ᐅᓄᕐᓂᕐᓴᐃᑦ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ 9%-ᒥ ᑮᓇᐅᔭᓕᐊᕆᕙᒃᑕᖏᓐᓂ ᐊᑭᒃᑐᕆᐊᕈᔾᔨᓚᐅᖅᑐᑦ

For the English version of this story, please see Most GN workers to see 9% wage bump.

ᐅᓄᕐᓂᕐᓴᐃᑦ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᓂᕆᐅᒍᓐᓇᖅᓯᔪᑦ ᐊᑭᓕᖅᑕᐅᔾᔪᑎᖏ ᐊᓯᙳᓛᕐᓂᖏᓐᓂ ᐅᑭᐊᒃᓵᖅ ᐅᓇ ᐅᖃᐅᓯᐅᓵᕐᓂᑯ 9 ᐳᓴᓐᑎᒥ ᑮᓇᐅᔭᓕᐊᕆᔭᐅᕙᒃᑐᑦ ᐊᑭᑦᑐᕆᐊᖅᑕᐅᓂᐊᖅᑎᓪᓗᒋᑦ.

ᑕᐃᕕᑦ ᐊᕿᐊᕈᖅ, ᓄᓇᕗᒥᑦ ᒥᓂᔅᑕ ᐃᖅᑲᓇᐃᔮᒃᓴᓕᕆᓂᕐᒧᑦ, ᑐᓴᖅᑎᑦᑎᓚᐅᕐᑐᖅ ᐊᑭᑦᑐᕆᐊᕐᓂᐅᓂᐊᖅᑐᓂ ᒪᐃ 31-ᒥ ᒪᓕᒐᓕᕆᕕᒡᔪᐊᕐᒥᑦ.

ᓄᓇᕗᒥᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑐᑦ ᑭᒡᒐᖅᑐᖅᑕᐅᓪᓗᑎᒃ ᓄᓇᕗᒥᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᓄᑦ, ᐊᐅᓚᑦᑎᔨᐅᓂᕐᓴᓄᑦ, ᐊᒻᒪ ᐃᓚᐅᑎᑕᐅᙱᑦᑐᑦ ᐃᖅᑲᓇᐃᔭᖅᑏᑦ 9 ᐳᓴᓐᑎᒥ ᐊᑭᑦᑐᕆᐊᕈᔾᔨᓂᐊᖅᒪᑕ ᑮᓇᐅᔭᓕᐊᖏᓐᓂᒃ ᐱᒋᐊᕐᓗᓂ ᓯᑎᐱᕆ 30-ᒥ.

ᐃᓕᓴᐃᔩᑦ ᐊᒻᒪ ᖁᓪᓗᖅ ᐆᒻᒪᖅᑯᑎᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐃᓚᐅᑎᑕᐅᙱᑦᑐᑦ, ᓲᖃᐃᒻᒪ ᐊᓯᐊᒍᑦ ᐊᖏᖃᑎᒌᒍᑎᒃᑯᑦ ᐃᖅᑲᓇᐃᔮᖃᕐᒪᑕ ᐅᑯᑎᑐᓇᐅᙱᑦᑐᖅ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᔨᓄᑦ.

ᐃᖅᑲᓇᐃᔮᕆᔭᐅᔪᑦ ᐱᓕᕆᑯᑖᖕᓂᕐᓴᓄᑦ ᐅᕝᕙᓘᓐᓃᑦ ᐱᓕᕆᐊᒧᑦ ᐋᖅᑭᒃᓯᒪᔪᑦ 11 ᐳᓴᓐᑎᒥ ᐊᑭᑦᑐᕆᐊᕈᔾᔨᓂᐊᖅᑐᑦ, ᑐᓴᒐᒃᓴᕆᔭᐅᔪᑦ ᐅᖃᕐᓯᒪᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪ ᑲᑐᔾᔨᖃᑎᒌᓂᒃ ᒪᐃ 31-ᖑᑎᓪᓗᒍ.

ᐅᓇ 2 ᐳᓴᓐᑎᒥ ᐊᖏᓂᕐᓴᐅᔾᔪᑎ ᐱᕕᖃᕈᑎᐅᔪᖅ “ᐱᓕᕆᐊᒃᓴᐃᑦ ᐱᕙᓪᓕᐊᓂᖏᓐᓄᑦ ᐊᒻᒪᓗ ᐃᖅᑲᓇᐃᔭᖅᑎᓂᒃ ᐱᓕᕆᐊᒃᓴᑲᓐᓂᕐᓂ ᐱᓕᕆᓕᕈᒪᔾᔪᑎᐅᓇᓱᒃᖢᓂ,” ᑐᓴᒐᒃᓴᐃᑦ ᐅᖃᕐᓯᒪᓚᐅᕐᒥᔪᑦ.

ᖃᖓᑦᑎᐊᓵᖅ ᐃᖅᑲᓇᐃᔮᒃᓴᒧᑦ ᒪᓂᓴᐅᑎ ᓄᓇᓕᖕᓂ ᐋᓐᓂᐊᓯᐅᖅᑎᐅᓂᕐᒧᑦ ᐃᓚᖃᓚᐅᕐᑐᖅ ᑮᓇᐅᔭᓕᐊᒃᓴᖅ ᐱᒋᐊᕐᕕᖃᕋᔭᕐᓂᖓᓂᒃ $109,029-ᒥ. ᐋᓐᓂᐊᓯᐅᖅᑎ ᑕᐃᒪᓐᓇ ᑮᓇᐅᔭᓕᐅᖅᑐᖅ ᑮᓇᐅᔭᓕᐊᖓ ᑎᑭᓐᓇᔭᖅᑐᖅ $118,841.60-ᒧ ᑖᓐᓇ ᐊᑭᑦᑐᕆᐊᕈᑎ ᐱᒋᐊᖅᐸᑦ. ᐅᓇᓕ $377.41-ᒥ ᐅᓄᕐᓯᕚᓪᓕᕈᑎᐅᔪᖅ ᐱᓇᓱᐊᕈᓰᒃ ᒪᕐᕉᒃ ᐊᓂᒍᕌᖓ ᐲᔭᐃᕝᕕᐅᓚᐅᖅᑎᓐᓇᒍ.

ᓄᓇᕗᒥᑦ ᒐᕙᒪᒃᑯᓐᓄ ᑲᑎᓕᒫᖅᖢᑎᒃ ᐊᕐᕌᒍᒧᑦ ᐊᑭᑦᑐᕆᐊᕈᑎᐅᔪᑦ ᑎᑭᓐᓂᐊᖅᑐᑦ ᒪᐅᖓ $33 ᒥᓕᐊᓐ ᑖᓚᓄᑦ, ᐅᓇ ᐆᒪ ᐋᑲᔅ ᑐᓴᐅᒪᔾᔪᑎᓕᕆᓂᕐᒧᑦ ᐊᐅᓚᑦᑎᔨ ᐃᖅᑲᓇᐃᔮᒃᓴᓕᕆᔨᒃᑯᓐᓄᑦ ᐅᖃᓚᐅᕐᑐᖅ.

ᐅᓇ ᑮᓇᐅᔭᓕᐊᓄᑦ ᐊᑭᑦᑐᕆᐊᖅᑎᑦᑎᓂᒃ ᐱᓕᕆᐊᖑᓕᓚᐅᕐᑐᖅ ᕿᒥᕐᕈᐊᖅᑎᑦᑎᓚᐅᖅᑎᓪᓗᒋᑦ ᓄᓇᕗᒥᑦ ᒐᕙᒪᒃᑯᓐᓄᑦ ᑮᓇᐅᔭᓕᐊᕆᔭᐅᕙᒃᑐᓂᒃ ᑕᐅᑐᙳᐊᖅᖢᒋᑦ ᐊᔾᔨᖏᓐᓂ ᐃᖅᑲᓇᐃᔮᕆᔭᐅᔪᑦ ᑲᓇᑕᒥ ᐊᓯᐊᓂ, ᐅᖃᓚᐅᕐᑐᖅ ᐊᕿᐊᕈᖅ.

ᒪᐃ 2023-ᒥ ᑐᒃᓯᕋᐅᑎᓂ ᐱᔪᒪᔾᔪᑎᓂ ᑮᓇᐅᔭᓕᐊᕆᔭᐅᔪᓂᒃ ᕿᒥᕐᕈᐊᕐᓂᕐᒧᑦ ᐅᖃᕐᓯᒪᓚᐅᕐᒪᑕ ᓄᓇᕗᒥᑦ ᒐᕙᒪᒃᑯᑦ ᕿᒥᕐᕈᐊᖅᑎᑦᑎᑕᐅᙱᓐᓂᖏᓐᓂᒃ 2000 ᑭᖑᓂᐊᒍᑦ.

ᑕᐃᔅᓱᒪᓂᓕ ᓄᓇᕗᒥᑦ ᒐᕙᒪᒃᑯᓐᓄᑦ ᐃᖅᑲᓇᐃᔮᒃᓴᑦ ᐃᓄᖃᓚᐅᕐᓯᒪᙱᒻᒪᑕ ᒫᓃᑦᑐᓂ 37 ᐳᓴᓐᑎᖏᓐᓂ.

ᐊᕿᐊᕈᖅ ᐅᖃᓚᐅᕐᑐᖅ ᒪᓕᒐᓕᕆᕕᒡᔪᐊᕐᒥ ᐅᓇ ᐊᑭᑦᑐᕆᐊᕐᓂᐅᔪᖅ ᑕᐃᒪᐃᑎᑕᐅᓂᖓᓂ ᐅᑯᐊ ᓄᓇᕗᒥᑦ ᒐᕙᒪᒃᑯᑦ “ᓂᕈᐊᕆᔭᐅᓛᖑᖃᑦᑕᕐᓂᐊᕐᒪᑕ ᐃᖅᑲᓇᐃᔭᕐᕕᒃᓴᓂ.”

“ᑐᓴᖅᑎᑦᑎᒃᑲᓐᓂᕈᒪᓪᓗᖓ ᐃᖅᑲᓇᐃᔭᖅᑎᕗᑦ ᒐᕙᒪᑦᑎᓐᓄᑦ ᐱᒻᒪᕆᐅᓛᖑᖕᒪᑕ ᐃᑲᔫᑎᓂᒃ,” ᐊᕿᐊᕈᖅ ᐅᖃᕐᑐᖅ.

“ᑮᓇᐅᔭᓕᐅᑦᑎᐊᕈᑎ ᑕᐃᒪᓕ ᐃᖅᑲᓇᐃᔭᖅᑎᒋᑯᑖᖕᓂᕐᓴᐅᓇᔭᔭᕋᑦᑎᒍᑦ ᐊᒻᒪᓗ ᓄᑖᓂ ᐃᖅᑲᓇᐃᔭᕈᒪᔪᖃᓕᕐᓄᓂ ᓄᓇᕗᒥᑦ ᑭᒃᑯᓕᒫᓄᑦ ᐱᔨᑦᑎᕋᐅᑎᓂ.”

ᐅᖃᐅᓯᕆᔭᖓ ᐸᑦᑕᒃᑐᕈᑎᐅᓚᐅᕐᑐᖅ ᒪᓕᒐᓕᕆᔨᓂ ᑕᒪᐃᓐᓂ.

ᒪᓕᒐᓕᕆᕕᒡᔪᐊᕐᒥ ᑲᑎᒫᓂᒃᑎᓪᓗᒋᑦ ᒪᐃ 31-ᒥ ᐊᕿᐊᕈᖅ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᖁᕕᐊᒋᓂᕋᖅᖢᓂᐅᒃ ᑮᓇᐅᔭᓕᐊᕆᔭᐅᔪᑦ ᖁᕝᕙᖅᐹᓪᓕᕐᓂᐊᓕᕐᓂᖏᓐᓂᒃ ᐊᒻᒪᓗ ᐱᓕᕆᑎᑦᑎᓂᕐᒧᑦ ᐋᔩᕈᑎᐅᓛᕐᑐᑦ ᐊᒻᒪ ᐃᑲᔪᕐᓂᖃᓛᖁᓪᓗᓂᒋᑦ.

ᓄᓇᕗᒥᑦ ᒐᕙᒪᒃᑯᑦ ᐊᒻᒪᓗ ᓄᓇᕗᒥᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᓄᑖᒥ ᐊᖏᕈᑎᒃᓴᒥ ᐋᔩᕈᑎᖃᑲᑕᖕᓂᐊᕐᒪᑕ ᐅᓇ ᐊᖏᕈᑎᒋᔭᐅᔪᖅ ᐃᓱᓕᑉᐸᑦ ᐅᒃᑑᐱᕆ 1-ᒥ.

“ᑕᒪᑐᒧᖓᓕ ᐃᖅᑲᓇᐃᔭᖅᑎᖃᕆᐊᖃᕋᑦᑕ ᐃᖅᑲᓇᐃᔭᖅᑎᑦᑎᐊᕙᖕᓂ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᓂᒃᑯᑦ ᐊᒻᒪᓗ ᐅᓇ ᐃᑲᔫᑎᒻᒪᕆᐅᖕᒪᑦ ᐊᑭᓕᖅᓱᖅᑕᐅᑦᑎᐊᖃᑦᑕᕐᓂᖅ ᐊᒻᒪ ᐃᑲᔫᑎᑖᕈᑎᑦ,” ᐊᕿᐊᕈᖅ ᐅᖃᕐᑐᖅ.

ᓄᓇᕗᒥᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ “ᖁᕕᐊᒋᔭᖃᒻᒪᕆᓚᐅᕐᑐᑦ” ᓄᓇᕗᒥᑦ ᒐᕙᒪᒃᑯᑦ ᑮᓇᐅᔭᓕᐊᕆᔭᐅᔪᓂᒃ ᐱᓕᕆᐊᖃᓕᕐᒪᑕ, ᐅᖃᕐᑐᖅ ᑲᑐᔾᔨᖃᑎᒌᓄᑦ ᐊᖓᔪᖅᑳᖅ ᔭᐃᓴᓐ ᕈᓵᓐ ᑐᓴᒐᒃᓴᓕᐅᖅᑎᓪᓗᒋᑦ.

“ᐱᓕᕆᖃᑎᒋᓛᕐᓂᑦᑎᓐᓂ ᓄᓇᕗᒥᑦ ᒐᕙᒪᒃᑯᑦ ᓂᕆᐅᒋᑦᑎᐊᖅᑕᕗᑦ ᓯᕗᓂᒃᓴᒥ ᐋᔩᕈᑎᖃᓛᓕᕈᑦᑕ ᑕᒪᓐᓇ ᑭᖑᕙᓯᓕᖁᓇᒍ,” ᐅᖃᕐᑐᖅ.