ᑲᖏᖅᖠᓂᖅᒥᐊᑯᓂᕈᓗ ᑲᒪᒋᔭᐅᔭᕆᐊᓕᖕᓄᑦ ᐃᒡᓗᒋᔭᐅᔪᒃᓴᖅ ᒪᑐᐃᕐᑐᖅ ᑕᒪᑐᒪᓂ ᑕᖅᑭᕐᒥ

For the English version of this story, please see Rankin Inlet long-term care facility opens to elders this month.

ᓄᓇᕗᑦ ᐃᓐᓇᑐᖃᖏᑦ ᓄᒃᑎᖅᐸᓪᓕᐊᓕᕐᓂᐊᖅᑐᑦ ᓄᑖᒧ ᑲᖏᖅᖠᓂᖅᒥ ᐊᑯᓂᕈᓗ ᑲᒪᒋᔭᖃᕐᕕᒃᓴᒥ.

“ᐱᐊᓂᓕᒑᓕᖅᑕᕗᑦ ᐅᓇ ᐱᒻᒪᕆᐊᓗᒃ ᐊᑐᓕᕐᓂᐊᖅᑐ ᐊᑯᓂᕈᓗ ᑲᒪᒋᔭᖃᕐᕕᒃᓴ ᐊᖏᕐᕋᖏᓐᓄᑦ ᖃᓂᓐᓂᕐᓴᐅᓗᓂ,” ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᐅᖃᓚᐅᕐᑐᖅ ᒪᐃ 6-ᒥ ᑐᓴᒐᒃᓴᑎᒍᑦ.

“ᓂᕆᐅᒃᑐᒍᑦ ᐃᓐᓇᑐᖃᕐᓂᒃ ᓄᓇᕗᒧᑦ ᐅᑎᕐᓂᐊᖅᑐᓂᒃ ᐱᓇᓱᐊᕈᓯᕐᓂ ᐊᒡᒋᖅᑐᓂᒃ.”

ᐱᒋᐊᕐᓗᓂ ᒪᐃ 26-ᒥ, ᐱᓇᓱᐊᕈᓯᑕᒫᓐ, ᐱᖓᓱᓂᒃ ᑎᓴᒪᓄᑦ ᐃᓐᓇᑐᖃᕐᓂ ᒫᓐᓇ ᐊᒻᐸᓯ ᕗᐃᐊᔅᑦᒦ ᐋᑐᕚᒦᑦᑐᑦ, ᑎᑭᑉᐸᓪᓕᐊᓕᕐᓂᐊᖅᑐᑦ ᑲᖏᖅᖠᓂᖅᒧᑦ ᑐᐊᕕᕐᓇᖅᑐᓕᕆᓂᒃᑯᑦ ᖃᖓᑕᓲᒃᑯᑦ ᐊᐅᓚᑕᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᑐᓴᒐᒃᓴᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐅᖃᕐᓯᒪᓚᐅᕐᑐᖅ.

ᐅᓇ 24-ᓂ ᐃᒡᓕᖃᕐᑐᖅ ᑲᖏᖅᖠᓂᖅᒥ ᐱᐊᓂᒃᑕᐅᓚᐅᕐᓯᒪᔪᖅ ᔭᓄᐊᕆᒥ, 22-ᓂ ᐃᒡᓕᖃᖅᖢᓂ ᐊᒻᒪ ᒪᕐᕉᖕᓂ ᑲᒪᒋᔭᐅᑲᐃᓐᓇᕐᓂᐊᖅᑐᓄᑦ ᐃᒡᓕᖃᖅᖢᓂ.

ᑕᐃᔅᓱᒪᓂᓕ ᒪᐃᓐ ᐅᖃᓚᐅᕐᓯᒪᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ 70 ᓄᓇᕗᒥᐅᑕᑦ ᐃᓐᓇᑐᖃᐃᑦ ᐊᑯᓂᕈᓗᒃ ᑲᒪᒋᔭᐅᕝᕕᖕᒦᓐᓂᖏᓐᓂ ᓄᓇᕗᑦ ᓯᓚᑖᓃᑦᑐᓄᑦ.

ᐅᓇ ᑲᖏᖅᖠᓂᖅᒥ ᐃᓐᓇᑐᖃᕐᓄᑦ ᐊᖏᕐᕋᕆᔭᐅᔪᒃᓴᖅ ᒪᕐᕈᐃᓂᒃ ᐊᔾᔨᒌᒃᑐᓂ ᐃᓂᓕᐅᕐᓯᒪᓂᖃᖅᑐᖅ 12-ᓂ ᐊᑕᐅᓯᖅᓯᐅᑎᓂ ᐃᒡᓗᕈᓯᖃᖅᖢᓂ ᖁᐃᔭᖅᑐᕐᕕᖃᖅᖢᑎᒃ. ᐃᓄᒃᑯᕕᖃᖅᑐᑦ, ᓄᔭᓕᕆᔭᐅᕝᕕᒃ, ᐃᓄᒃᓯᐅᑎᓂ ᓂᕿᓕᐅᕐᕕᒃ, ᒪᒥᓴᖅᐸᓪᓕᐊᕝᕕᒃ ᐃᖃᐃᓕᓴᕐᕕᒃ, ᐊᓂᐊᕝᕕᖃᑦᑎᐊᖅᑐᖅ ᐃᒡᓗᕈᓯᖅ ᓴᓇᙳᐊᕐᕕᒃᓴᖅ ᐊᒻᒪ ᓴᓇᕈᓘᔭᕐᕕᒃᓴᖅ ᐊᒻᒪ ᑐᒃᓯᐊᕐᕕᖃᖅᖢᓂ.

ᐋᖅᑭᒃᑕᐅᓯᒪᔪᖅ 40-ᓂ 50-ᓄ ᐃᖅᑲᓇᐃᔭᖅᑎᖃᕐᓂᐊᕐᓗᑎᒃ.

ᓴᒃᑰᑉ ᐱᕈᐃᔭᖏᓐᓂ ᐊᐅᓚᑦᑎᔩᑦ ᐊᒻᒪ ᐊᒻᐸᓯ ᕗᐃᐊᔅᑦ ᐃᓐᓇᑐᖃᕐᓄᖅ ᐊᖏᕐᕋᖃᕐᕕᒃ ᑲᒪᒋᔭᖃᕐᓂᐊᖅᑑᒃ ᑖᔅᓱᒥᖓ ᐅᕘᓇ ᐊᕐᕌᒍ ᖁᓕᓄᑦ ᑳᓐᑐᕌᑎᒍᑦ ᓄᓇᕗᒥᑦ ᒐᕙᒪᒃᑯᓐᓂᓪᓗ ᐊᑭᖃᖅᖢᓂ $15 ᒥᓕᐊᓐ ᐊᕐᕌᒍᒧᑦ.

ᐅᓇ $59.4 ᒥᓕᐊᓐᑐᕐᑐᖅ ᐱᓕᕆᐊᒃᓴᖅ ᐃᓚᒋᔭᐅᔪᖅ ᒪᕐᕈᒃᑲᓐᓃᖕᓄᑦ ᑲᒪᒋᔭᖃᕐᕕᒃᓵᖕᓂ ᒐᕙᒪᒃᑯᑦ ᓴᓇᔪᒪᔭᖏᓐᓂᒃ ᓄᓇᕗᒥᑦ ᑎᑭᓪᓗᒍ 2030 ᐃᓚᒋᔭᐅᓪᓗᓂ ᐃᓐᓇᕈᖅᐸᓪᓕᐊᓂᖅ ᐃᓱᒪᒋᔭᐅᑦᑎᐊᕐᓂᒃᑯᑦ.

ᐱᓕᕆᕙᓪᓕᐊᖕᒪᑕ 24-ᓂ ᐊᒻᒪ 48-ᓂ ᐃᒡᓕᖃᕐᓂᐊᖅᑐᓂᒃ ᐃᑲᓗᒃᑑᑦᑎᐊᕐᒥ ᐊᒻᒪ ᐃᖃᓗᖕᓂ, ᐃᓂᒋᔭᐅᓂᐊᖅᑐᓪᓗ ᐱᔭᐅᓯᒫᓂᓕᖅᖢᑎᒃ.

ᐃᖃᓗᒃᑑᑦᑎᐊᕐᒥ ᐃᓐᓇᑐᖃᕐᓂ ᑲᒪᒋᔭᖃᕐᕕᒃᓴᖅ ᐱᐊᓂᒃᑕᐅᓂᐊᕋᓱᒋᔭᐅᔪᖅ 2028 ᐅᑭᐊᒃᓵᖓᓂ ᐊᒻᒪᓗ ᐃᖃᓗᖕᓂ ᓴᓇᔭᐅᔪᖅ 2029 ᐃᓱᓕᓕᖅᐸᑦ ᐅᕝᕙᓘᓐᓃᑦ 2030 ᐱᒋᐊᓕᓵᖅᑎᓪᓗᒍ, ᐅᖃᖅᓯᒪᙱᒃᑲᓗᐊᖅᑐᑦ ᓱᓕ ᖃᑯᒍ ᒪᑐᐃᓛᕐᓂᖏᓐᓂᒃ. ᑖᒃᑯᓄᖓ ᐊᑭᒋᔭᐅᓇᔭᖅᑐ ᐊᑐᐃᓐᓇᐅᓚᐅᙱᒻᒪ ᒫᔅᓯᐅᑎᓪᓗᒍ.

ᑲᖏᖅᖠᓂᖅᒥ ᐃᓐᓇᑐᖃᒃᑯᕕᒃᓴᖅ ᐱᐊᓂᒃᑕᐅᓇᓱᖕᓂᐊᓚᐅᕐᓯᒪᔪᖅ 2023-ᒥ, ᐊᒻᒪᓗ ᐱᓕᕆᐊᖑᓕᕐᓂᑰᓪᓗᓂ ᒐᕙᒪᒃᑯᑦ ᖃᐅᔨᓴᓚᐅᖅᑎᓪᓗᒋᑦ “ᑲᒪᒋᔭᐅᖏᓐᓇᕆᐊᓕᖕᓂ ᐱᓕᕆᔾᔪᓯ ᓄᓇᕗᒥᑦ ᓈᒻᒪᙱᓗᐊᕐᓂᖓᓂ ᐊᒻᒪ ᓄᓇᕗᒻᒥᐅᓄᑦ ᐱᔭᐅᔭᕆᐊᓕᖕᓂ ᐱᑕᖃᙱᓗᐊᖅᖢᓂ,” ᑕᐃᒪᐃᓕᖓᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐸᕐᓇᐅᓯᐅᕐᓂᕐᒧᑦ ᑎᑎᖃᖏᑦ.

ᐱᐊᓂᒃᕕᒃᓴᖓ ᐅᖓᕙᕆᐊᖅᑕᐅᓚᐅᕐᓯᒪᔪᖅ 2024-ᒧ ᓲᖃᐃᒻᒪ ᐊᑭᓕᐅᑎᒃᓴᖅ ᐱᓕᕆᐊᒥ ᐱᓕᕆᐊᖃᖅᑐᒧᑦ ᐊᒻᒪ ᐱᓕᕆᖃᑕᐅᔪᒧᑦ ᐅᖓᕙᕆᐊᖅᑕᐅᓯᒪᓚᐅᕐᒪᑕ ᑭᓯᐊᓂ 2025-ᖑᕐᐸᑦ.