ᐅᖃᓪᓚᖕᓂᖃᒃᑲᓐᓂᕆᐊᖃᖅᐳᑦ ᒪᒋᐅᓪ ᐃᓕᓐᓂᐊᕐᓂᕐᒧᑦ ᐊᑭᓕᐅᑎᓂᑦ ᐃᓚᐅᙱᑎᑦᑎᓂᐅᔪᓂ: ᑲᑎᕕᒃ ᐃᓕᓴᕐᓂᓕᕆᓂᖅ

For the English version of this story, please see More talks needed on McGill tuition exemptions: KI.

ᑕᖅᑭᐅᓚᐅᖅᑐᒥ, ᒪᒋᐅᓪ ᓯᓚᑦᑐᖅᓴᕐᕕᒡᔪᐊᖅ ᐅᖃᐅᓯᖃᓚᐅᖅᐳᖅ ᓄᑖᖑᔪᒥ ᐱᒋᐊᕈᑕᐅᔪᒥ ᐊᑭᓖᓂᖏᓐᓂ ᐃᓕᓐᓂᐊᕐᓂᕐᒧᑦ ᐊᑭᓕᐅᑎᓂᑦ ᐊᑭᐅᔪᓂᑦ ᐊᒻᒪ ᐱᔭᕆᐊᓕᖕᓂ ᐊᑭᓕᐅᑎᓂ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐱᒋᐊᕋᔭᕐᓂᖓᓂ ᑎᑭᑉᐸᓪᓕᐊᔪᒥ ᐅᑭᐊᒃᓵᒥ ᐃᓕᓐᓂᐊᕐᓂᕐᒧᑦ ᐊᕐᕌᒍᖓᓂ.

ᑭᓯᐊᓂ, ᐅᓇ ᐱᓕᕆᐊᖑᔪᖅ ᖃᔅᓯᐊᕐᔪᖕᓂ ᐃᓚᒋᐊᕈᑎᖃᖅᐳᖅ ᐅᓇᐅᑎᓪᓗᒍ ᓄᓇᕕᖕᒥ ᐃᓕᓐᓂᐊᖅᑎᓂ, ᑲᑎᕕᒃ ᐃᓕᓴᕐᓂᓕᕆᓂᖅ ᐅᖃᖅᐳᑦ ᐅᖃᓪᓚᒃᑲᓐᓂᖃᕆᐊᖃᕐᓂᖏᓐᓂ ᐋᖅᑭᒃᓱᐃᓂᕐᒥ ᐅᓂᒃᑳᕆᓯᒪᓂᐅᔪᓂ.

ᐱᒋᐊᕐᓂᐊᖅᑐᒥ ᐅᑭᐊᒃᓵᒥ, ᓯᓚᑦᑐᖅᓴᕐᕕᒡᔪᐊᖅ, ᑐᙵᕕᖃᖅᑐᒥ ᒪᓐᑐᕆᐋᓪᒥ, ᐸᕐᓇᒃᐳᖅ ᐊᑐᐃᓐᓇᖃᖅᑎᑦᑎᑐᐃᓐᓇᕐᓂᖓᓂ ᑕᒪᒃᑭᖅᑐᒥ ᐃᓕᓐᓂᐊᕐᓂᕐᒧᑦ ᐊᑭᓕᐅᑎᓂᑦ ᐊᑭᓖᓂᐅᔪᒥ ᐃᓕᓐᓂᐊᖅᑎᓄᑦ ᖃᓂᒋᔭᖓᓂ ᒨᕼᐋᒃᒥ ᓄᓇᓕᐅᔪᓂ, ᐃᓚᖃᖅᑐᒥ ᐊᓪᓚᓂ ᕼᐊᐅᑎᓇᓴᐅᓂ ᓄᓇᐅᔪᓂ ᒍᕌᓐᑦ ᑰᖓᓂ ᐋᓐᑎᐊᕆᐅᒥ.

ᒪᒋᐅᓪ ᑕᐃᓯᕗᖅ ᐆᒥᖓ “ᓯᕗᓪᓕᐅᔪᒥ ᐱᓕᕆᓂᐅᔪᒥ” ᐱᓕᕆᐊᖑᔪᒥ.

ᐅᓴᐅᑎᓪᓗᒍ ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓂ, ᐃᓚᖃᖅᑐᒥ ᓄᓇᕕᖕᒥᐅᑕᓂ, ᐱᓕᕆᓂᐅᔪᖅ ᐃᓚᖃᑐᐃᓐᓇᖅᐳᖅ ᓂᕆᐅᒋᔭᐅᔪᓂ ᐅᕝᕙᓘᓐᓃᑦ ᒫᓐᓇᐅᔪᒥ ᐃᓱᓕᑦᑎᓂᕐᒥ ᐸᐃᑉᐹᓕᖕᓄᑦ ᐃᓕᓐᓂᐊᖅᑎᓂ ᐃᓚᐅᖃᑕᐅᔪᓂ ᒪᒋᐅᓪ ᐃᓕᓐᓂᐊᕐᕕᖓᓂ ᐃᓄᓕᕆᓂᕐᒥ, ᐃᓕᓐᓂᐊᕐᕕᐅᔪᒥ ᑲᔪᓰᓐᓇᖅᑐᒥ ᐃᓕᓐᓂᐊᕐᓂᐅᔪᒥ, ᐅᕝᕙᓘᓐᓃᑦ ᑎᑎᕋᕐᕕᖓᓂ ᐊᓪᓚᓄᑦ ᐊᒻᒪ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᐅᔪᒥ.

ᐊᑭᖃᙱᑦᑐᒥ-ᐃᓕᓐᓂᐊᕐᓂᕐᒧᑦ ᐊᑭᓕᐅᑎᓂᑦ ᐱᓕᕆᐊᖑᔪᖅ ᑕᐅᑐᒃᑕᑐᐊᖃᑲᐃᓐᓇᖅᐳᖅ ᖃᓂᒋᔭᖓᓂ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓄᑦ ᒪᒋᐅᓪ ᐋᖅᑭᒃᑕᐅᓯᒪᖕᒪᑦ ᓄᓇᖓᓐᓂ, ᐅᖃᓚᐅᖅᐳᖅ ᓯᓚᔅᑦ ᐸᑐᕆ−ᔅᐸᐃᑦ, ᒪᒋᐅᓪ ᐃᓚᒋᔭᐅᔪᒥ ᐊᓪᓚᕝᕕᖓᓂ ᓄᓇᖃᖅᑳᖅᓯᒪᔪᓄᑦ ᐱᒋᐊᕈᑕᐅᔪᓂᑦ, ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ.

“[ᓯᓚᑦᑐᖅᓴᕐᕕᒡᔪᐊᖅ] ᐊᕐᕌᒍᒐᓵᓗᖕᓂ ᐱᓕᕆᖃᑎᖃᖅᓯᒪᕗᑦ ᐊᓯᖏᓐᓂ ᐊᓪᓚᓂ ᐊᒻᒪ ᐃᓄᖕᓂ ᓄᓇᓕᐅᔪᓂ ᑕᐃᑲᓂᓗᒃᑖᖅ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᑯᐸᐃᖕᒥ,” ᐸᑐᕆ−ᔅᐸᐃᑦ ᐅᖃᓚᐅᖅᐳᖅ.

“ᖃᓄᖅ ᑐᑭᖃᖅᐸ ᐃᓚᓕᐅᔾᔨᙱᓐᓂᕐᒥ ᐃᓕᓐᓂᐊᖅᑎᓂ ᐃᓚᐅᖃᑕᐅᓯᒪᔪᓂ ᐱᓕᕆᐊᖑᔪᓂ ᑕᐃᒃᑯᓇᓂ ᓄᓇᓕᐅᔪᓂ?”

ᑕᐃᒫᒃ ᐃᓄᐃᑦ ᐃᓕᓐᓂᐊᖅᑎᓂ ᐃᓚᐅᖃᑕᐅᔪᓂ ᐅᑯᓇᓂ ᐱᓕᕆᐊᖑᔪᓂ ᐅᕘᓇ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᓄᓇᕕᖕᒥ ᐊᕕᒃᑐᖅᓯᒪᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᒻᒪ ᐃᓄᓕᕆᓂᕐᒥ ᐊᒻᒪ ᒪᑭᕝᕕᖕᒥ ᐃᓚᓕᐅᔾᔭᐅᓚᐅᕆᕗᑦ ᐆᒥᖓ ᐱᒋᐊᕈᑕᐅᔪᒥ.

ᐸᑐᕆ−ᔅᐸᐃᑦ ᐅᖃᓚᐅᖅᐳᖅ ᐅᓇ ᐱᒋᐊᕈᑕᐅᔪᖅ ᑭᐅᓂᐅᕗᖅ ᖃᐃᖁᔨᓂᐅᔪᒥ ᖃᓄᐃᓕᐅᕐᓂᕐᒧᑦ ᐊᓪᓚᕝᕕᓕᕆᓂᕐᒥ ᐱᓕᕆᐊᖃᖅᑐᓂ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᐅᔪᒥ ᐊᒻᒪ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕐᓂᖓᓂ.

ᖃᐃᖁᔨᓂᐅᔪᖅ “ᐱᓕᕆᓂᕐᒥ ᐱᓪᓚᕆᐅᔪᓂ ᐱᒋᐊᕐᓂᐅᔪᒥ ᑐᓂᓯᓂᐅᔪᒥ ᐱᔪᓐᓇᐅᑎᒥᓂᒃ ᓴᒃᑯᐃᓐᓂᕐᒥ ᐃᓕᓐᓂᐊᕐᓂᕐᒧᑦ ᐊᑭᓕᐅᑎᓂᑦ ᐊᒻᒪ ᐱᔭᕆᐊᓕᖕᓂ ᐊᑭᓕᐅᑎᓂᑦ ᑕᒪᒃᑭᓄᑦ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᖅᑐᓂ ᒪᒋᐅᓪᒥ,” ᐅᖃᐅᓯᐅᓪᓗᓂ ᐃᑭᐊᖅᑭᕕᖓᓐᓂ.

ᐅᖃᐅᓯᐅᔪᒥ ᒫᓐᓇ ᐃᓱᒪᒋᔭᐅᕗᖅ ᓯᕗᓪᓕᖅᐸᐅᔪᒥ ᐱᓕᕆᓂᐅᔪᒥ ᐱᒋᐊᕈᑕᐅᔪᒥ.

ᑭᖑᓂᐊᒍᑦ, ᒪᒋᐅᓪ ᖃᐅᔨᓴᕐᓂᐊᖅᐳᖅ ᐱᒋᐊᕈᑎ ᐱᓕᕆᔪᓐᓇᕐᒪᖔᑦ ᑭᒃᑯᓕᒫᓄᑦ, ᐊᒻᒪ ᖃᓄᖅ ᐊᖏᒡᓕᒋᐊᖅᑕᐅᓂᖓ ᐱᓕᕆᐊᖑᔪᓐᓇᕐᓂᖓᓂ.

“ᐱᓕᕆᖃᑎᖃᕐᓂᕐᔪᐊᖑᕗᖅ ᐱᔭᕆᐊᖃᖅᑕᑦᑎᓐᓂ ᑕᒪᓐᓴ ᐱᔪᓐᓇᖁᓪᓗᒍ,” ᐸᑐᕆ−ᔅᐸᐃᑦ ᐅᖃᓚᐅᖅᐳᖅ.

“ᓂᕆᐅᒃᐳᒍᑦ ᑐᓂᓯᓂᕐᒥ ᐅᖃᐅᓯᒃᓴᒥ ᑐᑭᓯᐅᒪᓂᑦᑎᓐᓂ, ᐊᒻᒪ ᐃᑲᔪᖅᓱᐃᓂᐊᖅᐳᒍᑦ ᐃᓕᓐᓂᐊᖅᑎᓂ ᐃᓚᒋᔭᐅᓂᖏᓐᓂ ᓄᓇᓕᖏᓐᓂ ᐊᒻᒪ ᓄᓇᖏᓐᓂ.”

ᒪᒪᑐ ᑎᐅᑉ, ᑐᑭᒧᐊᒃᑎᑦᑎᔨ ᐃᓐᓇᕐᓄᑦ ᐃᓕᓐᓂᐊᕐᓂᐅᔪᒥ ᐊᒻᒪ ᐃᖅᑲᓇᐃᔮᖃᕐᓂᕐᒧᑦ ᐱᓕᒻᒪᒃᓴᓂᐅᔪᒥ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᐅᖃᓚᐅᖅᐳᖅ ᐅᖃᐅᓯᒃᓴᓕᐊᖑᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ “ᐅᖃᐅᓯᒃᓴᓕᐊᖑᔪᖅ ᒪᒋᐅᓪ ᓯᓚᑦᑐᖅᓴᕐᕕᒡᔪᐊᖓᓂ ᐱᐅᑦᑎᐊᖅᑐᒥ ᐱᕙᓪᓕᐊᑎᑦᑎᓂᐅᕗᖅ,” ᐊᒻᒪᓗ “ᑮᓇᐅᔭᓕᕆᓂᕐᒧᑦ ᐊᒃᑐᐃᓂᖃᕈᓐᓇᕐᓂᖓᓂ ᐃᓕᓴᐃᔨᓄᑦ ᐱᓕᒻᒪᒃᓴᓂᐅᔪᒥ ᐱᓕᕆᐊᖑᔪᓂ ᑲᑎᕕᒃ ᐃᓕᓴᕐᓂᓕᕆᓂᖅ ᐊᑐᐃᓐᓇᖃᖅᑎᑦᑎᓂᖓᓂ ᐃᓄᖕᓄᑦ ᐃᓕᓴᐃᔨᐅᔪᓄᑦ ᐃᖅᑲᓇᐃᔭᖅᑎᑕᖏᓐᓂ.”

“ᓱᓕ ᐃᒃᓯᕚᖃᑎᖃᕆᐊᖃᖅᐳᒍᑦ ᐱᓕᕆᖃᑎᒋᔭᑦᑎᓐᓂ ᒪᒋᐅᓪ ᐃᓕᓐᓂᐊᕐᕕᐅᔪᒥ ᐃᓕᓐᓂᐊᖅᑐᓕᕆᔨᒃᑯᑦ ᑎᑎᕋᕐᕕᖓᓂ ᐊᓪᓚᓄᑦ ᐊᒻᒪ ᐃᓄᖕᓄᑦ ᐃᓕᓐᓂᐊᕐᓂᖓᓂ ᐊᒻᒪ ᒥᓂᔅᑕᖃᕐᕕᖕᒥ ᐃᓕᓐᓂᐊᖅᑐᓕᕆᓂᕐᒥ ᐋᖅᑭᒃᓱᐃᓂᕐᒥ ᖃᓄᖅ ᐊᒃᑐᐃᓂᐊᕐᓂᖓᓂ ᑮᓇᐅᔭᑦ ᐊᑐᖅᑐᒃᓴᓂ ᐃᑲᔫᓯᖅᑕᐅᕙᒃᑐᓂ ᐱᓕᕆᐊᖑᔪᓂ, ᐊᒻᒪ ᐊᒃᑐᐃᓂᐅᔪᓂ ᐱᑕᖃᑐᐃᓐᓇᕆᐊᖃᖅᑐᓂ ᒫᓐᓇᐅᔪᒥ ᐊᒻᒪ ᓯᕗᓂᒃᓴᒥ ᐱᓕᕆᖃᑎᒌᖕᓂᐅᔪᓂ ᐊᖏᕈᑕᐅᔪᓂ,” ᑎᐋᑉ ᐅᖃᓚᐅᖅᐳᖅ.

ᐃᓚᒋᐊᖅᓯᓚᐅᖅᐳᖅ ᑭᓯᐊᓂ ᐅᓇ ᑐᑭᓯᓇᖅᓯᑦᑎᐊᖅᐸᑦ, “ᐊᔪᕐᓇᖅᐳᖅ ᐅᖃᐅᓯᒃᓴᓕᐅᕐᓂᕐᒥ ᐆᒥᖓ ᓄᑖᖑᔪᒥ ᐱᒋᐊᕈᑕᐅᔪᒧᑦ.”