᓇᕐᓂᑦᑎᓐᓂᒃ ᓄᓇᓕᖕᓂ ᓄᓇᖃᖅᑐᓂᒃ ᑕᐅᑐᖕᓂᖏᓐᓂᒃ ᕿᒻᒦᑦ ᖃᓄᐃᙱᑦᑐᕐᓂᒃ ᐊᒻᒪ ᐃᓄᖕᓂ ᖃᓄᐃᙱᑦᑐᓂᒃ ᐊᒻᒪᓗ ᑕᒪᒃᑯᓂᖓ ᐱᔨᑦᑎᕋᐅᑎᓂᒃ ᐊᑐᐃᓐᓇᖃᓕᖁᓪᓗᒋᑦ,” ᐅᖃᕐᑐᖅ.

ᑕᓪᓕᒪᑦ ᐃᓄᐃᑦ ᐅᑯᓇᙶᖅᑐᑦ ᓂᕐᔪᑎᓄᑦ ᐋᓐᓂᐊᓯᐅᖅᑎᑦ (Veterinarians Without Borders) ᐅᓱᖅᑑᕐᒧᑦ ᐊᒻᒪ ᑕᓗᕐᔪᐊᓅᓚᐅᕐᒪᑕ ᐱᓕᕆᔭᖅᑐᖅᖢᑎᑦ, ᐃᓚᖃᖅᖢᑎᒃ ᒪᕐᕉᖕᓂ ᓘᒃᑖᕐᓂᒃ ᓂᕐᔪᑎᓄᑦ. ᒪᕐᕉᖕᓂ ᓂᕐᔪᑎᓄᑦ ᐱᓕᕆᔾᔪᑎᓕᕆᔨᓂᒃ ᐊᒻᒪ ᐃᑲᔪᖅᑎᒃᓴᒥᒃ, ᕚᓐ ᑐ ᕕᐊᑕᓐ ᐅᖃᓚᐅᕐᑐᖅ.

ᐅᓇ ᐱᓕᕆᐊᖃᕐᓂᖅ ᐃᑲᔪᕈᑎ ᓄᓇᓕᖕᓂ ᓇᖕᒥᓂᖅ ᐊᔪᕈᓐᓃᕈᓐᓇᖁᓪᓗᒋᑦ ᐱᖤᙱᓴᖅᑐᓂᒃ ᐱᓕᕆᐊᖃᕈᓐᓇᕐᓂᕐᒥᒃ ᑎᑭᑎᑦᑎᔭᕆᐊᖃᙱᓪᓗᑎᒃ, ᐅᖃᕐᑐᖅ ᕚᓐ ᑐ ᕕᐊᑕᓐ.

ᑖᒃᑯᓂᖓ ᐱᓕᕆᔪᓐᓇᖅᑐᓂ ᐅᓄᕐᓯᑎᑦᑎᓂᖅ ᐱᒻᒪᕆᐅᖕᒪᓐ ᓲᖃᐃᒻᒪ ᓂᕐᔪᑎᓂᒃ ᑲᒪᒋᔭᖃᕐᓂᖅ ᐅᖓᓯᒌᒃᑐᒥᒃ ᓄᓇᓕᖕᓂ ᐊᒃᓱᕈᓐᓇᕐᐸᖕᒪᑦ ᐊᒻᒪᓗ ᐊᐅᓪᓚᖅᑎᑦᑎᔭᕆᐊᖃᖅᖢᑎᒃ ᑲᒪᒋᔭᐅᔪᒃᓴᓂᒃ.

“ᐃᓱᒪᙳᐊᕈᓐᓇᙱᓐᓇᒪᓘᓐᓃᑦ ᐊᑐᐃᓐᓇᖃᙱᓪᓗᖓ ᑎᒍᐊᓐᓄᑦ ᑲᒪᒋᔭᖃᕈᓐᓇᖅᑐᓂᒃ ᐊᒻᒪᓗ ᐅᖓᓯᒃᑐᒦᖢᑎ ᑕᒪᓐᓇᓗ ᐊᑭᑐᓪᓗᓂ ᓂᕐᔪᑎᓄᑦ ᐋᓐᓂᐊᓯᐅᖅᑎᖃᕋᓱᒋᐊᒃᓴᖅ,” ᕚᓐ ᑐᕕᐊᑕᓐ ᐅᖃᕐᑐᖅ.

ᓂᕐᔪᑎᓄᑦ ᐋᓐᓂᐊᓯᐅᖅᑎᑦ (Veterinarians Without Borders) ᓄᓇᓕᖕᓄᑦ ᐅᐸᒍᑎᕙᒃᑐᑦ ᕼᐋᒻᒪᓚᒃᑯᓐᓄᑦ ᐃᓚᒋᔭᐅᔪᒥ ᑎᑭᖁᔭᐅᓪᓗᑎᒃ, ᐅᖃᕐᑐᖅ. ᑖᒃᑯᐊᓗ ᕼᐋᒻᒪᓚᐅᔪᑦ ᐋᖅᑭᒃᓱᐃᓕᖅᐸᒃᖢᑎᒃ ᐊᐅᓚᑦᑎᓇᔭᖅᑐᓂᒃ ᑲᒪᒋᔭᖃᕐᓂᐊᖅᑐᓂᒃ.

ᓄᕕᐱᕆᐊᒪᐅᕐᓯᒪᔪᒥ ᑎᑭᖢᒍ ᔭᓄᐊᕆ ᐱᒋᐊᓕᖅᑎᓪᓗᒍ, ᓄᓇᕗᒥᑦ ᒐᕙᒪᒃᑯᑦ ᓇᓗᓇᐃᕐᓯᓚᐅᕐᒪᑕ 7-ᓂ ᐱᖤᙱᓴᖅᑐᓂᒃ ᑎᕆᒐᓂᐊᕐᔪᒃᑕᖃᓚᐅᕐᓂᖓᓂᒃ ᓄᓇᕗᒥᑦ. ᑕᐃᒪᓕ ᑖᓐᓇ ᐱᖤᙱᓴᕐᓂᖅ ᑎᕆᒐᓂᐊᕐᔪᒃᓄᑦ ᐋᓐᓂᐊᕆᔭᐅᔭᕐᓂᖓᓄᑦ ᑕᒪᒃᑯᐊ ᑎᕆᒐᓂᐊᕐᔪᐃᑦ ᐅᓄᕐᓯᕚᓪᓕᖅᐸᑕ ᑕᐃᒪᓕ ᐱᖤᙱᓴᖅᑐᑦ ᐅᓄᕐᓂᕐᓴᐅᓇᔭᕐᓂᖏᓐᓂᒃ, ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐆᒪᔪᓕᕆᔨᖏᓐᓄᑦ ᐊᕕᒃᑐᖅᓯᒪᓂᒃᑯᑦ ᐊᐅᓚᑦᑎᔨ ᕿᑭᖅᑖᓘᑉ ᓂᒋᐊᓄᑦ, ᔮᓇᑕᓐ ᐱᓐ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᖓᑦᑎᐊᓵᖅ.

ᒫᓐᓇᓕ, ᐱᖤᙱᓴᕐᓂᕐᒧᑦ ᑲᐴᑎᑦ ᕿᒪᒃᑕᐅᓚᐅᕐᑐᑦ ᓄᓇᓕᖕᓄᑦ ᐊᒻᒪᓗ ᐃᓱᒪᒐᓗᐊᖅᖢᑎᒃ ᑖᓐᓇ ᐱᓕᕆᐊᖑᔪᖅ ᐊᖏᒡᓕᕚᓕᕐᓂᐊᖁᓪᓗᒍ, ᕚᓐ ᑐ ᕕᐊᑕᓐ ᐅᖃᕐᑐᖅ.

ᐅᑯᐊ ᓂᕐᔪᑎᓄᑦ ᐋᓐᓂᐊᓯᐅᖅᑎᑦ Veterinarians Without Borders ᕿᑎᕐᒥᐅᓄᑦ ᐅᐸᒍᑎᑎᓪᓗᒋᑦ ᐅᖃᓚᐅᕐᑐᖅ ᑖᒃᑯᐊ ᑲᑐᔾᔨᖃᑎᒌᑦ ᕿᑭᖅᑕᖅᔪᐊᖅᒧᑦ ᐊᒻᒪ ᑭᒻᒥᕈᒻᒨᓚᐅᕐᓂᖏᓐᓂᒃ ᒫᔅᓯᐅᑎᓪᓗᒍ.