ᑰᔾᔪᐊᕌᐱᒃᒥ ᐊᖑᑎᑦ ᐱᓕᕆᖃᑎᒌᒃᑐᑦ ᐱᓕᕆᐊᒃᓴᖏᓐᓂ ᐅᓄᕐᓯᕚᓪᓕᖅᑎᑦᑎᕗᑦ

ᓴᐃᓚᔅ ᑯᑭ-ᑳᒻᑐᐊ ᐅᖃᕐᑐᖅ ᐱᒻᒪᕆᐊᓘᒐᓗᐊᖅ ᐊᖑᑎᑦ ᓂᓪᓕᐊᓐᓂᕐᓴᐅᒃᐸᑕ ᐃᓱᒪᒋᔭᖏᓐᓂ ᓄᓇᕕᒃᒥ ᓄᓇᓕᖕᓂ — ᐅᑯᐊᓗ ᐅᑭᐅᕐᑕᖅᑐᕐᒥ ᖃᓄᐃᓕᐅᕋᓱᖕᓂᕐᒧᑦ ᓵᓚᒃᓴᐅᓯᐊᖓ ᐃᑲᔪᖅᑕᐅᔾᔪᑎᒋᔭᖓ ᑕᐃᒪᐃᑦᑕᕆᐊᒃᓴᖅ.

ᐊᖓᔪᖅᑳᖓᑦ ᐅᑯᐊ ᕿᒧᑦᔪᐃᑦ, ᑰᔾᔪᐊᕌᐱᒃᒥ ᐊᖑᑎᑦ ᑲᑐᔾᔨᖃᑎᒌᓐᓄᑦ, ᖃᖓᑦᑎᐊᓵᖅ ᑐᓴᖅᑎᑦᑎᓚᐅᕐᑐᖅ ᐅᓇ $425,000 ᓵᓚᒃᓴᐅᓯᐊᖓ ᐅᐱᕐᙶᖑᓚᐅᕐᓯᒪᔪᖅ ᐊᒻᒪ ᐊᓯᖏᑦ ᐃᑲᔫᑎᒃᓴᑦ ᓴᖅᑭᑎᑦᑎᓂᕐᓴᐅᓂᐊᕐᓂᖏᓐᓂ ᐃᓕᖅᑯᓯᒃᑯᑦ ᖃᓄᐃᓕᐅᕈᑎᐅᕙᒃᑐᓂᒃ.

ᑲᑐᔾᔨᖃᑎᒌᑦ ᐊᔪᕈᓐᓃᖅᓴᖅᑎᑦᑎᕙᒃᑐᑦ ᐃᓕᓐᓂᐊᖅᑎᑦᑎᕙᒃᖢᑎᒡᓗ ᑲᑎᑎᑦᑎᓂᒃᑯᑦ ᐃᓐᓇᑐᖃᕐᓂᒃ ᐊᒻᒪ ᐃᓅᓱᒃᑐᓂ ᐊᐅᓪᓛᖅᑎᑦᑎᕙᒃᖢᑎ ᐊᖑᓇᓱᒋᐊᖅᑐᓂ ᐊᒻᒪ ᐊᔪᕈᓐᓃᖅᓴᕆᐊᖅᖢᑎᒃ ᐃᓕᖅᑯᓯᒃᑯᑦ ᖃᓄᐃᓕᐅᕈᑎᐅᕙᒃᑐᓂᒃ.

ᑯᑭ-ᑳᒻᑐᐊ ᐅᖃᓚᐅᕐᑐᖅ ᑲᑐᔾᔨᖃᑎᒌᑦ ᑐᓂᔭᐅᓚᐅᕐᓯᒪᖕᒪᑕ $1 ᒥᓕᐊᓐ ᑖᓚ ᐅᖓᑖᓂ ᐊᕐᕌᓂ ᐅᑯᓇᙵᑦ ᐅᑭᐅᕐᑕᖅᑐᕐᒥ ᖃᓄᐃᓕᐅᕋᓱᖕᓂᕐᒧᑦ ᓵᓚᒃᓴᐅᓯᐊᕐᒥ ᐊᒻᒪᓗ ᐅᑯᐊ ᓄᓇᕕᒃᒥᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᐊᒻᒪ ᐃᓄᓕᕆᔨᒃᑯᑦ.

ᐅᑯᐊ ᑲᑐᔾᔨᖃᑎᒌᑦ ᐋᖅᑭᒃᓯᓚᐅᕐᑐᑦ ᐊᐅᓪᓛᕐᕕᐅᓂᐊᖅᑐᒥ ᕿᓚᓗᒐᕋᓱᒃᑐᓄᑦ ᐊᒻᒪᓗ ᒪᕐᕉᒃᑲᓐᓃᕐᓂ ᐱᓕᕆᐊᖃᖅᐸᓪᓕᐊᔪᑦ ᐃᑲᔪᖅᑕᐅᓪᓗᑎᒃ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᓐᓄᑦ.

ᐊᒻᒪᓗ ᑲᑐᔾᔨᖃᑎᒌᑦ ᑐᓂᔭᐅᒃᑲᓐᓂᕐᓂᐊᖅᖢᑎᒃ $300,000 ᑕᒪᑐᒪᓂ ᐊᕐᕌᒍᒥ ᑯᐸᐃᒃ ᒐᕙᒪᒃᑯᖏᓐᓂ ᐊᐅᓪᓛᕐᕕᐅᖃᑦᑕᕐᓂᐊᖅᑐᓂ ᑭᓇᑐᐃᓐᓇᕐᓄᑦ ᐊᔪᕈᓐᓃᕐᓴᕈᒪᔪᓄᑦ ᐃᓄᐃᑦ ᓂᕿᓕᐅᕈᓯᖏᓐᓂ, ᓴᓇᕐᕈᑎᓕᐅᕐᓂᕐᒥ, ᓴᓇᐅᒐᓕᐅᕐᓂᕐᒥᒃ, ᐊᖑᓇᓱᖕᓂᕐᒥ ᐊᒻᒪ ᐃᖃᓗᒐᓱᖕᓂᕐᒥ.

ᐃᓱᒫᓗᖕᓇᓛᖑᔪᕐᓕ ᐅᑯᓄᖓ ᐊᖑᑎᑦ ᑲᑐᔾᔨᖃᑎᒌᓄᑦ ᐃᒡᓗᑖᕋᓱᖕᓂᖅ ᓇᖕᒥᓂᕆᓂᐊᖅᑕᖓᓂ.

“ᒫᓐᓇ ᐃᒡᓗᖃᙱᓐᓇᑦᑕ ᐃᑲᔪᕈᑎᐅᔪᓐᓇᖅᑐᒥᓐ ᓄᓇᓕᖕᓂ,” ᐅᖃᕐᑐᖅ ᑯᑭ-ᑳᒻᑐᐊ, ᐊᐱᕐᓱᖅᑕᐅᑎᓪᓗᒍ ᐊᖏᕐᕋᖓᓂ ᑰᔾᔪᐊᕌᐱᒃᒥ.

“ᐃᒡᓗᖁᑎᖃᕆᐊᖃᕋᑦᑕᑦ ᓲᕐᓗ ᒍᓛᔾᔪᒥᓪᓘᓐᓃᑦ ᐃᓕᓐᓂᐊᖅᑎᑦᑎᔪᓐᓇᕐᓂᐊᕋᑦᑕ ᖃᖓᓕᒫᖅ.”

ᒫᓐᓇᓕ ᑲᑐᔾᔨᖃᑎᒌᑦ ᐊᐅᓚᑦᑎᕙᒃᑐᑦ ᓄᓇᐃᓐᓇᕐᒥ ᖃᓄᐃᓕᐅᕈᑎᒃᓴᓂᒃ ᑭᓯᐊᓂᓕ ᓴᓇᐅᒐᓕᐅᕐᓂᕐᒧᑦ ᐱᑕᖃᙱᓗᐊᕐᒪᑦ ᐃᓂᒃᓴᖃᙱᓗᐊᕐᓂᕐᒧᑦ.

“ᐱᓕᕆᓇᓱᖃᑦᑕᖅᑐᐃᑦ ᒫᓐᓇ ᐱᓕᕆᔾᔪᑎᒋᔪᓐᓇᖅᑕᖏᑦᑎᒍᑦ,” ᑯᑭ-ᑳᒻᑐᐊ ᐅᖃᕐᑐᖅ.

ᐊᖑᑎᑦ ᑲᑐᔾᔨᖃᑎᒌᖏᑦ ᑰᔾᔪᐊᕌᐱᒃᒥ ᐱᒋᐊᓚᐅᕐᓯᒪᔪᑦ ᐊᕐᕌᒍ ᑕᓪᓕᒪᑦ ᓯᕗᓂᐊᓂ, ᒪᓕᒃᖢᑎᒃ ᖃᓂᒋᔭᖏᓐᓃᑦᑐᓂ ᓄᓇᓕᖕᓂ ᐅᒥᐅᔭᖅᒥᑦ ᐊᒻᒪ ᐃᓄᒃᔪᐊᒃᒥ ᑖᒃᑯᐊᓗ ᐱᒋᐊᖅᑎᑦᑎᓯᒪᓕᖅᖢᑎᒃ ᐊᖑᑎᑦ ᑲᑐᔾᔨᖃᑎᒌᖏᓐᓂ.

ᐃᓄᒃᔪᐊᒃ ᓯᕗᓪᓕᖅᐹᖑᓚᐅᕐᑐᖅ ᑕᐃᒪᐃᓕᐅᕐᑐᓂ ᐱᒋᐊᕈᑎᖃᖅᖢᑎᒃ 2001-ᒥ ᐃᒻᒥᓃᖅᐸᒃᑐᓂ ᐃᓅᓱᒃᑐᓂ ᐱᒋᐊᕈᑎᖃᖅᖢᑎᒃ ᓄᓇᓕᖕᓂ.

ᒫᓐᓇᓕ ᑎᓴᒪᐅᓕᕐᑐᑦ ᐊᖑᑎᑦ ᑲᑐᔾᔨᖃᑎᒌᖏᑦ ᓄᓇᕕᒃᒥᑦ ᐅᑯᐊ ᖁᐊᖅᑕᖅᒥ ᓄᓇᓕᑐᐊᖑᓪᓗᑎᒃ ᐅᖓᕙᐅᑉ ᓯᒡᔭᖓᓂ ᓄᓇᓕᖕᓂ.

“ᑭᓱᓂ ᐱᖃᙱᓗᐊᓚᐅᕋᑦᑕ, ᖃᓄᐃᓕᐅᖅᑐᖃᙱᖢᓂ ᐊᖑᑎᓅᖓᔪᓂᒃ ᐱᓗᐊᕐᑐᒥᓐ. ᑕᒪᓐᓇ ᐱᒋᐊᖅᑎᑦᑐᒪᓕᓚᐅᕋᑦᑎᒍᑦ,” ᐅᖃᕐᑐᖅ ᑯᑭ-ᑳᒻᑐᐊ.

“ᐱᑖᕆᐊᖃᓚᐅᕋᑦᑕ ᐃᓕᖅᑯᓯᒃᑰᖓᔪᒥ ᐊᖑᑎᓄᑦ ᐱᓕᕆᐊᖑᔪᓐᓇᖅᑐᓂ ᐊᐅᓪᓛᕈᑎᒃᓴᖏᓐᓂ, ᐊᖑᓇᓱᒍᑎᒃᓴᖏᓐᓂ ᐊᒻᒪ ᐃᓅᓱᒃᑐᓂ ᐃᓕᓐᓂᐊᖅᑎᑦᑎᕙᓪᓕᐊᓗᑎᒃ.”

ᑯᑭ-ᑳᒻᑐᐊ ᐅᖃᓚᐅᕐᑐᖅ ᐃᓂᖃᖅᐸᑕ ᐊᖑᑏᑦ ᐱᓕᕆᕝᕕᒋᔪᓐᓇᖅᑕᖓᓂ, ᐅᖃᓪᓚᖃᑎᒌᕝᕕᒋᔪᓐᓇᖅᑕᖓᓂ ᐃᓱᒪᒋᔭᖏᓐᓂ ᐊᒻᒪ ᓈᒻᒪᙱᓕᐅᕈᑎᖏᓐᓂ ᒪᐅᓇ ᐊᖑᓇᓱᒐᓱᖕᓂᒃᑯᑦ, ᓄᓇᐃᓐᓇᕐᒥ ᖃᓄᐃᓕᐅᕈᑎᒃᓴᓄᑦ ᐊᒻᒪ ᓴᓇᐅᒐᓕᐅᕐᓂᕐᒥ ᓈᒻᒪᓛᖑᓇᔭᕐᓂᖓᓄᑦ.

“ᓈᒻᒪᖕᓂᕐᓴᐅᖕᒪ ᐅᖃᓪᓚᖃᑦᑕᖅᖢᓂ ᓈᒻᒪᙱᓕᐅᕈᑎᒋᔭᑦᑕᓐᓂ ᐊᒻᒪ ᐊᓯᖏᑦ ᐊᖑᑎ ᐅᖃᖃᑎᖃᕐᕕᒃᓴᐅᓐᓇᖅᑐᑦ ᐊᒻᒪ ᐃᓕᖕᓂ ᑐᑭᓯᔪᓐᓇᕐᓂᕐᓴᐅᓪᓗᑎᒃ,” ᐅᖃᕐᑐᖅ.

“ᐊᔪᕐᓇᙱᑦᑐᖅ ᐊᒻᒪ ᖁᕕᐊᓇᖅᖢᓂ. ᐅᖃᓪᓚᒃᐸᓪᓕᐊᓂᕐᓴᐅᓕᕈᓐᓇᖅᑐᓯ ᐊᒻᒪ ᐃᒡᓚᑲᑕᖕᓂᕐᓴᐅᓕᕐᓗᓯ.”