ᐅᓄᕐᓂᖅᓴᓂ ᑎᕆᒐᓂᐊᕐᓂ ᑐᑭᖃᖅᐳᖅ ᐅᓄᕐᓂᖅᓴᓂ ᐱᖦᖤᙱᓴᕐᓂᐅᔪᒥ, ᐅᖃᖅᐳᖅ ᖃᐅᔨᓴᖅᑎ
ᐱᑕᖃᑦᑎᐊᙱᓐᓂᖓᓂ ᓂᕿᒋᔭᐅᒐᔪᒃᑐᓂ ᐊᒻᒪ ᐱᑕᖃᙱᓗᐊᕐᓂᖓᓂ ᓴᕆᐅᕐᒥ ᓯᑯᖓᓂ ᑐᕌᖅᑎᑦᑎᓂᖃᖅᐳᖅ ᐆᒪᔪᓂ ᑕᓯᐅᔭᕐᔪᐊᑉ ᓯᒡᔭᖅᐸᓯᖓᓄᑦ ᓄᓇᓕᖕᓄᑦ
ᖁᑦᑎᒃᑐᒥ ᑎᕆᒐᓂᐊᕐᓂ ᐅᓄᕐᓂᐅᔪᓂ ᑲᑎᙵᓂᖃᖅᑐᒥᓪᓗ ᑲᑕᒃᐸᓪᓕᐊᓂᐅᔪᒥ ᓂᕿᒃᓴᓂ ᑐᕌᖅᑎᑦᑎᓂᖃᖅᐳᖅ ᐆᒪᔪᓂᑦ ᐃᓚᖏᓐᓄᑦ ᓄᓇᕕᖕᒥ ᓄᓇᓕᐅᔪᓄᑦ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ)
For English version, see Fox population spike raises risk of rabies on Nunavik’s Hudson coast: researcher
ᐅᓄᕐᓂᖅᓴᓂ ᑎᕆᒐᓂᐊᕐᓂ ᐃᖏᕐᕋᕙᓪᓕᐊᕗᑦ ᐃᓚᖏᓐᓄᑦ ᓄᓇᕕᖕᒥ ᓄᓇᓕᐅᔪᓄᑦ ᑕᒪᑐᒪᓂ ᐅᑭᐅᖑᔪᒥ, ᓇᒃᓴᖅᖢᑎᒃ ᐱᕈᖅᐸᓪᓕᐊᔪᒥ ᐅᓗᕆᐊᓇᕐᓂᐅᔪᒥ ᐱᖦᖤᙱᓴᕐᓂᐅᔪᒥ.
ᐱᖦᖤᙱᓴᕐᓂᐅᔪᖅ ᐋᓐᓂᐊᕈᑕᐅᖏᓐᓇᓲᖑᕗᖅ ᑎᕆᒐᓂᐊᕐᓂ ᐅᓄᕐᓂᐅᔪᓄᑦ, ᑐᑭᖃᖅᑐᒥ ᐃᖏᕐᕋᐃᓐᓇᐅᔭᖅᑐᖅ, ᐅᖃᓚᐅᖅᐳᖅ ᐋᓐᑐᕋᐃᔭᔅ ᓵᕝᕼᐅᓱᕐ-ᑳᐱᓐᑎᐅᕐ, ᐅᖃᖅᑎᐅᔪᖅ ᓄᓇᕕᖕᒥ ᐊᕕᒃᓯᒪᓂᐅᔪᒥ ᑲᑎᒪᔨᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ
ᐊᐃᑦᑐᐃᔪᓐᓇᖅᐳᑦ ᐋᓐᓂᐊᕐᓇᐅᔪᒥ ᓄᓇᓕᖕᓂ ᕿᒻᓄᑦ ᐊᒻᒪ “ᐃᒻᒪᖄ ᐃᓄᖕᓄᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ “ᑭᒃᑯᓕᒫᑦ ᐅᔾᔨᖅᓱᑦᑎᐊᕆᐊᖃᖅᐳᑦ.”
ᑎᕆᒐᓂᐊᕐᓂ ᐅᓄᕐᓂᐅᔪᑦ ᖁᕝᕙᒐᔪᒃᐳᑦ ᐊᒻᒪ ᑲᑕᒃᐸᒃᖢᑎᒃ ᐱᓕᖅᑭᒃᑕᕐᓂᕐᒥ ᐊᑐᕐᓂᐅᔪᒥ ᐊᕐᕌᒍᑦ ᐱᖓᓱᓂ ᑕᓪᓕᒪᓄᑦ, ᐅᖃᓚᐅᖅᐳᖅ ᒋᔭᐅᒻ ᓱᐊᕐ, ᐆᒪᔪᐃᑦ ᐃᓕᖅᑯᓯᖏᓐᓂ ᖃᐅᔨᓴᖅᑎ ᑯᐸᐃᖕᒥ ᐊᕙᑎᓕᕆᓂᕐᒧᑦ ᒥᓂᔅᑕᖃᕐᕕᖓᓂ, ᐅᐃᕖᑎᑐᑦ ᐊᐱᖅᓱᖅᑕᐅᓂᐅᔪᒥ.
ᐅᓄᕐᓂᐅᔪᑦ ᐊᖏᒡᓕᒋᐊᖅᓯᒪᕗᖅ ᖁᔭᓐᓇᒦᒃ ᐊᕐᕌᒍᒐᓴᑦᑎᐊᕙᖕᓂ ᐆᒪᔫᑉ ᓂᕿᓪᓗᐊᑕᕆᔭᖓᓐᓄᑦ — ᐊᕕᙵᐃᑦ, ᒥᑭᖦᖢᑎᒃ ᐊᕕᙵᐅᔪᑦ ᓇᓂᔭᐅᒐᔪᒃᑐᓂ ᐅᑭᐅᖅᑕᖅᑐᒥ ᓇᐹᖅᑐᖃᕈᓐᓇᙱᑦᑐᒥ.
“[ᑎᕆᒐᓂᐊᑦ ᐅᓄᕐᓂᖏᑦ] ᐱᓕᖅᑭᒃᑕᕐᓂᖓ ᑲᓱᖃᑎᖃᕐᔪᐊᖅᐳᖅ ᐊᕕᙵᕐᓄᑦ ᐅᓄᕐᓂᐅᔪᓂ ᐱᓕᖅᑭᒃᑕᕐᓂᖏᓐᓂ,” ᓱᐊᕐ ᐅᖃᓚᐅᖅᐳᖅ.
2023−ᒥ, ᖁᕝᕙᕆᐊᕐᓂᐅᔪᒥ ᐊᕕᒃᓯᒪᓂᐅᔪᒥ ᐊᕕᙵᓄᑦ ᐅᓄᕐᓂᖏᓐᓂ ᑕᑯᔭᐅᓚᐅᖅᐳᖅ ᓴᓪᓗᐃᑦ ᖃᓂᒋᔭᖓᓂ ᑲᑎᙵᓂᐅᔪᓂ ᑲᓇᑕᒥ ᑕᑯᓐᓇᒐᒃᓴᓕᕆᔨᐅᔪᓂ ᓄᓇᒧᑦ.
“ᐊᕕᙵᖃᕐᔪᐊᓕᕌᖓᑦ, ᑎᕆᒐᓂᐊᑦ ᐱᕚᓪᓕᓲᖑᕗᑦ ᐊᒻᒪ ᕿᑐᕐᙱᐅᒃᑲᓐᓂᕐᔪᐊᕐᓗᑎᒃ,” ᐅᖃᓚᐅᖅᐳᖅ ᓱᐊᕐ, ᐃᓚᒋᐊᖅᓯᓪᓗᓂ ᐊᕕᙵᐃᑦ ᐅᓄᕐᓂᖏᑦ ᖁᑦᑏᓐᓇᓚᐅᖅᐳᖅ 2024−ᒥ, ᓴᖅᑭᑎᑦᑎᔪᒥ “ᒪᕐᕈᐃᓕᖓᔪᒥ ᖁᕝᕙᕆᐊᕐᓂᐅᔪᒥ.”
ᐱᑕᖃᕐᔪᐊᖅᑐᒥ ᓂᕿᒃᓴᖏᓐᓂ ᐃᑲᔪᖅᓱᐃᓚᐅᖅᐳᖅ ᐊᓯᐊᓂ ᐊᕐᕌᒎᑉ ᐃᓚᖓᓐᓂ ᐃᕐᓂᐅᕐᔪᐊᕐᓂᐅᔪᓂ ᑎᕆᒐᓂᐊᕐᓂᑦ.
ᑕᒪᑐᒪᓂ ᐊᕐᕌᒎᔪᒥ, ᓱᐊᕐ ᐅᖃᓚᐅᖅᐳᖅ, ᖁᑦᑎᒃᑐᒥ ᑎᕆᒐᓂᐊᕐᓂ ᐅᓄᕐᓂᐅᔪᓂ ᑲᑎᙵᓂᖃᖅᑑᔮᖅᐳᖅ ᐱᓇᖕᓇᒥ ᐃᓚᖓᓐᓂ ᓄᓇᕕᖕᒥ.
ᐊᕕᙵᐃᑦ ᐅᓄᕐᓂᖏᑦ ᑲᑕᒃᐸᓪᓕᐊᓕᖅᐳᖅ, ᐊᑕᐅᑦᑎᒃᑯᑦ ᐱᑕᖃᙱᓗᐊᕐᓂᖓᓂ ᑕᕆᐅᕐᒥ ᓯᑯᖓᓂ ᐊᔪᕐᓇᖅᑎᑦᑎᒃᑲᓐᓂᖅᐳᖅ ᑎᕆᒐᓂᐊᕐᓄᑦ ᓇᓂᓯᓂᕐᒥ ᓂᕿᒃᓴᒥᑦ.
“ᒫᓐᓇᐅᔪᒥ ᐊᕐᕌᒎᔪᒥ, ᑎᓯᔪᒥ ᓯᓈᑕᖃᒐᔪᒃᐳᖅ ᑕᕆᐅᑉ ᓯᓈᖓᓂ ᑎᕆᒐᓂᐊᕐᓄᑦ ᐱᓂᕐᒥ ᓇᑦᑎᕐᓂ ᑐᖁᖓᔪᓂ ᐊᒻᒪ ᐊᓯᖏᓐᓂ ᑕᕆᐅᕐᒥ ᓯᑯᒥ ᐃᑲᔪᕈᑎᒃᓴᓂ,” ᓱᐊᕐ ᐅᖃᓚᐅᖅᐳᖅ.
“ᒫᓐᓇ ᖃᓄᐃᓐᓂᕐᒦᑉᐳᒍᑦ ᓂᕿᒃᓴᖃᑦᑎᐊᙱᓐᓂᖓᓂ ᓄᓇᒥ, ᐊᒻᒪ ᐊᑐᐃᓐᓇᖃᙱᓚᖅ ᑕᕆᐅᕐᒧᑦ. ᑕᑯᓯᒪᔭᑦᑎᓐᓂ, ᑎᕆᒐᓂᐊᑦ ᐅᑎᖅᓯᒪᔫᔮᖅᐳᑦ ᓄᓇᓕᖕᓄᑦ” ᓂᕆᓪᓗᑎᒃ ᓂᕿᓂᒃ ᐊᒥᐊᒃᑯᓂ ᕿᒪᒃᑕᐅᔪᓂ ᐃᓄᖕᓂ.
ᑎᕆᒐᓂᐊᑦ ᑕᑯᔭᐅᓯᒪᕗᑦ ᓴᓪᓗᓂ ᐃᓂᐅᔪᓄᑦ ᐅᔭᕋᖕᓂᐊᕐᕕᖕᓂ ᑕᖕᒫᕐᕕᓂ ᓄᓇᕕᐅᑉ ᕿᑎᐊᓂ ᐄᔫ ᐃᔅᑦᓯᒧᑦ ᑯᕇ ᓄᓇᓕᐅᔪᓂ.
“ᑎᕆᒐᓂᐊᑦ ᕿᓂᖅᑑᔮᖅᐳᑦ ᓂᕿᓂᑦ, ᐊᒻᒪ ᐊᑲᐅᙱᓕᐅᕈᑎᖃᖅᐳᒍᑦ ᑕᒪᒃᑭᓂ ᓯᒡᔭᖅᐸᓯᖕᓂ ᓄᓇᓕᐅᔪᓂ ᐊᒻᒪ ᐅᔭᕋᖕᓂᐊᕐᕕᖕᓂ ᐃᓂᐅᔪᓂᑦ,” ᐅᖃᓚᐅᖅᐳᖅ ᓱᐊᕐ.
ᓄᓇᕕᖕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᐱᓕᕆᖃᑎᖃᖅᐳᑦ ᓄᓇᓕᖕᓂ ᑲᑐᔾᔨᖃᑎᒌᖑᔪᓂ ᐊᒻᒪ ᐊᕙᑎᓕᕆᓂᕐᒧᑦ ᒥᓂᔅᑕᖃᕐᕕᖕᒥ ᐊᐅᓚᑦᑎᓂᕐᒥ ᑭᐅᓂᐅᔪᓂ ᖁᑦᑎᒃᑐᒥ ᑎᕆᒐᓂᐊᕐᓂ ᐅᓄᕐᓂᐅᔪᓄᑦ.
ᓵᕝᕼᐊᐅᓱᕐ-ᑳᐱᓐᑎᐅᕐ, ᑲᑎᒪᔨᐅᔪᓪᓗ, ᑐᓂᓯᓚᐅᖅᐳᑦ ᑎᑎᕋᖅᓯᒪᓂᐅᔪᒥ ᐱᓕᕆᓂᐅᔪᓂ ᐃᓄᐃᑦ ᐃᒻᒥᓂᒃ ᓴᐳᔾᔨᓯᒪᔪᓐᓇᕐᓂᖏᓐᓂ ᐱᖦᖤᙱᓴᕐᓂᐅᔪᒧᑦ:
- ᐊᑐᕐᓗᑎᑦ ᐊᒡᒑᖕᓂᑦ ᐊᒻᒪ ᐊᑐᖅᐸᒡᓗᑎᑦ ᓴᓗᒪᑦᑎᐊᕐᓂᐅᔪᒥ ᑲᒪᒋᔭᖃᖅᑎᓪᓗᑎᑦ ᑐᖁᖓᔪᓂ ᐆᒪᔪᓂᑦ;
- ᐃᑲᔪᖅᑕᐅᓂᖃᑲᐅᑎᒋᓗᑎᑦ ᑮᔭᐅᒍᕕᑦ, ᕿᓱᒃᑕᐅᒍᕕᓪᓘᓐᓃᑦ ᕿᒻᒥᕐᒧᑦ, ᑎᕆᒐᓂᐊᕐᒧᑦ ᐅᕝᕙᓘᓐᓃᑦ ᐊᓯᐊᓂ ᓄᓇᒥᐅᑕᒥ ᐆᒪᔪᕐᒥ;
- ᐅᖓᓯᒋᓗᒋᑦ ᓄᓇᒥᐅᑕᓂ ᐆᒪᔪᓂ, ᖃᓂᒡᓕᙱᓪᓗᒋᑦ ᑎᕆᒐᓂᐊᓂ ᐱᓗᐊᖅᑐᒥ ᖃᓂᒪᔫᔮᖅᐸᑕ ᐅᕝᕙᓘᓐᓃᑦ ᐊᔾᔨᐅᙱᑦᑐᒥ ᐃᓕᖅᑯᓯᖃᕈᑎᒃ;
- ᕿᒻᒥᓂ ᐃᐲᙶᖅᑎᑉᐸᙱᓪᓗᒋᑦ ᓇᒧᙵᐅᕈᓘᔭᙱᓪᓗᑎᒃ ᐊᒻᒪ ᑲᒪᒋᔭᐅᓂᖃᙱᓪᓗᑎᒃ;
- ᐋᓐᓂᐊᓕᕇᒃᑯᓯᕐᓗᒋᑦ ᕿᒻᒥᑎᑦ ᐱᖦᖤᙱᓴᕐᓂᐅᔪᒧᑦ.
ᐱᖦᖤᙱᓴᕐᓂᐅᔪᖅ ᐃᓅᓕᓴᖅᑕᐅᔪᓐᓇᖅᐳᖅ ᑭᓯᐊᓂ ᑐᖁᓐᓇᖅᐳᖅ ᐃᓅᓕᓴᖅᑕᐅᓂᖃᙱᓪᓗᓂ.
(0) Comments