ᓄᑖᑦ ᖃᖓᑕᓲᒃᑯᕕᒃᓴᐃᑦ ᑕᓪᓕᒪᓂ ᓄᓇᓕᖕᓂ ᒪᑐᐃᕐᓂᐊᖅᑐᑦ ᐅᐱᕐᖔᖅ

For English version, see New airport terminals in 5 communities set to start operation in spring

ᑕᓪᓕᒪᑦ ᐊᕐᕕᓂᓕᒃᓂ ᓄᓇᕗᒥᑦ ᖃᖓᑕᓲᒃᑯᕕᖕᓂ ᒫᓐᓇ ᓴᓇᔭᐅᔪᓂ ᒪᑐᐃᓕᒑᔪᑦ ᐊᐅᓪᓚᖃᑦᑕᖅᑐᓄᑦ ᐅᐱᕐᖔᖅ ᑭᖑᕙᕆᐊᑲᑕᓚᐅᖅᖢᑎᒃ.

ᓄᑖᑦ ᖃᖓᑕᓲᒃᑯᕕᒃᓴᐃᑦ ᓴᓇᔭᐅᔪᑦ ᐅᑯᓇᓂ ᐃᒡᓗᓕᒑᕐᔪᒃ, ᑎᑭᕋᕐᔪᐊᖅ, ᓇᐅᔮᑦ, ᖁᒡᓗᖅᑑᖅ ᐊᒻᒪ ᑭᒻᒥᕈᒻᒥ ᐅᑯᓇᙵᑦ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒥᑦ ᒐᕙᒪᒃᑯᓐᓂ ᐃᑲᔫᑎᖃᖅᑎᑕᐅᓪᓗᑎᒃ ᓴᓇᔭᐅᓂᖏᑦ.

ᑲᑎᖢᑎᒃ ᐊᑭᖃᕐᑐᑦ ᑖᒃᑯᐊ ᖃᖓᑕᓲᒃᑯᕖᑦ ᒫᓂ $75.5 ᒥᓕᐊᓐ-ᓂ, ᐊᑭᖏᑦ ᐊᕕᒃᑕᐅᓯᒪᓪᓗᑎᒃ ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪ ᐋᑐᕚᒥ.

2020-ᖑᑎᓪᓗᒍ ᓄᓇᕗᒥᑦ ᒐᕙᒪᒃᑯᑦ ᑐᕌᒐᖃᓚᐅᕐᓯᒪᖕᒪᑕ ᐱᐊᓂᒃᓯᔪᒪᓪᓗᑎ ᖃᖓᑕᓲᒃᑯᕕᖕᓂᑦ 2023 ᑎᑭᑉᐸᑦ. ᑭᓯᐊᓂᓕ, ᐱᓕᕆᐊᒃᓴᐃᑦ ᐊᑭᑦᑐᕋᐅᑎᐅᒃᑲᓐᓂᓕᓚᐅᕐᓯᒪᖕᒪᑕ ᓯᕗᓪᓕᖅᐹᖅ ᐊᑭᑦᑐᕋᐅᑎᐅᔪᑦ ᐊᑭᓪᓗᐊᖏᑦᑕ ᐅᖓᑖᓅᖓᑎᑕᐅᓗᐊᕐᓂᖏᓐᓄᑦ ᑕᐃᒪᓐᓇᓗ ᑭᖑᕙᕆᐊᕈᑎᐅᓯᒪᓪᓗᓂ.

ᑕᐃᕕᑦ ᐊᕿᐊᕈᖅ, ᐱᕙᓪᓕᐊᔪᓕᕆᔨᒃᑯᑦ ᐊᒻᒪ ᐃᖏᕐᕋᔾᔪᑎᓕᕆᔨᒃᑯᓐᓄᑦ ᒥᓂᔅᑕ, ᑐᓴᖅᑎᑦᑎᓚᐅᕐᑐᖅ ᐅᒃᑑᐱᕆᒥ ᑖᒃᑯᐊ ᑕᓪᓕᒪᑦ ᒥᑭᓐᓂᕐᓴᐃᑦ ᐊᐅᓚᑕᐅᓕᕐᓂᐊᕐᓂᖏᓐᓂᑦ 2024 ᐃᓱᓕᑉᐸᑦ.

ᑭᓯᐊᓂᓕ ᑭᖑᕙᕆᐊᖅᑕᐅᒃᑲᓐᓂᓚᐅᕐᓯᒪᖕᒪᑕ. “ᐅᑯᐊ ᐱᓕᕆᐊᒃᓴᐃᑦ ᐱᖁᑎᓂ ᓈᒻᒪᙱᓕᐅᕈᑎᖃᓚᐅᕐᒪᑕ ᐃᓚᖏᓪᓗ ᐃᒡᓗᒃᓴᓄᑦ ᐃᓚᒋᔭᐅᓪᓗᑎᒃ,” ᐅᖃᕐᑐᖅ ᑳᑐᕆᓐ ᑕᕙᕉ, ᑐᓴᐅᒪᔾᔪᑎᓕᕆᓂᕐᒧᑦ ᐊᐅᓚᑦᑎᔨᔾ ᐱᕙᓪᓕᐊᔪᓕᕆᔨᒃᑯᓐᓄᑦ ᐊᒻᒪ ᐃᖏᕐᕋᔾᔪᑎᓕᕆᔨᒃᑯᓐᓄᑦ ᖃᕋᓴᐅᔭᒃᑯᑦ ᑎᑎᕋᖅᖢᑎᒃ.

ᒫᓐᓇᓕ ᐃᒡᓗᓕᒑᕐᔪᒃᒥ ᓴᓇᔭᐅᔪᖅ ᖃᖓᑕᓲᒃᑯᕕᒃᓴᖅ ᐱᐊᓂᒃᑕᐅᓪᓗᐊᖅᑐᖅ ᔭᓄᐊᕆᒥ ᑭᖑᓪᓕᖅᐹᖓᓂ ᐱᓇᓱᐊᕈᓯᐊᓂᒃ, ᓈᐅᔮᓂᓪᓗ ᐊᒻᒪ ᑎᑭᕋᕐᔪᐊᕐᒥᓪᓗ ᓴᓇᔭᐅᔪᐃᑦ ᐱᐊᓂᒃᑕᐅᓂᐊᖅᖢᑎᒃ ᒫᔅᓯᒥ ᐊᒻᒪ ᖁᒡᓗᖅᑑᒥ ᐊᐃᕆᓕᒥᑦ.

ᐊᒻᒪᓗ ᐱᓇᓱᐊᕈᓯᑦ ᑎᓴᒪᑦ ᐱᐊᓂᒃᑕᐅᑎᓪᓗᒋᑦ ᓄᓇᓕᖕᓂ ᐊᒻᒪ ᒐᕙᒪᒃᑯᓐᓂ ᐋᖅᑭᒃᑕᐅᓯᒪᓂᖓᒍᑦ ᑖᒃᑯᐊ ᐊᑐᖅᑕᐅᓕᖅᑎᑕᐅᓂᐊᖅᖢᑎᒃ, ᑕᕕᕉ ᐅᖃᕐᑐᖅ.

ᖃᖓᑕᓲᒃᑯᕕᐅᓚᐅᕐᑐᓂ ᐊᖏᓂᕐᓴᐅᓪᓗᑎᒃ ᓴᓇᔭᐅᓂᑯᓂ 40 ᐊᕐᕌᒍᑦ ᓯᕗᓂᐊᒍᑦ. ᓱᕋᒃᑎᖅᑕᐅᓛᕐᑐᑦ ᓄᑖᑦ ᖃᖓᑕᓲᒃᑯᕖᑦ ᐱᐊᓂᒃᑕᐅᒃᐸᑕ.

ᑲᖏᖅᖠᓂᖅᒥ ᖃᖓᑕᓲᒃᑯᕕᒃ 2025-ᒥ ᐊᑐᖅᑕᐅᓕᕐᓂᐊᖅᑐᖅ ᑭᓯᐊᓂᓕ ᑖᓐᓇ ᐱᓕᕆᐊᒃᓴᖅ ᐊᑭᑐᓂᕐᓴᐅᔪᖅ ᐊᒻᒪᓗ ᒪᕐᕈᐃᓕᖓᓪᓗᓂ ᓴᓇᔭᐅᓪᓗᓂ.

ᐱᓕᕆᓂᖅ 1 ᐱᓕᕆᐊᒃᓴᖅ ᐃᓱᒪᒋᔭᐅᔪᖅ ᐱᐊᓂᒃᑕᐅᓂᐊᕆᐊᒃᓴᖓᓂ ᔫᓂ ᐱᒋᐊᕐᓯᒪᓕᕐᑎᓪᓗᒍ “ᐱᓕᕆᕝᕕᐅᓕᕐᓗᓂ” ᔪᓚᐃᒥ.

ᑭᖑᓂᐊᒍᓪᓕ, ᓄᑕᐅᙱᑦᑐᖅ ᖃᖓᑕᓲᒃᑯᕕᒃ ᓱᕋᒃᑎᖅᑕᐅᓂᐊᖅᖢᓂ ᐊᒻᒪᓗ ᐱᓕᕆᓂᖅ 2 ᐱᓕᕆᐊᖑᓂᐊᖅᖢᓂ ᓄᑕᐅᙱᑦᑑᑉ ᖃᖓᑕᒃᓲᒃᑯᕕᕕᓂᐅᑉ ᐃᓂᖓᓂᒃ.

ᓄᑖᒃ ᒪᕐᕉᒃ ᐃᒡᓗᕐᔪᐊᒃ ᑲᑎᑎᑕᐅᓂᐊᖅᑐᑦ ᐊᑕᐅᓯᕐᒧᑦ 2,650 ᑭᑉᐹᕆᒃᑎᓯᒪᔪᓂ ᒦᑕᓂ ᖃᖓᑕᓲᒃᑯᕕᐅᓕᕐᓗᓂ ᐊᒻᒪᓗ ᐃᓄᖃᕈᓐᓇᕐᓂᐊᖅᖢᓂ 508 ᖃᖓᑕᓲᒃᑰᕐᓂᐊᖅᑐᓂ ᐊᒻᒪ ᓂᐅᕝᕕᐅᕆᐊᖅᓯᒪᔪᓂᒃ.

ᐊᑭᖃᑲᓴᒃᖢᓂ $85 ᒥᓕᐊᓐᓂ, ᑕᒪᕐᒥ ᑲᖏᖅᖠᓂᖅᒥ ᐱᓕᕆᐊᖑᔪᖅ ᐱᐊᓂᒃᑕᐅᓪᓗᐊᖅᑐᖅ 2026 ᐅᑭᐊᒃᓵᖓᓂᒃ. ᑕᕗᕉ ᐅᖃᓚᐅᕐᑐᖅ. ᑐᓂᔭᐅᓯᒪᔪᑦ $63.5 ᒥᓕᐊᓐᓂ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒥᑦ ᒐᕙᒪᒃᑯᑦ ᑐᓂᓯᓯᒪᓪᓗᑎᒃ $21.5 ᒥᓕᐊᓐᓂ.