ᓄᑖᖅ ᑕᓚᕕᓴᓐᑯᑦ ᑕᐅᑐᒐᒃᓴᖅ ᐅᖃᐅᓯᖃᖃᑦᑕᖅᑐᖅ ᐱᒻᒪᕆᐊᓗᖕᓂ ᐃᓄᐃᑦ ᐃᓕᖅᑯᓯᖏᓐᓄᑦ

For English version, see New TV show takes on issues important to Inuit culture

ᐃᓄᐃᑦ ᑕᑯᓐᓇᒐᒃᓴᓕᕆᔨᖏᑦ IBC-ᑯᑦ ᓴᖅᑭᑎᑦᑎᓂᐊᓕᕐᒪᑕ ᓄᑖᒥ ᐃᓅᓱᒃᑐᓅ ᑐᕌᖓᓗᐊᕐᑐᖅ ᐃᓄᒃᑎᑐᑦ ᐅᖃᐅᓯᖃᕐᓗᑎᒃ ᑕᕐᕆᔭᒐᒃᓴᓕᐅᕐᓂᐊᕐᒪᑕ APTN-ᑯᓐᓂ ᐅᑭᐅᒃᓴᖅ ᑖᒃᑯᐊᓗ ᐅᖃᐅᓯᖃᑲᑕᖕᓂᐊᖅᖢᑎᒃ ᐊᒃᓱᕈᕐᓇᖅᑐᓂ ᐊᒻᒪᓗ ᐃᒡᓚᕐᓇᖃᑦᑕᕐᓗᑎᒃ ᐊᒻᒪ ᖁᕕᐊᓇᕐᓗᑎᒃ.

ᐅᓇ ᑕᑯᓐᓇᒐᒃᓴᖅ, ᑏᑐᕐᑕ, ᓲᖃᐃᒻᒪ ᐃᓄᒃᑐᑦ ᑐᑭᖃᖅᖢᓂ “ᑏᑐᖃᑎᒌᒃᑕ”, ᐅᖃᐅᓯᖃᖃᑦᑕᕐᓂᐊᕐᑐᑦ ᓄᑖᓂ ᖃᓄᐃᓕᐅᕈᓯᕐᓂ ᐃᓄᖕᓄᑦ ᑐᑭᖃᖅᑐᓂ ᐊᑐᕐᑕᐅᕙᒃᑐᕕᓂᕐᓂ, ᐃᓕᖅᑯᓯᖏᓐᓂᒃ ᐊᒻᒪ ᐅᖃᐅᓯᐅᔭᕆᐊᓕᖕᓂ, ᐅᖃᓪᓚᒃᑎᐅᖃᑕᐅᔪᖅ ᐊᖑᑎ ᔮᓐᔅᑕᓐ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ ᐅᓇᓗ ᐅᖃᓪᓚᒃᑎᐅᖃᑎᖓ ᔮᓇᑦ ᐃᕝᕕᒃ.

ᐅᓇ ᑕᕐᕆᔭᒐᒃᓴᖅ ᐅᑯᓂᖓ ᓄᓇᕗᒥᑦ ᐊᒻᒪ ᐋᑐᕚᓂ ᐱᓕᕆᖃᑎᖃᕐᓂᐅᔪᖅ, ᐊᒻᒪᓗ ᐊᑕᐅᓯᖅ ᓴᖅᑭᔮᒐᒃᓴᖅ ᐃᓄᒋᐊᓂ ᐃᓅᑉ ᐃᓅᓯᖓᓃᕐᓯᒪᔪᖅ.

ᐅᓇ ᑏᑐᕐᑕ ᐅᖃᐅᓯᖃᕐᓇᐅᒐᓗᐊᕐᑎᓪᓗᒍ ᐊᒃᓱᕈᕐᓇᕐᑐᓂ ᐊᑐᓗᐊᕈᑎᐅᔭᓐᓇᕐᑐᓂ, ᐃᓄᒋᐊᓂ ᐃᓅᖃᑎᒌᐊᖃᕐᓂᕐᒥ ᐊᒻᒪ ᐋᖓᔮᑲᑕᖕᓇᙱᑦᑐᒥ, ᐃᕝᕕᒃ ᐃᓱᒪᔪᖅ ᑕᒪᓐᓇ ᒪᒥᔾᔪᑎᐅᔪᓐᓇᕆᐊᒃᓴᖓᓂ.

“ᐅᕙᓐᓂ ᐃᑲᔪᓚᐅᕐᓯᒪᔪᖅ. ᐊᔪᕐᓇᖃᑦᑕᕐᒪᑦ ᐅᖃᐅᓯᖃᕆᐊᒃᓴᖅ ᐃᓚᖏᓐᓂ,” ᐅᖃᕐᑐᖅ, ᓲᖃᐃᒻᒪ ᐃᓚᖏᑦᑕ ᖃᐅᔾᔪᓯᕆᓚᐅᕐᑕᖏᑦᑎᒍᑦ. “ᐊᒃᓱᕈᕐᓇᖅᑐᐊᓗᒃ, ᑭᓯᐊᓂᓕ ᐅᖃᐅᓯᕆᕙᒃᖢᒍ ᒪᒥᓴᖃᑎᒌᒍᓐᓇᖅᑐᒍᑦ.”

ᐋᖅᑭᒃᓱᐃᔨᐅᕙᒃᑐᑦ ᐱᓇᓱᒃᑎᐊᓚᐅᕐᑐᑦ ᐊᒻᒪᓗ ᓂᕈᐊᖅᖢᑎᒃ ᓇᓕᐊᓐᓂ ᐅᖃᐅᓯᖃᕐᓂᐊᕐᒪᖔᑕ ᐊᒻ ᑭᓇᒥ ᐊᐱᕐᓱᕐᓂᐊᕐᖓᒪᖔᑕ, ᔮᓐᓇᔅᑕᓐ ᐅᖃᕐᑐᖅ.

“ᐱᒃᑯᒋᒐᑦᑎᒍᑦ ᐊᒻᒪᓗ ᐋᖅᑭᒃᓱᖅᑕᕗᑦ ᓴᖅᑭᑎᑉᐸᓪᓕᐊᑎᓪᓗᑎᒍᑦ ᐱᒃᑯᕕᔭᕗᑦ, ᑕᐃᒪᓕ ᐃᓱᒪᔪᖓ ᐃᓄᐃᑦ ᐃᖕᒥᖕᓂ ᐱᒃᑯᒋᖃᑦᑕᖁᓪᓗᑎᒍᑦ ᑕᒪᑐᒥᖓ,” ᐅᖃᕐᑐᖅ.

ᐊᑐᓂ ᓴᖅᑭᑕᐅᕙᓪᓕᐊᔪᑦ ᐱᒋᐊᕈᑎᖃᖃᑦᑕᕐᑐᑦ ᐃᓐᓇᑐᖃᕐᒥᙶᕐᑐᒥ — ᓂᐱᓕᐅᕐᓯᒫᓂᒃᑐᕕᓂᕐᒥᓪᓘᓐᓃᑦ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᑲᑎᑉᐸᓪᓕᐊᔭᖏᓐᓂᒃ ᐅᕝᕙᓘᓐᓃᑦ ᓄᑖᕕᓂ ᓂᐱᓕᐅᖅᑕᐅᓂᑰᓪᓗᓂ — ᖃᐅᔨᓇᓱᓚᐅᕐᑎᓐᓇᒋᑦ ᐅᖃᐅᓯᐅᔪᖅ ᐊᐱᕐᓱᑲᑕᖕᓂᒃᑯᑦ.

ᐊᑕᐅᓯᖅ ᑕᐅᑐᒐᒃᓴᖅ, ᑕᐃᒎᓯᖃᕐᑐᖅ “ᐃᓄᖕᒧᑦ ᐱᖃᓐᓇᕆᔭᐅᓂᕐᐹᖅ” ᐅᖃᐅᓯᖃᕐᑐᖅ ᕿᒻᒥᑐᐃᓐᓇᕐᓂ, ᔮᓐᔅᑕᓐ ᐅᖃᕐᑐᖅ.

ᐅᖃᐅᓯᖃᕐᒥᔪᖅ ᐃᒻᒪᒃᑲᓐᓂᖅ ᕿᒧᒃᓯᐅᑎᒋᔭᐅᕙᓚᐅᕐᓯᒪᔪᓂ ᐊᔾᔨᓕᐅᒐᕕᓂᕐᓂ ᐊᒻᒪᓗ ᐅᖃᐅᓯᖃᕆᓪᓗᑎᒃ ᕿᒻᒦᑦ ᑐᖁᕋᖅᑕᐅᑎᓪ 1950-ᖏᓐᓂ ᐊᒻᒪ 1960-ᖏᓐᓂ.

ᑕᐃᔅᓱᒪᓂᒃ, 1,000 ᐅᖓᑖᓃᑦᑐᑦ ᑐᖁᑕᐅᓚᐅᕐᓯᒪᖕᒪᑕ ᐸᓖᓯᓄᑦ ᐊᒻᒪᓗ ᑯᐸᐃᒃ ᐸᓖᓯᖏᓐᓄᑦ ᓄᓇᕕᒃᒥ. ᐅᓇ ᑐᖁᑎᑦᑎᑲᑕᖕᓂᖅ ᐃᓄᖕᓄᑦ ᐊᒃᓱᕈᕐᓇᓚᐅᕐᓯᒪᔪᖅ ᐊᒻᒪᓗ ᓂᕿᖃᑦᑕᐊᕐᓇᕈᓐᓃᑕᐅᓪᓗᓂ ᐊᒻᒪ ᐊᓯᐅᔨᔾᔪᑎᐅᓪᓗᓂ ᐃᖅᑯᓯᑐᖃᕐᒥᒃ ᐊᒻᒪ ᐊᑐᖅᑕᐅᖃᑦᑕᕐᓯᒪᔪᓂᒃ.

ᑕᐃᑲᙵᓪᓕ, ᑕᑯᔭᒃᓴᐃᑦ ᐊᓯᐊᓅᕐᓯᒪᖕᒥᔪᑦ ᐅᕗᖓ “ᐃᓅᓱᒃᑐᖅ ᐊᕐᓇᖅ ᓇᖕᒥᓂ ᕿᒥᒃᓯᐅᑎᖃᕐᑐᖅ, ᐊᒻᒪᓗ ᓄᑲᖅᖠᒃᑲᓐᓂᕐᒥ ᕿᒧᒃᓯᐅᔾᔪᐊᖃᑕᐅᓕᕐᓂᑯᕕᓂᕐᒥᒃ ᐅᐱᕐᖔᒃᑯᑦ,” ᔮᓐᔅᑕᓐ ᐅᖃᕐᑐᖅ.

ᔮᓐᔅᑕᓐ ᑕᕐᕆᔭᒐᒃᓴᓕᐅᖃᑦᑕᕐᓯᒪᔪᖅ ᐊᒻᒪᓗ ᑕᓚᕕᓴᓐᑯᑦ ᓴᖅᑭᓐᓂᐊᕐᑐᓂ ᐋᖅᑭᒃᓱᐃᔨᐅᓕᖅᖢᓂ ᐊᕐᕌᒍᑦ ᖁᓕᑦ ᐅᖓᑖᓂ. ᐃᖃᓗᖕᓂ ᓄᓇᖃᕐᑐᖅ ᐃᓚᖏᓪᓗ, ᑭᓯᐊᓂᓕ ᓇᓂᕈᓘᔭᕐ ᕿᑭᖅᑖᓗᖕᒥ ᓄᓇᖃᕐᓯᒪᔪᖅ, ᐅᖃᕐᑐᖅ.

ᐃᕝᕕᒃ ᐸᖕᓂᕐᑑᕐᒥᐅᑕᕕᓂᖅ ᑭᓯᐊᓂᓕ ᐋᑐᕚᒥ ᓄᓇᖃᓕᕐᓯᒪᔪᖅ ᐊᕐᕌᒎᓕᕐᑐᓂᒃ 13-ᓂ. ᐃᖅᑲᓇᐃᔭᖃᑦᑕᖅᑐᖅ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓄ ᐋᖅᑭᒃᓱᐃᔨᒋᔭᐅᓪᓗᓂ ᐊᒻᒪ ᑲᑎᕐᓱᒐᖕᓂ ᐋᖅᑭᒃᓱᐃᔨᐅᓯᒪᓪᓗᓂ.

ᐅᖃᓚᐅᕐᑐᖅ ᖁᕕᐊᒋᓂᕐᓴᐅᓂᕋᖅᖢᓂᐅᒃ ᐱᓕᕆᐊᖃᕆᐊᒃᓴᖅ ᓴᖅᑭᔮᕐᓇᙱᑦᑐᒃᑯᑦ ᐃᓂᒃᓴᐅᓕᖅᑎᐅᓪᓗᓂ ᐊᐱᕐᓱᖅᑕᐅᓂᐊᖅᑐᓂᒃ, ᐊᐱᕐᓱᖅᑎᐅᕙᒃᖢᓂ ᖃᓄᐃᓕᐅᖅᑎᐅᕙᒃᑐᓂ ᑕᐅᑐᒃᑕᐅᓂᐊᖅᑐᓂᒃ ᐊᒻᒪᓗ ᖃᐅᔨᓇᓱᒃᐸᒃᖢᓂ ᐱᓕᕆᐊᖓᓄᑦ ᑭᓯᐊᓂᓕ ᖃᐅᔨᕚᓪᓕᕐᓂᕋᖅᑐᖅ ᐱᓕᕆᖃᑕᐅᓂᖓᓂᒃ ᐆᒥᖓ ᑏᑐᕐᑕ.

ᑖᒃᑯᐊᒃ ᐅᖓᓯᒌᒃᑐᓂ ᓄᓇᖃᖅᖢᑎᒃ, ᐊᔾᔨᓕᐅᕐᑕᐅᓯᒪᓕᕐᑑᑦ ᑕᓪᓕᒪᐃᕐᑕᐅᓪᐊᖅᖢᑎᒃ, ᐅᖃᕐᑐᖅ ᔮᓐᔅᑕᓐ.

ᑕᒪᕐᒥ 13 ᓴᖅᑭᔮᒃᑐᒃᓴᑦ ᓯᕗᓪᓕᕐᐹᒥ ᑕᑯᒃᓴᐅᓐᓇᐅᑎᓪᓗᒍ ᐊᔾᔨᓕᐅᕐᑕᐅᕌᓂᒃᓯᒪᓕᕐᑐᑦ. ᑕᐃᒪᓕ ᐅᖃᓪᓚᒃᑎᒋᔭᐅᔪᑦ ᐊᒻᒪ ᐋᖅᑭᒃᓱᐃᔨ ᐊᐃᑉᐸᖓᓂ ᑕᑯᒃᓴᐅᓐᓇᐅᓛᕐᑐᒥ ᐱᓕᕆᐊᖃᕐᐸᓪᓕᐊᓯᔫᒃ, ᑕᒻᒪ ᑖᓐᓇ ᐱᓕᕆᐊᕆᔪᒥᒋᔭᐅᑦᑎᐊᖅᖢᓂ ᑖᒃᑯᓄᖓ.

ᐊᐅᑉᐸᖓᓂ ᑕᑯᒃᓴᐅᓐᓇᐅᓂᐊᕐᑐᒥ, ᐊᔾᔨᓕᐅᕆᑲᑕᒃᓯᒪᔪᑦ ᐃᖃᓗᐃᑦ ᐊᒻᒪ ᐋᑐᕚᑉ ᐊᓯᐊᓂ ᒪᑯᑎᑐᓇᖅ ᑯᐸᐃᒃ ᑕᕐᕋᖓᓂ ᐊᒻᒪ ᓄᓇᑦᓯᐊᕐᒥ, ᔮᓐᔅᑕᓐ ᐅᖃᕐᑐᖅ.

“ᐃᓚᐅᑎᑦᑎᓇᓱᒃᑲᑦᑕᑦ ᑕᒪᐃᓐᓂᓕᒫᖅ ᐃᓄᖕᓂᒃ,” ᐃᕝᕕᒃ ᐅᖃᕐᑐᖅ.