ᓄᑖᖅ ᓴᐳᑎ ll ᐃᖃᓗᒐᓲᑎ ᐅᒥᐊᕐᔪᐊᒃᓴᖓ ᑎᑭᓐᓂᐊᕐᑐᖅ ᑲᓇᑕᒧᑦ ᒪᐃᖑᓕᕐᐸᑦ

For English version, see New Saputi II fishing vessel to arrive in Canada in May

ᓄᑖᖅ $100 ᒥᓕᐊᓐ ᑖᓚᑐᕐᑐᖅ ᐃᖃᓗᒐᓲᑎ ᐅᒥᐊᕐᔪᐊᖅ ᓂᕆᐅᒋᔭᐅᔪᖅ ᓄᓇᕗᒧᙵᐅᓂᐊᕐᓂᖓᓂ ᓈᒻᒪᓈᕐᓗᓂ ᐆᒧᖓ 2026-ᒥ ᐃᖃᓗᒐᓱᖕᓇᕐᒧᑦ.

“ᓴᐳᑎ ll ᐱᐅᓯᕚᓪᓕᖅᑎᑦᑎᓂᐊᕐᑐᖅ ᐱᔭᐅᕙᓪᓕᐊᕙᒃᑐᓂᒃ ᐊᒻᒪ ᐊᑐᒻᒪᕆᒡᓗᓂ ᑕᕆᐅᕐᒥ,” ᕼᐃᐅᕆ ᕕᓕᐅᕋᑎ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨ ᕿᑭᖅᑖᓗᒃᒥ ᐃᖃᓗᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂ, ᐅᖃᓚᐅᕐᑐᖅ ᐅᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᑲᑎᒪᔨᓄᑦ ᐅᒃᑑᐱᕆ 7-ᒥ ᐅᖃᐅᓯᖃᖅᖢᓂ ᓄᑖᖅ ᐅᒥᐊᕐᔪᐊᖅ ᖃᓄᐃᓕᖓᓂᐊᕐᓂᖓᓂ.

ᕿᑭᖅᑖᓗᒃᒥ ᐃᖃᓗᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓇᖕᒥᓂᕆᔭᐅᒻᒪᑦ ᕿᑭᖅᑖᓗᒃ ᑲᑐᔾᔨᖃᑎᒌᓄᑦ, ᑖᓐᓇᓗ ᐱᓕᕆᐊᖃᕐᓂᕐᒥ ᐱᓕᕆᔨᐅᓪᓗᑎᒃ ᐅᑯᓄᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ, ᑲᑐᔾᔨᖃᑎᒌᒃᑐᑦ ᑲᒪᒋᔭᖃᖅᖢᑎᒃ ᓴᖅᑭᑎᑦᑎᕙᓪᓕᐊᓂᕐᒥᒃ ᕿᑭᖅᑕᓂ ᐃᓄᐃᑦ ᐱᔪᓐᓇᐅᑎᖏᓐᓂᒃ.

ᓴᐳᑎ ᑐᑭᖃᕐᑐᖅ “ᐃᖃᓗᖕᓄᑦ ᓴᐳᑎᒥ” ᐃᓄᒃᑎᑐᑦ. ᑐᑭᖃᕆᓪᓗᓂ ᐊᑎᒋᔭᐅᓂᖓᓂ 76 ᒦᑕᓂ ᑕᑭᓂᓕᖕᒥ ᐅᒥᐊᕐᔪᐊᕐᒥ ᒫᓐᓇ ᐊᑐᖅᑕᐅᔪᒥᒃ ᕿᑭᖅᑖᓗᒃᒥ ᐃᖃᓗᓕᕆᔨᒃᑯᓐᓄᑦ. ᓴᓇᔭᐅᓂᑰᓪᓗᓂ 1987-ᒥ, ᐃᓇᖏᖅᑕᐅᓕᕐᓂᐊᖅᑕᖅ ᓄᑖᒧᑦ, ᐊᖏᓂᕐᓴᒧᑦ ᓴᐳᑎ ll-ᒧᑦ.

ᓴᐳᑎ ᐅᓯᔪᓐᓇᕐᓂᐊᖅᑐᖅ ᑎᑭᑐᓂᒃ 1,100 ᑕᓐᔅ ᑭᖑᒃᐸᖕᓂ — ᒪᕐᕈᐃᖅᖢᓂ ᐅᓄᕐᓂᕐᓴᓂ ᐃᓚᖏᕐᓂᐊᖅᑕᖓᓂ — ᐅᕝᕙᓘᓐᓃᑦ 750 ᑕᓐᔅᓂ ᑲᕕᓯᓕᒃᓂ.

ᓄᑖᖅ ᐅᒥᐊᕐᔪᐊᕐᒥ ᐃᖃᓗᓕᕆᕝᕕᒃ ᖁᐊᖅᑎᑦᑎᖃᑦᑕᕋᔭᕐᑐᖅ 50 ᑕᓐᔅᓂ ᑲᕕᓯᓕᒃᓂ ᐅᕝᕙᓘᓐᓃᖑᑦ 100 ᑕᓐᔅᓂ ᑭᖑᒃᐸᖕᓂ ᖃᐅᑕᒫᓐ, ᒪᕐᕈᐃᓪᓗᐊᖅᖢᓂ ᒫᓐᓇ ᐅᒥᐊᕐᔪᐊᖅᒥ ᐃᖃᓗᓕᕆᕝᕕᒃᒥ ᐊᖏᓂᕐᓴᐅᓪᓗᓂ. ᑕᐃᒪᓕ ᓴᐳᑎ ll ᐊᑯᓂᐅᓂᕐᓴᖅ ᐃᖃᓗᒐᓱᒍᑎᐅᖃᑦᑕᕋᔭᖅᖢᓂ ᑐᓚᓚᐅᙱᓐᓂᖏᓐᓂᒃ, ᕕᓕᐅᕋᑎ ᐅᖃᓚᐅᕐᑐᖅ ᐊᐱᕐᓱᖅᑕᐅᓪᓗᓂ.

“ᐱᐅᔪᐊᓗᒃ ᐱᓕᕆᕝᕕᒃ ᐊᒻᒪ ᐊᐅᓚᐅᑎᖏᑦ ᑕᕆᐅᕐᒧᑦ ᐅᓗᕆᐊᓇᙱᖢᑎᒃ, ᓂᕆᕝᕕᖃᐅᕐᖢᓂ ᐊᒻᒪ ᑕᕐᕆᔭᕐᕕᖃᖅᖢᓂ,” ᕕᓕᐅᕋᑎ ᐅᖃᕐᑐᖅ ᐊᐱᕐᓱᖅᑕᐅᓪᓗᓂ. “ᑕᐃᒪᓕ ᓂᕆᐅᒋᒻᒪᕆᒃᑕᕗᑦ.”

ᖃᓄᐃᓕᖓᓂᐊᕐᓂᖓ ᐋᖅᑭᒃᑕᐅᓯᒪᓪᓗᓂ ᓄᐊᕗᐃᒥ ᓴᓇᕝᕕᐅᕙᒃᑐᒥ ᓯᑭᑉᑎᓂᔅᒃ (Skipsteknisk), ᐃᑲᔪᖅᑕᐅᓪᓗᑎᒃ ᐅᑯᓇᙵᑦ ᐋᔅᕗᐊᑐ ᑕᕆᐅᕐᒥᐅᑕᕐᓄᑦ ᖃᐅᔨᒋᐊᕐᕕᒃᒥ (Allswater Marine Consultants) ᓅᕙ ᓯᑰᓯᐊᒥ, ᐅᓇ ᓴᐳᑎ ll ᒫᓐᓇ ᓴᓇᔭᐅᔪᖅ ᐅᕙᓂ ᕗᕆᐅ ᐅᒥᐊᕐᔪᐊᖃᕐᕕᒃᒥ ᕖᒍ, ᓯᐸᐃᓐᒥ. ᐅᒥᐊᕐᔪᐊᖅ ᑕᑭᓂᓕᒃ 79 ᒦᑕᓂ, 17 ᒦᑕᓂ ᓴᓂᒧᑦ, ᐊᒻᒪᓗ ᐃᓄᖃᕈᓐᓇᖅᖢᓂ 34-ᓂ ᐃᖅᑲᓇᐃᔭᖅᑎᓂᒃ.

ᐊᑭᖃᓪᓗᐊᖅᖢᓂ ᒫᓂ $100 ᒥᓕᐊᓐ ᑖᓚᓂ, ᕿᑭᖅᑖᓗᒃᒥ ᐃᖃᓗᓕᕆᔨᒃᑯᑦ ᑐᓴᖅᑎᑦᑎᓚᐅᕐᑐᖅ ᑖᓐᓇ ᑐᓴᖅᑕᐅᑎᔾᔪᑎᒋᓚᐅᕐᓯᒪᓪᓗᓂᔾᔾᔪᑦ ᐊᕐᕌᒎᒃ ᒪᕐᕉᒃ ᓯᕗᓂᐊᓂ. ᒫᓐᓇᓕ ᐅᒥᐊᕐᔪᐊᖅ ᑲᓇᑕᒥ ᒪᐃ ᕿᑎᕐᐸᓯᐊᓂ ᑎᑭᓐᓂᐊᕋᓱᒋᔭᐅᔪᖅ ᐊᕋᒍ ᐊᒻᒪᓗ ᐃᖃᓗᖕᓄᐊᕐᓗᓂ ᐋᒐᓯᒥ, ᕕᓕᐅᕋᑎ ᐅᖃᕐᑐᖅ, ᐅᖃᒃᑲᓐᓂᖅᖢᓂ ᓯᐸᐃᓐᒧᙵᐅᓛᕐᓂᖓᓂ ᖃᓂᑦᑐᒃᑯᑦ ᖃᐅᔨᓇᓱᒡᓗᓂᐅᒃ ᐅᒥᐊᕐᔪᐊᖅ.

ᐅᓇ ᓴᐳᑎ ll ᐊᑐᒐᒃᓴᐅᓕᕐᐸᑦ ᓄᑕᐅᙱᓐᓂᕐᓴᖅ ᐅᒥᐊᕐᔪᐊᖅ ᓂᐅᕕᐊᒃᓴᕆᔭᐅᓕᕐᓂᐊᖅᖢᓂ.

2024-ᒥ ᐅᓇ ᓄᑕᐅᙱᑦᑐᖅ ᓴᐳᑎ ᑕᕆᐅᕐᒥᐅᑕᕐᓂ ᐊᕝᕗᕈᑎᐅᓚᐅᕐᓯᒪᔪᖅ 7,504 ᑕᓐᔅᓂ — 4,616 ᑕᓐᔅᓂ ᑭᖑᒃᐸᖕᓂ ᐊᒻᒪᓗ 2,888 ᑕᓐᔅᓂ ᑲᕕᓯᓕᖕᓂ, ᐅᑯᐊ ᕿᑭᖅᑖᓗᒃ ᑯᐊᐳᕇᓴᓐᑯᑦ ᐊᕐᕌᒍᒧᑦ ᐅᓂᒃᑳᖏᑦ ᐅᖃᕐᓯᒪᓚᐅᕐᑐᑦ.

ᓴᐳᑎ ll ᐊᖏᓂᕐᓴᐅᓂᐊᖅᑐᖅ ᐃᓇᖏᓐᓂᐊᖅᑕᖓᓂᒃ ᑭᓯᐊᓂᓕ ᒥᑭᓐᓂᕐᓴᐅᒋᓪᓗᓂ ᕿᑭᖅᑖᓗᒃᒥᑦ ᐃᖃᓗᓕᕆᔨᒃᑯᑦ ᐅᒥᐊᕐᔪᐊᖅᑖᕆᓚᐅᕐᑕᖓᓂ ᐃᓄᒃᓱᒃ ll ᐃᖃᓗᒐᓲᑎ. ᑕᑭᓂᖃᖅᖢᓂ 79.5 ᒦᑕᓂ, ᐃᓄᒃᓱᒃ ll ᒦᑕᐅᑉ ᓇᑉᐸᖓᓂ ᑕᑭᓂᕐᓴᐅᕌᕐᔪᒃᑐᖅ ᓴᐳᑎ ll-ᒥ.