ᓂᐅ ᑎᒧᑯᕌᑎᒃ ᐹᑎᑯ ᖃᐅᔨᓴᖁᔨᓕᖅᑐᑦ ᐱᕋᔭᒍᑎᕕᓂᐅᓂᑯᓂᒃ ᐃᓕᓐᓂᐊᕆᐊᖅᕕᓕᐊᕐᕕᕕᓂᕐᓂ
‘ᑲᓇᑕᐅᑉ ᓄᓇᙳᐊᖓ ᐱᕋᔭᒃᓯᒪᔪᐊᓗᖕᓂ ᐱᑕᖃᐅᓕᖅᑐᖅ,’ ᓄᓇᕗᒧᑦ ᒪᓕᒐᓕᐅᖅᑎ ᒪᒥᓛᖅ ᖃᖅᑲᖅ ᐅᖃᖅᑐᖅ
ᓄᓇᕗᒧᑦ ᒪᓕᒐᓕᐅᖅᑎ ᒪᒥᓛᖅ ᖃᖅᑲᖅ ᐃᒃᓯᕋᖅᔪᐊᖅ ᔪᐊᓂᔅ ᕆᕗᐊ ᐊᔾᔨᙳᐊᖓᓂ ᑎᒍᒥᐊᖅᑐᖅ, ᑖᓐᓇ ᐸᓯᔭᒃᓴᐅᑎᑕᐅᔪᖅ ᖁᓄᔪᕐᓂᐊᖃᑦᑕᖅᓯᒪᓂᖓᓄᑦ ᐃᓄᖕᓂ ᓄᑕᖅᑲᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂᒃ ᓄᓇᕗᒥᑦ 1960-ᖏᓐᓂ. ᓂᐅ ᑎᒧᑯᕌᑎᒃ ᐹᑎᑯ ᒐᕙᒪᑐᓐᓂ ᖃᐅᔨᓴᖁᔨᔪᑦ ᕆᕗᐊᒥ ᐊᒻᒪ ᐊᓯᖏᓐᓂ ᐱᓕᕆᐊᖃᖃᑦᑕᓚᐅᖅᓯᒪᔪᓂᒃ ᐃᓕᓐᓂᐊᕆᐊᖅᕕᓕᐊᕐᕕᖕᓂ. (ᐊᔾᔨᙳᐊᕐᒥᙶᖅᑐᖅ ᐅᑯᓇᙵᑦ CPAC)
For an English version of this story, see NDP calls for criminal probe into residential schools
ᒐᕙᒪᑐᖃᒃᑯᑦ ᓂᐅ ᑎᒧᑯᕌᑎᖏᑦ ᐋᑐᕚᒥ ᐱᓕᕆᔨᑖᖁᔨᓕᖅᑐᑦ ᐸᓯᔭᒃᓴᓕᕆᔨᐅᓂᐊᖅᑐᓂᒃ ᖃᐅᔨᓴᕐᓂᒃᑯᑦ ᐱᕋᔭᒍᑎᐅᓂᑰᓇᓱᒋᔭᐅᔪᓄᑦ ᓄᓇᖃᖅᑳᖅᑐᓄᑦ ᐊᒻᒪᓗ ᐱᑦᑎᐊᖅᑎᒋᕙᙱᑕᕕᓂᖏᓐᓂᒃ.
ᓄᓇᕗᒧᑦ ᒪᓕᒐᓕᐅᖅᑎ ᒪᒥᓛᖅ ᖃᖅᑲᖅ ᓂᐅ ᑎᒧᑯᕌᑎᒃ ᐹᑎᐅᖃᑎᖓᓗᑦ ᒪᓕᒐᓕᐅᖅᑎ ᓵᓕ ᐋᓐᒐᔅ ᑐᓴᒐᒃᓴᓕᐅᓚᐅᖅᓯᒪᔫᒃ ᒪᓕᒐᓕᕆᕕᒡᔪᐊᕐᒥᒃ ᔪᓚᐃ 8-ᖑᑎᓪᓗᒍ ᐅᑯᓂᖓ ᒐᕙᒪᑐᖃᒃᑯᓐᓄᑦ ᒪᓕᒐᓕᕆᓂᖅᒧᑦ ᒥᓂᔅᑕ ᐊᒻᒪᓗ ᒪᓕᒐᓕᕆᔨᕐᔪᐊᓄᑦ ᐊᖓᔪᖅᑳᖅ ᑕᐃᕕᑦ ᓚᒪᑎ ᓄᓇᕐᔪᐊᒥ ᐱᕋᔭᒃᑐᓕᕆᓂᕐᒧᑦ ᐃᖃᖅᑐᐃᕕᒃᑯᓐᓂ ᐱᓕᕆᓕᖅᑎᑦᑎᖁᓪᓗᓂᐅᒃ ᖃᐅᔨᓴᖅᑐᖃᓕᕐᓗᓂ ᖃᓄᐃᓕᐅᕈᓯᕐᒥ “ᐃᓅᓯᕆᔭᐅᔪᓄᑦ ᐱᕋᔭᒃᓯᒪᓗᐊᖅᓯᒪᓂᐊᓗᖕᒥᓐ.”
“ᑲᓇᑕᐅᑉ ᓄᓇᙳᐊᖓ ᐱᕋᔭᒃᓯᒪᔪᐊᓗᖕᓂ ᐱᑕᖃᐅᓕᖅᑐᖅ,” ᖃᖅᑲᖅ ᐅᖃᖅᑐᖅ.
“ᖃᐅᔨᓴᖅᑎᖃᕆᐊᖃᕋᑦᑕ ᐃᒻᒥᒃᑰᖓᔪᒥ ᐱᔪᓐᓇᕐᓂᖃᖅᑐᒥ ᑲᓇᑕᒥ ᐱᕋᔭᒍᑎᕕᓂᐊᓗᖕᒥ ᓴᖅᑭᑎᑦᑎᔪᓐᓇᖅᑐᒥ, ᐊᒻᒪᓗ ᐱᔪᓐᓇᕐᓂᖃᕐᓗᓂ ᑕᒪᒃᑯᓂᖓ ᐱᕋᔭᒃᓯᒪᔪᐊᓗᖕᓂ ᐃᖅᑲᖅᑐᐃᕕᒃᑰᖅᑎᑦᑎᔪᓐᓇᕐᓂᕐᒥᒃ,” ᖃᖅᑲᖅ ᐅᖃᖅᑐᖅ.
“ᐊᑯᓂᐊᓗᒃ ᑕᒪᓐᓇ ᐅᖃᐅᓯᕆᖃᑦᑕᖅᓯᒪᓕᖅᑕᕗᑦ ᐊᒻᒪᓗ ᒫᓐᓇ ᑲᓇᑕᒥᐅᑕᑦ ᓱᓕᔪᓂᒃ ᐅᒃᐱᕈᓱᒋᐊᖃᓕᕐᒪᑕ.”
ᓂᐅ ᑎᒧᑯᕌᑎᒃ ᐹᑎᑯᑦ ᐊᑐᖅᑕᐅᖁᔨᓕᓚᐅᖅᑐᑦ ᐱᓇᓱᐊᕈᓯᒐᓚᐃᑦ ᐊᓂᒍᖅᓯᒪᓕᖅᑎᓪᓗᒪ ᐃᓗᕕᖕᓂ ᓇᓂᓯᑲᑕᓚᐅᖅᑎᓪᓗᒋᑦ ᐃᓕᓐᓂᐊᕆᐊᖅᕕᕕᓂᖅᒥᓐ ᓄᓇᖃᖅᑳᖅᑐᓄᑦ ᑳᒻᓘᑉᔅ, ᐳᕆᑎᔅ ᑲᓚᒻᐱᐊᒥ ᐊᒻᒪ, ᑲᐅᕙᔅᓴᔅ, ᓴᔅᑳᑦᓱᐊᓐᒥ ᐊᒻᒪᓗ ᐊᓯᖏᓐᓂᒃ ᑲᓇᑕᐅᑉ ᐃᓗᐊᓃᑦᑐᓂᒃ.
ᓂᐅ ᑎᒧᑯᕌᑎᒃ ᐹᑎᒃᑯᑦᑕᐅ “ᐃᑲᔪᕈᑎᒃᓴᓂᒃ ᐅᓄᖅᓯᒋᐊᖅᓯᒪᔪᓂᒃ” ᖃᐅᔨᓴᖅᑎᑦᑎᓂᕐᒧᑦ ᑎᒥᓂᒃ ᐃᓕᓐᓂᐊᕆᐊᖅᕕᕕᓂᐅᔪᓂᒃ ᑕᒪᒃᑯᐊ ᑲᒪᒋᔭᐅᔪᓐᓇᑦᑎᐊᕐᓂᐊᕐᒪᑕ ᐊᒻᒪᓗ ᐃᓚᖏᓐᓄᑦ ᐅᑎᖅᑎᑕᐅᓗᑎᒃ.
ᐅᖃᖅᑎᐅᔪᖅ ᒪᓕᒐᓕᕆᓂᖅᒧᑦ ᒥᓂᔅᑕᒧᑦ ᐅᖃᓚᐅᖅᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᓇ ᓚᒪᑎ ᐱᔪᓐᓇᐅᑎᖃᙱᓐᓂᕋᖅᑕᐅᓪᓗᓂ ᐱᕋᔭᒃᑐᖃᖅᓯᒪᓂᖅᒧᑦ ᖃᐅᔨᓴᖅᑎᑦᑎᓇᓱᒋᐊᒃᓴᖅ, ᐅᖃᖅᖢᓂ ᑕᒪᓐᓇ ᐸᓖᓯᑯᓐᓄᑦ ᑲᒪᒋᔭᐅᓇᔭᕐᓂᖓᓂᒃ.
“ᒥᓂᔅᑕ ᒪᓚᑎ ᐅᖃᖃᑎᖃᑲᐃᓐᓇᑲᑕᒃᑐᖅ ᓄᓇᖃᖅᑳᖅᑐᓄᑦ ᐊᖓᔪᖅᑳᕆᔭᐅᔪᓂᒃ ᖃᓄᐃᓕᐅᕐᓂᐊᕆᐊᒃᓴᖏᓐᓂ ᑭᖑᓪᓕᖅᒥᒃ ᒐᕙᒪᒃᑯ ᐃᑲᔪᕋᓱᖕᓂᕐᒥ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ, ᐱᓗᐊᖅᑐᒥ ᐃᓕᓐᓂᐊᕆᐊᖅᑎᑕᐅᖃᑦᑕᕐᓂᑯ ᓱᓕ ᐆᒪᔪᓂᒃ ᐊᒻᒪᓗ ᐃᓚᖏᓐᓂᒃ, ᓇᓂᓯᓚᐅᖅᓯᒪᑎᓪᓗᒋ ᐃᓗᕕᐊᓗᖕᓂ ᑳᒻᓘᑉᔅᒥ ᐊᒻᒪ ᒥᐅᕆᕕᐊᒥ,” ᐅᖃᖅᑐᖅ ᓵᓐᑖᓪ ᐋᐳᕆᓐ, ᑐᓴᒐᒃᓴᓄᑦ ᑎᑎᕋᖅᑎᒋᔭᐅᔪᖅ ᓚᒪᑎᒧ ᖃᕋᓴᐅᔭᒃᑯᑦ.
“ᖃᓄᐃᓕᐅᕈᑎᒃᓴᓂ ᐃᓱᒪᒋᔭᖃᕐᓂᐊᖅᑐᒍ ᑕᒪᒃᑯᐊ ᐃᓕᓐᓂᐊᕆᐊᖃᑦᑕᕐᓂᑯ, ᓄᓇᓕᖏᑦ ᐊᒻᒪᓗ ᑲᓇᑕᒥᐅᑕ ᒪᒥᓴᕈᓐᓇᖁᓪᓗᒋ ᐊᒻᒪ ᐋᖅᑭᒋᐊᒃᑲᓐᓂᕈᑎᖃᕈᓐᓇᕐᓗᑎᒃ.”
ᑭᓯᐊᓂᓕ ᖃᖅᑲᖅ ᒪᓕᒐᓕᕆᓂᖅᒧᑦ ᒥᓂᔅᑕ ᐱᔪᓐᓇᕐᓂᖃᑦᑕᐊᕐᓂᕋᖅᖢᓂᐅ ᐃᖅᑲᖅᑐᐃᕕᒃᑰᖅᑎᑦᑎᔨᐅᓇᔭᖅᑐᒥ ᑭᓯᐊᓂᓕ ᑕᐃᒪᐃᓕᐅᕋᓱᙱᑐᐃᓐᓇᕐᓂᕋᖅᑕᖓ.
ᖃᖅᑲᖅ ᐅᖃᓚᐅᖅᑐᖅ ᖃᐅᔨᓴᖅᑐᖃᕆᐊᖃᒻᒪᕆᖕᓂᖓᓂ ᐅᖓᑖᓄᑦ ᐃᓕᓐᓂᐊᕆᐊᖅᕕᐅᕙᓚᐅᖅᑐᑦ ᖃᐅᔨᓇᓱᒡᓗᑎᒃ ᐱᓕᕆᕝᕕᐅᔪᓂᒃ ᓄᓇᖃᖅᑳᖅᑐᓄᑦ ᐅᐸᒃᑕᐅᖃᑦᑕᓚᐅᖅᑐᓂᒃ, ᐅᖃᐅᓯᖃᖅᖢᓂ ᓵᓇᑑᕆᐊᓂᒃ ᐃᓄᖕᓄᑦ ᐅᐸᒡᕕᐅᑎᑕᐅᓚᐅᖅᓯᒪᔪᑦ 1940-ᓗ 1960-ᓗ ᐊᑯᓐᓂᖓᓂ ᐳᕙᒡᓗᒃᑐᑦ ᒪᒥᓴᕐᕕᒋᖃᑦᑕᖅᑕᕕᓂᖏᓐᓂᒃ.
“ᐅᓄᖅᑐᐊᓘᐃᑦ ᕼᐊᓐᓇᓚᖏᓐᓃᑦᑐᑦ ᑕᐅᓴᖏᓐᓃᙱᒃᑯᑎ, ᐃᓄᐃᑦ ᐃᓗᕕᖅᑕᐅᓯᒪᔪᒃᓴᐅᔪᑦ ᓵᓇᑐᕆᐊᒻ ᓯᓚᑎᖏᓐᓂ ᑲᓇᑕᒦᑦᑐᓂᒃ,” ᐅᖃᖅᑐᖅ.
ᑐᓴᒐᒃᓴᓕᐅᖅᑎᓪᓗᒋᑦ, ᖃᖅᑲᖅ ᑎᒍᒥᐊᓚᐅᕐᒥᔪᖅ ᐃᒃᓯᕋᖅᔪᐊᖅ ᔪᐊᓂᔅ ᕆᕗᐊ ᐊᔾᔨᙳᐊᖓᓂ, ᑖᓐᓇ ᖁᓄᔪᕐᓂᐊᖃᑦᑕᕐᓂᕋᖅᑕᐅᓚᐅᖅᓯᒪᔪᖅ ᐃᓄᖕᓂ ᓄᓇᕗᒥᐅᑕᓂᒃ ᓄᑕᕋᕐᓂ ᐃᓕᓐᓂᐊᕆᐊᖃᑦᑕᓚᐅᖅᓯᒪᔪᓂᒃ 1960-ᖏᓐᓂ.
1997-ᒥ, ᕆᕗᐊ ᐸᓯᔭᒃᓴᙳᖅᑎᑕᐅᓚᐅᖅᓯᒪᔪᖅ ᐱᓕᕆᐊᖃᖃᑦᑕᖅᓯᒪᖃᑦᑕᕐᓂᖅᒥᒃ ᐊᒻᒪ ᖁᓄᔪᕐᓂᐊᖅᓯᕙᖕᓂᖅᒥᒃ ᓇᐅᔮᓂᒃ ᐊᒻᒪ ᐊᕐᕕᐊᓂᒃ 1968-ᓗ 1970-ᓗ ᐊᑯᓐᓂᖓᓂ.
ᐸᓖᓯᒃᑯᑦ ᑎᒍᔭᐅᔾᔪᑎᒃᓴᖓᓂᒃ ᐱᓯᒪᓚᐅᖅᓯᒪᔪᑦ 1998-ᒥ, ᑭᓯᐊᓂᓕ ᓰᐲᓰᑯᑦ 2019-ᖑᑎᓪᓗᒍ ᐅᓂᒃᑲᐅᓯᖃᓚᐅᖅᓯᒪᔪᑦ ᑖᓐᓇ ᑎᒍᔭᐅᔾᔪᑎᒃᓴᖅ ᓄᖅᑲᖅᑎᑕᐅᓚᐅᖅᓯᒪᓂᖓᓂᒃ. ᖃᐅᔨᒪᓇᓗᐊᙱᑦᑐᖅ ᒐᕙᒪᒃᑯᑦ ᕆᕗᐊᒥ ᕗᕌᓐᓯᒥ ᑕᒪᐅᙵᖅᑎᑦᑎᓇᓱᓚᐅᖅᓯᒪᔭᕆᐊᒃᓴᖏᓐᓂᒃ.
“ᐃᖅᑲᖅᑐᐃᕕᒃᑯᑦ ᑲᒪᒋᔭᐅᓇᓂ ᐱᕋᔭᒃᓯᒪᔭᖏᓐᓄᑦ, ᕆᕗᐊ ᐃᓅᓯᖃᖅᑐᑦ ᐃᓅᓯᑦᑎᐊᕚᓗᖕᒥ ᐃᒃᓯᕋᖅᔪᐊᓅᖓᔪᓄ ᐅᕙᓂ ᓯᑐᕌᔅᐳᒡᒥ, ᕗᕌᓐᔅ ᐊᒻᒪᓗ ᒐᕙᒪᑐᖃᒃᑯᑦ ᑕᒪᑐᒥᖓ ᑲᒪᒋᔭᖃᙱᑦᑎᐊᖅᖢᑎᒃ,” ᖃᖅᑲᖅ ᐅᖃᖅᑐᖅ.
“ᐱᑦᑎᐊᙱᔾᔪᑎᒋᔮᓗᒋᖃᑦᑕᓚᐅᖅᑕᖏ ᐊᑯᓂᐊᓗᒃ ᓈᒻᒪᙱᓕᐅᕈᑎᐅᓯᒪᓂᑰᓕᖅᐳᑦ,” ᐅᖃᖅᑐᖅ. “ᒐᕙᒪᑐᖃᒃᑯᑦ ᐊᒻᒪᓗ ᑐᒃᓯᐊᖅᕕᒃ ᐸᓯᔭᒃᓴᐅᓪᓗᐊᖅᑐᑦ ᒪᑯᓂᖓ ᕆᕗᐊᑎᑐᑦ ᓱᕋᐃᑎᑦᑎᖃᑦᑕᓚᐅᖅᓯᒪᓂᖏᓐᓂᒃ ᐃᓅᓯᕐᓂᒃ. ᐊᒻᒪᓗ ᒫᓐᓇᒧᑦ ᓱᓕ ᓱᕋᐃᒍᑎᐅᕙᓪᓕᐊᕗᖅ ᓄᑕᖅᑲᓄᑦ ᐅᓪᓗᒥ.”
ᓂᐅ ᑎᒧᑯᕌᑎᒃ ᐹᑎᑯᑦ ᐅᖃᓚᐅᖅᑐᑦ ᕆᕗᐊ ᐃᓚᒋᔭᐅᔪᖅ ᐅᓄᖅᑐᒻᒪᕆᐊᓗᖕᓂ ᐋᓐᓂᖅᓱᐃᖃᑦᑕᖅᑐᕕᓂᐊᓗᖕᓂ ᓄᓇᖃᖅᑳᖅᑐᑦ ᕿᑐᕐᖓᖏᓐᓂᒃ ᒪᐅᓇ ᐃᓕᓐᓂᐊᕆᐊᖅᕕᓕᕆᓂᒃᑯᑦ, ᐊᒻᒪᓗ ᖃᐅᔨᓴᕐᓂᐅᓂᐊᖅᑐᑦ ᐊᑐᐃᓐᓇᖃᖅᑎᑕᐅᔭᕆᐊᖃᖅᖢᑎᒃ ᑎᑎᖃᖁᑎᒋᔭᐅᔪᓂᒃ ᐊᒻᒪ ᐊᑎᕐᓂᒃ.
ᑕᖅᑭᐅᓚᐅᖅᑐᖅ ᑲᓇᑕᒧᑦ ᐊᖓᔪᖅᑳᖅᔪᐊᖅ ᔭᔅᑎᓐ ᑐᕉᑑ ᐊᐱᕆᓚᐅᖅᓯᒪᔪᖅ ᑳᑐᓕᒃ ᑐᒃᓯᐊᖅᕕᒃᓄᑦ ᑎᑎᖃᖁᑎᖏᓐᓂᒃ ᑐᓂᓯᖁᔨᓪᓗᓂ ᐊᒃᑐᐊᓇᔭᖅᑐᓂᒃ ᐱᕋᔭᒍᑎᕕᓂᕐᓄᑦ ᐊᒻᒪᓗ ᓇᓗᓇᐃᔭᖅᓯᒪᙱᑦᑐᓄᑦ ᐃᓗᕕᒐᓛᓗᖕᓄᑦ ᐃᓕᓐᓂᐊᕆᐊᖅᕕᕕᓂᕐᓄᑦ, ᑖᓐᓇᓗ ᑐᒃᓯᐊᖅᕕᓕᕆᔨᓄᑦ ᐃᓚᖏᓐᓂᒃ ᐳᕌᕕᓐᓯᓂᒃ ᐊᖏᖅᑕᐅᓯᒪᓕᕆᓪᓗᓂ.
ᑐᕉᑑ ᐅᖃᓚᐅᕐᒥᔪᖅ ᖃᐅᔨᓴᖅᑕᐅᑎᑦᑎᔪᒪᓂᕋᖅᖢᓂ ᐃᓕᓐᓂᐊᕆᐊᖅᕕᐅᖃᑦᑕᓚᐅᖅᓯᒪᔪᓂᒃ ᑭᓯᐊᓂᓕ ᐅᖃᖅᖢᓂ ᓄᓇᖃᖅᑳᖅᑐᑦ ᓄᓇᓕᖏᑦ ᑖᔅᓯᒥᖓ ᐱᓕᕆᐊᖃᓪᓚᕆᒃᑎᐅᓂᐊᕐᓗᑎᒃ.
(0) Comments