ᑐᖂᑦᑎᓂᕐᒧᑦ ᐸᓯᔭᒃᓴᙳᖅᑎᑦᑎᔪᑦ ᐃᓅᔪᓐᓃᖅᑐᖃᖅᑎᓪᓗᒍ ᒥᑦᑎᒪᑕᓕᒃᒥ ᐊᓈᓇᒋᔭᐅᔪᒥᒃ ᑎᓴᒪᓄ

ᔪᐊᓐ ᓄᑕᕋᖅ ᓂᐱᖄᓗᓚᐅᙱᑦᑐᖅ, ᐊᓯᒥᓂ ᐃᓱᒪᒋᔭᖃᑦᑎᐊᖅᐸᒃᖢᓂ ᐊᒻᒪ ᓈᒻᒪᒃᓴᙱᓐᓂᕋᖅᐸᙱᖢᓂ.

ᐊᒻᒪᓗ ᖁᖓᑦᑎᐊᖅᐸᒃᖢᓂ, ᐅᖃᓚᐅᕐᑐᖅ ᐊᑯᓂᐊᓗᒃ ᐱᖃᓐᓇᖓ ᔪᐊᓇ ᐃᓄᐊᓗᒃ-ᑯᓄᒃ.

ᐅᓇ 31ᓂ ᐊᕐᕌᒍᓕ ᐊᓈᓇᒋᔭᐅᔪᖅ ᑎᓴᒪᓄᑦ ᐃᓅᔪᓐᓃᓚᕐᒪᓐ ᐄᐳᕈᓪ 8ᒥ ᑖᓐᓇᓗ ᓯᕗᓪᓕᕐᒥ ᐸᓖᓯᓄᑦ ᐃᓱᒪᒋᔭᐅᓪᓗᓂ “ᐸᓯᓇᕐᓂᒃᑯᑦ”.

ᐄᐳᕈᓪ 13ᒥ ᐸᓖᓯᒃᑯᑦ ᑐᓴᖅᑎᑦᑎᓕᓚᐅᕐᑐᑦ ᒥᑦᑎᒪᑕᓕᒃᒥᐅᑕᕐᒥ ᐊᖑᑎᒥ ᐸᓯᔭᒃᓴᙳᖅᑎᑦᑎᓚᐅᕐᓂᖏᓐᓂᒃ ᑐᖂᑦᑎᓂᕐᒥ ᓄᓇᕋᖅᒥ.

ᑎᐅᕈᓪ ᖁᐊᕋᖅ, 33, ᐃᖅᑲᖅᑐᐃᕕᒃᒥ ᐱᓕᕆᐊᖑᓂᐊᕐᑐᖅ ᒪᐃ 30ᒥ ᐃᖃᓗᖕᓂ.

ᑐᓴᒐᒃᓴᖏᑦᑎᒍᑦ, ᐸᓖᓯᒃᑯᑦ ᐅᖃᓚᐅᙱᑦᑐᑦ ᖁᐊᕋᖅ ᐊᒻᒪ ᓄᑕᕋᖅ ᖃᐅᔨᒪᖃᑦᑕᐅᑎᔭᕆᐊᒃᓴᖏᓐᓂᒃ ᐊᐃᑉᐸᕇᒋᐊᒃᓴᖏᓐᓂᓪᓘᓐᓃᑦ.

ᓄᑕᕋᖅ ᒥᑦᑎᒪᑕᓕᒃᒥ ᐋᓐᓂᐊᕕᖕᒧᑦ ᐊᒡᔭᖅᑕᐅᓚᐅᕐᓯᒪᔪᖅ ᐄᐳᕈᓪ 8ᒥ. ᑕᐃᑲᓂ ᐃᓅᔪᓐᓃᓚᐅᕐᓯᒪᔪᖅ ᐊᓂᕐᓵᖅᑎᑕᐅᓇᓱᓚᐅᕋᓗᐊᖅᖢᓂ.

ᐸᓖᓯᑦ ᐅᖃᓚᐅᙱᑦᑐᖅ ᖃᓄᖅ ᐋᓐᓂᖅᑕᐅᓯᒪᓚᐅᕐᒪᖔᑦ ᓄᑕᕋᖅ.

ᐃᓄᐊᓗᒃ-ᑯᓄᒃ ᐅᖃᓚᐅᕐᑐᖅ ᑐᓴᓚᐅᕐᓂᕋᖅᖢᓂ ᓄᑕᕋᐅᑉ ᐃᓅᔪᓐᓃᕐᓂᖓᓂᑦ ᑕᐃᒪᐃᓵᑦᑎᐊᖅᑎᓪᓗᒍ, ᓲᖃᐃᒻᒪ ᑐᓴᑲᑕᒃᓴᐃᓐᓇᖅᑐᐊᓗᒃ ᓄᓇᓕᖕᓂ ᐃᓄᖃᖅᑐᒥ 1,500ᓂ.

ᐅᖃᒪᐅᕐᑐᖅ ᑕᒪᕐᒥᑦᑎᐊᖅ ᓄᓇᖃᕐᑐᑦ ᖁᒃᓴᓪᓚᒻᒪᕆᓚᐅᕐᑐᑦ ᓄᓇᕋᖅ ᐃᓅᔪᓐᓃᕐᓂᖓᓂᒃ.

“ᐃᓅᖃᑎᒋᑦᑎᐊᓚᐅᕋᑦᑎᒍᑦ ᓄᓇᑦᑎᓐᓂ ᒥᑦᑎᒪᑕᓕᒃᒥ, ᕿᑐᕐᖓᖏᑦ, ᐃᓚᖏᑦ, ᐱᖃᓐᓇᖏᑦ ᐊᒻᒪ ᑭᒃᑯᓕᒫᓄᑦ ᖃᐅᔨᒪᔭᖏᓐᓄᑦ,” ᐅᖃᓚᐅᕐᑐᖅ.

“ᐃᓚᐃᖅᑐᒍ ᐅᕙᑦᑎᓐ ᐃᑲᔪᑦᑎᐊᓚᐅᕐᑐᒥᒃ ᐊᒻᒪᓗ ᐋᓐᓂᕐᓈᓗᒃᖢᓂ.”

ᐃᓄᐊᓗᒃ-ᑯᓄᒃ ᐃᖃᓗᖕᓃᓚᐅᕐᓯᒪᔪᖅ ᓄᑕᕋᖅ ᕿᑭᖅᑕᓂ ᐋᓐᓂᐊᕕᐊᓗᒃᒧᐊᖅᑎᓪᓗᒍ ᑕᖅᑭᐅᓚᐅᕐᑐᒥ ᐃᕐᓂᔭᖅᑐᖅᖢᓂ ᓄᑲᖅᖠᖅᐹᒥᒃ.

ᓄᑕᕋᖅ ᐃᖅᑲᐅᒪᔭᐅᖁᔭᖓ ᐃᓄᑦᑎᐊᕚᓘᓚᐅᕐᓂᖓᓂᒃ, ᖁᕕᐊᓱᑦᑎᐊᖅᖢᓂ ᐊᒻᒪ ᓂᐱᖅᑯᖅᑐᐊᓗᙱᖢᓂ ᐊᒻᒪ ᐃᒡᓚᖅᓴᕋᐃᖅᖢᓂ.

“ᐊᐃᑦᑖᕈᓱᒻᒪᕆᒃᑐᒍᑦ,” ᐅᖃᕐᑐᖅ.

“ᐋᓐᓂᕐᓇᖅᑐᐊᓗᒃ.”

ᓄᑕᕋᐅᑉ ᐊᑦᑕᖓ, ᕕᐅᓇ ᐊᒡᓚᒃ, ᑕᐃᒪᓐᓇᑦᑕᐃᓐᓇᖅ ᐅᖃᓪᓚᓚᐅᕐᒥᔪᖅ ᓄᓇᑦᓯᐊᒥ ᐱᕙᓪᓕᐊᔪᓂᒃ ᐅᖃᕐᕕᐅᓕᕋᒥ ᐱᓇᓱᐊᕈᓯᐅᓚᐅᕐᑐᒥᓐ.

ᐊᒡᓚᒃ, ᒥᑦᑎᒪᑕᓕᒃᒥᐅᑕᖅ, ᐋᑐᕚᒦᖃᑎᖃᓵᓚᐅᕐᑐᖅ ᓄᑕᕋᖅᒥ, ᐱᖃᑎᒋᓪᓗᓂᐅᒃ ᓄᑕᕋᖅ ᐱᓇᓱᐊᕈᓯᕐᓂ 32ᓂ ᓇᔾᔨᐊᖃᓕᖅᖢᓂ.

“ᐱᑦᑎᐊᖅᑐᐊᓘᓚᐅᕐᑐᖅ ᐊᒻᒪ ᕿᑐᕐᖓᖏᓐᓂ ᓇᒡᓕᒍᓱᑦᑎᐊᖅᖢᓂ,” ᐅᖃᕐᑐᖅ. “ᖃᐅᔨᒪᖁᔨᔪᖓ ᐃᓄᖕᓂ ᓇᒡᓕᖕᓂᖃᑦᑎᐊᓚᐅᕐᓂᖓᓂᒃ, ᐃᓱᒪᒋᔭᖃᑦᑎᐊᖅᖢᓂ ᐊᒻᒪ ᓇᒡᓕᒍᓱᑦᑎᐊᖅᖢᓂ.”

ᐊᒡᓚᒃ ᐅᖃᓚᐅᕐᑐᖅ ᓇᓗᓂᕋᖅᖢᓂ ᖃᑯᒍ ᐃᓗᕕᖅᑕᐅᓂᐊᕆᐊᒃᓴᖓᓂ ᓄᑕᕋᖅ.