ᓄᑖᖑᔪᒥ ᓄᓇᕕᖕᒥ ᐱᓕᕆᐊᖑᔪᖅ ᑐᕌᕋᓱᐊᖅᐳᖅ ᐃᑲᔪᕐᓂᕐᒥ ᐃᓄᖕᓂ ᐊᑐᐃᓐᓇᖃᕐᓂᖏᓐᓂ ᒐᕙᒪᒃᑯᑦ ᐱᔨᑦᑎᕋᕐᓂᖏᓐᓂ

ᖃᖓᒃᑲᓐᓂᕐᓂᐅᔪᒥ, ᐃᖅᑲᓇᐃᔭᖅᑏᑦ ᐊᑐᓂ ᓄᓇᓕᐅᔪᒥ ᐃᑲᔪᕐᓂᐊᖅᐳᑦ ᐱᓕᕆᐊᖑᔪᓂ ᓲᕐᓗ ᐃᑦᑐᖅᓯᐅᑎᓂ ᓂᖏᐅᖅᓯᐅᑎᓂ, ᐱᕚᓪᓕᕈᑎᓂ ᐊᒻᒪ ᐃᖅᑲᓇᐃᔮᖃᕐᓂᕐᒧᑦ ᐃᑲᔪᖅᓱᐃᓂᐅᔪᒥ

ᑲᑕᕆ ᓵᒻᐸᐃᓐ ᔪᐊᑕᐃᓐ, ᑕᓕᖅᐱᖕᒥ, ᑯᐸᐃᖕᒥ ᐃᖅᑲᓇᐃᔮᖃᕐᓂᕐᒥ ᒥᓂᔅᑕᖓ, ᐅᐸᒃᑕᐅᕗᖅ ᐄᐊᓐ ᓚᕗᕆᓐᓂᐅᕐᒧᑦ, ᒥᓂᔅᑕ ᑲᒪᒋᔭᖃᖅᑐᒥ ᐱᓕᕆᖃᑎᒋᔭᐅᓂᐅᔪᒥ ᐊᓪᓚᓄᑦ ᐊᒻᒪ ᐃᓄᖕᓄᑦ, ᐊᒻᒪ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᓐᓂ ᐃᒃᓯᕙᐅᑕᖓᓂ ᕼᐃᐅᓪᑕ ᓯᓅᐹᓪ ᕿᑎᖅᑰᒥ ᐅᖃᐅᓯᒃᓴᓕᐊᖑᔪᒥ. (ᓴᑐᕆᒃ ᒐᓛᓐᑦ ᐊᔾᔨᓕᐅᖅᑕᖓ)

By ᓴᑐᕆᒃ ᒐᓛᓐᑦᒧᑦ - ᓄᓇᓕᖕᓂ ᑐᓴᒐᒃᓴᓕᐅᕐᓂᕐᒧᑦ ᐱᒋᐊᕈᑕᐅᔪᒥ ᑐᓴᒐᒃᓴᓕᐅᖅᑎ

For the English version of this story, please see New Nunavik program aims to help people access government services.

ᓴᖅᑭᑎᑦᑎᓂᐅᔪᒥ ᐱᔨᑦᑎᕋᕐᓂᖅ ᓄᓇᕕᖕᒥ, ᓄᑖᖑᔪᒥ ᐱᓕᕆᐊᖑᔪᒥ ᐱᔪᓐᓴᖅᑎᑦᑎᓂᐊᖅᑐᒥ ᓄᓇᕕᖕᒥᐅᓂ ᐊᑐᐃᓐᓇᖃᕐᓂᕐᒥ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᒐᕙᓴᒃᑯᓐᓂ ᐱᔨᑦᑎᕋᕐᓂᐅᔪᓂ ᓇᖕᒥᓂᖅ ᓄᓇᓕᖏᓐᓂ ᐃᓄᒃᑎᑐᑦ, ᖃᓪᓗᓈᑎᑐᑦ ᐊᒻᒪ ᐅᐃᕖᑎᑐᑦ, ᐅᖃᐅᓯᐅᓚᐅᖅᐳᖅ ᐅᒃᑐᐱᕆ 17−ᒥ.

ᑲᑐᔾᔭᐅᔪᒥ ᐱᓕᕆᐊᖑᓂᐅᔪᒥ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᓐᓂ ᐊᒻᒪ ᑯᐸᐃᖕᒥ ᒐᕙᒪᖓᓐᓂ, ᐱᓕᕆᐊᖑᔪᖅ ᐱᒋᐊᕐᓂᐊᖅᐳᖅ ᐱᖓᓱᓂ ᓄᓇᓕᐅᔪᓂ ᐊᒻᒪ ᑭᖑᓂᐊᒍᑦ ᐊᖏᒡᓕᒋᐊᖅᑕᐅᓂᐊᖅᐳᖅ ᑕᒪᒃᑭᓄᑦ 14−ᖑᔪᓂ ᓄᓇᕕᖕᒥ ᓄᓇᓕᖏᓐᓄᑦ.

ᑲᓇᑕᒥ ᐊᕕᒃᑐᖅᓯᒪᔪᒥ ᒐᕙᒪᖓ ᑐᓂᓯᓚᐅᖅᐳᑦ $13 ᒥᓕᐊᓐᓂ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᓐᓄᑦ ᐊᕐᕌᒍᓄᑦ ᑕᓪᓕᒪᓄᑦ ᓴᖅᑭᑎᑦᑎᓂᐅᔪᒥ ᐱᔨᑦᑎᕋᕐᓂᖅ ᓄᓇᕕᖕᒥ, ᐃᖅᑲᓇᐃᔮᖃᖅᑎᑦᑎᓂᕐᒥ ᒥᓂᔅᑕᖓ ᑲᑕᕆ ᓵᒻᐸᐃᓐ ᔪᐊᑕᐃᓐ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᓐᓂ ᑎᑎᕋᕐᕕᓪᓗᐊᑕᖓᓂ ᑰᔾᔪᐊᕐᒥ.

“ᐱᐅᓯᒋᐊᖅᑎᑦᑎᓂᐊᖅᐳᖅ ᐊᑐᐃᓐᓇᖃᕐᓂᖓᓂ ᒐᕙᒪᒃᑯᓐᓄᑦ ᐱᔨᑦᑎᕋᕐᓂᐅᔪᓂ ᐊᕕᒃᑐᖅᓯᒪᓂᑦᑎᓐᓂ ᐅᕘᓇ ᓴᖅᑭᑎᑕᐅᓂᖓᓂ ᖃᔅᓯᒐᓚᖕᓂ−ᐱᔨᑦᑎᕋᕐᓂᐅᔪᒥ ᐅᐸᒡᕕᒃᓴᐅᔪᓂ ᑕᒪᒃᑭᓂ 14−ᓂ ᐅᑭᐅᖅᑕᖅᑐᒥ ᓄᓇᓕᐅᔪᓄᑦ ᓄᓇᕕᖕᒥ,” ᐅᖃᓚᐅᖅᐳᖅ.

“ᐅᓇ ᐊᒥᓱᐊᓗᖕᓂ ᐃᓄᖕᓂ ᐃᓅᓯᖏᓐᓂ ᐊᔪᕐᓇᙱᑎᑦᑎᒃᑲᓐᓂᕐᓂᐊᖅᐳᖅ, ᐊᑐᐃᓐᓇᖃᖅᑎᑦᑎᔪᓐᓇᕐᓂᐊᖅᐳᒍᑦ ᓇᖕᒥᓂᖅᓱᖅᑐᒥ ᐃᑲᔪᖅᓱᐃᓂᐅᔪᒥ,” ᔪᐊᑕᐃᓐ ᐃᓚᒋᐊᖅᓯᓚᐅᖅᐳᖅ.

ᐱᔨᑦᑎᕋᕐᓂᐅᔪᑦ ᐃᑲᔪᖅᓯᖅᑕᐅᔪᓂ ᐆᒥᖓ ᓄᑖᖑᔪᒥ ᐱᒋᐊᕈᑕᐅᔪᒥ ᐅᕙᙶᖅᐳᑦ ᐱᓕᕆᐊᖑᔪᓂ ᑐᒃᓯᕋᐅᑕᐅᔪᓂ ᐃᖅᑲᓇᐃᔮᒥᓂᒃ ᓄᖅᑲᖅᐸᓪᓕᐊᓂᐅᔪᒥ ᐃᑦᑐᖅᓯᐅᑎᓂ ᓂᖏᐅᖅᓯᐃᑎᓂ, ᐊᓯᔾᔨᕐᓂᐅᔪᓄᑦ ᓱᕈᓯᖅᓯᐅᑎᓂ ᐱᕚᓪᓕᕈᑎᓂ, ᐃᓅᓵᖅᑐᓄᑦ, ᑲᑎᑎᑕᐅᔪᓄᑦ ᐅᕝᕙᓘᓐᓃᑦ ᑐᖁᔪᓄᑦ ᓇᓗᓇᐃᒃᑯᑕᖏᓐᓂ ᐅᕝᕙᓘᓐᓃᑦ ᐃᖅᑲᓇᐃᔭᖅᓯᐅᕐᓂᕐᒥ ᐃᑲᔪᖅᓱᐃᓂᐅᔪᒥ.

“ᐅᒃᐱᕆᔭᖃᖅᐳᒍᑦ ᐃᓄᖕᓂ ᐅᐸᒃᑕᐅᔪᓐᓇᕐᓂᖏᓐᓂ ᑭᐅᓂᕐᒥ ᐱᔭᕆᐊᖃᕐᓂᐅᔪᓂ ᐃᓄᖕᓂ ᐅᕙᓂ,” ᔪᐊᑕᐃᓐ ᐅᖃᓚᐅᖅᐳᖅ.

ᓄᓇᓕᖕᓂ ᐃᖅᑲᓇᐃᔮᖃᖅᑎᑦᑎᔨᐅᔪᓂ ᐃᓕᓯᒫᓂᒃᑐᓂ ᓄᓇᓕᖕᓂ ᑲᒪᒋᔭᖃᕐᓂᐊᖅᐳᑦ ᐅᐸᒃᑕᐅᕕᒃᓴᓂ. ᑭᓯᐊᓂ ᐊᑯᓂᐅᒐᓚᖕᓂᐊᖅᐳᖅ ᑭᓱᓕᒫᑦ ᐋᖅᑭᑦᑎᐊᖅᓯᒪᓕᕐᓂᖏᓐᓂ, ᐅᖃᓚᐅᖅᐳᖅ ᓖᑎᐊ ᐅᐊᑦ, ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᓐᓂ ᒪᑭᒪᔾᔪᑕᐅᔪᓂ ᐃᖅᑲᓇᐃᔮᖃᖅᑎᑦᑎᓂᕐᒧᑦ ᑐᑭᒧᐊᒃᑎᑦᑎᔨᖓ ᑐᕌᖅᑎᑦᑎᔪᒥ ᐱᓕᕆᐊᒃᓴᐅᔪᒥ.

“ᕿᑎᖅᐸᓯᐊᓂ ᐃᓂᖃᖅᐳᒍᑦ ᑰᔾᔪᐊᕐᒥ, ᐃᓄᒃᔪᐊᖅ ᐊᒻᒪ ᓱᓪᓗᐃᑦᓂ, ᐊᒻᒪ ᑕᐃᑲᙵᑦ ᐱᒋᐊᕐᓂᐊᖅᐳᒍᑦ,” ᐅᖃᓚᐅᖅᐳᖅ. ᑭᖑᓂᐊᒍᑦ, ᑲᑎᕕᒃ ᐊᕕᒃᑐᖅᓯᒪᓂᐅᔪᒥ ᒐᕙᒪᖓᑦ “ᐊᖏᒡᓕᒋᐊᖅᑎᑦᑎᓂᐊᖅᐳᑦ ᑕᒪᒃᑭᓄᑦ 14−ᓄᑦ ᓄᓇᓕᖕᓄᑦ.”

ᐱᓕᒻᒪᒃᓴᐃᓂᖅ ᐃᖅᑲᓇᐃᔮᖃᖅᑎᑦᑎᔨᐅᔪᓄᑦ ᐱᒋᐊᕐᓂᐊᖅᐳᖅ 2025 ᐱᒋᐊᕐᓂᐸᓗᐊᓂ.

“ᐱᓕᒻᒪᒃᓴᓂᕐᔪᐊᖑᓂᐊᖅᐳᖅ ᓇᓗᓇᐃᖅᓯᓂᕐᒥ ᐊᑐᕐᓂᑦᑎᓐᓂ ᐱᓕᕆᓂᐅᔪᓂ ᐊᒻᒪ ᐱᓯᒪᓂᑦᑎᓐᓂ ᑕᒪᒃᑭᓂ ᑐᓴᒐᒃᓴᓂ,” ᐅᐊᑦ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᐱᓕᕆᓂᖃᕐᓂᐊᕐᓂᖓᓂ ᖃᔅᓯᒐᓚᖕᓂ ᐊᕐᕌᒍᓂ ᐸᕐᓇᐃᓂᕐᒥ ᐱᔨᑦᑎᕋᕐᓂᖅ ᓄᓇᕕᖕᒥ ᐊᑐᐃᓐᓇᖃᓕᕈᓐᓇᕐᓂᖓᓂ ᐱᔨᑦᑎᕋᕐᓂᓕᒫᓂ ᑕᒪᒃᑭᓄᑦ ᓄᓇᓕᖕᓄᑦ.

ᐱᓕᕆᕝᕕᖓ ᐱᓕᕆᖃᑎᖃᕆᕗᖅ ᓱᓂᓯᓂᕐᒥ ᐱᔨᑦᑎᕋᕐᓂᐅᔪᒥ ᐅᕘᓇ ᐃᑭᐊᖅᑭᕕᖓᒍᑦ, ᐊᒻᒪ ᐊᑐᕐᓂᐊᖅᐳᖅ ᐃᓅᖃᑎᒌᖑᔪᓂ ᓯᐊᒻᒥᒪᖅᑎᑦᑎᓂᕐᒥ ᐊᒻᒪ ᓈᓚᐅᑎᒃᑯᑦ ᑐᓂᓯᓂᕐᒥ ᑐᓴᒐᒃᓴᓂ ᓄᓇᓕᖕᓄᑦ.

“ᑕᒪᒃᑭᑦ ᐃᖅᑲᓇᐃᔭᖅᑎᐅᔪᑦ ᐃᓅᕗᑦ,” ᐅᐊᑦ ᐅᖃᓚᐅᖅᐳᖅ. “ᑕᑕᑎᕆᐊᓕᑦ ᐊᔾᔨᒋᙱᑕᖓᓂ ᐅᖃᐅᓯᕐᒥᐅᒐᖢᐊᕈᓂ, ᖃᓪᓗᓈᑎᑐᑦ ᐅᕝᕙᓘᓐᓃᑦ ᐅᐃᕖᑎᑐᑦ, [ᓄᓇᕕᒻᒥᐅᑦ] ᐱᔨᑦᑎᕋᕐᓂᖃᕈᓐᓇᕐᓂᐊᖅᐳᑦ ᐃᓄᒃᑎᑐᑦ.”

“ᐊᐱᕆᙱᖔᕐᓗᓂ ᐃᓄᖕᓂ ᓱᖏᐅᔾᔨᓂᕐᒥ ᐃᒻᒥᓂᒃ ᐱᔨᑦᑎᕋᕐᓂᐅᔪᒧᑦ, ᐊᐃᑉᐸᖔᖓᓃᓐᓂᐊᖅᐳᖅ,” ᐅᖃᓚᐅᖅᐳᖅ ᐄᐊᓐ ᓚᕗᕆᓂᐅᕐ, ᑯᐸᐃᖕᒥ ᒥᓂᔅᑕᖓ ᑲᒪᒋᔭᖃᖅᑐᒥ ᐱᓕᕆᖃᑎᖃᕐᓂᐅᔪᒥ ᐊᓪᓚᓄᑦ ᐊᒻᒪ ᐃᓄᖕᓄᑦ.

“ᐅᖃᓪᓚᕐᓂᖃᕐᔪᐊᓲᖑᕗᒍᑦ ᐃᓕᖅᑯᓯᒧᑦ ᐊᑦᑕᓇᔾᔭᐃᖅᓯᓯᒪᓂᕐᒥ ᐃᓗᐊᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᔨᑦᑎᕋᕐᓂᐅᔪᒥ, ᑭᓯᐊᓂ ᐅᓚ ᑐᕌᒐᕆᔭᐅᕗᖅ ᐱᔭᕆᐊᖃᕐᓂᑦᑎᓐᓂ ᐊᑐᓂ ᐃᓱᒪᒋᔭᐅᓂᐅᔪᒥ ᒐᕙᒪᑦᑎᓐᓂ.”

Share This Story

(0) Comments