NCC ᑮᓇᐅᔭᓕᐅᕋᓱᐊᖅᑏᑦ ᐱᓇᓱᐊᖅᑕᖏᓐᓂᑦ ᓂᐱᖃᓗᐊᙱᑦᑐᒥ ᐊᑦᑎᖅᓯᕗᖅ ᓄᑖᖑᔪᒥ ᐊᖓᔪᖅᑳᖑᔪᒥ

For the English version of this story, please see NCC Investment quietly names new president.

NCC ᑮᓇᐅᔭᓕᐅᕋᓱᐊᖅᑏᑦ ᐱᓇᓱᐊᖅᑕᖏᓐᓂᑦ ᓂᐱᑭᑦᑐᒥ ᐊᑦᑎᖅᓯᕗᑦ ᓄᑖᖑᔪᒥ ᐊᖓᔪᖅᑳᙳᕐᓂᐅᔪᒥ.

ᔪᐊᓂ ᐸᓪᓘᑉ ᐊᑎᖓ ᐊᒻᒪ ᐊᔾᔨᙳᐊᖓ ᒫᓐᓇ ᓴᖅᑭᔮᓕᖅᐳᖅ ᑲᒻᐸᓂᒃᑯᑦ ᐃᑭᐊᖅᑭᕕᖓᓂ ᐊᐅᓚᑦᑎᓂᐅᔪᒥ ᒪᒃᐱᒐᖓᓐᓂ.

ᐃᓯᖅᐳᖅ ᐃᖅᑲᓇᐃᔮᖑᔪᒧᑦ ᓯᕗᓂᐊᓂ ᑎᒍᒥᐊᖅᑕᐅᓚᐅᖅᑐᒥ ᑭᓕᐊᕆᓐᔅ ᓴᐃᓈᑦᒧᑦ, ᐅᖃᐅᓯᖃᓚᐅᖅᑐᒥ ᓄᖅᑲᕐᓂᖓᓂ LinkedIn−ᑯᑦ ᑕᖅᑭᐅᓚᐅᖅᑐᒥ.

ᑭᓇᑐᐃᓐᓇᖅ NCC ᑮᓇᐅᔭᓕᐅᕋᓱᐊᖅᑏᑦ ᐱᓇᓱᐊᖅᑕᖏᓐᓂᑦ ᐃᓄᓕᒫᓄᑦ ᐅᖃᐅᓯᒃᓴᓕᐅᕈᒪᓚᐅᙱᓚᑦ ᓯᓈᑦ ᓄᖅᑲᕐᓂᖓᓂ, ᖃᔅᓯᒐᓚᖕᓂ ᐱᓇᓱᐊᕐᓂᐅᔪᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᓯᓈᑦ ᐅᖃᓗᒡᕕᐅᔪᓐᓇᓚᐅᙱᓚᖅ ᐅᖃᐅᓯᒃᓴᓕᐅᕐᓂᕐᒧᑦ ᐅᖃᐅᓯᒃᓴᓕᐅᓚᐅᖅᑎᓪᓗᒍ, ᖃᔅᓰᖅᓱᒐᓚᒃᖢᑎᒃ ᐱᓇᓱᐊᕋᓗᐊᕐᒪᑕ.

ᐅᖃᓗᒡᕕᐅᓪᓗᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐅᒃᑐᐱᕆ 1−ᒥ, ᐸᓪᓗᖅ ᐊᖏᓚᐅᙱᓚᖅ ᐊᐱᖅᓱᖅᑕᐅᓂᕐᒥ ᓄᑖᖑᔪᒥ ᐊᑐᕐᓂᖃᐅᑎᒋᓕᖅᑕᖓᓄᑦ.

“)ᐊᓂ ᐊᖓᔪᖅᑳᙳᖅᐳᖅ NCC ᑮᓇᐅᔭᓕᐅᕋᓱᐊᖅᑏᑦ ᐱᓇᓱᐊᖅᑕᖏᓐᓂᑦ ᐊᒻᒪ ᐊᕐᕌᒍᑦ 15 ᐅᖓᑖᓂ ᐱᓕᕆᓕᒪᓂᕐᒥ ᓄᓇᕗᒻᒥ ᐱᓕᕆᖃᑎᖃᖅᖢᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᓴᓇᔭᐅᓯᒪᓂᐊᖅᑐᓂᒃ ᑎᑎᕋᐅᔭᖅᑎᐅᓂᕐᒥ, ᐊᒻᒪ ᐱᓕᕆᐊᒃᓴᓄᑦ ᐊᐅᓚᑦᑎᓂᕐᒥ,” ᐅᖃᖅᐳᖅ ᐅᓂᒃᑳᕆᓯᒪᓂᐅᔪᒥ ᐃᓅᑉ ᐃᓅᓯᖓᓐᓂ ᑲᓱᖃᑎᖃᖅᑐᒥ ᐸᓪᓘᑉ ᐊᑎᖓᓄᑦ NCC ᐃᑭᐊᖅᑭᕕᖓᓂ, ᐅᖃᖅᓯᒪᓪᓗᓂ ᓚᐃᓴᓐᓯᖃᖅᖢᓂ ᓴᓇᔭᐅᓯᒪᓂᐊᖅᑐᓂᒃ ᑎᑎᕋᐅᔭᖅᑎᐅᓂᖓᓄᑦ.

“ᐃᖅᑲᓇᐃᔮᕆᓯᒪᔭᖓᓂ, ᔪᐊᓂ ᐊᐅᓚᑦᑎᓯᒪᕗᖅ ᓇᓗᓇᖅᑐᓂ, ᖁᑦᑎᒃᑐᒥ-ᐊᒃᑐᐃᓂᐅᔪᓂ ᐱᓕᕆᐊᒃᓴᐅᔪᓂ ᐱᒋᐊᕐᓂᖓᓂ ᐃᓱᒪᓂᐅᔪᒥ ᑕᐃᑯᖓ ᐱᔭᕇᑦᑎᐊᖅᓯᒪᓂᐅᔪᒧᑦ — ᑐᓂᓯᓂᕐᒥ ᐋᖅᑭᒍᑎᒃᓴᓂ ᐱᔭᕆᑐᔪᒥ ᐋᖅᑭᒃᑎᐊᖅᓯᒪᓂᐅᔪᓂ ᑭᓯᐊᓂᑦᑕᐅᖅ ᐃᓄᖕᓄᑦ-ᑐᕌᖓᓂᖃᖅᖢᓂ.”

NCC ᐱᕙᓪᓕᐊᓂᖏᑦ ᓕᒥᑎᑦ, ᑕᒪᒃᑭᖅᑐᒥ ᓴᖕᒥᓂᕆᔭᐅᔪᒥ ᐊᐅᓚᑕᐅᔪᒥ NCC ᑮᓇᐅᔭᓕᐅᕋᓱᐊᖅᑏᑦ ᐱᓇᓱᐊᖅᑕᖏᓐᓂᑦ, ᐊᑎᓕᐅᕆᓚᐅᖅᐳᑦ ᐊᖏᕈᑎᒥᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ 2022−ᒥ ᓴᓇᓂᕐᒧᑦ 2,000−ᓂ ᐊᖏᕐᕋᓂ ᓄᓇᕗᓕᒫᒥ ᐃᓚᒋᔭᐅᓪᓗᓂ ᓄᓇᕗᑦ 3000 ᐱᒋᐊᕈᑕᐅᔪᒥ.

ᑕᐃᓐᓇ ᐱᒋᐊᕈᑕᐅᔪᖅ ᕿᓂᖅᐳᖅ ᓴᓇᓂᕐᒥ 3,000−ᓂ ᓄᑖᖑᔪᓂ ᐊᖏᕐᕋᓂᑦ ᓄᓇᕗᒻᒥ ᕿᑎᐊᓂ 2022−ᒥ ᐊᒻᒪ 2030−ᒧᑦ, ᑭᓯᐊᓂ ᓵᙵᓯᒪᕗᖅ ᑭᖑᕙᕆᐊᕐᓂᐅᔪᓂ ᐊᒻᒪ ᐊᓯᖏᓐᓂ ᓄᖅᑲᕈᑕᐅᕙᖕᓂᖏᓐᓂ.