ᒥᐊᓕ ᓴᐃᒪᓐ ᐃᖅᑲᐅᒪᔪᖅ ᒐᕙᓇ ᔭᓄᕉᓂᖓᓂ

ᒥᐊᓕ ᓴᐃᒪᓐ ᐅᖃᕐᑐᖅ “ᐃᓱᒪᓚᐅᕐᓯᒪᙱᓐᓂᖓᓂ” ᒐᕙᓇ ᔭᓄᕉᓂᐊᕆᐊᒃᓴᖅ ᑲᓇᑕᒧᑦ.

ᑭᓯᐊᓂᓕ ᑕᓪᓕᒪᑦ ᐊᕐᕌᒍᑲᓴᐅᓕᕐᑐᓂ ᑎᑎᕋᕐᕕᒃᒦᖢᓂ ᐅᓇ 78-ᓂ ᐊᕐᕌᒍᓕᒃ ᓯᕗᓕᐅᖅᑎ — ᐃᓅᓂᑯ ᑲᖏᖅᓱᐊᓗᔾᔪᐊᖅᒥ ᐊᒻᒪ ᐱᕈᖅᓴᖅᖢᓂ ᑰᔾᔪᐊᖅᒥ — ᐃᓱᓕᑦᑎᓯᔪᖅ ᐃᓂᒋᕋᑖᖅᑕᖓᓂ.

ᐳᕋᐃᒻ ᒥᓂᔅᑕ ᒫᒃ ᑳᓂ ᑐᓴᖅᑎᑦᑎᓚᐅᕐᑐᖅ ᒪᐃ 5-ᒥ ᐅᓇ ᓗᐃᔅ ᐋᐳ, ᐃᖅᑲᖅᑐᐃᔨᕕᓂᖅ ᐃᖅᑲᖅᑐᐃᕝᕕᒃᔪᐊᕐᒥ ᐊᒻᒪᓗ ᐅᓇᑕᕐᓂᕐᒧᑦ ᐱᑦᑎᐊᖏᓗᐊᖅᑐᓂ ᐱᓕᕆᐊᖃᖅᐸᒃᖢᓂ, ᑭᒡᒐᖅᑐᐃᔨᐅᓕᕐᓂᐊᖅᑐᖅ ᐆᒧᖓ ᑭᖕ ᓵᔅᒥ ᑲᓇᑕᒥ. ᐋᐳ ᐃᓇᖏᕐᓯᓂᐊᖅᑐᖅ ᔫᓂ 8-ᒥ.

“ᐱᓕᕆᖃᑕᐅᓯᒪᕗᖓ ᖃᓄᐃᓕᐅᕈᑎᒃᓴᓂ ᐊᒻᒪ ᐃᓛᓐᓂ ᐊᒃᓱᕈᕐᓇᓚᐅᖅᐸᒃᖢᓂ,” ᓴᐃᒪᓐ ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ ᒪᐃ 7-ᒥ ᕇᑑ ᕼᐋᓪᒥ, ᐊᖏᕐᕋᕆᓚᐅᑲᒃᑕᖓᓂ ᐋᑐᕚᒥ.

ᐊᒃᓱᕈᕈᑎᖃᖃᑦᑕᓚᐅᕐᑐᖅ ᐃᓄᖕᓂ ᐃᓚᐃᖅᑐᓂ ᓈᒻᒪᙱᓕᐅᕈᑎᖃᕐᓂᕐᒧᑦ.

ᐱᓇᓱᐊᕈᓰᒃ ᒪᕐᕉᒃ ᐊᑐᓚᐅᕐᑐᓂ ᑕᒻᐳᓗ ᕆᑦᔾᒦᓚᐅᕐᑐᖅ ᐳᕆᑎᔅ ᑲᓚᒻᐱᐊᒥ ᐅᐸᒍᑎᔭᖅᑐᖅᖢᓂ ᒪᒥᓴᕋᓱᒃᑐᓂ ᑯᑭᖅᓯᔪᖃᓚᐅᖅᑎᓪᓗᒍ 9-ᓂ ᐃᓄᖕᓂ ᕕᕝᕗᐊᕆᐅᑎᓪᓗᒍ. ᐅᓇ “ᐃᓱᒫᓗᖕᓇᓚᐅᕐᑐᖅ,” ᐅᖃᕐᑐᖅ.

ᖁᕕᐊᓱᖕᓂᕐᒧᑦᑕᐅᖅ ᐳᓛᖃᑦᑕᓚᐅᕐᑐᖅ ᐱᓗᐊᖅᑐᒥ ᐅᑭᐅᕐᑕᖅᑐᕐᒧᙵᐅᔭᕌᖓᑦ.

ᓇᒧᑐᐃᓐᓇᖅ ᐊᐅᓪᓚᕌᖓᑦ ᓄᓇᕗᒧᑦ ᐅᕝᕙᓘᓐᓃᑦ ᓄᓇᕕᒃᒧᑦ, ᑐᙵᓱᒃᑎᑕᐅᖃᑦᑕᓚᐅᕐᑐᖅ ᐱᖃᓐᓇᕆᔭᖏᓐᓂ, ᐃᓚᖏᓐᓂᓪᓗ ᐊᒻᒪ ᐃᓄᖕᓄᑦ ᐊᔾᔨᖃᖃᑎᖃᕈᒪᔪᓄᑦ.

“ᑕᑉᐸᐅᖓᑲᑕᑦᑎᐊᕐᓯᒪᙱᓐᓇᒪ ᐊᕐᕌᒍᑦ ᑕᓪᓕᒪᑦ ᐃᓗᐊᓂ, ᑭᓯᐊᓂᓕ ᓂᐅᕐᕈᑕᐃᓐᓇᕌᖓᒪ ᖁᕕᐊᓇᑦᑎᐊᖃᑦᑕᖅᓯᒪᔪᖅ,” ᐅᖃᕐᑐᖅ.

“ᐃᓚᖃᐅᕈᓘᔭᕋᒪ ᐅᑭᐅᕐᑕᖅᑐᕐᒥ.”

ᓴᐃᒪᓐ ᐅᖃᖃᑎᖃᕐᓯᒪᔪᖅ ᓄᓇᕐᔪᐊᕐᒥ ᓯᕗᓕᐅᖅᑎᐅᓯᒪᔪᓄᑦ, ᐃᓚᒋᔭᐅᓪᓗᓂ — ᑯᐃᓐ ᐃᓕᓴᐱ — ᑖᓐᓇᓗ ᐃᖅᑲᐅᒪᑦᑎᐊᖅᖢᓂᐅᒃ.

“ᐊᓈᓇᑦᐊᕋ, ᐱᕈᖅᐸᓪᓕᐊᑎᓪᓗᑕ, ᐅᖃᐅᓯᖃᖃᑦᑕᓚᐅᕐᓯᒪᖕᒪᑦ ᑯᐃᓐᒥ,” ᓴᐃᒪᓐ ᐅᖃᕐᑐᖅ. “ᐃᓱᒪᒋᔭᐅᑦᑎᐊᖃᕐᑕᓚᐅᕐᒪᓐ ᐊᒻᒪᓗ ᐃᓄᐃᑦ ᓄᓇᓕᖏᓐᓂ ᐊᖏᕐᕋᖏᓐᓂ ᐊᔾᔨᙳᐊᖃᖅᐸᒃᖢᑎᒃ ᑯᐃᓐᒥ.”

ᐃᓕᓴᒥ ᐃᓅᔪᓐᓃᖅᑎᓪᓗᒍ ᐊᒻᒪ ᐃᓗᕕᖅᑕᐅᑎᓪᓗᒍ 2022-ᒥ “ᓄᒫᓇᒻᒪᕆᓚᐅᕐᓯᒪᔪᖅ,” ᑭᓯᐊᓂᓕ ᐊᕐᕌᒍᑎᓪᓗᒍ ᖁᕕᐊᓇᓚᐅᕐᓯᒪᓪᓗᓂ ᐅᓇ ᑭᖕ ᓵᔅ ᐊᖓᔪᖅᑳᙳᖅᑎᓪᓗᒍ.

ᑕᐃᓐᓇ ᐊᑐᕐᐸᓪᓕᐊᓕᕐᑎᓪᓗᒍ ᓴᐃᒪᓐ ᑲᑎᒪᔪᓂ ᐃᓂᖃᖅᑎᑦᑎᓚᐅᕐᓯᒪᔪ ᑖᓐᓇ ᓄᑖᖅ ᑭᖕᙳᕐᑐᕐᒥ ᐊᖓᔪᖅᑳᒐᓚᖕᓂ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ, ᐊᓪᓚᖓᔪᐃᑦ ᑲᑎᒪᔨᖏᓐᓂ ᐊᒻᒪᓗ ᐊᓪᓚᐃᑦ ᐊᐅᓚᑦᑎᔨᖏᓐᓂ.

“ᐅᕙᓐᓄᓪᓕ ᒪᑐᐃᕈᑎᐅᓚᐅᕐᑐᖅ ᓄᓇᖃᖅᑳᖅᑐᓄᑦ ᓯᕗᓕᐅᖅᑎᓄᑦ ᑭᖕ ᐳᓛᖅᑕᐅᔪᓐᓇᓕᕐᓂᖓᓂᒃ,” ᓴᐃᒪᓐ ᐅᖃᕐᑐᖅ.

ᐅᓇᑦᑕᐅᖅ ᐃᓅᔪᓐᓃᕐᓂᑯ ᐃᒃᓯᕋᕐᔪᐊᕌᓗᒃ ᕗᕌᓐᓯᔅ “ᐃᑲᔪᑦᑎᐊᓚᐅᕐᒥᔪᖅ,” ᓴᐃᒪᓐ ᐅᖃᕐᑐᖅ, ᐃᓱᒪᒋᓗᐊᖅᖢᓂᐅᒃ “ᐅᔾᔨᕐᓇᓗᐊᖅᑐᓂᒃ” ᒪᒥᐊᓐᓂᕋᐃᑎᓪᓗᒍ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓄᑦ 2022-ᒥ. ᐅᓇᓕ ᐃᒃᓯᕋᕐᔪᐊᕌᓗᒃ ᓕᐅ ᒥᒃᓵᓄᑦ ᐅᖃᓚᐅᕐᒥᔪᖅ ᒪᒥᓴᕆᐊᖃᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ.

ᓴᐃᒪᓐ ᐅᖃᐅᓯᖄᕐᔪᓚᐅᕐᒥᔪᖅ ᑕᑯᓚᐅᕐᓂᖓᓂ ᐊᒥᐊᓕᑲᒥᐅᑦ ᐊᖓᔪᖅᑳᖏᓐᓂ ᑖᓄᑦ ᑐᕋᒻᑉ ᐊᒻᒪ ᔫ ᐸᐃᑕᓐᒥ. ᐊᒻᒪᓗ ᐅᐱᒍᓱᓚᐅᕐᓯᒪᓂᕋᖅᖢᑎ ᑲᑎᖃᑎᖃᖅᑎᓪᓗᒍ 2023-ᒥ ᐆᒥᖓ ᔫᑯᕇᓐ ᐊᖓᔪᖅᑳᖓᓂ ᕙᓛᑎᒥᐅ ᔨᓚᓐᔅᑭᒥ. ᐅᖃᐅᓯᕆᓪᓗᓂᐅᒃ ᐊᔪᐃᓐᓇᕆᐊᖃᕐᓂᕐᒥᒃ.

“ᐅᖃᓪᓚᖃᑎᒋᓪᓗᒍ ᐃᓱᒪᒋᓚᐅᕐᑕᕋ ᐊᔪᐃᓐᓇᕆᐊᖃᕐᓂᕐᒥ ᓲᖃᐃᒻᒪ ᐱᕈᖅᐸᓪᓕᐊᑎᓪᓗᖓ ᑖᓐᓇ ᐅᖃᐅᓯᖅ ᑐᓴᕐᓇᖃᑦᑕᓚᐅᕐᓯᒪᖕᒪᑦ.”

ᐅᖃᓪᓚᒃᑎᓪᓗᒍ ᑲᓇᑕᒥ ᑲᑎᒪᕕᒡᔪᐊᕐᓇᒥ ᔨᓚᓐᔅᑭ ᐅᖃᐅᓯᖃᖃᑦᑕᓚᐅᕐᒪᑦ ᐃᒪᓐᓇ “ᐊᔪᐃᓐᓇᖅᑕ ᑲᓇᑕ. ᐊᔪᐃᓐᓇᖅᑕ ᔫᑯᕇᓐ.”

‘ᑭᖑᓂᖃᔮᖂᙱᑦᑐᖓ ᑭᓱᒥ’

ᑕᐃᒪᓕ ᖃᓄᐃᓕᐅᕐᓂᐊᓕᖅᐸ ᓴᐃᒪᓐ? ᓯᕗᓪᓕᕐᒥᓪᓕ “ᐊᑯᓂᕈᓗ ᕿᑲᑐᐃᓐᓇᕐᓂᐊᖅᑐᖓ.”

ᓴᐃᒪᓐ ᐊᒻᒪ ᐅᐃᖓ ᕗᐃᑦ ᕗᕇᓱ ᐋᑐᕚᒥ ᓄᓇᖃᐃᓐᓇᕐᓂᐊᕈᒪᔫᒃ ᑕᒫᓂ ᐃᓚᖃᐅᕐᒥᒐᒥ.

ᑖᒃᑯᐊ ᐊᐃᑉᐸᕇ ᐃᒡᓗᑯᓗᖃᕐᒪᑎᒃ ᓅᕙ ᓯᑰᓯᐊᒥ ᐊᐅᔭᕐᓗ ᑕᐃᑲᓃᑲᑕᒍᒪᓪᓗᑎᒃ. ᓴᐃᒪᓐ ᐳᓛᕐᓂᐊᕈᒪᖕᒥᔪᖅ ᐊᖏᕐᕋᕆᓚᐅᕐᑕᖓᓄᑦ ᓄᓇᕕᒃᒥ.

“ᖃᓄᐃᙱᒃᑯᒪ ᑭᒃᑯᓕᒫᓪᓗ ᖃᓄᐃᙱᑉᐸᑕ ᐅᑎᑐᐃᓐᓇᕆᐊᖃᕐᑐᓂ ᐳᓛᕆᐊᕐᓗᖓ ᐃᓚᓐᓂ ᐱᖃᓐᓇᕆᔭᓐᓂᓪᓗ ᐊᒻᒪ ᐸᐅᕐᖓᖅᑕᕆᐊᕐᓗᖓ,” ᐅᖃᕐᑐᖅ.

ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᖅ ᓯᕗᓪᓕᐅᑎᓯᒪᓚᐅᖅᖢᓂᐅᒃ ᒐᕙᓇ ᔭᓄᕉᓂᖓᓂ, ᓴᐃᒪᓐ ᑭᖑᓂᐊᒍᑦ ᖃᓄᐃᓕᐅᕐᓂᐊᕐᓂᕐᒥᓂ ᐃᓱᒪᒋᔭᖃᕐᒥᔪᖅ.

ᒫᓐᓇᓗ ᓄᖃᒻᒪᕆᒍᒪᖏᓐᓂᖓᓄᑦ ᐅᖃᕐᑐᖅ ᐃᓄᐃᑦ ᓄᓇᖓ ᐃᓱᒪᒋᓂᕐᓴᐅᓂᐊᕈᒪᓪᓗᓂᐅᒃ.

“ᐋᖅᑭᒃᓱᐃᓯᒪᒐᒪ ᐋᖅᑭᓱᐃᔪᒪᓪᓗᖓ ᓄᓇᓕᖕᓂ ᖃᓄᐃᑉᐸᓪᓕᐊᔾᔪᑎᐅᔪᓐᓇᖅᑐᓂᒃ ᐊᒻᒪ ᐊᔪᕈᓐᓃᖅᓴᕈᑎᒃᓴᓂ ᒪᑯᓄᖓ ᐃᓱᒪᒃᑯᑦ ᐋᓐᓂᐊᖃᕐᓇᖏᑦᑐᓕᕆᓂᕐᒥ ᐃᓅᓯᓕᕆᔨᓂᒃ,” ᐅᖃᕐᑐᖅ

ᐊᐱᕆᔭᐅᒐᒥ ᑭᓱᒥ ᑭᖑᓂᖃᕋᔭᕐᒪᖔᑦ ᒐᕙᓇ ᔭᓄᕉᓂᕐᒧᑦ, ᓴᐃᒪᓐ ᐅᖃᓚᐅᕐᑐᖅ ᑭᖑᓂᖃᔾᔮᕋᓱᒋᙱᑦᑐᖓ.”

ᖁᕕᐊᒋᓚᐅᕐᑕᖓ ᐱᔨᑦᑎᕋᖅᑎᐅᓂᕐᒥᓂᒃ ᐊᒻᒪ ᑲᓇᑕᒥᐅᑕᓂ ᑕᑯᖃᑦᑕᕐᓂᖓᓂ ᐊᒻᒪᓗ “ᐊᖅᑯᑎᓕᐅᓯᒪᓂᕐᒥ ᒪᒥᓴᕐᓂᕐᒨᖓᔪᓂᒃ ᐊᒻᒪ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒥ.

“ᐃᓱᒪᓚᐅᕐᓯᒪᙱᑦᑐᖓ ᒐᕙᓇ ᔭᓄᕉᓂᐊᕐᓂᕐᒥᒃ, ᑭᓯᐊᓂᓕ ᐃᓱᒪᖕᓇᙱᑦᑐᓂ ᖃᓄᐃᓕᐅᕐᓕᕐᓇᕐᒪ ᐊᒻᒪᓗ ᑲᓇᑕᒥ ᖃᐅᔨᕚᓪᓕᒻᒪᕆᒃᖢᖓ,” ᐅᖃᕐᑐᖅ.