ᓇᓯᑦᑐᖅ ᑯᐊᐳᕇᓴᓐᑯᑦ ᑐᓂᔭᐅᔪᑦ $122 ᒥᓕᐊᓐ ᑖᓚᓂ ᐱᓕᕆᓂᐊᕐᓂᕐᒧᑦ ᐊᓘᑦᒥ

ᑲᒻᐸᓂᐅᔪᖅ ᐱᔨᑦᑎᕋᖅᑎᐅᖃᑦᑕᕐᓯᒪᔪᑦ ᑲᓇᑕᒥ ᐅᓇᑕᖅᑐᒃᓴᓄᑦ ᑕᐃᒪᙵ 2012-ᒥ

ᑲᓇᑕᒥ ᐅᓇᑕᖅᑐᒃᓴᐃᑦ ᐃᓂᖓ ᐊᓘᑦ, ᓄᓇᕗᒥᑦ ᑖᓐᓇᓗ ᐅᒥᖕᒪᓕᐅᑉ ᖄᖓᓃᑲᓴᒃᖢᓂ. ᓇᓯᑦᑐᖅ ᑯᐊᐳᕇᓴᓐᑯᑦ ᑐᓂᔭᐅᓚᐅᕐᒪᑕ $122 ᒥᓕᐊᓐ ᑖᓚᓂ ᑳᓐᑐᓛᒥ ᐊᕐᕌᒍᓂ 8-ᓂ ᐱᔨᑦᑎᕋᖅᑎᐅᓂᐊᕐᓂᕐᒥ ᑕᕝᕙᓂ. (ᐊᔾᔨᙳᐊᖁᑎᒋᔭᐅᔪᖅ)

By ᑕᐃᕕᑦ ᓛᕼᐄᑦ

For English version, see Nasittuq Corporation awarded $122M contract for Alert

ᓇᓯᑦᑐᖅ ᑯᐊᐳᕇᓴᓐᑯᑦ ᑐᓂᔭᐅᓂᐊᕐᑐᑦ $122 ᒥᓕᐊᓐ ᑖᓚᓂ ᐊᐅᓚᑦᑎᓂᐊᕐᓗᑎᒃ ᐅᑭᐅᕐᑕᖅᑐᕐᒥ ᐅᐊᖕᓇᕐᒦᓛᒥ ᐱᓕᕆᕝᕕᒃᒥ – ᑲᓇᑕᒥ ᐅᓇᑕᖅᑐᒃᓴᒃᑯᑦ ᐱᓕᕆᕝᕕᐊᓂᒃ ᐊᓗᒃᒥ.

ᐅᓇ ᐱᓕᕆᐊᒃᓴᐅᓂᐊᕐᑐᖅ ᐊᕐᕌᒍᓄᑦ 8-ᓄ, ᒪᕐᕈᐃᖅᑕᐅᓗᓂ ᐅᖓᕙᕆᐊᖅᑕᐅᔪᓐᓇᕐᓗᓂ ᐊᕐᕌᒍ ᑎᓴᒪᑦ ᐱᐊᓂᒃᑳᖓᑕ, ᑲᓇᑕᒥ ᓴᐳᓐᓂᐊᖅᑎᒃᑯᑦ ᑐᓴᖅᑎᑦᑎᓚᐅᕐᑐᑦ ᐅᒃᑑᐱᕆ 3-ᒥ ᑐᓴᒐᒃᓴᑎᒍᑦ.

“ᐅᓇ ᑭᓱᑖᑦᑎᐊᕐᓇᖅᑐᐊᓗᒃ,” ᐅᖃᕐᑐᖅ ᔫᑎ ᓛᓐᔨᓕᐅ, ᐊᖓᔪᖅᑳᖅ ᓇᓯᑦᑐᖅᑯᓐᓄᑦ.

“ᖁᕕᐊᓇᑦᑎᐊᕐᑐᖅ ᑕᒪᒃᑯᓂᖓ ᐱᔨᑦᑎᕋᐅᑎᓂᒃ ᑲᔪᓯᑎᑦᑎᓂᐊᕐᓗᓂ ᐅᑯᓄᖓ ᑲᓇᑕᒥ ᓴᐳᓐᓂᐊᖅᑎᒃᑯᓐᓄᑦ.”

ᓇᓯᑦᑐᖅ ᐊᐅᓚᑦᑎᓂᒃᑯᑦ ᐱᔨᑦᑎᕋᐅᑎᓕᕆᓯᒪᔪᑦ ᐊᓘᑦᒧ ᑳᓐᑐᕌᑎᒍᑦ ᑕᐃᒪᙵᑦ 2012-ᒥ.

ᐊᓘᑦ 725 ᑭᓛᒥᑕᓂ ᐅᖓᓯᖕᓂᓕᖕᒥ ᐊᐅᓱᐃᑦᑑᑉ ᐅᐊᖕᓇᖓᓃᑦᑐᖅ. 90-ᓂ ᐃᒡᓗᖃᖅᖢᓂ, ᑐᐊᐸᖕᒥ ᒥᑦᑕᕐᕕᖃᖅᖢᓂ, ᐅᕐᓱᐊᓗᖃᕐᕕᖃᖅᖢᓂ ᐊᒻᒪ ᐅᖄᓚᐅᓯᕆᕝᕕᖃᖅᖢᓂ, ᓄᓇᓕᕆᕝᕕᒃ ᐊᒻᒪᓗ ᐅᓄᕈᓘᔭᕐᑐᓂᒃ ᐊᖅᑯᑎᖃᐅᖅᖢᓂ.

ᓇᓯᑦᑐᖅ, ᐃᓄᐃᑦ ᓇᖕᒥᓂᖓ ᐊᒻᒪ ᐋᑐᕚᒦᖢᓂ, ᓂᕿᖃᖅᑎᑦᑎᖃᑦᑕᐃᓐᓇᕐᓂᐊᖅᑐᑦ ᐊᒻᒪ ᐃᓂᖃᖅᑎᑦᑎᑦᑎᔨᐅᓗᑎᒃ. ᑖᒃᑯᐊᑦᑕᐅᖅ ᑲᒪᒋᔭᖃᖅᑐᑦ ᐊᐅᓚᑦᑎᔨᐅᓪᓗᑎᒡᓗ ᐱᖁᑎᒋᔭᐅᔪᓂᒃ, ᒪᑯᓂᖓ ᒥᑦᑕᕐᕕᒃᒥ, ᐊᖅᑯᑎᓂᒃ, ᐆᒻᒪᖅᑯᑎᖃᕐᕕᒃᒥᑦ ᐊᒻᒪᓗ ᐃᒪᕐᒥ ᖃᓄᐃᓕᐅᕈᑎᓂᒃ.

ᐅᓇ ᑳᓐᑐᕌᒃ ᐃᓄᖕᓂᒃ ᐱᓕᕆᓕᕈᑎᐅᔪᓐᓴᕐᓂᐊᖅᑐᖅ ᐊᒻᒪ ᐱᓕᕆᑎᑕᐅᓐᓇᕐᓗᓂ, ᐅᖃᕐᑐᖅ ᓛᓐᔨᓕᐅ. ᐊᔪᕈᓐᓃᕐᓴᕈᑎᒃᓴᖃᕐᓂᐊᕐᓗᓂ, ᐱᓕᕆᔾᔪᑎᓕᕆᓂᕐᒧᑦ ᐅᕝᕙᓘᓐᓃᑦ ᐅᖁᒪᐃᑦᑐᓂᒃ ᓄᓇᓯᐅᑎᓂ ᐊᖁᑎᐅᔪᓐᓇᕐᓂᕐᒥᒃ.

“ᐃᖅᑲᓇᐃᔮᒃᓴᖅᑕᖃᕈᓘᔭᕐᒪᑦ ᐃᓄᖕᓄᑦ,” ᓛᓐᔨᓕᐅ ᐅᖃᕐᑐᖅ.

ᐊᖏᓂᕐᓴᓄᓪᓕ ᐱᓕᕆᐊᓄᑦ, ᐅᖃᕐᑐᖅ, ᒪᑯᑎᑐᓇ ᓄᓇᓕᕆᕝᕕᒃᑐᑦ ᐊᓯᖏᓐᓂᒡᓘᓐᓃᑦ ᐱᖁᑎᒃᓴᓂᒃ, ᓇᓯᑦᑐᖅ ᐱᓕᕆᑎᑦᑎᑲᑕᖕᓂᐊᖅᑐᑦ ᐃᓱᒪᓪᓗᑎᒃ ᐃᓄᐃᑦ ᓇᖕᒥᓂᖏᑦ ᐱᓕᕆᐊᓄᑦ ᐃᓱᒪᒋᔭᐅᖅᑳᕐᓗᑎᒃ.

ᐊᓘᑦᒥ ᐱᓕᕆᐊᒃᓴᐃᑦ ᐅᑯᓂᖓ ᑲᓇᑕᒥ ᐅᓇᑕᖅᑐᒃᓴᓂᒃ ᐱᓕᕆᐊᖃᖅᑎᑦᑎᖕᒪᓐ ᐅᓇᑕᖅᑐᒃᓴᐃᑦ ᐱᓕᕆᐊᒃᓴᖏᓐᓂᒃ ᐅᑭᐅᕐᑕᖅᑐᕐᒥ, ᑐᓴᒐᒃᓴᐃᑦ ᐅᖃᕐᓯᒪᓚᐅᕐᑐᑦ ᐅᑯᓇᙵᑦ ᑲᓇᑕᒥ ᓴᐳᓐᓂᐊᖅᑎᒃᑯᓐᓂ.

ᐅᑯᓇ ᐅᕌᓯᐊᒥᐅᑦ ᔪᑯᕇᓐᒥ ᐅᓇᑕᓕᓚᐅᕐᓯᒪᑎᓪᓗᒋᑦ ᕕᕝᕗᐊᕆ 24-ᒥ, ᓄᓇᕗᒥᑦ ᓯᕗᓕᐅᖅᑎ ᐸᐅᓗᓯ ᐊᕿᐊᕈᖅ ᑲᑎᖃᑎᖃᓚᐅᕐᓯᒪᖕᒪᑦ ᑲᓇᑕᒥ ᐊᖓᔪᖅᑳᒥ ᔭᔅᑎᓐ ᑐᕉᑑᒥ ᐄᐳᕉᑎᓪᓗᒍ ᐅᑭᐅᕐᑕᖅᑐᖅ ᐅᖃᐅᓯᕆᓪᓗᓂᔾᔪᒃ ᐊᒻᒪ ᓴᐳᔾᔭᐅᓯᒪᓂᖓ.

ᔫᓂ 20-ᒥ, ᑲᓇᑕᒥ ᓴᐳᓐᓂᐊᖅᑎᒃᑯᑦ ᒥᓂᔅᑕᖓ ᐊᓃᑕ ᐊᓈᓐ ᑐᓴᖅᑎᑦᑎᓚᐅᕐᓯᒪᖕᒪᑕ ᒐᕙᒪᑐᖃᒃᑯᑦ ᐊᑐᐃᓐᓇᖃᕐᓂᖏᓐᓂᒃ $4.9 ᐱᓕᐊᓐ ᑖᓚᓂ ᐊᕐᕌᒍᓄᑦ 6-ᓄ ᓄᐊᑦ ᐊᒥᐊᓕᑲᒥ ᖁᑦᑎᒃᑐᒥ ᓴᐳᓐᓂᐊᕐᕕᓕᕆᓂᖅ ᐱᐅᓯᕚᓪᓕᖅᑕᐅᓂᐊᕐᓗᓂ ᑖᓐᓇᓗ ᐃᓚᖃᖅᖢᓂ ᖃᐅᔨᓴᖃᑦᑕᕐᓂᕐᒥᒃ ᐊᒻᒪ ᓴᐳᔾᔨᓯᒪᓂᕐᒥᒃ ᐅᑭᐅᕐᑕᖅᑐᕐᒥ.

Share This Story

(0) Comments

Join the Conversation

Your email address will not be published. Required fields are marked *

*