ᑐᖂᑦᑎᓂᕐᒧᑦ ᐸᓯᔭᒃᓴᐅᑉ ᐸᓯᔭᐅᔾᔪᑎᖏ ᓄᖅᑲᖅᑎᑕᐅᕗᑦ ᐅᑭᐅᓂᒃ ᑎᓴᒪᓂᒃ ᑎᒍᔭᐅᓯᒪᓚᐅᖅᖢᓂ
ᓗᐊᐃᔭᐃᑦ ᐆᒥᖓ ᒐᓚᓐ ᑲᑦᓚᒃ ᓄᑲᖅᖠᖅ ᑐᖁᑎᑦᑎᓂᕐᒧᑦ ᐸᓯᔭᒃᓴᐅᔾᔪᑎᓂᒃ ᓄᖅᑲᖅᑎᑦᑎᕗᑦ ᓯᑎᐱᕆ 21-ᖑᑎᓪᓗᒍ
ᓗᐊᐃᔭᐃᑦ ᐸᓯᔭᒃᓴᐅᔾᔪᑎᓂᒃ ᑐᖂᑦᑎᓂᕐᒥ ᐆᒥᖓ ᒐᓚᓐ ᑲᑦᓚᒃ ᓄᑲᖅᖠᖅ ᓯᑎᐱᕆ 21-ᒥ. ᑲᑦᓚᒃ ᐸᓯᔭᒃᓴᐅᑎᑕᐅᓚᐅᕐᑐᖅ 2017-ᒥ ᐃᓅᔪᓐᓃᖅᑐᖃᖅᑎᓪᓗᒍ 12-ᓂ ᐅᑭᐅᖃᖅᑐᒥ ᐊᖑᑎᓯ ᑲᖏᖅᖠᓂᖅᒥ. (ᐊᔾᔨᙳᐊᖁᑎᒋᔭᐅᔪᖅ ᑕᐃᕕᑦ ᕕᐊᓐ)
For English version, see ‘It’s been devastating’: Murder suspect’s charge dropped after 4 years in custody
ᐸᓯᔭᒃᓴᐅᑎᑦᑎᔪᑦ ᓄᖅᑲᖅᑎᑦᑎᓚᐅᕐᑐᑦ ᑐᖂᑦᑎᓂᕐᒧᑦ ᐸᓯᔭᒃᓴᐅᑎᑕᖓᓂᒃ ᐆᒥᖓ ᒐᓚᓐ ᑲᑦᓚᒃ, ᓄᑲᖅᖠᖅ, ᐊᐃᑉᐸᕆᔭᐅᔪᒃ ᒪᕐᕉᖕᓂᒃ ᐸᓯᔭᒃᓴᐅᔫᖕᓂᒃ ᑐᖂᑦᑎᓂᕐᒥᒃ 12-ᓂ ᐅᑭᐅᓕᖕᒥ ᐊᖑᑎᒥ ᑲᖏᖅᖠᓂᖅᒥ 2017-ᐅᑎᓪᓗᒍ.
ᐋᖅᑭᒃᑕᐅᓕᓚᐅᕐᒪᓐ ᐸᓯᔭᒃᓴᐅᔾᔪᑎᑕᖃᙱᓐᓂᖓᓂᒃ, ᑎᑎᕋᓚᐅᕐᑐᖅ ᓄᓇᕗᒥᑦ ᒐᕙᒪᑐᖃᒃᑯᓐᓄᑦ ᓗᐊᐃᔭ ᕕᓕᑉ ᐳᓘᑦ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
“ᐸᓯᔭᒃᓴᐅᑎᑦᑎᔪᑦ ᐅᖃᖃᑎᖃᓚᐅᕐᓯᒪᖕᒪᑕ ᑐᖁᑕᐅᔫᑉ ᐃᓚᖏᓐᓂᒃ,” ᐳᓘᑦ ᑎᑎᕋᕐᑐᖅ. “ᖃᓄᑐᐃᓐᓇᖅ ᐊᑐᕋᓗᐊᕐᓂᖅᐸᑕ, ᑖᓐᓇ ᓱᕈᓯᖅ ᐅᑎᖅᑎᑕᐅᔪᓐᓇᕈᓐᓃᖅᑐᖅ, ᐊᒻᒪᓗ ᓄᓇᓖᑦ ᐃᓅᑐᐃᓐᓇᓕᕐᓗᑎᒃ ᐱᑕᖃᙱᑦᑐᖅ ᖃᐅᔨᒪᒐᓗᐊᕐᓗᒍ.”
ᓄᓇᓕᖕᓂ ᓄᓇᖃᖅᑐᑦ ᐊᖑᑎᐅᑉ ᑎᒥᖓᓂ ᓇᓂᓯᓚᐅᕐᓯᒪᖕᒪᑕ ᐃᒡᓗᕋᓛᒥ ᔪᓚᐃ 7, 2017-ᒥ, ᐊᓯᐅᓂᕋᖅᑕᐅᓯᒪᓕᖅᑎᓪᓗᒍ ᐅᓪᓗᒐᓴᐅᓕᕐᑐᓂᒃ. ᐃᖅᑲᖅᑐᐃᕕᒃᒥ ᐅᖃᓪᓚᒃᑐᓂᒃ, ᑖᒃᑯᐊ ᐃᖅᑲᖅᑐᐃᔨᒃᑯᑦ ᐅᖃᐅᔾᔭᐅᓚᐅᕐᒪᑕ ᐊᓇᐅᔭᐅᓯᒪᓂᕐᒨᖓᓂᖓᓂᒃ ᐊᒻᒪᓗ ᑲᐱᔭᐅᑲᑕᒃᓯᒪᓪᓗᓂ ᐅᓄᖅᑐᐃᖅᑕᐅᓪᓗᓂ.
ᑖᔅᓱᒪ ᓱᕈᓯᐅᑉ ᐊᑎᖓ ᑕᐃᔭᐅᔪᓐᓇᙱᒻᒪᑦ ᐃᖅᑲᖅᑐᐃᕕᒃᑎᒍᑦ ᐅᖃᐅᓯᐅᖁᔭᐅᙱᓐᓂᖓᓄᑦ. ᐸᓖᓯᒃᑯᑦ ᒪᕐᕉᖕᓂ ᑎᒍᓯᓚᐅᕐᓯᒪᔪᑦ ᐊᒻᒪᓗ ᐸᓯᔭᒃᓴᙳᖅᑎᑦᑎᓪᓗᑎᒃ ᑐᖂᑦᑎᓂᕐᒥ.
ᐊᑕᐅᓯᖅ ᐃᓅᓱᒃᑑᓚᐅᕐᑐᖅ ᐃᓅᔪᓐᓃᖅᑎᓪᓗᒍ ᐊᒻᒪᓗ ᐊᑎᖓ ᐅᖃᐅᓯᐅᔪᓐᓇᙱᖢᓂ ᐅᕘᓇ ᐃᓅᓱᒃᑐᓄᑦ ᐱᕋᔭᒃᓯᒪᔪᓄᑦ ᒪᓕᒐᓕᕆᓂᕐᒧᑦ ᒪᓕᒐᖅᑎᒍᑦ. ᐃᖅᑲᖅᑐᖅᑕᐅᕌᓂᓚᐅᕐᑐᖅ ᐃᖃᓗᖕᓂ ᓯᑎᐱᕆ 13-ᒥ ᐊᒻᒪ ᐃᖅᑲᖅᑐᐃᔨ ᓲᓴᓐ ᑰᐳ ᐋᖅᑭᒃᓯᓚᐅᕐᑐᖅ ᐅᒃᑑᐱᕆ 31-ᒥ ᖃᓄᐃᑕᐅᓂᐊᕐᓂᖓᓄᑦ ᐋᖅᑭᒃᑕᐅᔪᓂᒃ.
ᐸᓖᓯᒃᑯᑦ ᑎᒍᓯᓚᐅᕐᒥᔪᑦ ᑲᑦᓚᒃᒥ, ᐅᒃᑑᐱᕆ 2018-ᒥ. ᑎᒍᔭᐅᓯᒪᓪᓗᓂ ᓯᑎᐱᕆ 21 ᑕᖅᑭᐅᓵᖅᑐᒥ ᐅᓇ ᐃᖅᑲᖅᑐᐃᔨ ᓂᐅᓪ ᓵᑭ ᑐᓴᓚᐅᖅᑎᓪᓗᒍ ᐳᓘᑦ ᐸᓯᔭᒃᓴᐅᔪᓐᓃᕈᑎᖏᓐᓂᒃ.
ᐳᓘᑦ ᐅᖃᓚᐅᕐᒪᑦ ᐸᓯᔭᒃᓴᐅᔪᓐᓃᖅᑎᑕᐅᓂᖓ ᑲᑦᓚᐅᑉ, 25, ᐊᒃᑐᐃᓂᖃᔾᔮᙱᑦᑐᖅ ᐃᓅᓱᒃᑑᑉ ᐃᖅᑲᖅᑐᖅᑕᐅᓂᖓᓂᒃ.
ᓇᓗᓇᐃᕐᓯᓚᐅᙱᑦᑐᖅ ᑭᓱᓂ ᐊᓯᙳᖅᑐᖃᓚᐅᕐᒪᖔᑦ ᑐᖂᑦᑎᓂᕐᒧᑦ ᐱᓕᕆᐊᓂᒃ ᑖᒃᑯᐊ ᐸᓯᔭᒃᓴᐅᑎᑦᑎᔪᑦ ᐋᖅᑭᒃᓯᑎᓪᓗᒋᑦ ᐅᓇ ᑲᑦᓚᒃ ᖃᓄᐃᓕᔭᐅᔪᓐᓇᕋᓱᒋᔭᐅᓇᓂ.
“ᑕᒪᑐᒧᖓ ᖃᐅᔨᓴᖅᑕᐅᕙᓪᓕᐊᔪᑦ ᒪᐅᓈᕐᓯᒪᖕᒪᑕ ᑎᑎᕋᖅᑕᐅᕙᓪᓕᐊᓯᒪᔪᓂᒃ ᑕᐃᒪᓐᓇᓗ ᐅᓇ ᖃᐅᔨᓴᕐᓂᖅ ᐱᓕᕆᐊᖑᐃᓐᓇᖅᐳᖅ,” ᐳᓘᑦ ᐅᖃᓚᐅᕐᑐᖅ.
“ᑎᑎᕋᖅᑕᐅᓯᒪᔪᑦ ᐸᓯᔭᒃᓴᐅᔾᔪᑎᒧᑦ ᐃᖅᑲᖅᑐᖅᑕᐅᔾᔪᑎᖃᕈᓐᓇᖃᑦᑕᖅᑐᑦ ᐱᒋᐊᓕᓵᕐᓂᒃᑯᑦ ᐊᒻᒪᓗ ᐱᓕᕆᐊᖑᓂᖓᓂᒃ ᐸᓯᔭᒃᓴᐅᔾᔪᑎᖃᕈᓐᓃᕐᓇᖅᖢᑎᒃ.”
ᑭᓯᐊᓂᓕ, ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᑲᑦᓚᐅᑉ ᓴᐳᓐᓂᐊᖅᑎᖓ ᓗᐊᐃᔭ ᔭᐃᒻᔅ ᕗᐊᑦ ᐅᖃᓚᐅᕐᒪᑦ ᐃᖅᑲᖅᑐᐃᔨᒃᑯᑦ ᐃᓱᒪᓕᐊᖏ ᑕᐃᒪᐃᑦᑕᕆᐊᒃᓴᖓᓂᒃ ᐅᓇ ᑲᑦᓚᒃ ᖃᓄᐃᓕᐅᕐᓂᕕᓂᖓ — ᐱᔭᐅᓂᑯ ᐸᓖᓯᓂᒃ ᐃᓕᓴᕐᓇᙱᑦᑐᓂᒃ ᐱᓕᕆᐊᖃᖅᑐᓂᒃ — ᑕᐃᒪᐃᓪᓚᕆᒐᓱᒋᔭᐅᓇᓂ.
ᑲᑦᓚᒃ ᐃᓅᓱᒃᑐᖅ ᐃᖅᑲᖅᑐᖅᑕᐅᑎᓪᓗᒍ ᐊᐱᕐᓱᖅᑕᐅᓪᓗᓂ ᐅᑯᓄᖓ ᐸᓖᓯᓄ ᑎᒍᔭᐅᓚᐅᕐᓯᒪᓂᖓᓂᒃ ᑎᓯᐱᕆ 2017-ᒥ ᑖᔅᓱᒪ ᓱᕈᓯᐅᑉ ᐃᓅᔪᓐᓃᕐᓂᖓᓄᑦ ᑭᓯᐊᓂᓕ ᐸᓯᔭᒃᓴᙳᖅᑎᑕᐅᓚᐅᕐᓯᒪᙱᑦᑐᖅ ᐊᓂᑎᑕᐅᓪᓗᓂᓗ.
ᑲᑦᓚᒃ ᐅᖃᓚᐅᕐᑐᖅ ᑎᒍᔭᐅᓯᒪᑎᓪᓗᒍ ᐊᖑᑎᒥ ᖃᐅᔨᒪᓕᓚᐅᕐᓯᒪᖕᒪᑦ ᔭᐃᓴᓐᒥ ᑎᒍᔭᐅᓯᒪᕝᕕᒃᒥ. ᐱᖃᓐᓇᕇᓕᖅᖢᑎᒃ ᑕᖅᑭᓂᒃ 10-ᓂ, ᑖᓐᓇ ᔭᐃᓴᓐ ᐃᖅᑲᓇᐃᔭᖅᑎᑦᑎᕙᒃᖢᓂ ᑲᑦᓚᒃᒥ ᕿᔪᓕᕆᓂᕐᒥᒃ ᐊᒻᒪ ᐅᐊᔭᓕᕆᓂᕐᒥᒃ ᒫᓂᑑᐸᒥ.
ᕗᐊᑦ ᐅᖃᓚᐅᕐᑐᖅ ᔭᐃᓴᓐ ᑲᑦᓚᒃᒥᒃ ᓂᕆᔭᖅᑐᕐᕕᖕᓄᐊᖃᑎᖃᖃᑦᑕᓚᐅᕐᑐᖅ ᐊᒻᒪᓗ ᐊᔾᔨᒌᙱᑦᑐᓄᑦ ᓄᓇᓕᖕᓄᐊᖅᐸᒃᖢᑎᒃ.
“ᐅᓇ ᖃᓄᐃᓕᐅᕐᓂᖅ ᑲᔪᓯᑎᑕᐅᓚᐅᕐᓯᒪᔪᖅ ᐊᒻᒪᓗ ᒐᓚᓐᒥ ᖃᓂᒡᓕᓂᕐᓴᐅᓪᓗᓂ, ᐅᒃᐱᕆᔭᐅᔪᓐᓇᕐᓯᓪᓗᓂ, ᐱᖃᓐᓇᕆᔭᐅᓕᖅᖢᓂ ᐊᒻᒪᓗ ᖃᓄᐃᓕᐅᖅᑎᑲᑕᒃᖢᓂᐅᒃ ᑲᖏᖅᖠᓂᖅᒥ ᐊᑐᕋᔭᓚᐅᙱᑕᖏᓐᓂᒃ,” ᕗᐊᑦ ᐅᖃᕐᑐᖅ. “ᑖᒃᑯᐊᓗ ᑕᒪᕐᒥ ᐸᓖᓯᐅᓪᓗᑎᒃ.’
ᑲᑦᓚᒃ ᐃᓅᓱᒃᑐᖅ ᐃᖅᑲᖅᑐᖅᑕᐅᑎᓪᓗᒍ ᐅᓂᒃᑳᖅᑎᑕᐅᓚᐅᕐᑐᖅ ᐅᖃᖅᖢᓂ ᐅᖃᐅᔾᔭᐅᒪᐅᕐᓂᖓᓂᒃ ᐸᓖᓯᓄᑦ ᐸᓖᓯᐅᓇᓱᒋᙱᑕᖏᓐᓄᑦ ᐃᖅᑲᓇᐃᔮᖓᓂᒃ ᐊᓯᐅᔨᓂᐊᕐᓂᕋᖅᑕᐅᓪᓗᓂ ᑐᖁᑎᑦᑎᓚᐅᙱᓐᓂᕋᕈᓂ. ᑲᑦᓚᒃ ᑕᒪᑐᒥᖓ “ᓱᓕᙱᑦᑐᖅ ᑐᖁᑎᑦᑎᓚᐅᕐᓂᕐᒥᒃ.”
ᐃᓚᖏ ᑲᑦᓚᐅᑉ ᐱᓂᕋᖅᓯᒪᔭᖏ ᐸᓖᓯᓄᑦ ᑕᐃᒪᐃᓕᖁᔭᐅᓚᕐᓂᖓᓅᖓᓄᑦ, ᕗᐊᑦ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐱᓂᕋᖅᓯᒪᔪᑦ ᐊᔾᔨᒌᑲᑕᓚᐅᙱᓐᓂᖏᓐᓂᒃ ᖃᓄᐃᓕᐅᕐᓂᐅᔪᒧᑦ.
ᕗᐊᑦ ᐊᐱᕐᓱᓚᐅᕐᓯᒪᔪᖅ ᖃᓄᐃᒻᒪ ᐃᖅᑲᖅᑐᐃᔨᒃᑯᑦ ᑕᐃᒪᐃᑎᑦᑎᓚᐅᕐᒪᖔᑕ ᐊᕐᕌᒍᒐᓴᐃᑦ ᐊᓂᒍᖅᑎᓪᓗᒋ ᑕᐃᒪᐃᓐᓂᕋᓚᐅᕐᓯᒪᑎᓪᓗᒍ ᐊᒻᒪᓗ ᐱᓇᓱᐊᕈᓯᐅᑉ ᓯᕗᓂᐊᓂ ᑲᑦᓚᐅᑉ ᐃᖅᑲᖅᑐᐃᕕᖕᒥ ᐱᓕᕆᐊᕆᔭᐅᓂᐊᖅᑎᓪᓗᒍ.
“ᖃᐅᔨᒪᙱᑦᑐᖓ ᖃᐅᔨᒪᔭᖏᓐᓂᒃ, ᑭᓯᐊᓂᓕ ᖃᐅᔨᒪᙱᑦᑐᖓ ᑭᓱ ᐊᓯᙳᓚᐅᕐᒪᖔ ᐸᓯᔭᐅᔾᔪᑎᐅᓂᑯᑦ,” ᕗᐊᑦ ᐅᖃᕐᑐᖅ.
ᐳᓘᑦ ᑭᐅᓚᐅᙱᑦᑐᖅ ᐊᐱᕆᔭᐅᑎᓪᓗᒍ ᐃᖅᑲᖅᑐᐃᔨᑦ ᐃᓱᒪᓕᐊᖓ ᐸᓯᔭᒃᓴᐅᔪᓐᓃᖅᑎᑦᑎᓂᕐᒥ ᐊᒃᑐᐊᓂᖃᕐᒪᖔᑦ ᖃᓄᐃᓕᐅᕈᑎᓂᒃ ᐱᓂᕋᖅᑐᕕᓂᕐᒧᑦ.
ᕗᐊᑦ ᐅᖃᓚᐅᕐᑐᖅ ᓄᑖᓂᒃ ᐊᐱᖅᑯᑎᑕᖃᓕᕐᓂᖓᓂ ᐅᓇ ᑲᑦᓚᒃ ᐃᖅᑲᖅᑐᐃᔨᓂ ᐱᓕᕆᐊᖑᑎᑦᑎᓂᐊᕆᐊᒃᓴᖓᓂᒃ ᐊᑯᓂᕈᓗᒃ ᑎᒍᔭᐅᓯᒪᓚᐅᕐᓂᖓᓄᑦ.
“ᐊᕐᕌᒍᑦ ᑎᓴᒪᑦ ᓇᑉᐸᕐᓗ ᑎᒍᔭᐅᓯᒪᓪᓗᓂ … ᐅᐊᑲᓪᓚᐅᓂᑯ ᑖᔅᓱᒧᖓ, ᐃᓚᖏᓐᓂᒃ ᑕᑯᑎᑕᐅᕙᙱᖢᓂ, ᑎᒍᔭᐅᓯᒪᓪᓗᓂ. ᐃᓱᒪᓇᙱᑉᐸᓵᕐᒪᓐ,” ᕗᐊᑦ ᐅᖃᕐᑐᖅ.
“ᐅᓇᓕᖃᐃ ᐱᕋᔭᒃᓴᐅᑎᒪᖃᑕᐅᙱᑦᑑᒐᓗᐊᖅ ᒪᓕᒐᓕᕆᓂᒃᑯᑦ?”
The public housing system is worse than that for a much larger number of people.
Is my freedom of speech allowed here in nunatsiaq news comments section?