ᓱᕈᓯᕐᓄᑦ ᐅᖃᓕᒫᒐᖅ ᕿᒥᕐᕈᐊᕐᓇᕐᑐᖅ ᖃᓄᐃᓕᐅᕈᑎᖃᕐᓂᕐᒥᒃ ᐅᔭᕋᖕᒥ ᑎᒍᐊᕆᔭᐅᔪᒥᒃ

For English version, see New children’s book explores experiences of beloved pet rock

ᐋᔅᓕ ᕿᓚᕝᕙᖅ-ᓴᕚᑦ ᓯᕗᓪᓕᖅᐹᒥ ᐃᓄᒃᑎᑐᑦ ᓯᓐᓇᒃᑐᖅᑕᖓᓂ ᑐᓐᓂᖅᑯᓯᐊᖅᑐᖅ.

ᑎᑎᕋᖅᑎ, ᑎᑎᕋᐅᔭᖅᑎ, ᐅᓂᒃᑳᖅᑎ ᐊᒻᒪᓗ ᐊᔾᔨᓕᐅᕆᔨ ᓯᓐᓇᒃᑐᖃᑦᑕᓕᓚᐅᕐᓯᒪᔪᖅ ᐃᓄᒃᑎᑐᑦ 2021ᒥ ᐃᓕᓐᓂᐊᓚᐅᖅᖢᓂ ᐃᓄᒃᑎᑐᑦ ᐃᓐᓇᐅᓕᖅᑎᓪᓗᒍ. ᓱᕈᓯᐅᓪᓗᓂ ᐃᖃᓗᖕᓂ ᐱᕈᖅᐸᓪᓕᐊᑎᓪᓗᒍ, ᕿᓚᕝᕙᖅ-ᓴᕚᑦ ᐅᖃᕐᑐᖅ, ᐃᓄᒃᑎᑐᑦ ᐃᓕᓐᓂᐊᕋᓱᒃᖢᓂ ᐃᑲᔪᖅᑕᐅᓚᐅᕐᓯᒪᙱᑦᑐᖅ.

“ᓯᓐᓇᒃᑐᓚᐅᕋᒪᑦ ᐊᕙᓗᔭᐅᓯᒪᓪᓗᓂ ᐃᓄᖕᓄᑦ ᐊᕐᓇᓄᑦ ᑎᑎᕋᐅᔭᖅᑎᓄᑦ ᐊᒻᒪᓗ ᐅᕙᓐᓄ ᐃᒋᑦᑎᓪᓗᑎᒃ ᐅᖃᖅᑐᑦ, ‘ᐊᑏ, ᑕᑯᑎᓚᐅᖅᑎᒍ ᐊᔪᙱᓐᓂᕐᓂ.”

ᐃᓄᒃᑎᑐᑦ ᐅᖃᕈᓐᓇᑐᐃᓐᓇᓚᐅᕐᑐᖅ ᐃᒪᓐᓇ, “ᐅᔭᕋᐅᔪᖓ, ᐅᓪᓚᒍᓐᓇᙱᖢᖓ. ᖃᖓᑕᕙᙱᑦᑐᖓ. ᐱᓱᖃᑦᑕᙱᑦᑐᖓ.”

ᑖᒃᑯᐊ ᐅᖃᐅᓰᑦ ᐅᖃᓕᒫᒐᓕᐊᖓᓂ ᐱᒋᐊᕈᑎᒋᕙᓪᓕᐊᓕᓚᐅᖅᑕᖓ ᐅᔭᕋᐅᔪᖓ, ᓱᕈᓯᕐᓄᑦ ᐅᖃᓕᒫᒐᖅ ᐊᒻᒪᓗ ᐋᖅᑭᒃᑕᐅᓂᖅᖢᓂ ᐅᑯᓇᙵᑦ ᐃᓐᕼᐊᐱᑦ ᒦᑎᐊ ᑕᖅᑭᐅᓂᐊᖅᑐᒥᓐ.

ᐅᔭᕋᐅᔪᖓ ᒪᓕᒃᑐᖅ ᓱᕈᓯᕐᒥ ᐃᓄᖕᒥ ᓄᑲᑉᐱᐊᕐᒥ ᐊᒻᒪᓗ ᐊᓈᓇᖓᓂ ᐅᓂᒃᑳᖅᑎᓪᓗᒍ ᓯᓐᓇᒃᓴᐅᑎᒥ ᐅᓂᒃᑳᖅᑐᐊᒥ ᓄᑲᑉᐱᐊᑉ ᐅᔭᕋᒃ ᑎᒍᐊᖓᓂ. ᑖᓐᓇ ᓄᑲᑉᐱᐊᖅ ᐊᐱᕆᓕᕐᑐᖅ ᐊᓈᓇᒥᓄᑦ ᐅᔭᕋᒃ ᑎᒍᐊᖓ ᑕᑯᓯᒪᔭᕆᐊᒃᓴᖓᓂ ᓄᓇᕐᔪᐊᒥ.

“ᐊᓈᓇᖓᑕ ᐅᖃᐅᑎᓪᓗᓂᐅᒃ, ‘ᐄ, ᐅᓇ ᐅᔭᕋᒃ ᑐᓵᔪᓐᓇᖅᑐᖅ ᐊᕕᙵᕐᓂ ᐱᓱᒃᑐᓂ ᓄᓇᒥ, ᑐᓵᔪᓐᓇᖅᖢᓂᓗ ᑐᒃᑐᐃᑦ ᐃᓯᒐᖏᓐᓂᒃ,’ ᑐᓵᔪᓐᓇᖅᑐᖅ ᑭᓱᓕᒫᓂᒃ,” ᐅᖃᕐᑐᖅ ᕿᓚᕝᕙᖅ-ᓴᕚᑦ ᐊᐱᕐᓱᖅᑕᐅᑎᓪᓗᒍ.

ᐅᔭᕋᐅᔪᖓ ᓄᑖᖅ ᓱᕈᓯᕐᓄᑦ ᐅᖃᓕᒫᒐᐅᓕᕐᑐᖅ ᐃᖃᓗᖕᓂ ᓄᓇᖃᖅᑐᒧᑦ ᐋᔅᓕ-ᕿᓚᕝᕙᖅ-ᓴᕚᑦ. (ᐊᔾᔨᙳᐊᖅ ᐅᑯᓇᙵᑦ ᐃᓐᕼᐱᑦ ᐅᖃᓕᒫᒐᐃᑦ)

“ᑕᑯᔪᓐᓇᕐᑐᖅ ᐊᒻᒪ ᐃᒃᐱᒍᓱᒍᓐᓇᖅᖢᓂ.”

ᐅᖃᓕᒫᒐᕐᒥ ᑎᑎᕋᐅᓯᕆᔭᖏ ᕿᓚᕝᕙᖅ-ᓴᕚᑦ ᐊᒃᑲᖓᓂ ᐊᒻᒪ ᓂᖏᐅᖓᓂ ᐃᓱᒪᒋᔭᖃᖅᖢᓂ ᑎᑎᕋᖅᓯᒪᔭᖏᑦ.

ᐅᖃᐅᓯᖃᓚᐅᕐᑐᖅ ᐱᓕᕆᐊᒥᓂ “ᐱᐅᔪᑯᓗᒃ ᐅᖃᓕᒫᒐᕋᓛᖅ.” ᓴᖅᑭᑎᑦᑎᓯᒪᔪᖅ ᑎᑎᕋᐅᔭᕐᓯᒪᔪᓂ ᖃᐅᒪᔫᑎᓂᒃ ᒪᑯᓂᖓ ᖃᑯᑦᑎᐊᖅᑐᓂᒃ ᓇᑦᑎᕐᓂᒃ, ᑐᒃᑐᓂ, ᑲᖑᕐᓂ, ᐃᖃᓗᖕᓂ ᐊᒻᒪ ᐊᕿᒡᒋᕐᓂ ᖃᖓᑕᔪᓂ ᒪᒃᐱᒐᖅᑎᒍᑦ.

ᕿᓚᕝᕙᖅ-ᓴᕚᑦ ᐅᖃᓚᐅᕐᑐᖅ ᑎᑎᕋᖃᑦᑕᖅᖢᓂ ᖃᓄᖅ ᐊᔾᔨᒌᙱᑦᑐᓂ ᐅᖃᐅᓯᒃᓴᖅᓯᐅᕐᓇᕐᓂᕋᖅᖢᓂᐅ ᐊᒻᒪᓗ ᓄᓇᕐᔪᐊᒥ ᖃᐅᔨᕚᓪᓕᕈᑎᒋᔾᔪᑎᒋᓪᓗᓂᐅᒃ. ᐅᖃᖅᖢᓂ ᑖᓐᓇ ᑕᑯᔭᐅᔪᒪᖁᓇᔭᖅᖢᓂᐅᒃ ᓱᕈᓯᕐᒧᑦ ᐅᖃᓕᒫᖅᑐᓂᒃ ᐅᔭᕋᐅᔪᖓ, ᑖᓐᓇᓗ ᓄᓇᕐᔪᐊᕐᒥ ᐅᔾᔨᕈᓱᓕᖅᑎᑦᑎᔾᔪᑎᐅᓗᓂ — ᐅᑭᐅᕐᑕᖅᑐᖅ — ᐱᐅᔪᐊᓘᓂᖓᖓᓂ.

“ᐱᒻᒪᕆᐊᓘᒻᒪ ᓱᕈᓯᕐᓂ ᓄᓇᒥᐅᑕᓂ ᖃᐅᔨᒪᓕᕐᑎᓐᓇᓱᒡᓗᒋᑦ,” ᐅᖃᕐᑐᖅ. “ᐊᐱᕐᓱᕈᓐᓇᓕᕐᓗᑎᒃ ᓄᓇᒥᐅᑕᓂᒃ, ᓄᓇ ᖃᓄᐃᑉᐸᓪᓕᐊᔾᔪᑎᖓᓂᒃ ᑕᑯᕙᒃᑕᑦᑎᓐᓂ ᐊᒻᒪᓗ ᐱᕈᖅᑐᕕᓂᕐᓂ ᑲᒪᙱᔭᖃᕐᓇᒥ.”

ᑖᔅᓱᒪᓕ ᐅᖃᓕᒫᒐᐅᑉ ᐊᓯᐊᒍᑦ ᕿᓚᕝᕙᖅ-ᓴᕚᑦ ᐅᖃᓚᐅᕐᑐᖅ ᐱᓕᕆᕈᓘᔭᕐᓂᐊᕐᓂᕐᒥᓂᒃ. ᐱᓕᕆᐊᖃᖅᐸᓪᓕᐊᖕᒥᔪᖅ ᖃᐅᔨᓴᖅᑐᓕᕆᓂᕐᒧᑦ ᐅᓂᒃᑳᓕᐊᓂ ᐊᒻᒪᓗ ᑎᑎᕋᖅᐸᓪᓕᐊᓕᖅᖢᓂ ᐊᔾᔨᓕᐅᒐᐅᓛᖅᑑᖕᓂ ᒪᕐᕉᖕᓂ ᐊᒻᒪ ᒪᕐᕉᖕᓄ ᑕᕐᕆᔭᒐᓕᐊᖑᓂᐊᖅᑑᖕᓂ.

ᐅᔭᕋᐅᔪᖓ ᐅᖃᓕᒫᒐᓕᐊᖑᓂᐊᖅᑐᖅ ᐊᐃᕆᓕ 9ᒥ. ᐅᓇ ᓴᖅᑭᑎᑕᐅᓪᓚᕆᓛᖅᖢᓂ ᐊᐃᕆᓕ 13ᖑᓕᕐᐸᑦ ᐅᕙᓂ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᖅᕕᒃᒥ.

ᕿᓚᕝᕙᖅ-ᓴᕚᑦ ᓯᕗᓪᓕᖅᐹᒥ ᐅᖃᓕᒫᒐᓕᐊᖓᓂ ᐱᒋᐊᕈᑎᖃᓚᐅᕐᓯᒪᔪᖅ ᓲᕐᓗ ᐱᓯᖅᑎᑑᖓᔪᒥ ᐊᑎᖃᖅᖢᓂ Where the Sea Kuniks the Land, (ᑕᕆᐅᑉ ᑯᓂᒃᕕᖓ ᓄᓇᒥ) ᓴᖅᑭᑕᐅᓂᑯ 2022ᒥ.