ᕼᐋᒻᒪᓚᒃᑯᑦ ᓂᕿᑖᕈᓐᓇᐅᑎᖏᑦ ᓄᑖᙳᕆᐊᖅᑕᐅᔾᔮᙱᑦᑐᑦ

For the English version of this story, please see No more approvals for ICFI food-voucher program: Official

ᓄᓇᕗᒥᑦ ᓂᕿᑖᕈᓐᓇᐅᑎᓕᕆᓂᕐᒧᑦ ᐱᓕᕆᐊᖑᔪᖅ ᐃᑲᔪᕈᑎᐅᕙᒃᖢᓂ ᐅᓄᒻᒪᕆᒃᑐᓂᒃ ᐃᓄᐃᑦ ᓱᕈᓯᖏᓐᓂᒃ ᐅᕘᓇ ᐃᓄᐃᑦ ᓄᑕᖅᑲᖏᑦ ᓯᕗᓪᓕᖅᐸᐅᑎᑕᐅᓗᑎᒃ ᐱᓕᕆᐊᒃᓴᖅ ᓄᑖᙳᕆᐊᖅᑕᐅᔾᔮᙱᑦᑐᖅ.

ᒐᕙᒪᑐᖃᒃᑯᑦ ᐃᑲᔫᑎᒃᓴᕆᔭᐅᕙᒃᑐᖅ ᐅᕘᓇ ᓄᓇᕐᔪᐊᕐᒥ ᓂᕿᓄᑦ ᐃᑲᔫᑎᓕᕆᓂᕐᒨᖓᔪᓂᒃ ᐊᖏᔾᔮᔪᓐᓃᖅᑐᑦ, ᑖᓐᓇᓗ ᓄᓇᕗᒥᑦ 24 ᐅᕙᙵᑦ 25-ᓂ ᓄᓇᓕᖕᓂ ᐊᑐᖅᑕᐅᓚᐅᕐᑐᖅ ᐊᕐᕌᓂ, ᓄᓇᖃᖅᑳᖅᑐᓂᒃ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᐱᓕᕆᐊᒃᓴᓕᕆᔨᖓᑦ ᐋᓐᑐᕉ ᐅᐃᓚᑦ ᑎᑎᕋᓚᐅᕐᑐᖅ ᐊᐃᕆᓕ 17-ᒥ ᖃᕋᓴᐅᔭᒃᑯᑦ ᑎᑎᕋᖅᑕᕕᓂᖏᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐱᔭᐅᔪᓐᓇᓚᐅᕐᑐᒥᓐ.

ᐅᐃᓚᑦ ᖃᕋᓴᐅᔭᒃᑯᑦ ᑎᑎᕋᖅᑐᕕᓂᖅ ᐆᒧᖓ ᐆᐳᓪ ᒪᒃᒋᓂᔅ ᓄᓇᕗᑦ ᑐᙵᕕᒃᑯᓐᓄᑦ ᐃᖅᑲᓇᐃᔭᖅᑎᒧᑦ, ᑖᓐᓇᓗ ᐅᖃᐅᓯᖃᖅᖢᓂ ᓂᕿᑖᕈᓐᓇᐅᑎᓄᑦ ᐃᑲᔫᑎᒃᓴᓂ ᐅᖓᕙᕆᐊᕈᑎᐅᓇᓱᒃᑐᓂ ᑰᒑᕈᒃᒥ ᕼᐋᒻᒪᓚᒃᑯᓐᓂ ᐊᖏᖅᑕᐅᓯᒪᙱᓐᓂᖓᓂᒃ.

“ᓄᓇᖃᖅᑳᖅᑐᓂᒃ ᐱᔨᑦᑎᕋᐅᑎᓕᕆᔨᑦ ᑲᓇᑕᒥ ᐋᖅᑭᒃᓯᓚᐅᕐᒪᑕ, ᒪᓕᒃᖢᑎᒃ ᖃᐅᔨᓴᕈᑎᒋᔭᐅᔪᓂᒃ ᒪᓕᒐᖅᑎᒍᑦ ᐊᑐᖅᑕᐅᔭᕆᐊᓕᖕᓂᑦ ᐊᒃᑐᐊᓂᖃᖅᑐᓂᒃ ᐊᔾᔨᒌᒃᑎᑦᑎᔭᕆᐊᖃᕐᓂᕐᒥᒃ ᐅᕘᓇ ᐃᓄᐃᑦ ᓄᑕᖅᑲᖏᑦ ᓯᕗᓪᓕᖅᐸᐅᑎᑕᐅᓗᑎᒃ ᐱᓕᕆᒃᓴᑎᒍᑦ, ᐅᓇ ᐃᑲᔫᑎᒃᓴᖅ ᓄᓇᕐᔪᐊᒃᑯᑦ ᓂᕿᑖᕈᓐᓇᐅᑎᓕᕆᓂᖅ ᐊᖏᖅᑕᐅᔾᔮᒋᑦᑐᖅ,” ᐅᐃᓚᑦ ᖃᕋᓴᐅᔭᒃᑯᑦ ᑎᑎᕋᓚᐅᕐᑐᖅ.

ᐃᓄᐃᑦ ᓄᑕᖅᑲᖏᑦ ᓯᕗᓪᓕᖅᐸᐅᑎᑕᐅᓗᑎᒃ ᐱᓕᕆᐊᒃᓴᖅ “ᐃᑲᔫᑎᖃᕈᑎᐅᓚᐅᕐᑐᖅ ᐅᓄᒻᒪᕆᒃᑐᓄᑦ ᓂᕿᑖᕈᓐᓇᐅᑎᒃᓴᓄᑦ” ᐆᑐᓇᖅ ᓂᕿᑖᕈᓐᓇᐅᑎᒃᓴᓕᕆᓂᕐᒧᑦ ᐃᑲᔫᑎᒃᓴᓕᕆᓂᐅᕙᓚᐅᖅᑐᑎᑐᑦ, ᓄᓇᖃᖅᑳᖅᑐᓂᒃ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᐅᖃᖅᑎᖓ ᐸᔅᑳᓪ ᓚᐸᓛᓐᑦ ᐅᖃᓚᐅᕐᑐᑦ ᖃᕋᓴᐅᔭᒃᑯᑦ ᑎᑎᕋᖅᖢᓂ ᐊᐃᕆᓕ 23-ᒥ.

ᓄᑖᖅ “ᐊᐅᓚᑦᑎᓂᕐᒧᑦ ᑐᓴᒐᒃᓴᖅ” ᑐᑭᖃᖅᑐᖅ ᐃᑲᔫᑎᒃᓴᓂᒃ ᑐᒃᓯᕋᐅᑎᒋᔭᐅᔪᑦ ᐊᖏᑕᐅᖃᑦᑕᕐᓂᐊᖅᑐᑦ ᑭᓯᐊᓂ ᓄᑕᕋᐅᑉ ᐱᔭᕆᐊᖃᖅᑕᖏᑦᑎᒍᑦ, ᓚᐸᓛᓐᑦ ᐅᖃᕐᑐᖅ.

ᐅᓇ ᑐᓴᒐᒃᓴᕆᔭᐅᔪᖅ ᑐᓴᑳᓪᓚᒍᑎᐅᓚᐅᕐᑐᖅ ᐃᓄᖕᓄᑦ ᑖᒃᓱᒥᖓ ᐃᑲᔫᑎᒥ ᖃᐅᔨᒪᔪᓂᒃ.

“ᓯᕗᓂᐊᒍᑦ ᑕᒪᑐᒧᖓ ᑐᓴᐅᒪᑎᑕᐅᓚᐅᙱᑦᑐᒍᑦ,” ᐅᖃᕐᑐᖅ ᓯᓐᑐ ᒍᕕᓐᑕᐱᓚᐃ, ᑐᑭᒧᐊᖅᑎᒋᔭᐅᔪᖅ ᐅᑯᓄᖓ ᖁᐸᓄᐊᖅ, ᑲᒪᔨᐅᔪᑦ ᑕᒪᑐᒧᖓ ᐃᑲᔫᑎᓕᕆᓂᕐᒥᒃ ᐅᕘᓇ ᐃᓄᐃᑦ ᓄᑕᖅᑲᖏᑦ ᓯᕗᓪᓕᖅᐸᐅᑎᑕᐅᓗᑎᒃ ᐱᓕᕆᐊᒧᑦ.

“ᐅᖃᐅᓯᖃᖅᑐᒍ ᐊᑐᒻᒪᕆᒃᑐᒥᒃ ᐃᑲᔫᑎᒥ ᐊᓯᐅᑐᐃᓐᓇᕐᓂᐊᕐᓂᖓᓂ ᐅᓐᓄᐊᒃᑯᑦ.”

ᑕᒪᑐᒥᖓ ᐱᓕᕆᐊᖃᖃᑕᐅᔪᑦ ᓄᓇᕗᒥᑦ ᕼᐋᒻᒪᓚᐅᔪᑦ ᑐᓂᔭᐅᓚᐅᕐᓯᒪᖕᒪᑕ ᒥᓕᐊᓐᖏᓐᓃᑦᑐᓂᒃ ᑮᓇᐅᔭᓂ ᐊᕐᕌᓂ ᐅᕘᓇ ᓂᕿᓄᑦ ᐃᑲᔫᑎᒃᓴᓕᕆᓂᕐᒧᑦ ᐱᓕᕆᐊᑎᒍᑦ. ᐅᓇ ᐃᓚᒌᓂ ᑕᖅᑭᑕᒫᑦ $500-ᑖᕈᑎᐅᕙᓚᐅᕐᑐᖅ ᐊᑕᐅᓯᕐᒧᑦ ᐃᓄᖕᒧᑦ ᓄᑕᖅᑲᒧᑦ ᐅᑭᐅᖃᖅᑐᓂ 18 ᑐᖔᓂ ᐊᒻᒪ $250-ᓂ ᓄᑕᖃᓄᑦ ᐊᕐᕌᒍᓕᖕᓂ ᑎᓴᒪᓂ ᑐᖔᓄᑦ ᓄᓇᓕᖕᓂ.

ᐅᓇ ᐱᓕᕆᐊᒃᓴᖅ ᐃᑲᔫᑎᒃᓴᖅᑖᕈᑎᐅᕙᓚᐅᕐᑐᖅ ᐅᑯᓇᙵᑦ ᐃᓄᐃᑦ ᓄᑕᖅᑲᖏᑦ ᓯᕗᓪᓕᖅᐸᐅᑎᑕᐅᓗᑎᒃ ᐱᓕᕆᐊᒧᑦ, ᒐᕙᒪᑐᖃᒃᑯᓐᓂᒃ ᐃᑲᔫᑎᒋᔭᐅᔪᖅ ᒪᑯᓄᖓ ᐋᓐᓂᐊᖃᖅᑕᐃᓕᓂᕐᒧᑦ, ᐃᓅᖃᑎᒌᓄᑦ ᐊᒻᒪ ᐃᓕᓐᓂᐊᕈᑎᒃᓴᓄᑦ, ᐱᔨᑦᑎᕋᐅᑎᓄᑦ ᐊᒻᒪ ᐃᑲᔫᑎᓄᑦ ᐃᓄᐃᑦ ᓄᑕᕋᖏᓐᓄᑦ. ᐃᑲᔫᑎᒋᔭᐅᓚᐅᕐᑐᑦ ᑖᔅᓱᒧᖓ ᐱᓕᕆᐊᒃᓴᒧᑦ ᐃᓚᖃᓚᐅᕐᑐᖅ ᓂᕿᑖᕈᓐᓇᐅᑎᓕᕆᓂᕐᒥᑦ ᐃᓱᓕᓚᐅᕐᒪᓐ ᒫᔅᓯ 31-ᒥ.

ᓄᓇᖃᖅᑳᖅᑐᓂᒃ ᐱᔨᑦᑎᕋᐅᑎᓕᕆᔨᒃᑯᑦ ᑲᓇᑕᒥ ᑐᓴᖅᑎᑦᑎᓚᐅᕐᓯᒪᒻᒪᑕ $121.7-ᒥᓕᐊᓐ ᑖᓚᓂ ᐊᕐᕌᒍᒧᑦ ᐅᖓᕙᕆᐊᕈᑎᐅᓂᐊᖅᑐᒥᒃ ᒫᔅᓯᐅᑎᓪᓗᒍ. ᑭᓯᐊᓂᓕ ᑖᓐᓇ ᑮᓇᐅᔭᖅ ᐊᖏᖅᑕᐅᔭᕆᐊᖃᕐᒪᑦ ᒪᓕᒐᓕᕆᔨᕐᔪᐊᓄᑦ, ᑖᒃᑯᐊᓗ ᑲᑎᒪᓕᑕᐅᓐᓇᓛᖅᖢᑎᒃ ᐊᐃᕆᓕ 28 ᓂᕈᐊᕕᒡᔪᐊᕐᓇᖅ ᐊᓂᒍᖅᐸᑦ.

ᒍᕕᓐᑕᐱᓚᐃ, ᐋᓐᓂᐊᓯᐅᖅᑎ ᕿᑭᖅᑕᓂ ᐋᓐᓂᐊᕕᐊᓗᒃᒥ ᐊᒻᒪ ᐃᓕᓴᐃᔨᓄᑦ ᐃᑲᔪᖅᑎᐅᓪᓗᓂ ᔫᓂᕘᓯᑎᒥ ᐋᑐᕚᒥ, ᐃᓚᒋᔭᐅᓚᐅᕐᑐᖅ ᖃᐅᔨᓴᖅᑐᓂᒃ ᐊᒃᑐᐃᔾᔪᑎᐅᔪᓂᒃ ᓂᕿᑖᕈᓐᓇᐅᑎᓕᕆᓂᕐᒥᒃ ᐊᕐᕌᒍ ᐃᓗᐊᓂ ᕿᑭᖅᑖᓗᒃᒥᑦ.

ᖃᐅᔨᓴᖅᑎ ᑐᕇᓯ ᒐᓚᕗᐃ ᐅᖃᓚᐅᕐᑐᖅ ᓂᖀᑦ ᐊᑭᖏᑦ ᓄᓇᓕᖕᓂ ᐊᑭᑐᓗᐊᖅᑐᐊᓘᒻᒪ ᑕᒪᒃᑯᐊᓘᓐᓃᑦ ᐃᖅᑲᓇᐃᔮᖃᑦᑎᐊᖅᑐᑦ ᐊᒃᓱᕈᓚᐅᖃᑦᑕᕐᓂᕋᖅᖢᓂᒋᑦ ᓂᕿᑖᕋᓱᖕᓂᒃᑯᑦ.

“ᐊᐱᖅᓱᑲᑕᕈᓘᔭᓚᐅᕐᓯᒪᒐᒪ ᕕᕝᕗᐊᕆᐅᓚᐅᕐᑐᒥᓐ, ᐊᒻᒪᓗ ᑕᒪᕐᒥ ᐃᓄᐃᑦ ᐅᖃᖃᑎᒋᔭᒃᑲ ᐅᖃᓚᐅᕐᑐᑦ ᐃᓛᓐᓂᑦ ᓂᕆᙱᑦᑎᐊᒻᒪᕆᓚᐅᖅᐸᖕᓂᖏᓐᓂᒃ,” ᐅᖃᕐᑐᖅ ᒐᓚᕗᐃ, ᐃᓕᓴᐃᔭᐅᖃᑕᐅᕙᒃᑐᑦ ᑐᕌᓐᑐᒥ ᔫᓂᕘᓯᑎᒥ ᐃᓅᖃᑎᒌᖕᓂᓕᕆᓂᕐᒥᒃ.

“ᐊᐱᖅᓱᖅᑕᓕᒫᒃᑲ ᐊᒃᓱᕈᖅᓯᒪᔪᑦ.”

ᕚᓐᓇ ᓯᓇ, ᖃᐅᔨᓴᖅᑎᐅᖃᑕᐅᒻᒥᔪᖅ, ᐊᐱᖅᓱᖅᑕᖏᓐᓂᑦᑕᐅᖅ ᑕᐃᒪᓐᓇᐸᓗᒃ ᖃᐅᔨᓚᐅᕐᒥᔪᖅ ᓄᓇᖃᖅᑐᓂᒃ.

“ᐃᓄᐃᑦ ᐅᕙᑦᑎᓐᓂ ᐅᖃᖃᑦᑕᓚᐅᕐᑐᑦ ᐃᒻᒥᖕᓂ ᑳᒃᑎᓚᐅᖅᐸᖕᓂᖏᓐᓂᒃ ᕿᑐᕐᖓᖏᑦ ᓂᕆᔭᒃᓴᖃᕐᓂᐊᕐᒪᑕ. ᑕᐃᒪᓕ ᓇᓗᓇᙱᓚᖅ ᖃᓄᐃᓐᓂᐊᓕᕆᐊᒃᓴᖏᓐᓂᒃ,” ᐅᖃᕐᑐᖅ ᓯᓇ, ᖃᐅᔨᓴᖅᑎᐅᖃᑕᐅᔪᖅ ᐃᓕᓴᐃᔨ ᐅᕙᓂ ᔫᓂᕘᓯᑎ ᑳᓗᕌᑐ ᐴᕐᑐᔅ ᐃᓕᓐᓂᐊᖅᕕᖕᒥ.

ᐅᖃᒃᑲᓐᓂᖅᖢᓂ ᒫᓂ 80 ᐳᓴᓐᑎᖏᓐᓂᐸᓗᒃ ᓄᑕᖅᑲᑦ 14-ᓂ ᐅᑭᐅᓕᑦ ᑐᖔᓂᓪᓗ ᓄᓇᕗᒥᑦ ᓂᕆᔭᒃᓴᖃᑦᑎᐊᖃᑦᑕᙱᑦᑐᑦ, ᐊᖓᔪᖅᑳᕆᔭᐅᔪᑦ ᐱᒃᑲᖅᑎᑕᐅᓕᖅᐸᒃᖢᑎᒃ ᑭᓯᐊᓂᓕ ᑕᒻᒪᓐᓇ ᐱᓕᕆᔾᔪᓯᕐᒧᑦ ᓈᒻᒪᙱᓕᐅᕈᑎᖃᕈᑎᐅᔪᖅ.

“ᑕᐃᒪᓕ 80 ᐳᓴᓐᑎᖏᑦ ᓄᑕᖅᑲᑦ ᐊᖏᕐᕋᖃᑦᑕᕈᑎᒃ ᓂᕿᖃᑦᑎᐊᙱᑦᑐᒧᑦ ᐊᒻᒪᓗ 45 ᐳᓴᓐᑎᖏᑦ ᐊᖏᕐᕋᖏᓐᓂᒃ ᓂᕆᙱᓚᐅᖅᐸᒃᑐᑦ, ᑕᐃᒪᓐᓇ ᓈᒻᒪᒃᑲᓗᐊᕐᒫᓐ?,” ᐅᖃᕐᑐᖅ ᓯᓇ.

“ᐊᒻᒪᓗ ᓈᒻᒪᒋᔭᐅᓐᓇᔭᙱᖢᓂ ᐊᓯᐊᓃᑦᑐᓄᑦ ᑲᓇᑕᒥ, ᖃᓄᐃᒻᒪᓪᓕ ᑕᐃᒪᓐᓇ ᐊᖏᑐᐃᓐᓇᖅᐱᑕ ᓄᓇᕗᒥᑦ?”