ᐃᓄᐊᕐᓂᕐᒥ ᐃᖅᑲᖅᑐᒐᒃᓴᙳᖅᑎᑕᐅᕗᖅ ᐃᓄᐊᖅᑎᓪᓗᓂ ᖁᑭᖅᑕᐅᔪᒥ ᓵᑯᕆ ᑎᒡᓕᒃᒥ

For English version of this story, see Murder charge laid in fatal shooting of Zachary Tiglik

ᐸᓖᓯᒃᑯᑦ ᐋᑐᕚᒥ ᑎᒍᓯᓚᐅᖅᐳᑦ ᐊᖑᒻᒥ ᖁᑭᖅᑕᐅᔪᒥ ᑐᖂᑦᑎᓂᐅᔪᒥ ᑎᒍᔭᐅᓚᐅᖅᐳᖅ ᓵᑯᕆ ᑎᒡᓕᖕᒥ,  19-ᓂ-ᐅᑭᐅᓕᖕᒥ ᓄᓇᕗᒻᒥᐅᑕᓪᓚᕆᐅᓚᐅᖅᑐᒥ.

ᑕᐃᓗᕐ ᓚᓄᑦ−ᒪᒃᓚᐅᑦ, 21, ᐋᑐᕚᒥᐅᑕᖅ ᑎᒍᔭᐅᓚᐅᖅᐳᖅ ᐊᒻᒪ ᓵᙵᕗᖅ ᐃᓄᐊᕐᓂᕐᒥ ᐸᕐᓇᓯᒌᖅᓯᒪᓇᓂ ᐃᖅᑲᖅᑐᒐᒃᓴᐅᓂᕐᒥ ᖁᑭᖅᓯᓪᓗᓂ ᑐᖂᖅᑎᓂᐅᔪᒥ ᓵᑯᕆ ᑎᒡᓕᒃᒥ, 19, ᓄᓇᕗᒻᒥᐅᑕᐅᓚᐅᖅᑐᒥ, ᐸᓖᓯᒃᑯᑦ ᐋᑐᕚᒥ ᐅᖃᓚᐅᖅᐳᑦ ᔪᓚᐃ 14−ᒥ. (ᐋᑐᕚ ᐸᓖᓯᒃᑯᑦ ᐱᔨᑦᑎᕋᕐᓂᕐᒥ ᐊᔾᔨᖁᑎᖏᑦ)

ᑕᐃᓗᕐ ᓚᓄᑦ−ᒪᒃᓚᐅᑦ, 21, ᐋᑐᕚᒥᐅᑕᖅ ᐃᖅᑲᖅᑐᒐᒃᓴᙳᓚᐅᖅᐳᖅ ᐃᓄᐊᕐᓂᕐᒥ ᐸᕐᓇᓯᒌᖅᓯᒪᓇᓂ ᖁᑭᖅᓯᓂᐅᓚᐅᖅᑐᒥ ᐋᑐᕚᒥ ᐱᓇᓱᐊᕈᓯᑦ ᐱᖓᓱᑦ ᐊᓂᒍᖅᓯᒪᓕᖅᑐᒥ, ᐋᑐᕚᒥ ᐸᓖᓯᒃᑯᓐᓂ ᐱᔨᑦᑎᕋᕐᓂᕐᒧᑦ ᑐᓴᒐᒃᓴᓕᐊᖑᔪᒥ ᐅᖃᓚᐅᖅᐳᑦ ᔪᓚᐃ 14−ᒥ.

ᑎᒡᓕᒃ ᐃᓅᔪᓐᓃᓚᐅᖅᐳᖅ ᐅᓐᓄᖓᓂ ᔫᓂ 29−ᒥ Caldwell Avenue−ᒥ ᓄᓇᓕᐸᐅᔭᐅᑉ Carlington ᐃᓄᖃᕐᕕᖓᓂ.

ᐸᓖᓯᒃᑯᑦ ᐊᑦᑎᖅᓯᓚᐅᖅᐳᑦ ᓚᓄᑦ−ᒪᒃᓚᐅᑦᒥ ᐸᓴᒋᔭᐅᓂᖓᓂ ᔪᓚᐃ 4−ᒥ ᐊᒻᒪ ᑐᓂᓯᓚᐅᖅᐳᑦ ᑎᒍᓯᔾᔪᒻᒥ ᑎᒍᓯᖁᔨᓪᓗᑎᒃ.

ᑎᒍᔭᐅᓚᐅᖅᐳᖅ ᐋᑐᕚᒥ, Const. ᒪᐃᒃ ᑯᑦᕋᓱᕝ ᐅᖃᓚᐅᖅᐳᖅ ᔪᓚᐃ 14−ᒥ, ᓇᓗᓇᐃᖅᓯᓇᑎᒃ ᓇᒥ ᑎᒍᔭᐅᓚᐅᕐᓂᖓᓂ ᖃᖓᓘᓐᓃᑦ.

ᐸᓖᓯᒃᑯᑦ ᓯᕗᓪᓕᕐᒥ ᓇᓗᓇᐃᖅᓯᓚᐅᖅᐳᑦ ᑎᒡᓕᖕᒥ ᐋᑐᕚᒥᐅᑕᐅᓂᖓᓂ. ᑭᓯᐊᓂ, ᓱᕈᓯᐅᖃᑎᒋᓚᐅᖅᑕᖓᓂ ᐱᖃᓐᓇᕆᔭᖓᓂ ᐊᐱᖅᓱᖅᑕᐅᔪᒪᓚᐅᙱᑦᑐᒥ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᑎᒡᓕᒃ ᐸᖕᓂᖅᑑᕐᒥᐅᑕᒃᓴᔭᐅᓂᖓᓂ, ᐊᒻᒪ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐸᓖᓯᒃᑯᓐᓂ ᐅᖃᖅᑎᐅᔪᒥ ᑭᖑᓂᐊᒍᑦ ᐅᖃᓚᐅᖅᐳᖅ ᖃᐅᔨᓴᖅᑎᐅᔪᑦ ᐅᔾᔨᕈᓱᖕᓂᖏᓐᓂ ᑎᒡᓕᒃ ᐃᖃᓗᖕᓂ ᓄᓇᖃᖅᓯᒪᓂᖓᓂ.

GoFundMe ᐱᓕᕆᐊᖑᔪᒥ ᐱᒋᐊᖅᑎᑕᐅᓚᐅᖅᐳᖅ ᑎᒡᓕᐅᑉ ᐱᖃᓐᓇᕆᔭᖓᓂ, ᑕᐃᓗᕐ ᐹᓯᓂᔾᒧᑦ, ᐃᑲᔪᕐᓂᕐᒧᑦ ᐊᑭᓖᓂᕐᒥ ᐃᓗᕕᖅᑕᐅᓂᖓᓄᑦ ᐊᑭᖏᓐᓄᑦ.

“ᑭᓇᑐᐃᓐᓇᖅ ᑕᐃᒪᓐᓇ ᐅᑭᐅᓕᖕᒥ ᑕᐃᒪᐃᑐᐊᓪᓚᐅᙱᓚᖅ,” ᐹᓯᓂᔾ ᑎᑎᕋᓚᐅᖅᐳᖅ ᑮᓇᐅᔭᓂ ᐱᕈᖅᑎᑦᑎᓇᓱᐊᕐᓂᐅᔪᒥ ᒪᒃᐱᒐᖓᓐᓂ.

“ᐊᖏᔪᐊᓗᖕᒥ ᐆᒻᒪᑎᖃᓚᐅᖅᐳᖅ ᐊᒻᒪ ᐱᖃᓐᓇᕆᔭᑦᑎᐊᕙᐅᓚᐅᖅᐳᖅ ᐊᒻᒪ ᐃᒡᓚᕐᓂᖃᖅᖢᓂ ᐆᒻᒪᑎᒥᒃ ᐆᓇᖅᓯᑎᑦᑎᔪᓐᓇᖅᑐᒥ ᐊᒻᒪ ᐱᓪᓗᐊᖅᐳᖅ ᐱᐅᓛᖑᔪᒥ ᑐᓂᔪᓐᓇᖅᑕᑦᑎᓐᓂ.”

ᔪᓚᐃ 14−ᒥ, $2,500−ᐸᓗᖕᓂ ᐱᕈᖅᑎᑦᑎᓚᐅᖅᐳᑦ.

ᐋᑐᕚᒥ ᐸᓖᓯᒃᑯᑦ ᑭᒃᑯᑐᐃᓐᓇᕐᓂ ᐊᐱᕆᕗᑦ ᑐᓴᒐᒃᓴᖃᖅᑐᓂ ᖁᑭᖅᓯᓂᐅᔪᒥ ᖃᐅᔨᒋᐊᖁᔭᐅᓪᓗᑎᒃ ᑐᖂᑦᑎᔪᓄᑦ ᐱᓕᕆᕝᕕᐅᔪᒥ 613-236-1222−ᒧᑦ, ext. 5493.