ᓱᕈᓯᕐᒧᑦ, ᐃᓄᓕᕆᔨᒃᑯᑦ ᐱᓕᕆᒃᑲᓐᓂᕆᐊᖃᖅᐳᑦ: ᑕᒻᒪᖅᓯᒪᔪᖅᓯᐅᑎᒻᒪᕆᒃ

For the English version of this story, please see More work needed to improve child, family services in Nunavut: Auditor general.

ᓄᓇᕘᑉ ᐃᓄᓕᕆᔨᒃᑯᖏᑦ ᐊᖏᔪᒥ ᐱᐅᓯᒋᐊᖅᑎᑦᑎᓯᒪᙱᓚᑦ ᐱᔨᑦᑎᕋᕐᓂᖓᓂ ᓴᐳᔾᔨᓯᒪᓂᕐᒧᑦ ᐊᒻᒪ ᖃᓄᐃᙱᑦᑎᐊᕐᓂᖏᓐᓄᑦ ᐊᒃᑐᖅᑕᐅᓴᕋᐃᑦᑐᓂ ᓱᕈᓯᕐᓂ ᓄᓇᕗᒻᒥ, ᑎᑎᕋᕐᕕᒃ ᑕᒻᒪᖅᓯᒪᔪᖅᓯᐅᑎᒻᒪᕆᒃᑯᓐᓂ ᑲᓇᑕᒥ ᓇᓂᓯᓯᒪᕗᑦ.

ᑭᓯᐊᓂ ᐅᓄᖅᓯᒋᐊᖅᑐᓂ ᐃᖅᑲᓇᐃᔭᖅᑎᑦᑎᑖᕐᓂᕐᒥ ᐃᖅᑲᓇᐃᔭᕐᕕᖓᓄᑦ ᐊᑐᐊᒐᓂ ᐱᔪᓐᓇᖅᑎᑦᑎᓯᒪᕗᖅ ᐃᓚᖏᓐᓂ ᐱᐅᓯᒋᐊᖅᑕᐅᓂᐅᔪᓂ, ᐅᖃᖅᐳᖅ ᑕᒻᒪᖅᓯᒪᔪᖅᓯᐅᑎᒻᒪᕆᐅᑉ ᑐᒡᓕᐊ ᐋᓐᑐᕉ ᕼᐊᐃᔅ.

“ᐊᑦᑎᓛᖑᔪᒥ ᑎᑎᕋᖅᓯᒪᓂᐅᔪᖅ ᓯᕗᓪᓕᐅᔪᒥ ᖃᓄᐃᓕᐅᕈᑕᐅᔪᑦ ᐊᒻᒪ ᐱᓕᕆᓂᐅᔪᑦ ᐱᓕᕆᐊᖑᓯᒪᑎᓪᓗᒋᑦ, ᓱᓕ ᓴᖅᑭᑎᑦᑎᔭᕆᐊᖃᖅᐳᑦ ᖁᔭᒋᔭᐅᔪᓐᓇᖅᑐᓂ ᐊᓯᔾᔨᕐᓂᐅᔪᓂ ᖃᓄᐃᓕᖓᓂᐅᔪᓄᑦ ᐊᒃᑐᖅᑕᐅᓴᕋᐃᑦᑐᓂ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ,” ᕼᐊᐃᔅ ᐅᖃᐅᔾᔨᓚᐅᖅᐳᖅ ᑐᓴᒐᒃᓴᓕᐅᖅᑎᓂ ᐃᖃᓗᖕᓂ ᒫᔾᔨ 5−ᒥ, ᒪᓕᒃᑐᒥ ᓴᖅᑭᑎᑕᐅᓂᖓᓂ ᑕᒻᒪᖅᓯᒪᔪᖅᓯᐅᑎᒻᒪᕆᐅᑉ ᖃᐅᔨᒋᐊᒃᑲᓐᓂᕐᓂᖓᓂ ᐱᓕᕆᕝᕕᐅᑉ ᐱᓕᕆᓂᖓᓂ.

ᐅᓂᒃᑳᓕᐊᖅ ᕿᒥᕐᕈᕗᖅ ᖃᓄᖅ ᐃᓄᓕᕆᔨᒃᑯᑦ ᐸᖅᑭᓂᖃᑦᑎᐊᓲᖑᓂᖏᓐᓂ ᕼᐊᓐᓇᓚᖏᓐᓂ ᓱᕈᓯᕐᓂᑦ ᐊᖅᓵᖅᑕᐅᓯᒪᔪᓂ ᐸᖅᑭᕙᒃᑐᓂ.

“ᓱᕈᓯᑦ ᐊᒻᒪ ᒪᒃᑯᒃᑐᑦ ᓄᓇᕗᒻᒥ ᓱᓕ ᐅᓗᕆᐊᓇᖅᑐᒦᑉᐳᑦ ᐱᙱᓐᓂᖏᓐᓂ ᓴᐳᔾᔭᐅᓯᒪᓂᐅᔪᓂ ᐊᒻᒪ ᐱᔨᑦᑎᕋᕐᓂᕐᓂ ᐱᔭᕆᐊᖃᖅᑕᒥᓂ ᐊᒻᒪ ᐱᓪᓗᐊᖅᑕᒥᓂᑦ ᐅᕘᓇ ᒪᓕᒐᑎᒍᑦ,” ᕼᐊᐃᔅ ᐅᖃᓚᐅᖅᐳᖅ.

ᐅᓂᒃᑳᓕᐊᖅ ᖃᐅᔨᒋᐊᒃᑲᓐᓂᕐᓂᐅᕗᖅ ᑕᒻᒪᖅᓯᒪᔪᖅᓯᐅᑎᒻᒪᕆᖕᒧᑦ ᑭᐊᕆᓐ ᕼᐆᒋᓐ 2023−ᒥ ᑮᓇᐅᔭᓂᒃ ᖃᐅᔨᓴᖅᑕᐅᓂᖓᓐᓂ ᓱᕈᓯᕐᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ ᓄᓇᕗᒻᒥ. ᑕᐃᑲᓂ ᐅᓂᒃᑳᓕᐊᒥ, ᕼᐆᒋᓐ ᐅᖃᐅᓯᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᓂ ᐃᓚᖃᖅᑐᒥ ᐸᖅᑭᓂᐅᔪᒥ ᐊᒻᒪ ᐅᔾᔨᕈᓱᙱᓐᓂᖏᓐᓂ ᐊᒻᒪ ᑕᐃᓪᓗᓂᐅᒃ ᓇᓂᔭᖏᓐᓂ “ᑐᐊᕕᕐᓇᖅᑐᒥ ᖃᐃᖁᔨᓂᐅᔪᒥ ᖃᓄᐃᓕᐅᕐᓂᕐᒧᑦ.”

ᓯᕗᓂᐊᓂ ᑮᓇᐅᔭᓂᒃ ᖃᐅᔨᓴᖅᑕᐅᓂᖓᓐᓂ ᐱᓕᕆᐊᖑᓚᐅᖅᐳᑦ 2011−ᒥ ᐊᒻᒪ 2014−ᒥ.

ᐊᑕᐅᓯᐅᔪᒥ ᐱᒻᒪᕆᐅᔪᒥ ᓇᓂᔭᐅᓂᐅᔪᓂ ᐱᓇᓱᐊᕈᓯᐅᓚᐅᖅᑐᒥ ᐅᓂᒃᑳᓕᐊᖓᓂ ᐃᓄᓕᕆᔨᒃᑯᑦ ᑐᓂᓯᔪᓐᓇᓚᐅᖅᐳᑦ ᐅᓄᕐᓂᐅᔪᓂ ᓱᕈᓯᕐᓂ ᓄᓇᕗᒻᒥ ᐊᖅᓵᖅᑕᐅᓯᒪᔪᓄᑦ ᐸᖅᑭᔭᐅᓂᖏᓐᓂ ᐱᓕᕆᔾᔪᓯᐅᔪᒥ — ᑕᒪᓐᓇ ᐱᓕᕆᕝᕕᒃ ᐅᖃᕈᓐᓇᓚᐅᙱᓐᓂᖓᓂ ᐊᕐᕌᒍᑦ ᒪᕐᕉᖕᓂ ᐊᓂᒍᖅᓯᒪᔪᓂ.

ᐃᓄᓕᕆᔨᒃᑯᑦ ᒥᓂᔅᑕᖓ ᒫᒡᒍᓕ ᓇᑲᓱᒃ ᐅᖃᓪᓚᒃᐳᖅ ᒪᓕᒐᓕᐅᕐᕕᖕᒥ ᒫᔾᔨ 5−ᒥ. (ᔨᐊᕝ ᐱᓚᑦᑎᐊᐃᒧᑦ ᐊᔾᔨᓕᐅᖅᑕᐅᔪᖅ)

ᑕᐃᓐᓇ ᐅᓄᕐᓂᐅᔪᖅ 533−ᖑᕗᖅ — ᐃᓚᖃᖅᑐᒥ 444−ᓂ ᓄᓇᕗᒻᒥ — ᐃᓄᓕᕆᔨᒃᑯᑦ ᒥᓂᔅᑕᖓ ᒫᒡᒍᓕ ᓇᑲᓲᑉ ᐃᖅᑲᓇᐃᔭᖅᑎᖏᑦ ᐅᖃᐅᔾᔨᓚᐅᖅᐳᑦ ᑐᓴᒐᒃᓴᓕᐅᖅᑎᓄᑦ.

“ᐱᔭᕆᐊᖃᖅᑎᑦᑎᓚᐅᖅᐳᖅ ᐱᓕᕆᓪᓗᑎᒃ ᐊᒃᓱᕈᕐᓂᐅᔪᒥ ᓇᓗᓇᐃᖅᓯᓂᖏᓐᓂ ᓇᒦᓐᓂᖏᓐᓂ ᓱᕈᓯᑦ ᐊᒻᒪ ᒪᒃᑯᒃᑐᖏᑦ, ᑭᓯᐊᓂ ᐱᓕᕆᔪᓐᓇᓚᐅᖅᐳᑦ,” ᕼᐊᐃᔅ ᐅᖃᓚᐅᖅᐳᖅ.

ᐱᓕᕆᕝᕕᒃ ᐊᑐᓕᖅᑎᑦᑎᓯᒪᕗᖅ ᓄᑖᖑᔪᒥ ᑐᓴᒐᒃᓴᓂ ᐊᐅᓚᑦᑎᓂᕐᒥ ᐱᓕᕆᔾᔪᓯᐅᔪᒥ ᖃᐅᔨᓴᕐᓂᕐᒧᑦ ᑖᒃᑯᓂᖓ ᐅᓄᕐᓂᐅᔪᓂ, ᑭᓯᐊᓂ ᑕᒪᒃᑭᑦ ᐃᖅᑲᓇᐃᔭᖅᑎᐅᔪᑦ ᐱᓕᒻᒪᒃᓴᖅᓯᒪᙱᓚᑦ ᑕᐃᔅᓱᒥᖓ, ᐅᓂᒃᑳᓕᐊᖅ ᐅᖃᓚᐅᖅᐳᖅ.

ᐱᓕᕆᕝᕕᒃ ᓄᑖᙳᕆᐊᖅᑎᑦᑎᕙᓪᓕᐊᓕᕆᕗᖅ ᐊᑐᐊᒐᓂ ᖃᐅᔨᓴᕐᓂᕐᒧᑦ ᐸᓴᒋᔭᐅᔪᓂ ᖃᓄᐃᓐᓂᐅᔪᓂ ᓱᕈᓯᕐᓂ ᐱᑦᑎᐊᙱᓐᓂᐅᔪᓂ.

ᐊᒻᒪᓗᑦᑕᐅᖅ, ᐱᓕᕆᕝᕕᒃ ᐅᓄᖅᓯᒋᐊᖅᑎᑦᑎᓯᒪᕗᖅ ᐅᓄᕐᓂᖏᓐᓂ ᓄᓇᓕᖕᓂ ᐃᓄᓕᕆᔨᐅᔪᓂ. ᑭᓯᐊᓂ, ᐃᒡᓗᒃᓴᖃᙱᓗᐊᕐᓂᖓᓂ ᐃᖅᑲᓇᐃᔭᖅᑎᓄᑦ ᑭᒡᓕᖃᖅᑎᑦᑎᕗᖅ ᑕᐃᔅᓱᒥᖓ ᐃᖏᕐᕋᓂᐅᔪᒥ.

“ᐱᓕᕆᕝᕕᒃ ᖃᑎᖅᓱᐃᕙᓪᓕᐊᔭᕆᐊᖃᖅᐳᖅ ᑮᓇᐅᔭᓂᒃ ᑐᖅᑯᖅᑕᐅᓯᒪᓗᑎᒃ ᐱᕈᖅᐸᓪᓕᐊᑎᑕᐅᓗᓂ ᐃᖅᑲᓇᐃᔭᖅᑎᖏᓐᓄᑦ, ᐊᒻᒪ ᓴᖅᑭᑎᑦᑎᓂᐊᖅᐳᖅ ᐱᐅᓂᖅᓴᐅᔪᓂ ᖃᓄᐃᓕᖓᓂᐅᔪᓂ ᐃᓄᖕᓄᑦ,” ᕼᐊᐃᔅ ᐅᖃᓚᐅᖅᐳᖅ.

ᐅᖃᖃᑎᖃᖅᖢᓂ ᑐᓴᒐᒃᓴᓕᐅᖅᑎᓄᑦ, ᓇᑲᓱᒃ ᑕᐃᓯᓚᐅᖅᐳᖅ ᐅᓂᒃᑳᓕᐊᖑᔪᒥ “ᐱᐅᑦᑎᐊᖅᑐᒥ ᖃᐅᔨᒋᐊᒃᑲᓐᓂᕐᓂᐅᔪᒥ” ᑕᑯᒃᓴᐅᑎᑦᑎᔪᒥ ᓇᒥ ᐱᓕᕆᕝᕕᖓ ᐱᐅᓯᒋᐊᖅᑎᑦᑎᒃᑲᓐᓂᕆᐊᖃᕐᓂᖓᓂ.

ᐃᓄᓕᕆᔨᒃᑯᑦ “ᐱᔪᓐᓇᕐᓂᐅᔪᒥ” ᐊᑲᐅᙱᓕᐅᕈᑎᖃᖅᐳᑦ ᐊᒃᑐᐃᔪᒥ ᐃᖅᑲᓇᐃᔭᖅᑎᑖᕐᓂᕐᒥ ᐊᒻᒪ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᖏᓐᓂ. ᑭᓯᐊᓂ ᐱᓕᕆᕝᕕᒃ ᑮᓇᐅᔭᖃᖅᑎᑦᑏᓐᓇᖅᐳᑦ ᐃᓂᒃᓴᒃᑲᓐᓂᐅᔪᓂ, ᐃᓚᒋᐊᖅᓯᓚᐅᖅᐳᖅ.

“ᓲᖃᐃᒻᒪ, ᑭᓱᑐᐃᓐᓇᐃᑦ ᓱᒃᑲᐃᒐᓚᖕᒪᑕ, ᑭᓯᐊᓂ ᐅᖃᓪᓚᒃᑲᑦᑕ ᕿᓚᒻᒥᑯᓗᖕᒥ ᐱᔭᕇᖅᓯᒪᔭᕆᐊᖃᕐᓂᖓᓂ ᐅᕙᓂ,” ᓇᑲᓱᒃ ᐅᖃᓚᐅᖅᐳᖅ ᐃᖏᕐᕋᓂᐅᔪᒥ ᐱᓕᕆᐊᖑᔪᒥ ᑕᐃᒪᙵᓂ ᑕᒻᒪᖅᓯᒪᔪᖅᓯᐅᑎᒻᒪᕆᐅᑉ 2023−ᒥ ᐅᓂᒃᑳᓕᐊᖓᓂ.

ᐅᓂᒃᑳᓕᐊᖅ ᐃᓚᖃᓚᐅᙱᓚᖅ ᐊᑐᖅᑕᐅᖁᔭᐅᓇᔭᖅᑐᓂ ᐃᓄᓕᕆᔨᒃᑯᓐᓄᑦ.

ᕼᐊᐃᔅ ᐅᖃᓚᐅᖅᐳᖅ ᓂᕆᐅᒃᐳᖅ ᑎᑎᕋᕐᕕᖓᓂ ᓴᖅᑭᑎᑦᑎᒃᑲᓐᓂᕐᓂᖓᓂ ᖃᐅᔨᒋᐊᒃᑲᓐᓂᕐᓂᐅᔪᒥ ᐃᓗᐊᓂ ᐊᕐᕌᒍᓂ ᒪᕐᕉᖕᓂ.