ᓇᐃᑕᓐ ᐅᐱᐊᑦ ᐸᕐᓇᒃᓯᒪᔭᖏᓐᓂ ᐊᓯᙳᕐᑎᑦᑎᔪᖅ, ᐅᖃᖅᖢᓂ ᐃᓄᐃᑦ ᑕᐱᕇᒃᓴᒃᑯᓐᓄᑦ ᐊᖓᔪᖅᑳᖑᒃᑲᓐᓂᕋᓱᒍᒪᓂᕋᖅᖢᓂ

For the English version of this story, please see Natan Obed changes plan, says he wants another term as president of ITK.

ᓇᐃᑕᓐ ᐅᐱᐊᑦ ᐅᖃᕐᑐᖅ ᓂᕈᐊᒐᒃᓴᐅᓂᐊᕐᓂᕋᖅᖢᓂ “ᐱᓇᓱᒃᑲᓐᓂᕐᓗᓂ” ᑎᓴᒪᒋᔭᖓᓂ ᐊᖓᔪᖅᑳᕆᔭᐅᓂᕐᒥ ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐅᖃᓚᐅᕋᓗᐊᖅᖢᓂ ᓂᕈᐊᒐᒃᓴᐅᔾᔮᙱᓐᓂᕋᖅᖢᓂ.

“ᐃᓚᒋᓚᐅᕐᑕᖓᓕ ᐃᓱᒪᒃᓴᖅᓯᐅᕋᓱᒃᖢᖓ ᐃᓱᒪᓪᓗᖓ ᐅᖃᐅᓯᕆᔭᒃᑲ ᓂᕈᐊᒐᒃᓴᐅᑎᓪᓗᖓ ᐊᑐᕋᔭᙱᑦᑕᕆᐊᒃᓴᖏᓐᓂᒃ,” ᐅᐱᐊᑦ ᐅᖃᕐᑐᖅ ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ ᔪᓚᐃ 31-ᒥ.

“ᐅᓇ ᐃᓱᒪᒋᑦᑎᐊᖅᖢᒎᓚᐅᖅᑕᕋ.”

ᐅᐱᐊᑦ, 49, ᑐᓴᖅᑎᑦᑎᓚᐅᕐᑐᖅ ᔪᓚᐃ 30-ᒥ ᓂᕈᐊᒐᒃᓴᐅᒃᑲᓐᓂᕐᓂᐊᕐᓂᕋᖅᖢᓂ ᕙᐃᔅᐳᒃᑯᑦ ᑎᑎᕋᖅᖢᓂ, ᑕᕝᕙᓂᑦᑕᐃᓐᓇ ᐃᓄᐃᑦ ᑕᐱᕇᒃᑯᑦ ᓂᕈᐊᒐᒃᓴᓕᐊᕐᓂᖅ ᒪᑐᐃᖅᑕᐅᑎᓪᓗᒍ ᓂᕈᐊᓛᖅᖢᑎᒃ ᓯᑎᐱᕆ 18-ᒥ.

ᐅᐱᐊᑦ ᐊᖓᒧᖅᑳᕆᔭᐅᓕᕐᑐᖅ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᓄᑦ ᐊᕐᕌᒎᓕᕐᑐᓂᒃ ᖁᓕᓂ ᐊᒻᒪᓗ ᐊᑯᓂᐅᓂᖅᐹᖅ ᐊᖓᒧᖅᑳᕆᔭᐅᓪᓗᓂ. ᓵᓚᒃᓴᓚᐅᕐᓯᒪᒻᒪ 2015-ᒥ ᐊᒻᒪ 2018-ᒥ ᐊᖓᔪᖅᑳᒃᓴᒧᑦ, ᐊᒻᒪᓗ 2021-ᒥ ᐊᖓᔪᖅᑳᙳᖅᑎᑕᐅᑐᐃᓐᓇᖅᖢᓂ ᓂᕈᐊᒐᒃᓴᖅᑕᖃᓚᐅᙱᓐᓂᖓᓂ ᐊᓯᖓᓂ.

2021-ᒥ ᓂᕈᐊᒐᒃᓴᐅᑎᓪᓗᒍ ᐅᐱᐊᑦ ᐅᖃᓚᐅᕐᓯᒪᔪᖅ ᑭᖑᓪᓕᐹᕆᓂᐊᕐᓂᕋᓕᖅᖢᓂᐅᒃ ᐊᖓᔪᖅᑳᖑᓂᕐᒥᒃ.

ᑭᓯᐊᓂᓕ ᐅᑭᐊᒃᓵᖑᓚᐅᕐᑐᖅ, “ᑐᕉᑑ ᒐᕙᒪᖏ ᐃᓱᓕᓕᖅᑎᓪᓗᒋᑦ” ᑖᔅᓱᒥᖓ ᐃᓱᒪᒃᓴᖅᓯᐅᕈᑎᖃᒃᑲᓐᓂᓕᓚᐅᕐᑐᖅ.

ᓄᑖᓂ ᒐᕙᒪᖃᓕᖅᑎᓪᓗᒍ ᒐᕙᒪᑐᖃᒃᑯᑦ ᐅᕘᓇ ᐳᕋᐃᒻ ᒥᓂᔅᑕ ᒫᒃ ᑳᓂᑯᓐᓂ ᐊᒻᒪ ᓄᓇᕐᔪᐊᕐᒥ ᓇᓗᓈᕿᑲᑕᒃᑎᓪᓗᒋ ᐅᕙᙶᖅᑐᒥ ᐊᒥᐊᓕᑲᒥᐅᑦ ᐊᖓᔪᖅᑳᖓᓂ ᑖᓄᑦ ᑐᕋᒻᑉ ᐊᑭᓕᐅᑎᒃᓴᒃᑲᓐᓂᐅᑎᓐᓇᓱᒃᑕᖏᓐᓄᑦ ᐊᒻᒪ ᐅᖃᙳᐊᑲᑕᒃᖢᓂ ᑲᓇᑕ 51-ᒋᔭᐅᓕᕐᓂᐊᕐᓂᕋᖅᖢᓂᐅ ᐊᒥᐊᓕᑲᒥ ᓄᓇᖁᑎᒋᔭᐅᔪᓂᒃ, ᐅᐱᐊᑦ ᐅᖃᓚᐅᕐᑐᖅ ᐃᓄᐃᑦ ᐃᑲᔪᖅᑕᐅᓇᔭᕐᓂᖏᓐᓂᒃ “ᑲᔪᓯᓂᒃᑯ” ᐃᓄᐃᑦ ᑕᐱᕇᑦ ᑲᓇᑕᐅᑉ ᐊᖓᔪᖅᑳᖓᓂ.

“ᑭᖑᓪᓕᖅᐹᖑᖃᑕᐅᒐᒪ ᒫᓂ ᐋᑐᕚᒥ ᐱᒋᐊᓚᐅᕐᓯᒪᑎᓪᓗᖓ 2015-ᒥ. ᑕᐃᒪᓕ ᐱᓕᕆᓕᒪᓂᕐᓴᐅᓪᓗᓂ ᐱᐅᓂᕐᓴᖅ ᐊᒻᒪᓗ ᑕᑯᓯᒪᓕᖅᖢᖓ ᖃᓄᕈᓘᔭᖅ ᐊᕐᕌᒍᑦ ᖁᓕᑦ ᐃᓗᐊᓂ,” ᐅᖃᕐᑐᖅ.

ᐅᐱᐊᑦ ᐅᖃᓚᐅᕐᑐᖅ ᓂᕈᐊᒐᒃᓴᐅᒃᑲᓐᓂᓛᕋᓱᒋᙱᖢᓂ 2029-ᒥ, ᑭᓯᐊᓂᓕ ᖃᐅᔨᓚᐅᕐᓂᕋᖅᖢᓂ “ᐃᓱᒪᓕᐅᕆᓂᕐᒥ” ᐋᖅᑭᒃᓯᓪᓚᕆᒋᐊᖃᙱᓐᓂᕐᒥ.

“ᐃᓱᒪᒋᓪᓗᒍ ᐃᓱᒪᓚᐅᕐᓯᒪᙱᓐᓇᒪ ᒫᓐᓇᒧᑦ ᓂᕈᐊᒐᒃᓴᐅᓂᐊᕆᐊᒃᓴᓐᓂ, ᑭᓯᐊᓂᓕ ᐊᖓᔪᖅᑳᖑᓂᕋ ᑲᔪᓯᔾᔮᔪᒃᓴᐅᙱᑦᑐᖅ ᑕᒪᑐᒪ ᐅᖓᑖᓄᑦ.”

ᐊᕐᕌᒎᓕᕐᑐᓂ ᖁᓕᓂ, ᐃᓄᐃᑦ ᑕᐱᕇᒃᑯᑦ ᐋᖅᑭᒃᓱᐃᖃᑕᐅᓚᐅᕐᓯᒪᔪᑦ “ᐱᒋᐊᕈᑎᒥ” ᒪᓕᒐᕐᒥ ᐅᑯᓂᖓ ᔫᓇᐃᑕᑦ ᓇᐃᓴᓐᔅ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ, ᐱᒋᐊᖅᑎᑦᑎᔨᐅᓪᓗᑎᒃ ᐅᓇ ᐱᒋᐊᖅᑕᐅᓕᖅᑎᑦᑎᓪᓗᓂ ᐃᓄᐃ-ᒐᕙᒪᒃᑯᓪᓗ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᓂᒃ, ᐊᒻᒪᓗ ᐃᓄᐃᑦ ᐱᓇᓱᒍᒪᔭᖏᑦ ᓴᖅᑭᑎᑕᐅᒃᑲᓐᓂᖅᖢᑎᒃ. ᐅᐱᐊᑦ ᐅᖃᓚᐅᕐᑐᖅ ᑕᒪᓐᓇ ᐱᕙᓪᓕᐊᓂᖅ ᑲᔪᓯᑎᓐᓂᐊᕈᒪᓪᓗᓂᐅᒃ.

ᑐᓴᓚᐅᕐᑑᒐᓗᐊᖅ ᓈᒻᒪᒃᓴᖅᐸᓕᑦᑎᙱᑦᑐᓂᒃ ᓂᕈᐊᒐᒃᓴᐅᒃᑲᓐᓂᕋᓱᖕᓂᖓᓂ ᑮᓇᐅᔭᓕᐅᕋᓱᓗᐊᕐᓂᕐᒧᑦ, ᑭᓯᐊᓂᓕ ᑖᓐᓇ ᐃᓱᒫᓗᒋᓚᐅᙱᑕᖓ.

“ᑮᓇᐅᔭᓕᐅᕋᓱᖕᓂᖅ ᓯᕗᓪᓕᐅᑎᓯᒪᙱᓐᓇᒃᑯ ᐱᓕᕆᐊᖃᕋᓱᒃᑎᓪᓗᖓ ᐃᓄᖕᓄᑦ,” ᐅᐱᐊᑦ ᐅᖃᕐᑐᖅ.

ᓇᓗᓇᐃᓚᐅᕐᑐᖅ 2024-ᒥ ᑮᓇᐅᔭᓕᐅᓚᐅᕐᓂᖓᓂ $300,000-ᓗ $349,000-ᓗ ᐊᑯᓐᓂᖓᓃᓐᓂᖓᓂᒃ.

ᐃᓄᐃᑦ ᑕᐱᕇᒃᑯᓐᓄᑦ ᐊᖓᔪᖅᑳᙳᕐᑐᑦ ᓂᕈᐊᖅᑕᐅᓪᓚᕆᒃᐸᙱᒻᒪᑕ ᐃᓄᖕᓄᑦ ᐃᓄᐃᑦ ᓄᓇᖓᓂ ᐱᖃᖃᑕᐅᔪᓄᑦ.

ᑭᓯᐊᓂᓕ, ᓂᕈᐊᒐᒃᓴᙳᖅᑎᑕᐅᕙᒃᑐᑦ ᐅᑯᓇᙵᑦ ᑎᓴᒪᓂᒃ ᐊᕕᒃᑐᖅᓯᒪᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ: ᓄᓇᕗᑦ ᑐᙵᕕᒃ; ᒪᑭᕝᕕᒃ ᑯᐊᐳᕇᓴᓐ, ᑭᒡᒐᖅᑐᐃᔪᑦ ᓄᓇᕕᒃᒥ ᐃᓄᖕᓂᑦ; ᐃᓄᕕᐊᓗᐃᑦ ᐊᕕᒃᑐᖅᓯᒪᓂᒃᑯᑦ ᑯᐊᐳᕇᓴᓐᑯᓐᓂᒃ, ᐅᐊᓕᓂᕐᒥᐅᓂ; ᐊᒻᒪ ᓄᓇᑦᓯᐊᕗᑦ ᒐᕙᒪᒃᑯᓐᓂᒃ, ᑖᒃᑯᐊᓕ ᐃᓄᖕᓂ ᑭᒡᒐᖅᑐᐃᔪᑦ ᓂᐅᕙᐅᓐᓛᓐᒥ ᐊᒻᒪ ᓛᐸᑐᐊᒦᑦᑐᓂᒃ.

ᐊᒻᒪᑲᓐᓂᖅ, ᒪᕐᕉᒃ ᑖᒃᑯᓇᓂ ᑭᒡᒐᖅᑐᐃᖃᑕᐅᔪᑦ ᐊᒻᒪ ᐃᓄᐃᑦ ᑕᐱᕇᒃᑯᑦ ᐊᖓᔪᖅᑳᖓᑕ ᑐᒡᓕᖓ ᓂᕈᐊᖃᑕᐅᕙᒃᑐᑦ.

ᓂᕈᐊᒐᒃᓴᐅᔪᑦ ᐃᓅᔭᕆᐊᓖᑦ ᐊᕐᕌᒍᖃᕐᓗᑎ 18 ᐅᖓᑖᓂ. ᓂᕈᐊᒐᒃᓴᙳᖅᑎᑕᐅᔪᓐᓇᖅᑕ ᑭᒡᒐᖅᑐᐃᔨᐅᑎᑕᐅᔪᒧᑦ ᐃᓄᐃᑦ ᑲᑐᔾᔨᖃᑎᒌᓄᑦ ᐅᕝᕙᓘᓐᓃᑦ ᑎᑎᕋᕐᓗᑎ ᓯᕗᓕᐅᖅᑎᐅᓯᒪᓂᕐᒥ ᐱᓕᕆᐊᕆᓯᒪᔭᖏᓐᓂ ᓇᓗᓇᐃᔭᐃᓗᓂ, ᒪᓕᒡᓗᓂ ᓂᕈᐊᒐᒃᓴᓕᕆᓂᕐᒧᑦ ᒪᓕᒐᕆᔭᐅᔪᓂᒃ.

ᓂᕈᐊᒐᒃᓴᓕᐅᕐᓂᖅ ᐃᓱᓕᓐᓂᐊᕐᑐᖅ ᐃᓄᐃᑦ ᑕᐱᕇᒃᑯᓐᓄ ᐊᖓᔪᖅᑳᒃᓴᒥ ᐋᒐᓯ 28 5:00 ᐅᓐᓄᓴᒃᑯᑦ.

ᓯᕗᓂᐊᒍᓪᓕ ᓂᕈᐊᒐᒃᓴᓕᕆᓂᖅᑎᒍ ᐅᐱᐊᑦ ᓂᕈᐊᒐᒃᓴᙳᖅᑎᑕᐅᓚᐅᕐᓯᒪᔪᖅ ᓄᓇᑦᓯᐊᕗᑦ ᒐᕙᒪᒃᑯᓐᓄᑦ.

ᐊᖓᔪᖅᑳᖓ, ᔪᕼᐊᓇᔅ ᓛᒻᑉ, ᐅᖃᕐᓯᒪᔪᑐᐊᖅ ᐅᑯᓇᙵᑦ ᑎᓴᒪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᓯᕗᓕᐅᖅᑎᓂ ᐃᑲᔪᖅᑐᐃᓯᒪᓂᕋᖅᖢᓂ ᐅᐱᐊᑦᒥ ᐊᐱᕐᓱᖅᑕᐅᑎᓪᓗᒍ

ᐅᖃᕐᑎᒋᔭᐅᔪᖅ ᒪᑭᕝᕕᒃ ᑯᐊᐳᕇᓴᓐᑯᓐᓄᑦ ᐊᒻᒪ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᒃᑯᑦ ᑯᐊᐳᕇᓴᓐᑯ ᑕᒪᑐᒧᖓ ᓂᓪᓕᕈᒪᓚᐅᙱᑦᑐᑦ ᐅᓇᓗ ᓄᓇᕗᑦ ᑐᙵᕕᒃᑯᓐᓄᑦ ᑭᒡᒐᖅᑐᐃᔨ ᐅᖃᕐᕕᐅᔪᓐᓇᓚᐅᙱᖢᓂ.