ᓄᑖᖑᔪᒥ ᐃᓄᒃᑎᑐᑦ ᓈᓚᐅᑎᒃᑯᑦ ᐱᓕᕆᐊᖑᔪᒥ ᓈᓚᐅᑎᒃᑰᖅᐳᖅ ᑐᓴᖅᓴᐅᑲᐅᑎᒋᔪᒥ ᐋᑐᕚᒥ
ᓯᕗᓪᓕᖅᐹᒥᒃ ᑲᑎᙵᓂᐅᔪᒥ ‘ᑭᑦᓯᐱᒥ ᐱᕙᓪᓕᐊᔪᑦ’ ᓴᖅᑭᑎᑕᐅᔪᒥ CKCU-FM−ᑯᓐᓂ ᐊᒻᒪ ᐅᕙᒍᑦ ᑕᓚᕖᓴᒥ
ᕗᕌᓐᑯ ᐳᓴᒥ, ᓴᐅᒥᖕᒥ, ᐊᐱᖅᓱᖅᐳᖅ ᓴᖅᑭᑎᑦᑎᔨᐅᔪᒥ ᐊᐃᐱᓕ ᐆᑦᑐᕙᖕᒥ CKCU-FM ᐱᓕᕆᕝᕕᖕᒥ ᑐᓴᖅᓴᐅᑲᐅᑎᒋᔪᒥ ᓈᓚᐅᑎᒃᑯᑦ ᑭᑦᓯᐱᒥ ᐱᕙᓪᓕᐊᔪᑦ, ᐃᓄᒃᑎᑐᑦ-ᐅᖃᐅᓯᕐᒥ ᑐᓴᒐᒃᓴᓕᐊᓂ ᐊᒻᒪ ᐃᓕᖅᑯᓯᒥ ᐱᓕᕆᐊᖑᓂᐅᔪᒥ, ᔫᓂ 2−ᒥ. (ᓂᕼᐋ ᐱᒧᓪ ᐊᔾᔨᖁᑎᖓ)
For the English version of this story, please see New Inuktitut radio program broadcasts live in Ottawa.
ᐃᑲᕐᕋᒥ ᓯᕗᓂᐊᓂ ᑐᓴᖅᓴᐅᑎᑕᐅᙱᓐᓂᖓᓂ, ᓴᖅᑭᑎᑦᑎᔨ ᐊᐃᐱᓕ ᐆᑦᑐᕙ ᑕᕐᕆᔭᓕᐊᒃᑯᑦ ᐅᖃᓗᖕᓂᖃᓚᐅᖅᐳᖅ ᐅᕙᒍᑦ ᑕᓚᕖᓴᒥ ᐃᖅᑲᓇᐃᔭᖅᑎᓂ, ᕿᒥᕐᕈᓪᓗᑎᒃ ᖃᖓ ᐱᓕᕆᔭᕆᐊᓕᖕᓂ ᐅᖃᕆᐊᓕᖕᓂ ᑭᑦᓯᐱᒥ ᐱᕙᓪᓕᐊᔪᒧᑦ, ᓄᑖᖑᔪᒥ ᑐᓴᖅᓴᐅᑲᐅᑎᒋᔪᒥ ᐃᓄᒃᑎᑐᑦ-ᐅᖃᐅᓯᕐᒥ ᑐᓴᒐᒃᓴᓕᐊᖑᔪᒥ ᐱᓕᕆᐊᖑᔪᒥ ᓈᓚᐅᑎᒃᑰᖅᑐᒥ CKCU-FM−ᑯᑦ ᐱᓕᕆᕝᕕᖓᓂ ᑳᕈᑎᓐ ᓯᓚᑦᑐᖅᓴᕐᕕᒡᔪᐊᖓᓂ.
20-ᓴᑲᓐᒥ ᑐᓴᖅᓴᐅᓂᐅᔪᒥ ᑭᖑᕙᕆᐊᖅᑐᒥ ᐋᑐᕚᒥ ᐊᒻᒪ ᐅᕙᒍᑦ ᑕᓚᕖᓴᒥ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ ᐱᔭᕆᐊᖃᖅᐳᖅ ᐊᐅᓚᑕᐅᓂᑦᑎᐊᖑᔪᒥ ᐊᑐᓂ ᐱᓕᕆᐊᖑᓂᐅᔪᒥ, ᐆᑦᑐᕙ ᐅᖃᓚᐅᖅᐳᖅ.
10 ᐅᓪᒡᓚᖓᓄᐊᓕᖅᑎᓪᓗᒍ ᐆᑦᑐᕙ ᐱᒋᐊᓚᐅᖅᐳᖅ ᑕᐅᓄᖓ ᓇᐃᓴᐃᕙᓪᓕᐊᓂᐅᔪᒥ.
“5 ᓴᑲᓐᓂ ᓈᓚᐅᑎᒧᑦ,” ᐅᖃᓚᐅᖅᐳᖅ.
ᑲᒪᔨᐅᔪᖅ ᕗᕌᓐᑯ ᐳᓴᒥ ᐋᖅᑭᒋᐊᖅᓯᓚᐅᖅᐳᖅ ᖃᓂᙳᕐᓇᐅᑎᖓᓂ ᐊᒻᒪ ᐱᒋᐊᖅᑎᑦᑎᓚᐅᖅᐳᖅ ᓄᓇᓕᖕᓄᑦ ᑐᓴᒐᒃᓴᓂ ᐊᒻᒪ ᖃᓄᐃᓐᓂᐅᔪᓂ ᐃᓄᒃᑎᑐᑦ ᔫᓂ 2−ᒥ.
ᑭᑦᓯᐱᒥ ᐱᕙᓪᓕᐊᔪᑦ ᑐᓴᖅᓴᐅᓲᖑᕗᖅ 10 ᐅᓪᓛᒥ 11 ᐅᓪᓛᒧᑦ.
ᑲᑐᔾᔨᖃᑎᒌᖕᓂᐅᕗᖅ ᓄᓇᓕᖕᓂ ᐅᖃᓪᓚᒡᕕᖓᓂ CKCU-FM−ᒥ ᐊᒻᒪ ᐃᓄᒃ ᓈᓚᐅᑎᒃᑰᖅᑎᑦᑎᔨ ᐅᕙᒍᑦ ᑕᓚᕖᓴᒥ, ᓴᖅᑭᑎᑕᐅᓂᖓᓂ ᐃᑲᔪᖅᓯᖅᑕᐅᓪᓗᓂ ᑐᓂᔭ.ᐅᔪᒥ ᐆᑦᑐᕙᐅᑉ ᓯᐊᒻᒪᖅᑎᑦᑎᓂᕐᒥ ᑲᒻᐸᓂᖓᓂ, O2va Studios−ᒥ.
ᐱᓇᓱᐊᕈᓯᕐᓂ-6-ᓂ ᓯᕗᓪᓕᖅᐹᒥᒃ ᑲᑎᙵᓂᐅᔪᒥ ᐱᒋᐊᓚᐅᖅᐳᖅ ᒪᐃ 19−ᒥ, ᑐᓂᓯᓪᓗᓂ ᐃᓄᒃᑎᑐᑦ-ᐅᖃᐅᓯᕐᒥ ᑐᓴᒐᒃᓴᓂ, ᐊᐱᖅᓱᕐᓂᐅᔪᓂ, ᐃᓕᖅᑯᓯᒧᑦ ᐱᓕᕆᐊᖑᓂᐅᔪᓂ ᐊᒻᒪ ᓂᔾᔮᑎᑦᑎᓂᐅᔪᒥ ᑐᓴᖅᓴᐅᑲᐅᑎᒋᔪᒥ ᐅᕙᒍᑦ ᑕᓚᕖᓴᒥ ᐅᕝᕙᓘᓐᓃᑦ ᐋᑐᕚᒥ 93.1 FM−ᒥ.
“ᑭᑦᓯᓯᐱ ᐊᓂᔅᓈᐱᑎᑐᑦ ᐊᑎᒋᔭᐅᕗᖅ ᐋᑐᕚᒥ ᑰᖓᓄᑦ,” ᐳᓴᒥ ᐅᖃᓚᐅᖅᐳᖅ ᓈᓚᒃᑕᐅᕙᒃᑐᒥ ᑕᐃᒎᓯᖓᓐᓂ, ᐃᓚᖃᖅᑐᒥ ᐃᓄᒃᑎᑐᑦ ᐱᙳᐊᕐᓂᐅᔪᒥ ᐅᖃᐅᓯᕐᒥ.
“ᐊᒻᒪ ᐱᕙᓪᓕᐊᔪᑦ ᑐᓴᒐᒃᓴᐅᕗᑦ [ᐃᓄᒃᑎᑐᑦ],”ᐅᖃᓚᐅᖅᐳᖅ.
ᓈᓚᐅᑎᒃᑰᖅᑐᖅ ᐱᕈᓚᐅᖅᐳᖅ ᐅᖃᓪᓚᒡᕕᖕᒥ, ᐱᓇᓱᐊᕈᓯᑕᒫᒥ ᐃᓄᒃᑎᑐᑦ-ᐅᖃᐅᓯᕐᒥ ᐱᓕᕆᐊᖑᔪᒥ CKCU-FM−ᒥ ᑲᒪᒋᔭᐅᖃᑕᐅᔪᒥ ᐳᓴᒥᒧᑦ.
ᓯᕗᓂᒃᑲᓐᓂᐊᓂ ᐊᕐᕌᒍᒥ, ᐅᕙᒍᑦ ᑕᓚᕖᓴᒥ ᐅᐸᒍᑎᓚᐅᖅᐳᖅ ᐅᖃᓪᓚᒡᕕᖕᒥ ᐊᖏᒡᓕᒋᐊᖅᑎᑦᑎᓂᕐᒥ ᐃᓄᐃᑦ-ᐅᖃᐅᓯᖓᓐᓂ ᑐᓴᒐᒃᓴᓕᐅᕐᓂᕐᒥ ᐊᖓᔪᖅᑳᖃᕐᕕᖓᓂ.
“ᐱᕕᒃᓴᖃᕐᓂᐅᕗᖅ ᐃᓄᖕᓄᑦ ᖁᙱᐊᖅᑐᓄᑦ ᐅᑭᐅᖅᑕᖅᑐᒥ ᑲᑎᖃᑎᖃᕐᓂᕐᒧᑦ ᐋᑐᕚᒧᑦ ᐅᖃᐅᓯᖃᕈᓐᓇᕐᓗᑎᒃ ᐅᓂᒃᑳᖅᑐᐊᖏᓐᓂ ᐊᖏᕐᕋᒧᑦ,” ᐳᓴᒥ ᐅᖃᓚᐅᖅᐳᖅ.
“ᑕᑯᒃᓴᐅᑎᑦᑎᒋᕗᖅ ᓴᙱᓂᐅᔪᒥ ᐃᓄᒃᑎᑐᒻᒥ ᐋᑐᕚᒥ, ᓄᓇᓕᐸᐅᔭᒦᒃᑲᓗᐊᖅᑎᓪᓗᑕ, ᓱᓕ ᓴᙱᓪᓗᓂ ᐅᖃᐅᓯᐅᔪᒥ ᐅᖃᓪᓚᒃᑕᐅᓲᖑᕗᖅ.”
ᐳᓴᒥ, ᐃᓅᓪᓗᓂ ᐃᖃᓗᖕᓂᕐᒥᐅᑕᐅᓪᓗᓂ ᐊᒻᒪ ᒫᓐᓇ ᐋᑐᕚᒥᐅᑕᐅᓕᖅᖢᓂ, ᑲᒪᒋᔭᖃᓲᖑᕗᖅ ᐱᓇᓱᐊᕈᓯᑕᒫᒥ ᓈᓚᐅᑎᒃᑰᕐᓂᕐᒥ ᐃᖅᑲᓇᐃᔮᒥᓂᒃ ᐱᓕᕇᓐᓇᖅᑎᓪᓗᒍ ᐃᓄᖕᓄᑦ ᓄᓇᓕᐅᔪᒥ ᑐᓴᐅᒪᑎᑦᑎᔨᐅᓪᓗᓂ ᑳᕈᑎᓐ ᓯᓚᑦᑐᖅᓴᕐᕕᒡᔪᐊᖑᔪᒥ ᐱᓕᕆᕝᕕᖓᓂ ᓄᓇᖃᖅᑳᖅᓯᒪᔪᓄᑦ ᐃᑲᔪᖅᓱᐃᓂᕐᒥ ᐊᒻᒪ ᓄᓇᓕᖕᓂ ᐃᓚᐅᑎᑦᑎᓂᕐᒥ.
“ᐊᓯᐊᓂ ᐱᔾᔪᑕᐅᔪᒥ ᐊᖏᓚᐅᖅᐳᖓ ᑕᐃᒪᐃᓕᐅᕐᓂᕐᒥ ᐃᒃᐱᒍᓱᒃᐳᖓ ᐃᓂᒃᓴᓕᐅᕐᓂᓐᓂ ᐃᓄᒃᑎᑐᑦ ᐱᓕᕆᐊᖑᓂᐅᔪᓂ ᓴᓇᓂᕐᒥ,” ᐅᖃᓚᐅᖅᐳᖅ ᐳᓴᒥ, ᓂᕆᐅᒃᑐᒥ ᐃᓄᖕᓂ ᐃᓕᓐᓂᐊᖅᑎᓂ ᑲᒪᒋᔭᖃᕈᓐᓇᕐᓂᐊᕐᓂᖏᓐᓂ ᐅᐸᒃᓯᒪᓂᐅᔪᓂ ᓂᐱᓕᐊᖑᓂᐅᔪᓂ ᓯᕗᓂᒃᓴᒥ.
ᒫᓐᓇᓕᓴᐅᔪᒥ ᑐᓴᖅᓴᐅᓂᐅᔪᓂ ᑕᑯᒃᓴᐅᑎᑦᑎᓯᒪᕗᖅ ᐊᐱᖅᓱᐃᓂᐅᔪᒥ ᓄᓇᕕᖕᒥ ᐃᙱᖅᑎᒥ-ᐱᓯᓕᐅᖅᑎ ᐲᑐᕆᔅ ᑎᐊ ᐊᒻᒪ ᑐᓴᒐᒃᓴᓂ ᒪᒃᑯᒃᑐᓂ ᐱᒋᐊᕈᑕᐅᔪᓂ, ᐃᓚᖃᖅᑐᒥ ᐅᖓᓯᒃᑐᒧᑦ ᐃᓴᒃᓯᒪᓂᐅᔪᒥ Ship2Shores ᐱᓕᕆᐊᖑᔪᒥ.
“ᑕᐅᑐᒃᑕᑐᐊᖑᓪᓚᐅᑕᐅᔪᒥ ᐆᒥᖓ ᐃᓄᓕᒫᓂ ᐅᖃᐅᔾᔪᖅᑕᐅᓂᖏᓐᓂ ᖃᓄᐃᓕᐅᕐᓂᖓᓂ ᓄᓇᓕᐸᐅᔭᒥ,” ᐆᑦᑐᕙ ᐅᖃᓚᐅᖅᐳᖅ. “ᐊᒥᓲᓗᐊᙱᑦᑐᓂ ᐃᓄᖕᓂ ᐊᓂᔪᓐᓇᓲᖑᕗᑦ ᐋᑐᕚᒥ, ᐱᓗᐊᖅᑐᒥ ᐸᓯᕆᐊᖃᕈᕕᑦ ᐊᔾᔨᒌᙱᑦᑐᓄᑦ ᐃᓂᐅᔪᓄᑦ ᐅᕝᕙᓘᓐᓃᑦ ᓄᓇᓯᐅᑎᖃᙱᒃᑯᕕᑦ.”
ᐅᓇᐅᒐᓗᐊᖅᐸᑦ ᑎᑭᑉᐸᓪᓕᐊᔪᒥ ᓄᓇᖃᖅᑳᖅᓯᒪᔪᓄᑦ ᓴᓇᐅᒐᓂ ᓂᐅᕕᐊᒃᓴᐅᔪᓂ ᑲᓇᑕᒥ ᓴᓇᐅᒐᓕᕆᕝᕕᖕᒥ ᐅᕝᕙᓘᓐᓃᑦ ᓄᓇᓯᐅᑎᕐᔪᐊᓂ ᑕᑯᒃᓴᐅᑎᑦᑎᓂᐅᔪᒥ, ᐳᓴᒥ ᐅᖃᓚᐅᖅᐳᖅ ᐱᓕᕆᐊᖑᔪᖅ ᓴᓇᓯᒪᕗᖅ ᑕᑯᒃᓴᐅᑎᑦᑎᓂᕐᒥ ᐱᔪᒪᓂᐅᔪᓂ ᐃᓄᖕᓂ ᐱᔨᑦᑎᖅᐸᒃᑕᖏᓐᓄᑦ.
“ᐸᐸᑦᑎᕗᒍᑦ ᑕᐃᒃᑯᓂᖓ ᐱᔪᒪᔭᐅᔪᓂ,” ᐅᖃᓚᐅᖅᐳᖅ.
ᓯᕗᓪᓕᖅᐹᖑᔪᒥ ᐱᓕᕆᐊᒃᓴᐅᔪᒥ ᐃᓱᓕᓐᓂᐊᖅᐳᖅ ᔫᓂ 23−ᒥ.
(0) Comments