ᓇᐅᔮᑦ ᐊᖏᙱᑦᑐᑦ $6.8 ᒥᓕᐊᓐ ᑖᓚᓂ ᐅᕙᙵᑦ ᔪᐊᑕᓐ ᐱᒻᒪᕆᒋᔭᖏᓐᓄᑦ ᐃᑲᔫᑎᒃᓴᓂ

For English version, see Naujaat hamlet council declines $6.8M in Jordan’s Principle funding

ᐱᑕᖃᕐᒪᓐ $6.8 ᒥᓕᐊᓐ ᑖᓚᓂ ᐅᕙᙵᑦ ᔪᐊᑕᓐ ᐱᒻᒪᕆᒋᔭᖏᓐᓄᑦ ᐃᑲᔫᑎᒃᓴᓂ ᐊᖏᖅᑕᐅᓯᒪᔪᓂᒃ ᓇᐅᔮᓄᑦ, ᑭᓯᐊᓂᓕ ᓄᓇᓕᖕᓄᐊᔾᔮᙱᑦᑐᖅ ᓲᖃᐃᒻᒪ ᕼᐋᒻᒪᓚᒃᑯᑦ ᑲᑎᒪᔨᖏᑦ ᐊᖏᓚᐅᙱᑦᑐᑦ ᑮᓇᐅᔭᓂ.

ᔪᐊᑕᓐ ᐱᒻᒪᕆᒋᔭᖏᑦ ᐊᐅᓚᑕᐅᕙᒃᑐᖅ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᓕᕆᔨᒃᑯᓐᓄᑦ ᒪᑯᐊ ᓄᓇᖃᖅᑳᖅᑐᑦ ᐊᓪᓚᐃᑦ ᐊᒻᒪ ᐃᓄᐃᑦ ᓱᕈᓯᖏᑦ ᑲᓇᑕᒥ ᐊᑐᐃᓐᓇᖃᖅᑎᑕᐅᓇᓱᒃᖢᑎᒃ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐃᓕᓐᓂᐊᕐᓂᕐᒧᑦ ᐃᑲᔫᑎᒃᓴᖏᓐᓂᒃ.

ᐃᓄᐃᑦ ᐱᓇᓱᒍᓐᓇᖅᑐᑦ ᔪᐊᑕᓐ ᐱᒻᒪᕆᒋᔭᖏᓐᓄᑦ ᐃᑲᔫᑎᒃᓴᓂ ᐅᑯᑎᒎᓇᖅ ᒐᕙᒪᑐᖃᒃᑯᑦ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓕ ᐱᓕᕆᐊᒥ.

“$6.8 ᒥᓕᐊᓐ ᑖᓚ ᐊᒥᓱᒻᒪᕆᐊᓘᖕᒪᑕ ᐊᖏᖅᑕᐅᙱᑦᑐᑦ ᐃᓄᖕᓄᑦ ᐃᑲᔪᖅᑕᐅᔭᕆᐊᓕᖕᓄᑦ,” ᐅᖃᕐᑐᖅ ᑲᑎᒪᔨ ᔮᓐ ᒑᔅ, ᐅᖃᒃᑲᓐᓂᖅᖢᓂ ᑲᑎᒪᔨᓂ ᓈᒻᒪᒃᓴᙱᓐᓂᕋᖅᖢᓂ ᐃᑲᔫᑎᒃᓴᓂ ᐱᔪᒪᙱᓐᓂᖏᓐᓂ.

ᓄᓇᖃᖅᑳᖅᑐᑦ ᓱᕈᓯᖏᓐᓄᑦ ᐱᓕᕆᖃᑎᒌᓂᖅ ᑲᓇᑕᒥ (The Indigenous Kids Network of Canada), ᑮᓇᐅᔭᓕᐅᕋᓱᒐᑎᒃ ᐃᑲᔪᖃᑦᑕᖅᑐᑦ ᓄᓇᓕᖕᓂ ᖃᐅᔨᑎᑦᑎᓪᓗᑎᒃ ᔪᐊᑕᓐ ᐱᒻᒪᕆᒋᔭᖏᓐᓂ ᐊᒻᒪ ᑕᒪᐅᖔᖓᔪᓂᒃ ᐱᓕᕆᐊᒃᓴᓂᒃ, ᑐᓂᓯᓚᐅᕐᓯᒪᔪᑦ ᓂᕿᑖᕈᓐᓇᐅᑎᒃᓴᓂ ᑐᒃᓯᕋᐅᑎᓂᒃ ᓄᕕᐱᕆ 10, 2023-ᒥ ᐃᑲᔪᕈᑎᒃᓴᓂᒃ 710-ᓂ ᓱᕈᓯᕐᓂ ᓇᐅᔮᓂ, ᐅᓇ ᐅᕋᐃᐊᓐ ᑎᓐᑐᓪ ᐅᖃᓚᐅᕐᑐᖅ ᐅᖃᖅᑎᒋᔭᐅᓪᓗᓂ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓕᕆᔨᒃᑯᓐᓄᑦ.

ᓂᕿᑖᕈᓐᓇᐅᑎᓕᕆᓂᕐᒧᑦ ᐱᓕᕆᐊᒃᓴᖅ ᓱᕈᓯᕐᓂ ᐊᕐᕌᒍᓕᖕᓄᑦ 18-ᓄ ᓂᕿᑖᕈᓐᓇᐅᑎᖃᖅᑎᑦᑎᓪᓗᑎᒃ, ᐊᒫᒪᒐᒃᓴᓂᒃ, ᖁᐃᖏᓕᓴᕐᓂ ᐊᒻᒪ ᐊᓯᖏᓐᓂ ᐊᑐᖅᑕᐅᔭᕆᐊᓕᖕᓂ.

ᑐᒃᓯᕋᐅᑎ ᐊᖏᖅᑕᐅᓚᐅᕐᓯᒪᔪᖅ ᑎᓯᐱᕆ 4, 2023-ᒥ, ᑎᓐᑐᓪ ᐅᖃᕐᑐᖅ.

“ᕕᕝᕗᐊᕆ 14, 2024-ᒥ ᕼᐋᒻᒪᓚᒃᑯᑦ ᓇᐅᔮᒥ ᑐᓴᖅᑎᑦᑎᓚᐅᕐᓯᒪᔪᑦ ᑎᑎᖃᑎᒍᑦ ᐱᓕᕆᐊᒥ ᐱᓕᕆᐊᖃᕈᓐᓇᙱᓐᓂᕋᖅᖢᑎᒃ,” ᑎᓐᑐᓪ ᐅᖃᕐᑐᖅ.

ᕼᐋᒻᒪᓚᐅᔪᑦ ᐱᕕᖃᖅᑎᑦᑎᑕᐅᕙᒃᑐᑦ ᐅᓪᓗᕐᓂ 90-ᓂ ᐊᖏᕈᑎᓂ ᐊᑎᓕᐅᕈᓐᓇᕐᓗᑎᒃ ᑭᓯᐊᓂᓕ ᐃᓱᖃᙱᒻᒪᑦ ᐃᑲᔫᑎᒃᓴᖅᑖᕋᓱᒃᖢᓂ, ᐅᖃᕐᑐᖅ.

“ᑕᐃᒪᓕ ᕼᐋᒻᒪᓚᒃᑯ ᐱᓕᕆᓕᕈᒪᒃᑲᓐᓂᖅᐸᑕ ᐱᓕᕆᐊᒃᓴᒥ ᑕᐃᒪᓕ ᓄᓇᖃᖅᑳᖅᑐᑦ ᓱᕈᓯᖏᓐᓄᑦ ᐱᓕᕆᖃᑎᒌᖕᓂᖅ ᑲᓇᑕᒥ ᕿᒥᕐᕈᐊᕋᔭᖅᑐᑦ ᑐᒃᓯᕋᐅᑎᒥ ᐊᒻᒪ ᐊᑐᖅᑕᐅᔪᒃᓴᑦ ᐋᖅᑭᒋᐊᖅᑕᐅᒃᑲᓐᓂᕋᔭᖅᖢᑎᒃ ᒪᓕᒡᓗᑎᒃ ᓄᑖᙳᕆᐊᖅᑕᐅᓂᖓᓂ,” ᑎᓐᑐᓪ ᐅᖃᕐᑐᖅ.

ᓇᐅᔮᓂ ᓄᓇᖃᖅᑐᖅ ᐹᓪ ᐊᖑᑎᑐᐊ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑕᑯᔪᒪᓂᕆᖅᖢᓂ ᓄᓇᓕᖕᓂ ᓯᕗᓕᐅᖅᑎᒐᓚᖕᓂ ᑖᔅᓱᒥᖓ ᐃᓱᒪᒃᓴᖅᓯᐅᒃᑲᓐᓂᖁᔨᓪᓗᓂ ᓲᖃᐃᒻᒪ “ᐱᒻᒪᕆᐅᖕᒪᓐ” ᐃᓄᖕᓄ ᓄᓇᖃᖅᑐᓄᑦ.

“ᐅᕙᓐᓄᑐᐊᖑᙱᑦᑐᖅ ᑭᓯᐊᓂᓕ ᓇᑉᐸᓪᓗᐊᖏ ᓄᓇᓕᖕᓂ ᐃᑲᔪᖅᑕᐅᒻᒪᕆᒃᑲᔭᕐᒪᑕ ᑖᔅᓱᒧᖓ,” ᑎᑎᕋᕐᑐᖅ.

ᑕᒪᐃᓐᓂ ᒑᔅ ᐊᒻᒪ ᑲᑎᒪᔨᐅᖃᑎᖓ ᓯᑏᕝ ᒪᑉᓴᓚᒃ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐅᖃᖃᑎᖃᖁᔨᓚᐅᕐᑐᑦ ᒪᐃᔭ ᑭᐊᕕᓐ ᑎᒍᒥᐊᕐᒥ ᑕᒪᑐᒧᖓ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᖃᖃᑎᖃᕈᓐᓇᓕᓚᐅᙱᓐᓂᕋᖅᖢᑎᒃ ᑎᒍᒥᐊᕐᒥ ᖃᓄᐃᒻᒪ ᕼᐋᒻᒪᓚᒃᑯᑦ ᐊᖏᓚᐅᙱᑦᑕᕆᐊᒃᓴᖏᓐᓂ ᐃᑲᔫᑎᒃᓴᓂ ᐅᕝᕙᓘᓐᓃᑦ ᑲᑎᒪᔩᑦ ᑕᒪᑐᒥᖓ ᐃᓱᒪᒋᔭᖃᕐᒪᖔᑕ.

ᑭᒡᒐᖅᑐᐃᔪᑦ ᓄᓇᖃᖅᑳᖅᑐᑦ ᓱᕈᓯᖏᓐᓄᑦ ᐱᓕᕆᖃᑎᒌᖕᓂᖅ ᑲᓇᑕᒥ ᑭᐅᓚᐅᙱᒻᒥᔪᑦ ᐅᖃᐅᓯᒃᓴᖃᕆᐊᒃᓴᖏᓐᓂ ᖃᐅᔨᕝᕕᐅᓇᓱᒃᑎᓪᓗᒋᑦ.