ᐅᓄᕐᓂᕐᓴᓂ ᓇᓄᕐᓂ ᑕᑯᔪᖃᒃᑲᓐᓂᕐᓯᒪᔪᖅ ᑕᑯᔪᖃᓚᐅᕐᓯᒪᑎᓪᓗᒍ

ᐅᓄᕈᓘᔭᕐᑐᓂᒃ ᓇᓄᕐᓂ ᑕᑯᔪᖃᕐᓯᒪᓕᕐᓂ ᑲᖏᖅᖠᓂᕐᒥᒃ, ᐃᑉᐸᒃᓴᖓᓂ ᐊᕐᓇᒥ ᕿᒪᒃᓯᔪᖃᕆᐊᖄᓪᓚᓚᐅᕐᑎᓪᓗᒍ ᓄᓇᓕᖕᓃᑦᑐᒥ.

ᐊᖑᓇᓱᒃᑐᓕᕆᔨᒃᑯᑦ ᐊᐅᓚᑦᑎᔨᖓ ᐋᓐᑐᕇ ᐊᐅᒃᑲᐅᑦ ᐅᖃᓚᐅᕐᑐᖅ ᒫᓐᓇ “ᐅᓄᕈᓘᔭᕐᑐᓂᒃ ᓇᓄᖅᑕᖃᕐᒪ ᑕᒫᓂ” ᐊᒻᒪᓗ ᓄᓇᖃᖅᑐᑦ ᑕᑯᓂᕋᑲᑕᒃᓯᒪᔪᑦ ᓄᓇᓖᑦ “ᓯᓚᑎᑦᑎᐊᑯᓗᐊᓂ ᒪᕐᕉᒡᓗ ᓄᓇᓕᖕᓃᒻᒪᕆᒃᖢᑎᒃ.”

ᐅᖃᓚᐅᕐᒥᔪᖅ ᑕᑯᔭᐅᔪᖅ ᓄᓇᖃᖅᑐᒥ ᔪᓐ ᑐᒐᒃ ᑕᑯᓚᐅᕐᒥᔪᖅ ᓵᑦᑎᐊᑯᓗᐊᓂ ᔪᓚᐃ 20-ᐅᑎᓪᓗᒍ ᓂᐅᕕᕐᕕᐅᑉ ᑯᐃᒃᓯᑖᑉ ᖃᓂᒋᔭᖓᓂ ᑖᓐᓇᓗ ᐅᓐᓄᙳᒃᑲᓐᓂᕐᑎᓪᓗᒍ ᐅᑎᒃᑲᓐᓂᓚᐅᖅᖢᓂ.

ᐊᐅᒃᑲᐅᑦ ᐅᖃᒃᑲᓐᓂᓚᐅᕐᑐᖅ ᐊᖑᓇᓱᒃᑐᓕᕆᔨᒃᑯᑦ ᓇᓄᕐᓂ ᖃᐅᔨᓴᖅᑎᖃᕐᓂᕋᖅᖢᓂᒋᑦ, ᐅᒥᐊᕐᒥ ᐊᑐᖅᖢᓂ ᕿᑭᖅᑕᓂ ᕿᓂᑲᑕᓚᐅᕐᑐᑦ ᓄᓇᓕᖕᓄᐊᖅᑐᕕᓂᕐᒥᒃ.

ᐳᕋᓐᑕ ᐊᐅᐱᓛᕐᔪᒃ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓇᓄᕐᒥ ᑕᑯᓚᐅᕐᓯᒪᓂᖓᓂᒃ 10:30-ᒥ ᐅᓪᓛᒃᑯᑦ ᔪᓚᐃ 21ᖑᑎᓪᓗᒍ ᐅᕙᓂ ᒪᕐᕉᒃ ᑕᓰᒃ (Landing Lake ᐊᒻᒪ Sandy Lake) ᐊᑯᓐᓂᖓᓂᒃ, ᑲᖏᖅᖠᓂᐅᑉ ᖃᓂᒋᔭᖓᓂ ᐊᓂᒌᒃ ᐃᖏᕐᕋᑎᓪᓗᒋᑦ ᐊᖅᑯᑎᒃᑯᑦ.

ᐊᔾᔨᓕᐅᕆᑲᑕᓚᐅᕐᑐᖅ ᐊᒻᒪᓗ ᓴᖅᑭᑎᖢᓂᒋ ᑲᖏᖅᖠᓂᖅᒥ ᑐᓴᒐᒃᓴᓄᑦ ᕙᐃᔅᐳᒃᒧ. ᐊᐃᐱᓛᕐᔪᒃ ᐅᖃᓚᐅᕐᑐᑦ ᐊᓂᖓ ᐊᓯᒃᑲᓐᓂᖓᓂᒃ ᑕᑯᓚᐅᕐᓂᕋᖅᖢᓂ ᐅᓪᓗᕈᒻᒥᑕᕐᓇᖅᓯᑎᓪᓗᒍ.

ᐊᐅᒃᑲᐅᑦ ᐅᖃᓚᐅᕐᑐᖅ ᑖᓐᓇ ᓇᓄᖅ ᖁᐊᕐᓵᕐᓈᓗᙱᑉᐸᑦ ᐆᒪᔪᕐᓂᐊᖅᑎᒃᑯᑦ ᕿᒫᑎᑦᑎᓇᓱᒃᑲᔭᕐᑐᑦ ᑐᖁᑦᑕᐃᓕᒪᓗᒍ.

“ᐊᔾᔨᒌᙱᑦᑐᓂ ᖃᓄᐃᓕᐅᕈᑎᒃᓴᖃᕐᒪᑕ ᓇᓄᕐᒥ ᑐᖁᑎᑦᑎᓚᐅᙱᓐᓂᖏᓐᓂᒃ,” ᐅᖃᕐᑐᖅ.

ᐊᖑᓇᓱᒃᑐᓕᕆᔩᑦ ᑲᑎᒪᓚᐅᕐᓯᒪᔪᑦ ᔪᓚᐃ 21ᒥ ᓇᓄᐃᑦ ᓄᓇᓕᖕᓄᐊᑲᑕᓗᐊᕐᓂᖏᓐᓄᑦ, ᐊᐅᒃᑲᐅᑦ ᐅᖃᕐᑐᖅ. ᐋᖅᑭᒃᓯᓕᓚᐅᕐᑐᑦ ᑎᓴᒪᓂᒃ ᓇᓄᕐᓂ ᖃᐅᔨᓴᖅᑎᐅᓂᐊᖅᑐᓂᒃ ᐊᔪᕐᓇᕈᓐᓃᑐᐊᕐᐸᑦ.

ᐅᖃᒃᑲᓐᓂᓚᐅᕐᑐᖅ ᐊᕐᕕᐊᕐᒥᐅᑕᐃᑦ ᑲᖏᖅᖠᓂᐅᑉ ᓂᒋᐊᓂᒃ ᓄᓇᓖᑦ ᐅᖓᓯᖕᓂᖃᖅᖢᑎᒃ 200 ᑭᓛᒥᑕᔅᓂᒃ, ᐅᖃᑲᑕᓚᐅᕐᑐᖅ ᓄᓇᓕᖕᓄᑦᑕᐅᖅ ᖃᓂᑦᑐᓂᒃ ᓇᓄᕐᓂ ᑕᑯᑲᑕᖕᓂᕋᖅᖢᑎᒃ.

ᐊᐅᒃᑲᐅᑦ ᐅᖃᓚᐅᕐᑐᖅ ᒫᓐᓇᓕ ᐊᖑᓇᓱᒍᓐᓇᕐᓂᖅ ᑭᓯᐊᓂ ᐱᒋᐊᕐᓂᐊᕐᒪᓐ ᓄᕕᐱᕆᒥ ᓲᖃᐃᒻᒪ ᓄᓇᓖᑦ ᐅᓄᓗᐊᙱᑦᑐᓂᒃ ᓂᕕᙵᑕᖃᕐᒪᑕ ᓇᓐᓄᒍᓐᓇᐅᑎᓂᒃ ᑭᓯᐊᓂᓕ ᑕᒪᓐᓇ ᓈᒻᒪᙱᓕᐅᕈᑎᐅᓯᒪᓕᕐᑐᖅ ᐱᓇᓱᐊᕈᓯᒐᓕᖕᓂᒃ ᓯᕗᓂᐊᒍᑦ.

“ᓇᓄᐃᑦ ᑕᒪᐅᙵᖅᑎᑕᐅᑲᑕᒍᓐᓃᖁᓐᓇᖅᑐᖅ. ᒫᓐᓇᐅᔪᕐᓕ ᕿᒫᑎᖃᑦᑕᕋᑦᑎᒍᑦ ᐅᓗᕆᐊᓇᙱᑦᑕᕌᖓᑕ, ᐅᕝᕙᓘᓐᓃᑦ ᓄᓇᓖᑦ ᓯᓚᑖᓃᑎᓐᓇᓱᒃᖢᑎᒍᑦ ᓲᖃᐃᒻᒪ ᐊᒥᓱᕈᓘᔭᐃᑦ ᐃᒡᓗᕋᓛᖃᕐᒪᑕ ᑕᒫᓂ,” ᐅᖃᕐᑐᖅ.

ᓇᓄᕐᒥ ᑕᑯᔪᖃᕐᐸᑦ ᐆᒪᔪᕐᓂᐊᖅᑎᒃᑯᓐᓂ ᖃᐅᔨᑎᑦᑎᔭᕆᐊᖃᕐᑐᑦ ᐊᒻᒪᓗ ᐅᖃᕐᕕᒋᔭᒃᓴᐅᙱᑉᐸᑕ ᐊᖑᓇᓱᒃᑐᓕᕆᔨᒃᑯᑦ ᐅᖄᓚᕝᕕᐅᓗᑎᒃ.

“ᓇᓄᕐᒥ ᑕᑯᕝᕕᐅᓚᐅᕐᑐᒥ ᐅᓪᓛᖅ ᑕᑯᔭᖅᑐᖅᑲᐅᒐᒥ ᓄᓇᓖᑦ ᓯᓚᑎᑦᑎᐊᖓᓄᑦ ᑭᓯᐊᓂᓕ ᓱᓕ ᖃᓂᑦᑐᒦᓗᐊᕆᔭᐅᖕᒪᑦ ᐊᒥᓱᓄᑦ ᐃᓄᖕᓄᑦ,” ᐅᖃᕐᑐᖅ. “ᕿᒫᑎᑦᑐᓐᓇᖅᑲᐅᔭᕗᑦ ᓂᒋᖅᐸᓯᖕᒧᑦ ᑭᓯᐊᓂᓕ ᐅᖄᓚᕝᕕᐅᓵᖅᑐᖓ ᐊᓯᒃᑲᓐᓂᐊᓂᒃ ᓇᓄᖅᑕᖃᕐᓂᕋᐃᔪᒥᒃ.

“ᒫᓐᓇ ᐱᔭᒃᓴᖃᕈᓘᔭᓚᐅᑲᒃᑲᑦᑕ.”