“ᑭᓱᖃᐅᑦᑎᐊᕐᑐᖅ’: ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐋᖅᑭᒃᓱᐃᔨᐅᓚᐅᕐᓯᒪᔫᑉ ᐱᓕᕆᐊᖏᑦ ᐸᐸᑕᐅᔪᑦ ᓄᓇᕗᒥᑦ ᒐᕙᒪᒃᑯᑦ ᑲᑎᑉᐸᓪᓕᐊᔭᖏᓐᓂᒃ

For English version, see ‘It’s all very rich’: Former Nunatsiaq News editor’s work preserved in GN archives

ᓄᓇᕗᒧᑦ ᒐᕙᒪᒃᑯᓐᓄᑦ ᑲᑎᑕᐅᕙᓪᓕᐊᔪᓕᕆᔨ ᐃᐊᕗᑦ ᐋᑦᑭᓐᓴᓐ ᐅᖃᓚᐅᕐᑐᖅ ᕿᒪᐃᑐᐃᓐᓇᕈᓐᓇᓚᐅᙱᓐᓂᖓᓂᒃ ᖁᓕᓂᒃ ᐴᕐᓂᒃ ᑎᑎᕋᖅᑕᐅᓯᒪᔪᓂᒃ ᐅᑭᐅᕐᑕᖅᑑᑉ ᒥᒃᓵᓄᑦ ᐆᒧᖓ ᔨᒻ ᐱᐊᓪᒧ ᐅᕙᓂ ᓄᓇᕗᒥᑦ ᑲᑎᑕᐅᕙᓪᓕᐊᔪᓂᒃ.

“ᐅᕙᙵᑦ ᓯᕗᓪᓕᖅᐹᒥ ᐴᕐᒥ ᖁᓕᖓᓄᑦ, ᐊᒃᓱᐊᓗᒃ ᑭᓱᖃᐅᑦᑎᐊᕐᑐᖅ,” ᐋᑦᑭᓐᓴᓐ ᐅᖃᕐᑐᖅ.

ᓄᕕᐱᕆᒥ, ᐊᕐᕌᒍᓂ 35-ᓂ ᐱᓕᕆᐊᕆᔭᐅᓯᒪᔪᑦ ᐊᒻᒪᓗ ᓇᖕᒥᓂᖅ ᐱᖁᑎᒋᔭᐅᔪᑦ ᐆᒧᖓ ᐱᐊᓪᒧ, ᐊᑯᓂᐊᓗᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐋᖅᑭᒃᓱᐃᔨ ᐊᒻᒪ ᑐᓴᒐᒃᓴᓕᐅᕐᑎ, ᑐᓐᓂᖅᑯᑎᐅᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᓐᓄᑦ ᑲᑎᑉᐸᓪᓕᐊᔭᖏᓐᓄᑦ.

ᐅᑯᐊ ᐃᓚᖃᓚᐅᕐᑐᑦ ᐅᖃᓕᒫᒐᐅᓕᕐᓯᒪᔪᓂᒃ ᐅᓂᒃᑳᓂᒃ, ᐊᔾᔨᙳᐊᓂᒃ, ᑐᓴᒐᒃᓴᓂᒃ ᑎᑎᕋᖅᑕᐅᓂᑯᓂᒃ, ᐊᒻᒪᓘᓐᓃᑦ ᐱᓯᓕᐊᕆᓯᒪᔪᓂᒃ.

ᐱᐊᓪ ᐃᓅᔪᓐᓃᓚᐅᕐᓯᒪᖕᒪᑦ ᑲᒡᒍᑎᒧᑦ (ᑳᓐᓱ) ᐋᒐᓯ 2021 ᐅᑭᐅᖃᓕᖅᖢᓂ 69-ᓂ.

ᐊᐱᕐᓱᖅᑕᐅᓪᓗᓂ ᐋᑦᑭᓐᓴᓐ ᐅᖃᓚᐅᕐᑐᖅ ᐱᐊᓪ ᑭᒡᒐᖅᑐᐃᓯᒪᓂᖓᓂᒃ ᓄᓇᕗᒥᑦ ᐋᖅᑭᒃᓱᐃᔨᑐᐃᓐᓇᕐᒨᙱᑦᑐᖅ ᐊᒻᒪ ᑐᓴᒐᓕᐅᕐᑎᐅᓂᕐᒧ ᑭᓯᐊᓂᓕ “ᑎᑎᕋᖅᑎᐅᓂᖓᓄᑦ ᐊᒻᒪᓗ ᑎᑎᕋᒐᒃᓴᓂᒃ ᐃᓱᒪᓕᐅᕆᖃᑦᑕᕐᓂᕐᒧᑦ.”

ᐱᐊᓪ ᑎᑎᕋᕐᑕᖏ ᐊᒻᒪ ᐊᓯᖏᑦ ᑎᑎᕋᕐᓯᒪᔭᖏᑦ ᑲᑎᑕᐅᓯᒪᔪᑦ ᐊᕐᕌᒍᓂᒃ 40 ᐅᖓᑖᓅᖓᔪᑦ ᐅᑭᐅᕐᑕᖅᑑᑉ ᑲᓇᖕᓇᖓᑕ ᖃᓄᐃᑉᐸᓪᓕᐊᔾᔪᑎᖏᓐᓂᒃ, ᒪᑯᓇᙶᖓᔪᓂᒃ ᐃᓄᐃᑦ ᒪᓕᒐᓕᕆᔾᔪᑎᖏᓐᓂᒃ ᐊᒻᒪᓗ ᒪᓕᒐᓕᕆᓂᕐᒥᒃ ᐱᕙᓪᓕᐊᔾᔪᑎᓂᒃ.

ᐃᓚᖏᑦ ᑎᑎᕋᕐᓯᒪᔪᑦ ᐅᕝᕙᓘᓐᓃᑦ ᖃᓄᐃᓕᐅᕈᑎᐅᓯᒪᔪᑦ ᐱᐊᓪ ᑎᑎᕋᖅᐸᓪᓕᐊᓂᑯᖏᓐᓂᒃ ᒪᑯᓂᖓ ᑎᑎᕋᐅᓯᖃᕐᓯᒪᔪᑦ ᓄᓇᑖᕋᓱᒃᐸᓪᓕᐊᓕᖅᑎᓪᓗᒋᑦ ᖃᓄᐃᓕᐅᕈᑎᕕᓂᓂᒃ ᐊᒻᒪᓗ ᑲᓇᑕᒥ ᒐᕙᒪᒃᑯᑦ ᓄᒃᑎᑦᑎᓂᑰᓂᖏᓐᓂᒃ ᐃᓄᖕᓂ ᖁᑦᑎᒃᑐᕐᒧᑦ 1950-ᖏᓐᓂᒃ.

ᐃᓚᖏᑦ ᐅᓂᒃᑳᑦ ᐱᐊᓪ ᑎᑎᕋᐅᓯᕆᓂᕐᓴᐅᕙᒃᑕᖏᓐᓂᒃ ᐅᑯᓂᖓ ᐃᓚᖃᓚᐅᕐᑐᖅ ᐋᖅᑭᒃᓱᖅᑕᐅᕙᓪᓕᐊᓂᖓ ᓄᓇᕗᒥᑦ ᒪᓕᒐᓕᕆᓂᖅ ᐊᒻᒪᓗ ᓄᓇᕗᑦ ᐃᓕᓐᓂᐊᖅᑐᓕᕆᓂᖓ, ᐋᑦᑭᓐᓴᓐ ᐅᖃᓚᐅᕐᑐᖅ.

ᐱᐊᓪ ᑲᑎᓯᒪᔭᖏᑦ ᐱᓕᕆᐊᕕᓂᖏᑦ ᐃᓚᖃᓚᐅᕐᑐᒥᔪᑦ ᐊᔾᔨᙳᐊᓂᒃ ᒪᑯᓂᖓ ᐱᒻᒪᕆᖕᓂᒃ ᐱᓕᕆᐊᖃᖅᑐᓂᒃ ᐃᓚᖃᖅᖢᑎᒃ ᐲᑕ ᐃᑎᓐᓄᐊᕐᒥ, ᓯᕗᓪᓕᖅᐹᖅ ᐃᓅᓪᓗᓂ ᒪᓕᒐᓕᕆᕕᒡᔪᐊᕐᒥ ᑲᑎᒪᔨᐅᖃᑕᐅᓚᐅᕐᓯᒪᔪᖅ; ᔫᓯ ᑯᓱᒐᖅ, ᐃᓕᓴᐃᔨ ᐊᒻᒪᓗ ᓈᓚᐅᑎᒃᑯᑦ ᐅᖃᓪᓚᒃᑎ ᐃᓚᒋᔭᐅᓚᐅᕐᓯᒪᓂᖓᓂᒃ ᓄᓇᕗᑦ ᐱᒋᐊᖅᑎᑕᐅᕙᓪᓕᐊᓕᖅᑎᓪᓗᒍ, ᐊᒻᒪᓗ ᔮᓐ ᐊᒪᕈᐊᓕᒃ, ᑖᓐᓇ ᓯᕗᓪᓕᖅᐹᖑᖃᑕᐅᓚᐅᕐᓯᒪᔪᖅ ᒪᓕᒐᓕᕆᔨᓂᒃ ᓄᓇᕗᒥᑦ ᐱᒋᐊᖁᔨᓯᒪᓪᓗᓂ.

ᐊᔾᔨᙳᐊᓂ ᐱᑕᖃᓛᖑᖃᑕᐅᓚᐅᕐᑐᖅ ᐳᕋᐃᐊᓐ ᐱᐅᓴᓐ (ᓴᓪᓗᕕᓂᖅ), ᓯᕗᓪᓕᖅᐹᖑᓪᓗᓂ ᒪᐃᔭᐅᓂᑯ ᐃᖃᓗᖕᓂ, ᑕᐃᔅᓱᒪᓂ ᖃᓪᓗᓈᑐᑦ ᑕᐃᔭᐅᕙᓚᐅᕐᑐᖅ ᕗᕉᐱᓱ ᐸᐃᒥ.

“ᐱᐅᓴᓐ ᐅᐊᑲᓪᓛᓘᓚᐅᕐᓯᒪᖕᒪᓐ,” ᐋᑦᑭᓐᓴᓐ ᐅᖃᕐᑐᖅ.

ᐊᓯᖏᑦ ᐊᔾᔨᙳᐊᑦ ᓴᖅᑭᑎᑦᑎᓯᒪᔪᑦ ᐱᒻᒪᕆᒃᑐᓂᒃ ᒪᓕᒐᓕᕆᓂᕐᒧᑦ ᖃᓄᐃᓕᐅᕈᑎᓂᒃ, ᒪᑯᑎᑐᓇᖅ ᓂᕈᐊᕐᓂᖅᑎᑐᑦ ᐃᓄᐃᑦ ᓇᖕᒥᓂᖅ ᑯᐊᐳᕇᓴᖏᓐᓄᑦ.

ᐊᔾᔨᙳᐊᖅᑕᖃᐅᕐᒥᔪᖅ ᑐᑭᑎᐅᓪ ᕼᐋᓪᒥ, ᐃᓕᓐᓂᐊᕆᐊᕐᕕᐅᕙᓚᐅᕐᓯᒪᔪᖅ ᐃᓄᖕᓄᑦ ᐃᒡᓗᓕᒑᕐᔪᒃᒧᑦ, ᐊᒻᒪᓗ ᐊᔾᔨᙳᐊᓂ ᐃᓕᓐᓂᐊᕆᐊᖃᑦᑕᖅᑐᕕᓃᑦ ᑲᑎᑕᐅᑎᓪᓗᒋ ᐃᒡᓗᓕᒑᕐᔪᒃᒥ 2009-ᖑᑎᓪᓗᒍ.

ᐋᑦᑭᓐᓴᓐ ᐅᖃᓚᐅᕐᑐᖅ ᐱᐊᓪ ᐱᓕᕆᐊᕕᓂᖏᓐᓂᒃ ᐅᔾᔨᕈᓱᓗᐊᕐᑐᖅ ᑕᑭᔪᕈᓗᒃ ᐅᓂᒃᑳᓕᐊᕆᓯᒪᔪᖅ ᐃᒡᓗᓕᕆᓂᕐᒥᒃ 1991-ᖑᑎᓪᓗᒍ ᐊᑎᖃᖅᖢᓂ ᐱᓕᕆᐊᒃᓴᖅ ᓄᐊᑕᒃᔅᒧᑦ, ᑖᒃᑯᐊ ᐱᖁᑎᖃᖅᑎᐅᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

ᐋᑦᑭᓐᓴᓐ ᐅᖃᓚᐅᕐᑐᖅ ᑖᓐᓇ ᐅᓂᒃᑳᖅ ᐅᖃᐅᓯᖃᖅᖢᓂ ᐃᒡᓗᑕᖃᓚᐅᕐᓯᒪᙱᓐᓂᖓᓂ ᐃᓄᐃᑦ ᓇᖕᒥᓂᖅ ᐅᕙᑦᑎᖃᖃᑦᑕᓚᐅᕐᓯᒪᔪᑦ, ᑐᐱᐅᒐᓗᐊᖅᐸᑦ, ᖃᕐᒪᐅᒐᓗᐊᖅᐸᑦ ᐅᕝᕙᓘᓐᓃᑦ ᐃᒡᓗᕕᒐᐅᒐᓗᐊᖅᐸᑦ.

ᐅᓂᒃᑲᐅᓯᖃᓚᐅᕐᓯᒪᔪᖅ ᐃᒡᓗᓕᕆᓂᕐᒥ ᑎᑭᖢᒍ 1991, ᒪᑯᓂᖓ ᐊᑐᖅᑐᐊᒐᐃᑦ ᓇᖕᒥᓂᕆᓕᓛᕐᓂᕐᒧᑦ ᐱᓕᕆᐊᓂᒃ ᐊᒻᒪᓗ ᓄᓇᑦᓯᐊᕐᒥ ᐃᒡᓗᓕᕆᔨᕐᔪᐊᒃᑯᑦ ᐱᒋᐊᓕᕐᓂᖏᓐᓂᒃ.

ᐅᓇ ᐅᓂᒃᑳᖅ ᐱᒻᒪᕆᐊᓘᖕᒪ, ᐋᑦᑭᓐᓴᓐ ᐅᖃᕐᑐᖅ, ᓲᖃᐃᒻᒪ ᑎᑎᕋᐅᓯᖃᖅᐸᓪᓕᐊᓯᒪᖕᒪᓐ ᐃᒡᓗᓕᕆᓂᕐᒧᑦ ᐊᐅᓚᑦᑎᓂᖅ ᖃᓄᐃᑉᐸᓪᓕᐊᓯᒪᓂᖓᓂ ᓄᓇᒥ ᓄᓇᕗᙳᓚᐅᖅᑐᒥᓐ.

ᐅᑯᐊ ᐱᓕᕆᐊᕕᓃᑦ ᑲᑎᑕᐅᓯᒪᔪᑦ ᐅᕙᙵᑦ ᐱᐊᓪᒥ ᐅᓂᒃᑳᓂᑐᐃᓐᓇᕐᓂᒃ ᐅᖃᐅᓯᖃᕐᓯᒪᙱᑦᑐᑦ ᑭᓯᐊᓂᓕ ᐱᓯᕐᓂ ᐱᑕᖃᓚᐅᕐᒥᔪᖅ. ᐱᐊᓪ ᐃᓕᓐᓂᐊᖅᑎᑦᑎᓚᐅᕐᓯᒪᒋᓪᓗᓂ ᓄᓇᕗᒥᑦ ᓯᓚᑦᑐᖅᓴᕐᕕᒃᒥ ᑐᓴᒐᒃᓴᓕᐅᖅᑎᐅᓂᕐᒥᒃ, ᐊᒻᒪᓗ ᐃᓕᓐᓂᐊᖅᑎᑦᑎᔾᔪᑎᖏᑦᑕᐅᖅ ᐱᑕᖃᓚᐅᕐᒥᔪᑦ.

ᐃᓚᖏᓪᓕ ᑲᑎᓯᒪᔪᑦ ᐱᓕᕆᐊᖏᑦ, ᓲᕐᓗ ᐊᔾᔨᙳᐊᖁᑎᖏᑦ, ᐊᔾᔨᙳᐊᙳᕐᓯᒪᖕᒪᑕ ᐊᒻᒪᓗ ᐋᖅᑭᒃᓱᖅᑕᐅᕙᓪᓕᐊᓪᓗᑎᒃ ᖃᕋᓴᐅᔭᒃᑰᕈᓐᓇᖅᑐᒧᑦ, ᐋᑦᑭᓐᓴᓐ ᐅᖃᓚᐅᕐᑐᖅ.

ᐅᖃᓚᐅᕐᒥᔪᖅ ᐱᐊᓪ ᓇᖕᒥᓂᖅ ᑎᑎᕋᕐᓯᒪᔭᖏᑦ ᖃᓄᐃᓕᐅᕈᑎᐅᕙᓪᓕᐊᔪᓄᑦ ᐊᑐᐃᓐᓇᐅᖕᒥᔪᑦ ᓄᓇᕗᒥᑦ ᒐᕙᒪᒃᑯᓐᓂ.