ᓄᑖ ᖁᐱᕐᕆᓯᒪᓂᕐᒧᑦ (ᓯᕕᓕᔅ) ᖃᐅᔨᓴᖅᑕᐅᑲᐅᕐᑐᕐᓇᖅᑐᒥ ᐱᒋᐊᖅᑕᐅᓂᐊᖅᑐᖅ ᓄᓇᕕᒃᒥ

For the English version of this story, please see New rapid test for syphilis to be rolled out.

ᖃᖓᑦᑎᐊᓵᖅ ᑐᓴᒐᒃᓴᓕᐊᖑᓚᐅᕐᑐᖅ ᐃᑲᔫᑎᒃᓴᓕᕆᓂᖅ ᐃᑲᔪᕈᑎᐅᓂᐊᖅᑐᖅ ᐸᕐᓇᒃᑕᐅᓯᒪᔪᒥ ᖃᐅᔨᓴᖅᑕᐅᑲᐅᕐᑐᕐᓇᖅᑐᒥ ᖁᐱᕐᕆᓯᒪᓂᕐᒧᑦ ᓄᓇᕕᒃᒥ.

ᑕᒪᒃᑯᐊ ᖃᐅᔨᓴᕈᑎᒃᓴᑦ ᐊᑐᐃᓐᓇᐅᓕᖅᐸᑕ ᓄᓇᕕᒃᒥ ᐋᓐᓂᐊᕕᖕᓂ ᑕᐃᒪᓕ ᖁᐱᕐᕆᓯᒪᓂᕐᒥ ᖃᐅᔨᓴᖅᑕᐅᔪᑦ ᐅᓄᕈᓐᓃᖅᐹᓪᓕᕈᑎᐅᓇᔭᖅᑐᖅ 35 ᐳᓴᓐᑎᒥ ᐊᕐᕌᒍᓂ ᑕᓪᓕᒪᓂᒃ ᖁᓕᓄᑦ, ᐅᖃᕐᑐᖅ ᓘᒃᑖᖅ ᓯᑐᕆᒃ ᔮᓐᓲᓂ, ᐃᓕᓴᐃᔨᐅᖃᑕᐅᔪᖅ ᒪᒋᐅᓪ ᓯᓚᑦᑐᖅᓴᕐᕕᐊᓗᒃᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐊᒻᒪᓗ ᐱᓕᕆᐊᒧᑦ ᐊᖓᔪᖅᑳᖑᓪᓗᓂ.

ᐅᖃᓚᐅᕐᑐᖅ ᖃᐅᔨᓇᓱᖕᓂ ᑐᙵᕕᖃᕐᓂᕋᖅᖢᓂᐅᒃ ᐱᓕᕆᖃᑎᒋᔭᖏᑦᑕ ᓇᐃᓴᐅᓯᕆᓂᒃᑯᑦ ᐋᖅᑭᒃᓯᒪᔭᖏᓐᓂᒃ. ᐅᖃᓚᐅᙱᑦᑐᖅ ᖃᔅᓯᐅᓇᔭᕆᐊᒃᓴᖏᓐᓂᒃ ᖁᐱᕐᕆᓯᒪᔪᑦ ᖃᐅᔨᓴᖅᑕᐅᓯᒪᙱᑉᐸᑕ ᖃᐅᔨᓴᖅᑕᐅᑲᐅᕐᑐᕐᓇᖅᑐᒥ.

ᔮᓐᓲᓂ ᐊᒻᒪ ᐱᓕᕆᖃᑎᒋᔭᖏᑦ — ᐅᑯᓇᙶᖅᑐᑦ ᓘᒃᑖᖃᖅᖢᑎ ᐊᑕᐅᓯᐅᙱᑦᑐᒥ, ᓄᓇᕕᒃᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᒪᔨᓂ ᐊᒻᒪ ᐊᑯᓕᕕᒃᒥ ᒪᐃᔭ ᐃᓚᐃ ᐊᖏᔪ — ᑲᑎᖢᑎᒃ $399,000-ᓂ ᑐᓂᔭᐅᓚᐅᕐᒪᑕ ᖁᐱᕐᕆᓯᒪᓂᕐᒧᑦ ᖃᐅᔨᓴᖅᑕᐅᑲᐅᕐᑐᕐᓇᖅᑐᒥ ᓄᓇᕕᒃᒥ ᐊᒻᒪᓗ ᖃᐅᔨᓴᕈᑎᐅᓂᐊᖅᑐᒥ ᑖᔅᓱᒥᖓ ᐋᓐᓂᐊᖑᕙᒃᑐᒥ.

ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖅᑎᑦ, ᑖᒃᑯᐊ ᑮᓇᐅᔭᖃᖅᑎᑦᑎᔪᑦ, ᒐᕙᒪᑐᖃᒃᑯᓐᓂ ᐱᓕᕆᔨᐅᔪᑦ ᐃᑲᔫᑎᒃᓴᓕᕆᓂᕐᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᕈᑎᒃᓴᓄᑦ ᑲᓇᑕᒥ.

ᓯᕕᓕᔅ ᐊᐃᑦᑑᑎᐅᔭᑦᑐᖅ ᑯᔭᑲᑕᖕᓂᒃᑯᑦ ᐊᒻᒪᓗ ᓇᔾᔨᐊᖑᔪᓄᑦ ᐋᓐᓂᐊᖅᑖᕆᔭᐅᔪᓐᓇᖅᖢᑎᒃ.

ᔮᓐᓲᓂ ᐅᖃᓚᐅᕐᑐᖅ, “ᐊᕐᕌᒎᓕᕐᑐᖅ ᖁᓕᓂ ᓄᓇᕗᒥᑦ ᐊᒻᒪ ᓄᓇᕕᒃᒥ, ᐅᓄᕐᓯᕚᓪᓕᖅᓯᒪᖕᒪᑕ ᐋᓐᓂᐊᖃᕐᑐᑦ ᓯᕕᓕᔅᒥ, ᖃᓪᓗᓈᓃᑦᑐᑎᑐᑦ.”

ᑭᓯᐊᓂᓕ, ᐅᖃᕐᑐᖅ, ᐊᑕᐅᓯᖅ ᖃᓄᐃᓕᐅᕈᑎ ᐅᓄᕐᓯᕙᓪᓕᐊᕈᑎᐅᒪᓐ ᐅᑭᐅᕐᑕᖅᑐᕐᒥ.

ᔮᓐᓲᓂ ᐅᖃᖢᓂ ᐊᐅᖏᖅᑕᐅᓚᐅᖅᖢᑎᒃ ᐅᑭᐅᕐᑕᖅᑐᕐᒥ ᓄᓇᓕᖕᓂ ᐊᒻᒪ ᑖᓐᓇ ᖃᐅᔨᓴᖅᕕᒃᒧᑦ ᖃᓪᓗᓈᓄᑦ ᐊᐅᓪᓚᖅᑎᑕᐅᓪᓗᓂ ᖃᐅᔨᓴᖅᑕᐅᓂᐊᕐᒪ ᑕᐃᒪᓐᓇᓗ ᐃᓛᓐᓂ ᒪᕐᕉᖕᓂ ᐱᓇᓱᐊᕈᓰᖕᓂ ᖃᐅᔨᓴᖅᑕᐅᓇᓱᒃᑐ ᖃᐅᔨᑎᑕᐅᓕᑕᐃᓐᓇᖅᐸᒃᖢᓂ.

“ᖃᐅᔨᓴᖃᑦᑕᕐᓂᕐᒥ ᑭᒃᑯᓕᒫᓂ ᐅᔾᔨᕈᓱᓕᓚᐅᕐᑐᒍᑦ ᐊᐃᑦᑐᐃᒍᑎᐅᔭᑦᑐᑦ ᐋᓐᓂᐊᕆᔭᐅᓕᖃᑦᑕᕐᓂᖏᓐᓂᒃ ᖃᐅᔨᓴᖅᑕᐅᔾᔪᑎᑦ ᖃᐅᔨᔭᐅᓇᓵᕐᓂᖏᓐᓄᑦ,” ᐅᖃᕐᑐᖅ.

ᐅᖃᖅᖢᓂ 2016-ᒥ, ᒪᕐᕈᓗᐊᑖᖕᓂ ᓯᕕᓕᔅᒥ ᐋᓐᓂᐊᖃᖅᑐᖃᓚᐅᕐᓯᒪᔪᖅ ᓄᓇᕕᒃᒥ, ᑭᓯᐊᓂᓕ ᐊᕐᕌᒍᑦ ᑎᓴᒪᑦ ᐊᑐᓕᖅᑎᓪᓗᒋ ᒫᓂ 100-ᖏᓐᓂ ᐋᓐᓂᐊᖃᖅᐸᒃᑐᑦ ᐊᕐᕌᒍᑕᒫᓐ.

ᓄᓇᕗᒥᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ “ᐅᔾᔨᕐᓇᓗᐊᖅᑐᒥ ᐅᓄᕐᓯᕚᓪᓕᕐᓯᒪᔪᓂᒃ” ᐋᓐᓂᐊᖃᖅᑐᓂᒃ ᓯᕕᓕᔅᒥ ᖁᒡᓗᖅᑑᖅᒥ.

ᖃᐅᔨᓴᕈᑎᐅᓚᐅᖅᑐᑎᒍᑦ ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪᓗ ᔪᓂᕘᓯᑎ ᐋᐴᑕᒥ, 655 ᓯᕕᓕᔅᒥ ᐋᓐᓂᐊᖃᖅᑐᑦ ᐅᖃᐅᓯᐅᓯᒪᓚᐅᕐᑐᑦ ᓄᓇᕗᒥᑦ 2012-ᓗ 2020-ᓗ ᐊᑯᓐᓂᖓᓂ.

ᔮᓐᓲᓂ ᐅᖃᓚᐅᕐᑐᖅ ᖃᐅᔨᓴᑲᐅᕐᑐᕈᑎ ᐊᑐᖅᑕᐅᓯᒪᓕᕐᓂᖓᓂ ᐳᕕᕐᓂᑐᖅᒥ ᐊᕐᕌᒍᒐᓴᐅᓕᕐᑐᓂ ᐊᒻᒪᓗ ᓱᓕᙱᑦᑐᓂ ᓴᕿᑎᑦᑎᕙᙱᖢᓂ, ᐊᑭᖃᙱᓪᓗᓂᓗ ᐊᑐᐃᓐᓇᐅᓗᓂ ᐊᒻᒪᓗ ᐊᒡᒐᒃᑯᑦ ᑲᐱᔭᐅᕌᕐᔪᑐᐃᓐᓇᕐᓇᖅᖢᓂ.

15 ᒥᓂᑦᔅ ᐃᓗᐊᓂ ᑖᓐᓇ ᖃᐅᔨᓴᖅᑕᐅᔪᖅ ᖃᐅᔨᑎᑕᐅᑲᐅᑎᒋᔪᓐᓇᖅᑐᖅ.

“ᐅᓇ ᐊᑑᑎᖃᒻᒪᕆᒃᑐᖅ ᖃᓄᐃᑦᑕᐃᓕᔾᔪᑎᓕᕆᓂᕐᒧᑦ,” ᐅᖃᕐᑐᖅ.

ᖃᐅᔨᓯᒪᓕᕋᒥᒃ ᐅᓇ ᖃᐅᔨᓴᕈᑎ ᐅᑭᐅᕐᑕᖅᑐᕐᒥ ᐊᔪᙱᓐᓂᖓᓂᒃ, ᔮᓐᓲᓂ ᐅᖃᓚᐅᕐᑐᖅ ᐱᓕᕆᖃᑎᖏᓪᓗ ᒪᓂᒻᒪᐃᓂᐊᓕᕐᓂᖏᓐᓂᒃ ᖃᐅᔨᓴᕈᑎᒃᓴᓂ 14-ᓄ ᓄᓇᓕᖕᓄᑦ ᐊᒻᒪᓗ ᐊᑐᖅᑕᐅᕙᓕᕐᓗᓂ ᖃᐅᔨᓴᕈᑎᐅᓗᓂ ᐊᕐᕌᒍᓂ ᐊᒡᒋᖅᑐᓂᒃ.

“ᐅᓇ ᐱᓕᕆᓂᖅ ᐃᑲᔪᕈᑎᐅᔪᓐᓇᑦᑎᐊᖅᑐᖅ ᐃᓄᖕᓂ ᐊᒻᒪ ᓄᓇᓕᖕᓂ,” ᐅᖃᕐᑐᖅ.

ᒫᓐᓇᓕ, ᔮᓐᓲᓂ ᐅᖃᕐᑐᖅ, ᐱᓕᕆᖃᑎᒋᔭᖏᑦ ᑖᒃᑯᓂᖓ ᖃᐅᔨᓴᕈᑎᓂ ᐊᑐᐃᓐᓇᐅᑎᑦᑎᓇᓱᖕᓂᐊᖅᑐᑦ ᑕᒪᒃᑯᓄᖓᓘᓐᓃᑦ ᐋᓐᓂᐊᕐᕕᓕᐊᓗᐊᖅᐸᙱᑦᑐᓄᑦ.

“ᐃᓱᒪᒋᒐᑦᑎᒍᓪᓕ ᑐᓗᖅᑕᕈᑎᑕᖃᕈᓐᓃᕐᓗᓂ ᐃᓄᐃᑦ ᐃᖕᒥᖕᓂ ᑲᒪᒋᔪᓐᓇᕐᓂᐊᕐᒪᑕ,” ᐅᖃᕐᑐᖅ. “ᖃᐅᔨᓴᖅᑕᐅᕙᖕᓂᖅ ᐋᓐᓂᐊᖃᕆᐊᒃᓴᒥ ᐊᔾᔨᒋᑐᐃᓐᓇᕐᒪᒍ ᐃᖃᐃᓕᓴᖃᑦᑕᕐᓂᐅᑉ ᐅᕝᕙᓘᓐᓃᑦ ᓂᕆᑦᑎᐊᖃᑦᑕᕆᐊᖃᕐᓂᕐᒥ.”