ᓄᑖᓂ ᑖᒃᓯᓂ ᐱᑕᖃᙱᑦᑐᖅ, $2 ᒥᓕᐊᓐᓂ ᐊᑐᙱᓗᐊᕐᓯᒪᔪᑦ ᐃᖃᓗᖕᓄᑦ ᐊᐅᓚᑦᑎᔾᔪᑎᒃᓴᓂ

For English version, see No new taxes, $2.5M surplus in Iqaluit 2026 operating budget

ᐃᖃᓗᐃᑦ ᓄᓇᓕᐸᐅᔭᖏᑦ 2026-ᒥ ᐊᐅᓚᑦᑎᔾᔪᑎᒃᓴᖏᑦ ᒪᑯᓂᖓ ᓇᖕᒥᓂᖅ ᓄᓇᒋᔭᐅᔪᓄᑦ ᐱᑕᖃᙱᓪᓗᓂ ᑭᓯᐊᓂᓕ ᐊᑐᒐᒃᓴᐅᔪᓂᒃ ᐊᑐᕐᑕᐅᓯᒪᙱᑦᑐᕕᓃᑦ ᑮᓇᐅᔭᓕᐅᕈᑎᑦᓄᑦ ᕿᒥᕐᕈᐊᓚᐅᕐᑎᓪᓗᒋᑦ ᑮᓇᐅᔭᓕᕆᔨᒃᑯᑦ ᑲᑎᒪᔨᕋᓛᖏᑦ ᓄᕕᐱᕆ 11-ᖑᑎᓪᓗᒍ.

“ᖁᕕᐊᓱᒃᑐᖓ ᐅᖃᕈᓐᓇᕐᓂᓐᓂ ᓇᓕᒧᓈᕐᓯᒪᔪᓂ ᐊᐅᓚᑦᑎᔾᔪᑎᒃᓴᖃᕐᓂᑦᑎᓐᓂ ᑖᒃᓰᔭᕈᑎᑕᖃᙱᖢᓂ ᐊᖏᔪᓂ ᐅᕝᕙᓘᓐᓃᑦ ᐊᑭᑦᑐᕆᐊᖅᑎᑦᑎᓂᖅᑕᖃᙱᖢᑎᒃ,” ᐲᑕ ᑐᒥᐊᑎ, ᓄᓇᓕᐸᐅᔭᐃᑦ ᑮᓇᐅᔭᓕᕆᔨᒃᑯᑦ ᑐᑭᒧᐊᖅᑎᑦᑎᔨᖓ, ᐅᖃᓚᐅᕐᑐᖅ ᑲᑎᒪᔨᕋᓛᓄᑦ ᐅᖃᐅᓯᖃᖅᖢᓂ ᐋᖅᑭᒃᓱᖅᑕᐅᓂᑯᓂ 2026-ᒥ ᐊᐅᓚᑦᑎᔾᔪᑎᒃᓴᓂ.

ᐆᒧᖓᓕ 2026 ᐊᐅᓚᑦᑎᓂᕐᒧᑦ ᐊᑐᕐᑕᐅᔪᒃᓴᓂ, ᐃᓱᒪᒋᔭᐅᔪᖅ ᓄᓇᓕᐸᐅᔭᐃᑦ $2.3 ᒥᓕᐊᓐᓂ ᐊᑐᕆᐊᖃᔾᔮᕋᓱᒋᙱᖢᒋᑦ. ᐅᓇ ᐊᔾᔨᒋᙱᔾᔪᑎᒋᔭᐅᔪᖅ ᐅᕙᙵᑦ ᑮᓇᐅᔭᖅᑖᕆᔭᐅᓂᐊᖅᑐᓂᒃ $75.6 ᒥᓕᐊᓐᓂ ᐊᒻᒪ ᐊᑭᓕᐅᑎᐅᕙᓪᓕᐊᓇᔭᖅᑐᓂᒃ ᐊᑭᖃᕋᔭᕐᑐᓂᒃ $73.3 ᒥᓕᐊᓐᓂ.

ᐅᑯᐊ ᓇᐃᓴᐅᑎᑦ ᐊᑦᑎᖕᓂᕐᓴᐅᔪᑦ 2025-ᒥ ᐊᐅᓚᑦᑎᔾᔪᑎᐅᓚᐅᕐᑐᓂᒃ, ᑕᐃᔅᓱᒪᓂᓗ ᑮᓇᐅᔭᓕᐅᕈᑎᒃᓴᑦ ᐋᖅᑭᒃᑕᐅᓯᒪᓚᐅᕐᑐᑦ ᒫᓂ $80 ᒥᓕᐊᓐᓂ ᐊᒻᒪ ᐊᑭᓕᐅᑎᐅᓇᔭᕐᑐᑦ ᒫᓂ $77 ᒥᓕᐊᓐ.

ᐅᓇ ᑕᐃᒪᐃᔾᔪᑎᖃᑐᐃᓐᓇᕆᐊᓕᒃ ᐃᓱᓕᑎᑕᐅᓯᒪᓂᖓᓄᑦ ᐃᓄᐃᑦ ᓱᕈᓯᖏᑦ ᓯᕗᓪᓕᐅᓗᑎᒃ ᖃᓄᐃᓕᐅᕈᑎ ᓂᕿᑖᕈᑎᐅᕙᓚᐅᕐᑐᖅ ᒫᔅᓯᐅᓚᐅᕐᑐᒥ ᑕᒪᑐᒪᓂ ᐊᕐᕌᒍᒥ, ᑐᒥᐊᑎ ᐅᖃᕐᑐᖅ. ᓄᓇᓕᐸᐅᔭᐃᑦ ᐆᒥᖓ $2.8 ᒥᓕᐊᓐᓂ ᐋᑐᕚᒥ ᐱᖃᑦᑕᓚᐅᕐᑕᖓᓂ ᑕᒪᑐᒪᓂ ᐊᕐᕌᒍᒥ ᑐᓂᔭᐅᔾᔮᙱᒻᒪᑕ, ᑕᐃᒪᓕ ᑖᓐᓇ ᓄᓇᓕᐸᐅᔭᓄᑦ ᐱᔭᐅᔾᔮᙱᖢᓂ ᐊᑐᕐᓗᒍᓘᓐᓃᑦ ᐊᕐᕌᒍ.

ᑕᐃᒪᐃᓐᓂᖓᓄᑦ ᓄᓇᓕᐸᐅᔭᐃᑦ ᓄᓇᓕᖕᓄᑦ ᐃᑲᔫᑎᖏᑦ ᒥᒃᖠᕚᓪᓕᕐᓂᐊᕐᓂᖓᓂᒃ $2.5 ᒥᓕᐊᓐᓂ ᑕᐅᑐᒃᖢᒍ $5.3 ᒥᓕᐊᓐ 2025-ᒥ.

ᐱᓕᕆᕝᕕᒋᔭᐅᔪᓂᓪᓕ, ᐅᓄᕈᓐᓃᖅᐹᓪᓕᕐᑐᑦ ᑮᓇᐅᔭᓕᐊᕆᔭᐅᕙᒃᑐᑦ ᐊᒻᒪ ᐃᑲᔫᑎᓄᑦ ᐊᑭᓕᐅᑎᑦ ᑕᐅᑐᒃᖢᒍ “ᐃᖅᑲᓇᐃᔮᒃᓴᐃᑦ ᐃᓄᖃᐅᙱᑦᑐᑦ,” ᑐᒥᐊᑎ ᐅᖃᕐᑐᖅ.

ᐅᖃᖅᖢᓂ ᓄᓇᓕᐸᐅᔭᐃᑦ ᐃᖏᕐᕋᓂᖏᓐᓂᒃ 10 ᒪᐅᖓ 20 ᐳᓴᓐᑎᖏᑦ ᐃᖅᑲᓇᐃᔮᕆᔭᐅᓪᓗᐊᕐᑐᑦ ᐃᓄᖃᙱᓐᓂᖏᓐᓂᒃ. ᐅᓇ 2026 ᐊᐅᓚᑦᑎᔾᔪᑎᒃᓴᖅ ᓴᖅᑭᑎᑦᑎᓯᒪᔪᖅ “5 ᐳᓴᓐᑎᒥ ᐃᓄᖃᐅᙱᓐᓂᕐᒥ ᐃᖅᑲᓇᐃᔮᒃᓴᑦ,” ᑕᐃᒪᓐᓇᓗ ᐊᑭᓕᐅᑎᒃᓴᓂ ᒥᒃᖠᕚᓪᓕᕈᑎᐅᓪᓗᓂ.

ᐃᒪᖅ ᐊᒻᒪ ᑯᕕᕐᑕᕐᓂᖅ ᐅᓄᕐᓯᕚᓪᓕᕈᑎᐅᖃᑕᐅᓂᐊᕐᑐᑦ ᐊᑭᓕᐅᑎᒃᓴᓂ ᐊᕐᕌᒍᒧᑦ, ᒪᐅᖓ $20.3 ᒥᓕᐊᓐᓄᑦ — ᖃᓂᒋᔭᖓᓂ $5 ᒥᓕᐊᓐᓂ ᐅᓄᕐᓂᕐᓴᐅᓪᓗᓂ ᓯᕗᓂᐊᒍᑦ ᐊᐅᓚᑦᑎᔾᔪᑎᒃᓴᓂᒃ. ᑐᒥᐊᑎ ᐅᖃᓚᐅᕐᑐᖅ ᐊᒃᑐᐊᑐᐃᓐᓇᕆᐊᖃᕐᓂᖓᓂ ᓄᓇᓕᐸᐅᔭᐃᑦ ᐃᒪᕐᒧᑦ ᐊᖅᑯᑎ ᓄᑖᙳᕆᐊᖅᑕᐅᓂᖓᓄᑦ ᐊᒻᒪ ᓄᓇᓯᐅᑎᖃᕐᓂᕐᓴᐅᓕᕐᓗᑎᒃ.

ᐱᑕᖃᙱᑦᑐᖅ ᓄᑖᓂ ᑖᒃᓰᔭᕈᑎᓂᒃ ᐅᓄᕐᓯᒋᐊᖅᑕᐅᔪᓂᒃ ᐅᕙᓂ 2026-ᒥ ᐊᐅᓚᑦᑎᔾᔪᑎᒃᓴᓂᒃ. ᑭᓯᐊᓂᓕ ᓄᓇᓕᐸᐅᔭᐃᑦ ᐃᓱᒪᒋᔭᐅᔪᑦ ᒫᓂ $28.2 ᒥᓕᐊᓐᓂ ᑮᓇᐅᔭᓕᐅᕈᑎᖃᕐᓂᐊᕐᓂᖏᓐᓂ ᓇᖕᒥᓂᖅ ᓄᓇᖃᕐᓂᕐᒧᑦ — ᐅᓄᕐᓂᕐᓴᐅᕌᕐᔪᒃᖢᓂ 2025-ᒥ — ᓲᖃᐃᒻᒪ ᓄᑖᓂ ᐱᖁᑎᒋᔭᐅᓂᐊᖅᑐᓄᑦ ᓴᓇᕙᓪᓕᐊᓂᖏᓐᓄᑦ.

ᑮᓇᐅᔭᓕᕆᔨᒃᑯᑦ ᑲᑎᒪᔨᕋᓛᖏᑦ ᑕᒪᕐᒥ ᐃᑲᔪᖅᑐᐃᓚᐅᕐᑐᑦ ᐊᐅᓚᑦᑎᔾᔪᑎᒃᓴᒥ ᑖᓐᓇᓗ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᐊᖏᖅᑕᐅᔭᕆᐊᖃᓕᖅᖢᓂ.

ᓄᓇᓕᐸᐅᔭᐃᑦ ᐊᑐᕐᓂᐊᖅᑕᖓᑦ $83.4 ᒥᓕᐊᓐ 2026-ᒥ ᑮᓇᐅᔭᖅᑐᔪᓄᑦ ᐊᐅᓚᑦᑎᔾᔪᑎᒃᓴᖅ — ᐊᓯᖏᓪᓗ ᐊᑐᑕᐅᔾᔪᑎᒃᓴᓄᑦ ᐸᕐᓇᐅᑎᑦ, ᓄᓇᓕᐸᐅᔭᐃᓪᓗ ᓄᓇᓯᐅᑎᓂ ᐱᑖᕈᒪᔾᔪᑎᖏᑦ ᐊᒻᒪ ᐱᖁᑎᒃᓴᓕᐅᕈᑎᓄᑦ — ᐊᖏᕐᑕᐅᓯᒪᔪᖅ ᑲᑎᒪᔨᓄᑦ ᐅᒃᑑᐱᕆᐅᑎᓪᓗᒍ.

“ᐊᔪᙱᕈᓘᔭᕐᓯᒪᔪᒍᑦ ᐊᐅᓚᑦᑎᓂᒃᑯᑦ ᓈᒻᒪᓈᕐᓯᒪᔪᓂᒃ ᐋᖅᑭᒃᑕᐅᓯᒪᔪᓂ ᐊᑐᕋᓱᒃᖢᑕ ᐅᓪᓗᖅ ᐃᓱᓕᑦᑕᕌᖓᑦ,” ᐅᖃᕐᑐᖅ ᑲᑎᒪᔨ ᑲᐃᐅᓪ ᓴᐳᑦ, ᑮᓇᐅᔭᓕᕆᔨᒃᑯᑦ ᑲᑎᒪᔨᕋᓛᖏᓐᓄᑦ ᐃᒃᓯᕙᐅᑕᖅ ᐊᐱᕐᓱᖅᑕᐅᑎᓪᓗᒍ.

“ᖁᕕᐊᓱᑦᑎᐊᖅᑐᖓ ᓇᖕᒥᓂᖃᕐᓂᕐᒧᑦ ᑖᒃᓰᔭᕈᑎᓂ ᑲᒪᒋᔭᖃᕋᒪᐊᒻᒪ ᐊᑭᓕᐅᑎᒃᓴᓂ ᓄᓇᖃᖅᑐᓄᑦ.”