ᓇᐃᑕᓐ ᐅᐱᐊᑦ ᐃᓄᐃᑦ ᑕᐱᕇᑦ ᑲᓇᑕᒥ ᐱᖓᔪᒋᔭᖓᓂᒃ ᐊᖓᔪᖅᑳᖑᓂᕐᒧᑦ ᓂᕈᐊᒐᒃᓴᐅᓕᕐᐳᖅ

ᓂᕈᐊᖅᑕᐅᒃᑲᓐᓂᕈᓂᓕ ᑭᖑᓪᓕᖅᐹᕆᓂᐊᖅᑕᖓ ᐊᖓᔪᖅᑳᖑᓂᕐᒥᒃ, ᐅᐱᐊᑦ ᐅᖃᖅᑐᖅ

ᓇᐃᑕᓐ ᐅᐱᐊᑦ, ᓄᓇᕗᒥᑦ ᓯᓚᑦᑐᖅᓴᕐᕕᖕᒦᑦᑐᑦ ᐋᒐᓯ 4-ᖑᑎᓪᓗᒍ, ᐅᖃᓚᐅᕐᓯᒪᔪᖅ ᓂᕈᐊᒐᒃᓴᐅᒃᑲᓐᓂᕐᓂᐊᕐᓂᖓᓂᒃ ᐊᖓᔪᖅᑳᒧᑦ ᐅᑯᓄᖓ ᐃᓄᐃᑦ ᑕᐱᕇᑦ ᑲᓇᑕᒥ. (ᐊᔾᔨᙳᐊᖁᑎᖓ ᑕᐃᕕᑦ ᕕᐊᓐ)

By ᑕᐃᕕᑦ ᕕᐊᓐ ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

ᓇᐃᑕᓐ ᐅᐱᐊᑦ ᐊᖓᔪᖅᑳᖑᓂᕐᒧᑦ ᓂᕈᐊᒐᒃᓴᐅᓂᐊᖅᑐᑦ ᐱᖓᔪᒋᔭᖓᓂᒃ ᐅᖃᖅᖢᓂ ᓄᖅᑲᕈᒪᙱᓐᓂᕋᖅᖢᓂ.

“ᒫᓐᓇ ᐃᒪᐃᓕᖓᖅᑰᔨᒐᑦᑕ ᖃᓄᐃᓕᐅᖅᐸᓪᓕᐊᔭᕗᑦ ᑲᑎᑦᑎᐊᖅᐸᓪᓕᐊᖅᑰᔨᓪᓗᑎᒃ,” ᐅᖃᖅᑐᖅ. “ᐊᒻᒪᓗ ᐃᓱᒪᓪᓗᖓ ᓱᓕ ᐱᓕᕆᐊᒃᓴᕋ  ᐅᕙᓂ ᐃᓄᐃᑦ ᑕᐱᕇᒃᑯᓐᓂ ᐱᐊᓂᖅᑰᔨᙱᖢᓂ ᐊᒻᒪᓗ ᐱᓕᕆᐊᑦᑎᓐᓂ ᐊᖏᔪᓂᒃ ᐊᓂᒍᐃᑦᑎᐊᖅᑐᓂᒃ ᑕᑯᔪᒪᓪᓗᖓ.”

ᐅᐱᐊᑦ ᓇᓗᓇᐃᕐᓯᓚᐅᖅᑐᖅ ᖃᓄᐃᓕᐅᕈᒪᓂᕐᒥᓂᒃ ᐊᐱᖅᓱᖅᑕᐅᑲᑕᒃᑎᓪᓗᒍ ᑐᓴᒐᒃᓴᓕᕆᔨᓂᒃ ᐋᒐᓯ 4-ᖑᑎᓪᓗᒍ ᐅᕙᓂ ᓄᓇᕗᒥᑦ ᓯᓚᑦᑐᖅᓴᕐᕕᒃᒥᑦ ᐅᑯᐊ ᒐᕙᒪᑐᖃᒃᑯᑦ ᑐᓴᒐᒃᓴᖏᓐᓂᒃ ᐅᖃᐅᓯᖃᖅᑎᓪᓗᒋᑦ.

ᐃᓄᐃᑦ ᑕᐱᕇᑦ ᑲᓇᑕᒥ ᑐᓴᖅᑎᑦᑎᓚᐅᖅᓯᒪᖕᒪᑕ ᑕᖅᑭᐅᓚᐅᖅᓯᒪᔪᒥᒃ ᓂᕈᐊᒐᒃᓴᓕᐅᕐᓂᖅᒥᒃ ᒪᑐᐃᕐᓯᓂᕋᖅᖢᓂ ᓂᕈᐊᒐᒃᓴᐅᔪᒪᔪᓄᑦ ᑖᒃᑯᓄᖓ ᑲᑐᔾᔨᖃᑎᒌᓄᑦ. ᑭᖑᓪᓕᖅ ᐊᖓᔪᖅᑳᖑᓂᐊᖅᑐᑦ ᓂᕈᐊᕆᔭᐅᓛᖅᑐᑦ ᐊᕐᕌᒍᒧᑦ ᑲᑎᒪᕕᒡᔪᐊᖅᑎᓪᓗᒋᑦ ᑖᒃᑯᐊ ᐋᖅᑭᒃᑕᐅᓯᒪᓪᓗᓂ ᓯᑎᐱᕆᒧᑦ.

ᐊᑯᓂᕈᓗᒃ ᐃᓄᐃᑦ ᑕᐱᕇᒃᑯᓐᓄᑦ ᐃᓚᒋᔭᐅᓯᒪᓪᓗᓂ ᐊᖓᔪᖅᑳᖑᓯᒪᓪᓗᓂᓗ ᑕᐃᒪᙵᓂᒃ 2015-ᒥ, ᐅᐱᐊᑦ ᐅᖃᐅᓯᖃᓚᐅᕐᑐᖅ ᓯᕗᓕᐅᖅᑎᐅᓂᖓ “ᐃᓄᖕᓅᖓᓗᐊᕐᓂᖓᓂᒃ, ᓴᖅᑭᔮᖅᓯᒪᔪᒃᑯᑦ ᐊᒻᒪᓗ ᓄᓇᕐᔪᐊᑎᒍᑦ ᑐᓴᐅᒪᕙᖕᓂᒃᑯᑦ” — ᑖᒃᑯᐊᓗ ᑲᑐᔾᔨᖃᑎᒌᓄᑦ ᐱᒻᒪᕆᐅᒋᔭᐅᓪᓗᑎᒃ.

ᐊᖓᔪᖅᑳᖑᑎᓪᓗᖑ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐱᒋᐊᖅᑎᑦᑎᓯᓚᔪᑦ ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᖃᐅᔨᓴᕈᑎᓂᒃ, ‘ᖃᓄᐃᑉᐱᑖ?’, ᐃᑲᔫᑎᒃᓴᖅᑖᖅᖢᑎᒃ ᐃᓄᐃᑦ ᓄᓇᖓᓂ ᓯᓚᑦᑐᖅᓴᕐᕕᒃᓴᒧᑦ ᐊᒻᒪᓗ ᐋᖅᑭᒃᓯᓪᓗᑎᒃ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᕐᒧᑦ ᑲᑎᒪᔨᕋᓛᓂᒃ — ᑕᒪᕐᒥᒡᓗ ᑖᒃᑯᐊ ᐃᖅᑲᓇᐃᔭᕆᐊᖅᖢᓂ ᖁᕕᐊᓱᒍᑎᒌᓐᓇᐅᔭᖅᑕᖏᑦ ᖃᐅᑕᒫᓐ, ᐅᐱᐊᑦ ᐅᖃᖅᑐᖅ.

“ᐊᒃᓱᐊᓗ ᐱᒃᑯᓕᓯᒪᒐᒪ ᐅᖃᓪᓚᖃᑎᖃᕐᓂᕐᒥᒃ ᐃᓄᖕᓂ ᑲᓇᑕᒥᐅᑕᓂᒃ,” ᐅᖃᖅᑐᖅ, ᓇᓗᓇᐃᕐᓯᓪᓗᓂ ᒪᑯᖓ ᒪᓕᒐᓕᕆᔨᐅᔪᑦ ᐊᒻᒪᓗ ᑐᓴᐅᒪᔾᔪᑎᓕᕆᔨᐅᔪᑦ ᐆᒥᖓ ᐅᖃᐅᓯᕐᒥ ᐊᑐᖃᑦᑕᕐᓂᖏᑦ ‘ᐃᓄᐃᑦ ᓄᓇᖓᑦ’ ᐊᒻᒪᓗ ᐃᓄᖕᓅᖓᔪᓂᒃ ᑮᓇᐅᔭᓂᒃ ᐊᑐᖅᑐᒃᓴᓕᕆᑎᓪᓗᒋᑦ ᐅᖃᐅᓯᖃᕐᓂᖏᓐᓂᒃ.

ᐅᐱᐊᑦ ᐅᖃᓚᐅᕐᑐᖅ ᓯᕗᓪᓖᑦ ᐊᕐᕌᒍᐃᑦ ᐊᑐᓚᐅᕐᓯᒪᓂᖓᓂᒃ ᒪᓕᒐᓕᕆᔨᓂᒃ ᖃᐅᔨᕙᓪᓕᐊᓂᕐᒧᑦ, ᒐᕙᒪᒃᑯᓐᓂᒃ, ᐊᒻᒪᓗ ᐱᓕᕆᐊᖑᓇᓱᒃᑐᓂᒃ ᖃᐅᔨᓇᓱᑦᑎᐊᒻᒪᕆᒃᐸᒃᖢᓂ. ᑕᐃᒪᓕ ᑕᒪᒃᑯᐊ ᐋᖅᑭᒃᓯᒪᓕᕐᓂᖏᓐᓄᑦ, ᐅᖃᓚᐅᕐᑐᖅ ᑖᒃᑯᐊ ᑲᑐᔾᔨᖃᑎᒌᑦ ᓄᑖᓂᒃ ᖃᓄᐃᓕᐅᕈᑎᒃᓴᓕᕆᔪᓐᓇᕐᓂᖅᓴᐅᓂᐊᕐᓂᖏᓐᓂᒃ.

“ᐊᑯᓂᕈᓗᒃ ᐱᓕᕆᐊᖃᕐᓯᒪᓕᕐᓂᓐᓄᑦ ᑕᐃᒪᓕ ᐱᓇᓱᒍᓐᓇᕐᓂᖅᓴᐅᒻᒪᕆᓕᕐᑐᖓ ᐅᐸᒐᓱᒃᑕᑦᑎᓐᓄᑦ,” ᐅᖃᖅᑐᖅ. “ᐃᓱᒪᒐᒪ ᐊᕐᕌᒍᓂᒃ ᑎᓴᒪᓂᒃ ᐊᒡᒋᖅᑐᓂᒃ ᖃᓄᐃᓕᐅᕈᓘᔭᕈᓐᓇᕐᓂᐊᕐᓂᑦᑎᓐᓂᒃ ᑕᒪᓐᓇᓗ ᒪᓕᒃᓯᒪᓂᕐᓴᐅᕙᒃᖢᓂ ᐊᖓᔪᖅᑳᖑᓂᖅ ᑲᔪᓯᓯᒪᑦᑎᐊᕐᓂᖓᒍᑦ.”

ᐅᖃᓚᐅᕐᑐᖅ ᑖᔅᓱᒪ ᑭᖑᓂᐊᒍᑦ ᐱᓇᓱᒃᑲᓐᓂᔾᔮᙱᓐᓂᕋᖅᖢᓂ ᓂᕈᐊᖅᑕᐅᓇᓱᖕᓂᕐᒥᒃ.

ᓂᕈᐊᕆᔭᐅᒃᐸᓪᓕ, ᐅᐱᐊᑦ ᐅᖃᒪᐅᕐᑐᖅ ᐱᓕᕆᐊᖃᕐᓂᖅᓴᐅᔪᒪᓂᕋᖅᖢᓂ ᐃᓄᖕᓂ ᑲᑎᑎᑦᑎᓂᕐᓴᐅᓗᓂ ᒪᓕᒐᓕᕆᓂᒃᑯᑦ ᐊᒻᒪᓗ ᐃᓚᐅᑎᓐᓂᕐᓴᐅᓗᒋᑦ ᑲᓇᑕᓕᒫᑎᒍᑦ.

ᐃᒻᒥᓂ ᓈᒻᒪᒋᓗᐊᙱᒃᑲᓗᐊᖅᖢᓂ ᐃᒪᓐᓇ ᐃᓄᒃᑎᑐᑦ ᐃᓕᑦᑎᓯᒪᙱᓗᐊᕐᓂᖓᓂᒃ ᑎᑎᕋᕐᕕᖕᒦᓐᓂᖓᓂᒃ ᑭᓯᐊᓂᓕ ᑕᒪᓐᓇ ᐱᓕᕆᐊᕇᓐᓇᕋᓱᒃᑲᖓ.

“ᑭᓯᐊᓂᓕ ᐃᒃᐱᒋᔭᐃᓐᓇᕋᒪ ᐱᓕᕆᐊᒃᓴᓐᓂ ᐱᓕᕆᐊᖃᖅᑎᓪᓗᖓ — ᖃᐅᔨᒪᒐᒪ ᐅᖃᓪᓚᖃᑦᑕᒃᑲᓐᓂᕆᐊᖃᕐᓂᓐᓂᒃ ᐅᖃᐅᓯᑦᑎᐊᕚᓗᑦᑎᓐᓂᒃ,” ᐅᖃᖅᑐᖅ.

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖓᔪᖅᑳᒃᓴᒥ ᓂᕈᐊᖅᑎᓪᓗᒋᑦ 13-ᓂ ᓂᕈᐊᖅᑐᓂᒃ ᑖᔅᓱᒥᖓ 7 ᓂᕈᐊᕆᐊᖃᖅᑐᑦ  ᑲᑎᒪᔭᖅᑐᖅᑎᑕᐅᔪᓂᒃ ᑭᒡᒐᖅᑐᐃᓪᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑎᓴᒪᓂᒃ ᐃᓄᐃᑦ ᐊᕕᒃᑐᖅᓯᒪᓂᒃᑯᑦ ᓄᓇᖏᓐᓂᙶᖅᑐᓂᒃ.

ᓂᕈᐊᒐᒃᓴᓕᐅᕐᓂᖅ ᒪᑐᓂᐊᕐᑐᖅ ᐋᒐᓯ 18-ᒥ.

Share This Story

(0) Comments

Join the Conversation

Your email address will not be published. Required fields are marked *

*