ᓄᑖᖑᔪᖅ ᐃᓚᒌᓄᑦ ᒪᒥᓴᕐᕕᖕᒥ ᑎᑭᑉᐳᖅ ᐃᖃᓗᖕᓄᑦ

For the English version of this story, please see Family wellness centre planned for Iqaluit.

ᐃᖃᓗᐃᑦ ᓄᑖᖑᔪᒥ ᐃᓚᒌᓄᑦ ᒪᒥᓴᕐᕕᖃᓕᖅᐳᑦ, ᐅᖃᐅᓯᐅᓪᓗᓂ ᐃᓄᓕᕆᔨᒃᑯᑦ ᒥᓂᔅᑕ ᒫᒡᒍᓕ ᓇᑲᓱᖕᒧᑦ.

ᓄᑖᖅ ᒪᒥᓴᕐᕕᒃ ᐃᒡᓗᖃᖅᑎᑕᐅᕗᖅ ᓄᓇᕗᒻᒥ ᒐᕙᒪᒃᑯᑦ ᐃᒡᓗᖁᑎᖓᓐᓂ ᕼᐋᐱ ᕚᓕᒥ ᓴᓂᓕᕇᖑᔪᒥ ᐊᑐᖅᑕᐅᕙᓚᐅᖅᓯᒪᔪᒥ ᑲᑎᙵᔪᓄᑦ ᐊᖏᕐᕋᐅᔪᒥ ᐊᕐᓇᓄᑦ.

“7-ᓂ ᐃᒡᓗᕈᓯᖃᖅᖢᓂ, ᐱᓕᕆᐊᖑᓂᐅᔪᓄᑦ ᐃᓂᒃᓴᒥ ᐊᒻᒪ ᑎᑎᕋᕐᕕᐅᔪᓐᓇᖅᑐᓂ, ᐃᓚᒌᓄᑦ ᒪᒥᓴᕐᕕᒃ ᐱᕐᔪᐊᖑᓪᓗᓂ ᐊᒻᒪ ᐊᑦᑕᓇᙱᑦᑐᒥ ᐃᑲᔪᕈᑎᒃᓴᐅᕗᖅ ᑐᓂᓯᓂᐊᖅᑐᒥ ᑐᐊᕕᕐᓇᖅᑐᒥ ᕿᑐᕐᙵᙳᐊᕆᔭᐅᓚᐅᑲᖕᓂᐊᖅᑐᓄᑦ ᐃᓕᔭᐅᓂᐅᔪᓂ ᓱᕈᓯᕐᓄᑦ ᐱᔭᕆᐊᖃᕌᖓᑦ,” ᓇᑲᓱᒃ ᐅᖃᓚᐅᖅᐳᖅ ᒪᓕᒐᓕᐅᕐᕕᖕᒥ ᒫᔾᔨ 12−ᒥ ᒥᓂᔅᑕᓄᑦ ᐅᖃᐅᓯᒃᓴᓕᐅᕐᓂᕐᒧᑦ.

ᐅᖃᓚᐅᖅᐳᖅ “ᑐᑭᖃᑦᑎᐊᕐᓂᖅᓴᐅᔪᒥ ᐊᑎᖓᓂ” ᒪᒥᓴᕐᕕᖕᒧᑦ ᓂᕈᐊᖅᑕᐅᓂᐊᖅᐳᖅ ᐱᓕᕆᕝᕕᒃ ᐅᖃᖃᑎᖃᓚᐅᖅᑎᓪᓗᒋᑦ ᐃᓄᑐᖃᕐᓂ.

ᐱᔨᑦᑎᕋᕐᓂᐅᔪᒥ ᐃᓄᓕᒫᓄᑦ ᐊᑐᐃᓐᓇᐅᑎᑕᐅᓚᐅᖅᐳᖅ ᐃᓘᕐᔪᐊᒥ ᐱᒋᐊᖅᑐᒥ ᒫᔾᔨ 18−ᒥ, ᐅᖃᓚᐅᖅᐳᖅ ᒫᔭ ᔨᓚᓕ ᑐᑭᒧᐊᒃᑎᑦᑎᒡᐅᓚᐅᑲᒃᑐᖅ ᐃᓄᓕᕆᔨᒃᑯᓐᓄᑦ, ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

ᒫᓐᓇᐅᔪᒥ, ᐃᒡᓗᕐᔪᐊᖅ ᐊᑐᐃᓐᓇᐅᑐᐃᓐᓇᓚᐅᑲᒃᐳᖅ ᐃᓄᓕᕆᔨᒃᑯᓐᓄᑦ ᐱᓕᕆᔾᔪᔾᔭᐅᕙᒃᑐᓄᑦ.

“ᐃᖃᓗᖕᓂ ᐃᓚᒌᓄᑦ ᖃᓄᐃᙱᑦᑎᐊᕐᓂᐅᔪᒥ ᑲᑎᙵᓂᐅᔪᑦ ᐊᑐᕐᓂᐊᕆᕗᑦ ᐆᒥᖓ ᐃᓂᐅᔪᒥ ᐳᓚᕋᕐᕕᐅᓂᕐᒧᑦ ᐊᖓᔪᖅᑳᖑᔪᓄᑦ ᐅᕝᕙᓘᓐᓃᑦ ᑲᒪᒋᔭᖃᖅᑐᓄᑦ ᐊᒻᒪ ᓱᕈᓯᕐᓄᑦ, ᓴᖅᑭᑎᑦᑎᓗᓂ ᐊᑦᑕᓇᙱᑦᑐᒥ ᐃᓂᐅᔪᒥ ᓱᕈᓰᑦ ᐅᐸᒃᓯᒪᔪᓐᓇᕐᓂᖏᓐᓂ ᐃᓚᒥᓂᒃ,” ᔨᓚᓕ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᐃᓄᓕᕆᔨᒃᑯᑦ ᐅᖃᖃᑎᖃᕐᓂᐊᖅᐳᑦ ᑮᓇᐅᔭᓕᐅᕋᓱᐊᙱᑦᑐᓂ ᑲᑎᙵᓂᐅᔪᓂ ᐃᖃᓗᖕᓂ ᕿᒥᕐᕈᓂᕐᒧᑦ ᐊᑐᕐᓂᐅᔪᓐᓇᖅᑐᓂ ᐃᓂᐅᔪᒥ ᖄᒃᑲᓐᓂᐊᒍᑦ ᐱᓕᕆᐊᖑᓂᐅᔪᓄᑦ.