ᐅᓂᒃᑳᑦ ᐱᒡᒍᓴᐅᑎᓂᕐᓴᐅᖁᔨᕗᑦ ᐅᑭᐅᕐᑕᖅᑐᕐᒧᑦ ᖃᖓᑕᓲᒃᑰᕈᑎᓂ

For English version, see New report urges more competition to improve air travel in the North

ᓄᑖᑦ ᐅᓂᒃᑳᑦ ᐱᒡᒍᓴᐅᑎᓕᕆᔨᒃᑯᓐᓂ ᑲᓇᑕᒥ ᐱᖁᔨᓯᒪᔪᑦ ᒐᕙᒪᑐᖃᒃᑯᓐᓂ ᐱᒡᒍᓴᐅᑎᑦᑎᒃᑲᓐᓂᕐᓗᑎ ᑲᓇᑕᐅᑉ ᖃᖓᑕᓲᓂ ᐱᓕᕆᐊᖃᖅᑐᓂ — ᐅᖃᐅᓯᖃᓗᐊᖅᖢᓂ ᑕᐃᒪᐃᑦᑕᕆᐊᖃᕐᓂᖏᓐᓂᒃ ᐅᑭᐅᕐᑕᖅᑐᕐᒥ ᐊᒻᒪ ᐃᓄᑭᑦᑐᓄᑦ ᓄᓇᓕᖕᓄᑦ.

ᑕᐃᒎᓯᖃᖅᖢᓂ ᖃᖓᑦᑕᑐᐃᓐᓇᕆᐊᖃᓕᕐᑐᖅ: ᐱᒋᐊᖅᑎᑦᑎᒃᑲᓐᓂᕐᓂᖅ ᖃᖓᑕᓲᒃᑯᑦ ᐱᒡᒍᓴᐅᑎᓂᕐᒥᒃ, ᐅᓂᒃᑳᑦ ᓴᖅᑭᑕᐅᓂᑯᑦ ᔫᓂ 19-ᒥ ᐋᖅᑭᒃᓯᓯᒪᔪᖅ ᖁᓕᓂᒃ (10) ᐃᓱᒪᒃᓴᖅᓯᐅᕈᑎᒃᓴᓂ ᐱᐅᓯᕚᓕᖅᑎᑦᑎᓂᕐᒧᑦ ᖃᖓᑕᓲᓕᕆᓂᕐᒥᒃ ᐊᒻᒪ ᐊᑭᑭᓐᓂᕐᓴᓂ ᖃᖓᑦᑕᐅᑎᓕᕆᓂᕐᒧᑦ.

ᐱᒡᒍᓴᐅᑎᓕᕆᔨᒃᑯᑦ ᐃᖃᓗᖕᓂ ᐅᐸᒃᓯᒪᓪᓗᑎᒃ ᖃᐅᔨᓴᓚᐅᕐᓯᒪᖕᒪᑕ ᐊᒻᒪᓗ 120 ᐅᖓᑖᓂ ᐊᐱᕐᓱᑲᑕᖅᖢᑎᒃ ᐃᓄᖕᓂᑦ ᓄᓇᖃᖅᑐᓂᒃ, ᐱᓕᕆᐊᕆᔭᐅᔪᓂᒃ ᐊᒻᒪᓗ ᖃᖓᑕᓲᓄᑦ ᑭᒡᒐᖅᑐᐃᔨᓂᒃ, ᓄᓇᕗᒥᑦ, ᓄᓇᑦᓯᐊᕐᒥᑦ, ᔫᑳᓐᒥᑦ ᐊᒻᒪ ᑯᐸᐃᒃ ᐅᐊᖕᓇᖓᓂᑦ.

ᐊᒃᓱᓪᓘᓐᓃᑦ ᐊᑕᐅᓯᐅᒐᓗᐊᒥ ᐱᒡᒍᓴᐅᑎᒋᔭᐅᓂᐊᕐᑐᒥ ᐊᖅᑯᑎᒋᔭᐅᕙᒃᑐᒃᑯᑦ ᐊᑭᖏᓐᓂ ᒥᒃᖠᕚᓪᓕᕈᑎᐅᓇᔭᕐᑐᖅ ᒪᐅᖓ 9 ᐳᓴᓐᑎᒧᑦ, ᐅᓂᒃᑳᑦ ᐅᖃᕐᓯᒪᔪᑦ.

ᖃᖓᑕᓲᒃᑯᑦ ᐃᖏᕐᕋᓂᖅ ᐅᑭᐅᕐᑕᖅᑐᕐᒥ “ᐱᒻᒪᕆᐅᒻᒪᑦ ᐃᓅᓯᕐᒧᑦ” ᖃᖓᑕᓂᕐᒧᑐᐊᖑᙱᑦᑐᓄᑦ ᑭᓯᐊᓂᓕ ᒪᑯᓄᖓᑦᑕᐅᖅ ᓂᕿᓄᑦ ᑎᑭᑉᐸᓪᓕᐊᕙᒃᑐᓄᑦ, ᐃᓅᓕᓴᐅᑎᓄᑦ, ᐱᓕᕆᔾᔪᑎᓄᑦ ᐊᒻᒪ ᑎᑎᖅᑲᒃᑯᕕᒃᑰᖅᑐᓄᑦ.

ᐊᐅᓪᓚᕐᕕᒋᒍᒃ ᓄᓇᕗᑦ (Travel Nunavut), ᐱᓕᕆᖃᑎᖃᕐᑐᖅ ᒐᕙᒪᒃᑯᓐᓂᑦ, ᐃᓄᐃᑦ ᑲᑐᔾᔨᖃᑎᒌᓂᒃ ᐊᒻᒪ ᐃᒻᒥᒃᑰᕐᑐᓂᒃ ᐳᓚᕋᖅᑐᓕᕆᔨᓂᒃ, ᐊᐱᕐᓱᖅᑕᐅᓚᐅᕐᒪᑕ ᖃᐅᔨᓴᖁᔭᐅᓪᓗᑎᒃ. ᐅᓂᒃᑳᓕᐅᓕᓚᐅᕐᑐᑦ ᓄᓇᕗᒥᑦ 25 ᓄᓇᓕᖏᓐᓂᒃ, “ᐊᑐᕈᒪᔪᐃᑦ ᐃᓱᒪᕐᓱᓗᐊᙱᓐᓂᖏᓐᓂᒃ” ᐊᑕᐅᓯᕐᒥ ᖃᖓᑕᓲᖃᖅᑎᓪᓗᒋᑦ.

ᓲᕐᓗ ᐃᒪᓐᓇ, ᐅᓄᕐᑐᐃᑦ ᐊᖅᑯᑎᐅᕙᒃᑐᑦ ᐊᑐᐃᓐᓇᐅᕙᒃᑐᑦ ᐊᑕᐅᓰᖅᖢᒍ ᐱᓇᓱᐊᕈᓯ ᐊᒻᒪᓗ ᐅᑎᒧᑦ ᐊᑭᓕᐅᑎᒃᓴᓂᒃ ᐱᓕᕆᕝᕕᐅᕈᓘᔭᖅᐸᒃᑐᓂᒃ, ᐋᑐᕚᓪᓗ ᐃᖃᓗᐃᓪᓗ ᐊᑯᓐᓂᖓᒍᑦ ᐊᑭᖃᖅᑐᖅ ᒫᙵᑦ $1,000 ᒪᐅᖓ $2,000-ᒧᑦ ᐅᖓᑖᓄᓪᓘᓐᓃᑦ. ᐃᖏᕐᕋᕝᕕᐅᓗᐊᖃᑦᑕᙱᑦᑐᒃᑯᓪᓗ ᐊᑭᖃᖅᑎᑕᐅᔪᑦ ᑎᑭᓯᒪᔪᓂ ᐃᓛᓐᓂ $5,000-ᒧᑦ, ᐊᖅᑯᓵᕆᐊᖃᖅᐸᒃᖢᑎ ᐊᑕᐅᓯᕐᒥ ᐅᖓᑖᓂᓪᓘᓐᓃᑦ ᐊᒻᒪᓗ ᐃᓛᓐᓂ ᐅᓪᓘᖕᓂ ᒪᕐᕉᖕᓂ ᐃᖏᕐᕋᓐᓇᖅᖢᓂ ᐅᐸᒐᓱᒃᑕᒧᑦ.

“ᐱᒡᒍᓴᐅᑎᓕᕆᔨᒃᑯᑦ ᑲᒪᒋᔭᖃᕐᒪᑕ ᓇᓕᒧᒌᒃᑎᑦᑎᓇᓱᖕᓂᕐᒥ ‘ᐱᓕᕆᕝᕕᐅᔪᓂᒃ,’” ᐊᐅᓪᓚᕐᕕᒋᒍᒃ ᓄᓇᕗᑦ ᐅᖃᕐᓯᒪᔪᑦ ᐅᓂᒃᑳᓂ.

ᖃᖓᑕᓲᓕᕆᔨᒃᑯ ᐅᖃᕐᓯᒪᖕᒥᔪᑦ ᐱᔨᑦᑎᕋᐅᑎᑦ ᑲᓇᑕᐅᑉ ᐅᐊᖕᓇᖓᓂ ᐊᔾᔨᖃᖅᑎᑕᐅᔭᕆᐊᖃᕐᓂᖏᓐᓂᒃ ᑲᓇᑕᐅᑉ ᓂᒋᐊᓂ ᐃᖏᕐᕋᕝᕕᐅᕙᒃᑐᓂᒃ, ᐅᓄᕐᓂᕐᓴᓂᒡᓗ ᐃᑲᔫᑎᒃᓴᖃᕐᓗᑎᒃ ᐊᐅᓚᑦᑎᓂᕐᒧᑦ ᐊᒻᒪᓗ ᐱᖁᑎᓄᑦ ᑮᓇᐅᔭᖅᑐᔪᓄᑦ ᐱᐅᓯᕚᓪᓕᕈᑎᒃᓴᓂᒃ.

ᐅᓂᒃᑳᑦ ᐃᓱᒪᓕᐅᕆᓯᒪᔪᖅ ᐋᖅᑭᒃᓱᐃᓗᑎᒃ ᑲᓇᑕᒥ ᐱᓕᕆᖃᑎᒌᖕᓂᐊᖅᑐᓂᒃ ᐱᓕᕆᐊᖃᕐᓗᓯ ᐱᐅᓯᕚᓪᓕᖅᑎᑦᑎᓂᕐᒥᒃ ᐅᑭᐅᕐᑕᖅᑐᕐᒥ ᖃᖓᑕᓲᒃᑯᑦ ᐃᖏᕐᕋᖃᑦᑕᕐᓂᕐᒥᒃ.

ᐃᓱᒪᓕᐅᕆᓯᒪᒋᓪᓗᑎᒃ ᐱᖁᔭᑎᒍᑦ ᐊᓯᐊᒎᕈᑎᐅᔪᓐᓇᕋᔭᖅᑐᓂᒃ, ᐃᓚᒋᔭᐅᓪᓗᓂ ᐊᑕᐅᓯᕐᒥ ᒪᓕᒐᖃᕐᓗᑎᒃ ᑭᒃᑯᓕᒫᓄᑦ ᓲᕐᓗ ᖃᖓᑕᓲᖅᑏ ᖃᖓᑕᑲᑕᒍᓐᓇᕐᓂᖏᓐᓄᑦ ᐊᒻᒪᓗ ᖃᖓᑕᓲᒥ ᐱᓕᕆᔨᐅᔪᑦ ᐃᑲᕐᕋᖏᓐᓂᒃ ᑕᒪᒃᑯᐊᓗ ᓈᒻᒪᙱᑐᐃᓐᓇᕆᐊᖃᕐᒪᑦ ᖃᖓᑕᖃᑦᑕᕐᓂᕐᒧᑦ ᐅᑭᐅᕐᑕᖅᑐᕐᒥ.

ᐅᓂᒃᑳᑦ ᒐᕙᒪᑐᖃᒃᑯᓐᓂ ᐱᖁᑎᓄᑦ ᑮᓇᐅᔭᓂ ᐃᑲᔪᖁᔨᓯᒪᔪᑦ ᒪᑯᓄᖓ ᖃᖓᑕᓲᓕᕆᓂᕐᒧᑦ ᐱᓕᕆᔨᒻᒪᕆᖕᓄᑦ, ᐃᒪᓐᓇᐅᙱᑦᑐᕐᓕ ᐊᑕᐅᓯᑐᐊᕐᒨᖓᔪᓂᒃ ᖃᖓᑕᓲᓕᕆᔨᓄᑦ.

ᓇᓗᓇᐃᕐᓯᓯᒪᓪᓗᑎ 2018-ᓂ ᒐᕙᒪᑐᖃᒃᑯᑦ ᐃᑲᔫᑎᖏᑦ ᐊᑐᕐᑕᐅᓚᐅᕐᓯᒪᖕᒪᑕ ᐱᖁᑎᒃᑯᕕᒃᓴᓕᕈᒪᓪᓗᑎᒃ ᐃᖃᓗᐃᑦ ᖃᖓᑕᓲᒃᑯᕕᐊᓄᑦ ᕘᔅᑦ ᐃᐅᑯᓐᓄᑦ, ᑭᓯᐊᓂᓕ ᑖᓐᓇ ᐊᓯᖏᓐᓄᑦ ᐊᑐᖁᔭᐅᓚᐅᕐᓯᒪᙱᑦᑐᖅ — ᑕᐃᒪᓐᓇᓗ ᐱᒡᒍᓴᐅᑎᓕᕆᓂᕐᒥ ᓄᖃᖓᑎᑦᑎᔾᔪᑎᐅᓪᓗᓂ.

ᐊᓯᖏᑦᑕᐅᖅ ᐃᓱᒪᓕᐊᕆᔭᐅᔪᑦ ᐃᓚᖃᓚᐅᕐᑐᑦ ᒐᕙᒪᒃᑯᑦ ᑮᓇᐅᔭᖏᓐᓂᒃ ᐱᒡᒍᓴᐅᑎᓂᕐᒥᒃ ᓴᖅᑭᑎᑦᑎᓂᕐᓴᐅᔾᔪᑎᐅᓗᑎᒃ, ᓲᕐᓗ ᒪᑯᓄᖓ ᐅᑭᐅᕐᑕᖅᑐᕐᒥ ᒥᑦᑕᕐᕕᖕᓂ ᓄᑖᙳᕆᐊᖅᑎᑦᑎᑲᑕᖕᓂᕐᒧᑦ ᐅᓄᕐᓂᕐᓴᓂ ᖃᖓᑕᓲᓂ ᒥᕝᕕᐅᔪᓐᓇᕐᓂᕐᓴᐅᓗᑎᒃ, ᐋᖅᑭᒃᓱᐃᓗᑎᒃ “ᑭᒃᑯᑐᐃᓐᓇᕐᓄᑦ ᐊᑐᐃᓐᓇᕐᓂ ᐱᓕᕆᕝᕕᖕᓂ” ᖃᖓᑕᓲᒃᑯᕕᖕᓂ ᐊᒻᒪ ᐊᑐᐃᓐᓇᐅᓕᕐᓗᑎ ᖃᓄᐃᑦᑐᑐᐃᓐᓇᕐᓄᑦ ᖃᖓᑕᓲᓄᑦ, ᐊᒻᒪᓗ ᐱᒋᐊᖅᑎᑦᑎᓗᑎᒃ ᒐᕙᒪᒃᑯᑦ ᑳᑐᕌᖑᓇᔭᕐᑐᓂᒃ ᐅᓄᕐᓂᕐᓴᓂᒃ ᐱᒡᒍᓴᐅᑎᑦᑎᒃᑲᓐᓂᕋᓱᖕᓂᕐᒧᑦ.

ᐅᑭᐅᕐᑕᖅᑐᕐᒥᐅᑕᑦ ᐊᐱᕐᓱᖅᑕᐅᔪᑦ ᐅᖃᐅᓯᖃᒪᐅᕐᒥᔪᑦ “ᐊᑭᖏᑦ ᖁᕝᕙᖅᐹᓪᓕᕐᒪᑕ ᐊᒻᒪᓗ ᐱᔨᑦᑎᕋᐅᑎᖏᑦ ᐊᑦᑎᖕᓂᕐᓴᐅᓕᖅᖢᑎᒃ” ᑕᐃᒪᙵᓂ 2019-ᒥ ᑲᑎᑎᑕᐅᓚᕐᓯᒪᓪᓗᑎᒃ ᕘᔅᑎ ᐃᐅ ᐊᒻᒪ ᑲᓃᑎᐊᓐ ᓄᐊᑦ ᐊᒻᒪᓗ ᐱᖁᔭᖅᑎᒍᑦ ᐊᑐᖁᔭᐅᔪᑦ ᑲᑎᑕᐅᓂᖏᓐᓄᑦ ᐊᑐᕈᓐᓃᖅᑎᑕᐅᓯᒪᓪᓗᑎᒃ 2023-ᒥ.

ᐅᓇ ᐊᑕᐅᓯᙳᖅᑎᑕᐅᓂᖅ ᐊᖏᕐᑕᐅᓚᐅᕐᓯᒪᔪᖅ ᐱᒡᒍᓴᐅᑎᓕᕆᔨᒃᑯᑦ ᐃᓱᒫᓘᑎᖃᕋᓗᐊᕐᑎᓪᓗᒋ ᐱᒡᒍᓴᐅᑎᓂᕐᒥᒃ, ᑕᐃᒪᓐᓇᓗ ᐱᒡᒍᓴᐅᑎᓕᕆᔨᒃᑯᑦ ᐃᓱᒪᓕᐅᕆᓚᐅᕐᓯᒪᓪᓗᑎᒃ ᒐᕙᒪᑐᖃᒃᑯᑦ ᐃᖏᕐᕋᔾᔪᑎᓕᕆᓂᕐᒧᑦ ᒥᓂᔅᑕᐅᑉ ᐱᔪᓐᓇᐅᑎᖓ ᐊᑐᕐᓂᖅᓴᐅᔪᓐᓇᕐᓗᓂ ᕿᒥᕐᕈᐊᕐᓂᒃᑯᑦ “ᐊᑕᐅᓯᙳᑎᑕᐅᓂᕐᒥᒃ ᐊᒻᒪ ᐱᒡᒍᓴᐅᓂᒃᑯᑦ ᐱᓕᕆᖃᑎᒌᖕᓂᕐᒥᒃ” ᐅᕘᓇ ᒐᕙᒪᑐᖃᒃᑯᑦ ᐱᒡᒍᓴᐅᑎᓂᕐᒥᒃ ᒪᓕᒐᖏᓐᓂᒃ.

“ᐅᓇ ᐃᑲᔫᑎᐅᓇᔭᕐᑐᖅ ᒪᑯᓂᖓ ᐱᒡᒍᓴᐅᑎᓂᕐᒥ ᓈᒻᒪᒃᓴᙱᓐᓂᕐᒧᑦ ᐊᖏᖃᑎᒌᒍᑎᓂ ᐊᖏᕈᑎᐅᖃᑦᑕᒋᓐᓂᖏᓐᓂᒃ,” ᐅᓂᒃᑳᑦ ᐅᖃᕐᓯᒪᔪᑦ.

ᐅᓂᒃᑳᑦ ᐅᖃᕐᓯᒪᒃᑲᓐᓂᕐᓯᒪᔪᑦ ᐃᓚᖏᑦ ᐅᑭᕐᑕᖅᑐᕐᒥ ᖃᓄᐃᓕᐅᖅᐸᓪᓕᐊᓂᕐᒧ ᐊᑕᐅᓯᑐᐊᕐᒥ ᖃᖓᑕᓲᖃᕈᑎ ᖃᓄᐃᓐᓇᔭᙱᓐᓂᖓᓂ — ᑕᐃᒪᐃᒃᑲᓗᐊᕐᐸᑦ ᐱᒡᒍᓴᐅᑎᓂᖅᑕᖃᐃᓐᓇᕆᐊᓕᒃ.

ᑐᓗᖅᑕᕈᑎᓂ ᐱᑕᖃᕈᓐᓃᖅᑎᑦᑎᕚᓪᓕᕐᓗᑎᒃ, ᐅᓂᒃᑳᑦ ᐅᖃᕐᓯᒪᔪᑦ, ᐊᒃᓱᕈᕈᑎᐅᓂᕐᓴᐅᕙᒃᑐᖅ ᒫᓐᓇ ᖃᖓᑕᓲᓕᕆᔨᒋᔭᐅᔪᓂᒃ, ᑕᒪᓐᓇ ᐊᖅᑯᑎᒋᔭᐅᔪᖅ ᐊᑕᐅᓯᕐᒨᕆᐊᖃᕋᓗᐊᖅᑎᓪᓗᒍ.

ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ ᐅᑯᐊ ᐱᒡᒍᓴᐅᑎᓕᕆᔨᒃᑯᑦ ᑲᓇᑕᒥ ᓇᓗᓇᐃᔭᐃᓯᒪᔪᑦ ᒪᓕᒐᖅᑎᒍᑦ ᒪᓕᒃᑎᑦᑎᔨᐅᓂᖏᓐᓂᒃ ᓴᐳᔾᔨᓯᒪᓂᕐᒥᒃ ᐊᒻᒪ ᐱᑕᖃᖅᑎᑦᑎᒃᑲᓐᓂᕋᓱᖕᓂᕐᒥᒃ ᐱᒡᒍᓴᐅᑎᓕᕆᓂᕐᒥ ᐊᑐᖃᑦᑕᖅᑐᓄᑦ ᐊᒻᒪ ᐱᓕᕆᐊᓄᑦ.