‘North of North’ ᑕᑯᒃᓴᐅᑎᑦᑎᕗᖅ ᐊᓯᐊᓂ ᓴᓂᓕᐊᓂ ᐃᓄᐃᑦ ᐃᓅᓯᖓᓐᓂ

ᓄᓇᕗᒻᒥ-ᑐᙵᕕᓕᒃ ᐃᔪᕐᓇᖅᑐᖅ ᓯᕗᓪᓕᖅᐹᒥ ᓴᖅᑭᔮᓚᐅᖅᐳᖅ CBC, APTN−ᑯᑦ ᔭᓄᐊᕆ 7−ᒥ ᓯᕗᓂᐊᓂ ᐅᐱᕐᙶᒥ Netflix ᑕᑯᒃᓴᐅᑎᑕᐅᓂᖓᓂ

ᑕᕐᕆᔭᒐᒃᓴᓂ ᐱᙳᐊᖅᑎ ᐋᓇ ᓛᒻ ᑕᑯᒃᓴᐅᕗᖅ ᑕᕐᕆᔭᓕᐅᖅᑎᓪᓗᒋᑦ North of North−ᒥ, ᓄᑖᖑᔪᒥ ᐃᔪᕐᓇᖅᑐᓂ ᑲᑎᙵᓂᐅᔪᒥ ᓯᕗᓪᓕᖅᐸᐅᔪᒥ ᖁᙱᐊᖅᑕᐅᓚᐅᖅᑐᒥ ᔭᓄᐊᕆ 7−ᒥ CBC−ᑯᑦ ᐊᒻᒪ APTN−ᑯᑦ. ᑲᑎᙵᓂᐅᔪᑦ ᑕᕐᕆᔭᓕᐊᖑᓚᐅᖅᐳᖅ ᐃᖃᓗᖕᓂ ᐊᕐᕌᓂ. (ᔮᔅᐳᕐ ᓵᕙᔾᒧᑦ ᐊᔾᔨᓕᐅᖅᑕᐅᔪᖅ/Netflix)

By ᓵᒻ ᓚᔅᑲᕋᔅᒧᑦ - ᐊᓯᐊᒎᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ

For English version, see ‘North of North’ co-creators depict a different side of Inuit life

ᒪᕐᕉᖕᓂ ᓄᓇᕗᒻᒥ ᑕᕐᕆᔭᓕᐅᖅᑏᑦ ᐊᑲᖅᓴᓚᐅᙱᓚᑦ ᓯᕗᓂᐊᓂ ᐅᓂᒃᑳᖅᑐᐊᕐᓂᐅᔪᓂ ᐃᓄᖕᓂ..

ᑕᐃᒫᒃ ᖁᖅᓴᓪᓚᖕᓇᖅᑐᒃᓴᐅᙱᓚᖅ ᔅᑕᐃᓯ ᐊᒡᓗᒃ ᒪᒃᑖᓄᑦ ᐊᒻᒪ ᐊᓖᑎᐊ ᐊᕐᓇᖅᑯᖅ−ᐳᕆᐅᓪ ᑕᑯᒃᓴᐅᑎᑦᑎᔪᒪᕐᔪᐊᓚᐅᖅᐳᑦ ᓄᓇᕐᔪᐊᒥ ᐊᔾᔨᒋᙱᑕᖓᓂ ᑕᑯᒃᓴᐅᑎᑦᑎᓂᐅᔪᒥ ᐃᓄᐃᑦ ᐃᓕᖅᑯᓯᖓᓐᓂ.

ᒪᕐᕉᒃ ᑲᑎᓚᐅᖅᐳᑦ ᓴᖅᑭᑎᑦᑎᓂᕐᒥ North of North−ᒥ, 8−ᓂ-ᖁᙱᐊᒐᒃᓴᓂ ᐃᔪᕐᓇᖅᑐᒥ ᑲᑎᙵᓂᐅᔪᒥ ᓯᕗᓪᓕᖅᐹᒥ ᓴᖅᑭᔮᓚᐅᖅᑐᒥ ᔭᓄᐊᕆ 7−ᒥ CBC−ᑯᑦ ᐊᒻᒪ APTN−ᑯᑦ. ᑲᑎᙵᓂᐅᔪᖅ ᐊᓱᐃᓛᒃ ᑕᑯᔭᐅᔪᓐᓇᕐᓂᐊᖅᐳᖅ ᓄᓇᕐᔪᐊᓕᒫᒧᑦ Netflix−ᑯᑦ ᑕᒪᑐᒪᓂ ᐅᐱᕐᙶᖑᔪᒥ.

ᔅᑕᐃᓯ ᐊᒡᓗᒃ ᒪᒃᑖᓄᑦ ᐊᒻᒪ ᐊᓖᑎᐊ ᐊᕐᓇᖅᑯᖅ−ᐳᕆᐅᓪ, ᓴᖅᑭᑎᑦᑎᔨᐅᔪᑦ North of North−ᒥ, ᓴᖅᑭᑉᐳᑦ ᓯᐊᒻᒪᖅᑎᑦᑎᓂᕐᒧᑦ ᖃᓄᐃᓐᓂᐅᔪᒥ ᑐᕌᓐᑐᒥ ᑎᓯᐱᕆᒥ. (ᓵᒻ ᓚᔅᑲᕋᔅ ᐊᔾᔨᓕᐅᖅᑕᖓ, ᐊᓯᐊᒎᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ)

ᐊᒡᓗᒃ ᒪᒃᑖᓄᑦ, ᐊᕐᓇᖅᑯᖅ−ᐳᕆᐅᓪ ᐊᒻᒪ ᐃᖃᓗᖕᓂᕐᒥᐅᑕᖅ ᑕᕐᕆᔭᓕᐊᓂ ᐱᙳᐊᖅᑎ ᐋᓇ ᓛᒻ, ᐱᙳᐊᖅᑐᒥ ᓴᖅᑭᔮᓛᖑᔪᒥ ᐃᓄᙳᐊᖑᔪᒥ ᓯᐊᔭᒥ ᑲᑎᙵᓂᐅᔪᒥ, ᑕᒪᒃᑭᑦ ᐅᐸᒃᓯᒪᓚᐅᖅᐳᑦ ᑐᓴᒐᒃᓴᓕᐊᖑᔪᒥ ᐅᓪᓗᖓᓂ CBC ᑕᕐᕆᔭᓕᐅᕐᕕᖕᒥ ᑐᕌᓐᑐᒥ ᑎᓯᐱᕆ 12−ᒥ ᖁᕝᕙᖅᓴᐃᓂᕐᒧᑦ ᑎᑭᑉᐸᓪᓕᐊᔪᒥ ᑲᑎᙵᓂᐅᔪᓂ.

ᐊᒡᓗᒃ ᒪᒃᑖᓄᑦ ᐅᖃᓚᐅᖅᐳᖅ ᓄᓇᖃᖅᑳᖅᓯᒪᙱᑦᑐᑦ ᓴᖅᑭᑎᑦᑎᔨᐅᔪᓂ ᑕᐃᔅᓱᒪᓂᒃᑲᓐᓂᖅ ᓴᖅᑭᔮᖅᑎᑦᑎᒐᔪᒃᐳᑦ ᓄᓇᖃᖅᑳᖅᓯᒪᔪᓂ ᐊᕐᓇᓂ ᐃᒋᑕᒃᓴᑐᐃᓐᓇᐅᓪᓗᑎᒃ ᐅᕝᕙᓘᓐᓃᑦ ᐅᓗᕆᐊᓇᖅᑐᒦᓐᓂᖏᓐᓂ.

“ᐱᔪᒪᓚᐅᖅᐳᒍᑦ ᓴᙱᔪᓂ ᐊᕐᓇᓂ ᐃᓄᙳᐊᖑᔪᓂ ᓴᙱᔪᓂ ᐊᒻᒪ ᓴᖕᒥᓂᖃᖅᑐᒥ ᓇᖕᒥᓂᖅ ᑎᒥᒥᑎᒍᑦ ᐃᓅᓂᖏᓐᓂ ᐊᒻᒪ ᐊᐃᑉᐸᖃᕐᓂᕐᒥ ᐃᒃᐱᒍᓱᖕᓂᖃᖅᑐᒥ ,” ᐅᖃᓚᐅᖅᐳᖅ ᑲᑎᙵᓂᐅᔪᒥ, ᑕᕐᕆᔭᓕᐊᖑᓚᐅᖅᑐᒥ ᐃᖃᓗᖕᓂ ᑭᓯᐊᓂ ᐋᖅᑭᒃᓯᒪᔪᖅ ᓱᓕᙱᓐᓂᐅᔪᒥ ᓄᓇᕗᒻᒥ ᓄᓇᙳᐊᖑᔪᒥ Ice Cove−ᒥ.

“ᐊᒻᒪᓗ ᑕᑯᒃᓴᐅᑎᑦᑎᔪᒪᓚᐅᖅᐳᒍᑦ ᐃᓄᖕᓂ ᐊᖑᑎᓂ ᐊᐃᑉᐸᖔᖓᓂ ᖃᓄᖅ ᑕᑯᒃᓴᐅᑎᑕᐅᕙᖕᓂᖏᓐᓂ ᐅᓗᕆᐊᓇᒐᓚᒃᖢᑎᒃ ᐅᕝᕙᓘᓐᓃᑦ ᑲᑉᐱᐊᓇᖅᖢᑎᒃ.

“ᑕᑯᕙᒃᐳᒍᑦ ᐃᓅᖃᑎᑦᑎᓐᓂ ᓄᓇᖃᖅᑳᖅᓯᒪᔪᓂ ᐃᓄᖕᓂ ᓴᙱᔪᐊᓗᒐᓚᐅᓪᓗᑎᒃ ᐊᒻᒪ ᐱᑕᖃᖅᖢᑎᒃ ᑭᓯᐊᓂ ᐊᑖᑕᑦᑎᐊᕙᐅᒋᓪᓗᑎᒃ ᐊᒻᒪ ᐃᓄᑦᑎᐊᕙᐅᓪᓗᑎᒃ ᐊᒻᒪ ᓂᑲᒐᓱᖕᓂᖃᖅᖢᑎᒃ ᐃᓅᓪᓗᑎᒃ. ᐅᑯᐊ ᐊᒃᑲᒋᕙᒃᑲ. ᑕᑯᒃᓴᐅᑎᑦᑎᔪᒪᓚᐅᖅᐳᒍᑦ ᐃᓄᖕᓂ ᐊᖑᑎᓂ ᐱᐅᓪᓗᑎᒃ, ᐃᓄᑦᑎᐊᕙᐅᓪᓗᑎᒃ, ᓂᑲᒍᓱᒃᖢᑎᒃ ᐃᓅᓪᓗᑎᒃ.”

ᑲᑎᙵᓂᐅᔪᖅ ᑕᐅᑐᒃᑕᑐᐊᖃᑲᐃᓐᓇᖅᐳᖅ ᓯᐊᔭᒥ, ᒪᒃᑯᒃᑐᒥ ᐅᐃᖃᙱᖦᖢᓂ ᐊᓈᓇᐅᔪᖅ ᓴᖅᑭᑎᑦᑎᓇᓱᐊᖅᑐᒥ ᓄᑖᖑᔪᒥ ᐃᓅᓯᐅᔪᒥ ᐃᒻᒥᓄᑦ ᒪᓕᒃᑐᒥ ᐃᓱᓕᓐᓂᖓᓂ ᑲᑎᑎᑕᐅᓯᒪᓂᖓᓂ.

ᓛᒻᒧᑦ, 24−ᖑᔪᖅ, ᐅᓇ ᓯᕗᓪᓕᖅᐹᖑᔪᒥ ᑕᑯᒃᓴᐅᓛᖑᔪᒥ ᐱᙳᐊᕐᓂᖓᓂ.

“ᐱᔪᒪᕐᔪᐊᓚᐅᖅᐸᕋ,”ᐅᖃᓚᐅᖅᐳᖅ. “ᐱᑕᖃᙱᓐᓂᖓᓂ ᐅᖃᐅᓯᑦᑎᐊᕙᐅᓂᖅᓴᒥ, ᐱᔪᒪᕐᔪᐊᓚᐅᖅᐳᖓ ᐱᓕᕆᓯᒪᑐᐃᓐᓇᖅᓯᒪᒐᒪ ᑕᓚᕖᓴᒃᑰᕐᓂᐅᔪᒥ.”

ᐋᓇ ᓛᒻ, ᑕᕐᕆᔭᒐᒃᓴᓂ ᐱᙳᐊᖅᑎ ᐃᖃᓗᖕᓂᕐᒥᐅᑕᖅ, ᑕᑯᒃᓴᐅᒐᔪᓛᖑᔪᒥ ᐃᓂᖃᖅᐳᖅ ᓯᐊᔭᐅᓪᓗᓂ North of North−ᒥ. ᐅᕙᓂ ᑕᑯᒃᓴᐅᕗᖅ ᓯᐊᒻᒪᖅᑎᑦᑎᓂᕐᒥ ᖃᓄᐃᓐᓂᐅᔪᒥ ᑐᕌᓐᑐᒥ ᑎᓯᐱᕆᒥ ᖁᕝᕙᖅᓴᐃᓂᕐᒧᑦ ᑲᑎᙵᓂᐅᔪᒥ. (ᓵᒻ ᓚᔅᑲᕋᔅ ᐊᔾᔨᓕᐅᖅᑕᖓ, ᐊᓯᐊᒎᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ)

ᓛᒻ ᐃᓚᐅᖃᑕᐅᓚᐅᖅᐳᖅ 2018−ᒥ ᑕᕐᕆᔭᓕᐊᖑᔪᒥ The Grizzlies−ᓂ. ᐊᑐᕐᓂᖃᐅᑎᖃᖅᓯᒪᒋᕗᖅ ᐊᔾᔨᒌᙱᑦᑐᓂ ᑕᓚᕖᓴᒃᑯᑦ ᑲᑎᙵᓂᐅᔪᓂ, ᐃᓚᖃᖅᑐᒥ True Detective, Three Pines ᐊᒻᒪ Trickster.

“ᑕᒪᒃᑭᒐᓚᑦ ᐃᓂᒋᓚᐅᖅᑕᒃᑲ ᐅᖁᒪᐃᐸᓗᒃᓯᒪᕗᑦ ᐊᒻᒪ ᓄᒫᓱᒃᖢᓂ ᐊᒻᒪ ᓂᙵᐅᒪᓪᓗᓂ,” ᓛᒻ ᐅᖃᓚᐅᖅᐳᖅ.

\ᐋᓇ ᓛᒻ, ᑕᕐᕆᔭᒐᒃᓴᓂ ᐱᙳᐊᖅᑎ ᐃᖃᓗᖕᓂᕐᒥᐅᑕᖅ, ᑕᑯᒃᓴᐅᒐᔪᓛᖑᔪᒥ ᐃᓂᖃᖅᐳᖅ ᓯᐊᔭᐅᓪᓗᓂ North of North−ᒥ. ᐅᕙᓂ ᑕᑯᒃᓴᐅᕗᖅ ᓯᐊᒻᒪᖅᑎᑦᑎᓂᕐᒥ ᖃᓄᐃᓐᓂᐅᔪᒥ ᑐᕌᓐᑐᒥ ᑎᓯᐱᕆᒥ ᖁᕝᕙᖅᓴᐃᓂᕐᒧᑦ ᑲᑎᙵᓂᐅᔪᒥ. (ᓵᒻ ᓚᔅᑲᕋᔅ ᐊᔾᔨᓕᐅᖅᑕᖓ, ᐊᓯᐊᒎᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ)“ᐊᓕᐊᓇᐃᒋᑦᑎᐊᖅᑕᕋ ᑕᐃᒪᑦᑐᒐᓚᖕᓂ ᐱᓕᕆᓪᓗᓂ. ᐃᓱᒪᕗᖓ ᑕᓚᕖᓴᒃᑰᖅᖢᓂ ᐊᓕᐊᓇᐃᑦᑎᐊᖅᑐᖅ. ᑭᓯᐊᓂ ᑕᑯᓪᓗᓂ ᔅᑕᐃᓯ ᐊᒻᒪ ᐊᓖᑎᐊ ᓴᖅᑭᑎᑦᑎᓂᐊᕐᓂᖏᓐᓂ ᐃᔪᕐᓇᖅᑐᒥ, ᐃᒪᐃᒐᓚᓚᐅᖅᐳᖓ, ᖃᓄᖅ ᐃᓚᒋᔭᐅᔪᓐᓇᖅᐳᖓ? ᖃᓄᐃᓕᐅᕈᓐᓇᖅᐳᖓ? ᐆᒃᑐᕋᓪᓚᕆᖕᓂᐊᖅᐳᖓ ᑕᒪᒃᑭᓄᑦ ᐃᓂᒃᓴᐅᔪᓄᑦ ᐃᓕᓯᒪᔪᓂ ᒪᒃᐱᖅᑐᒐᕐᒥ ᐱᔪᒪᒐᒪ ᑭᓱᑐᐃᓐᓇᕐᒥ.”

ᓛᒻ ᐃᓚᒋᐊᖅᓯᓚᐅᖅᐳᖅ ᐃᓕᔭᐅᓂᖓᓂ ᓯᐊᔭᐅᓂᕐᒥ ᐱᔪᒪᑦᑎᐊᓚᐅᖅᐸᖓ.

“ᕿᐊᓚᐅᖅᐳᖓ,”ᐅᖃᓚᐅᖅᐳᖅ.

“ᐊᒻᒪ ᐊᒥᓱᐊᖅᓱᖅᖢᖓ ᕿᐊᓚᐅᖅᐳᖓ ᓂᕆᐅᓚᐅᙱᓐᓂᓐᓂ ᐱᒋᓂᐊᖅᑕᕋ. ᐊᒻᒪ ᕿᐊᓚᐅᖅᐳᖓ ᐊᒥᓱᐊᖅᓱᖅᖢᖓ ᖃᐅᔨᒐᒪ ᐱᒋᓂᓐᓂ. ᖁᔭᓕᕐᔪᐊᖅᐳᖓ. ᐱᓕᕆᐊᒃᓴᑦ ᐅᐊᑲᓪᓚᓚᐅᖅᐳᖅ ᐊᒻᒪ ᓂᒡᓚᓱᓚᐅᖅᐳᖅ ᐊᒻᒪ ᑕᖃᓇᕐᔪᐊᓚᐅᖅᐳᖅᔭ ᑭᓯᐊᓂ ᐃᓱᒪᕗᖓ ᐱᐅᕐᔪᐊᕐᓂᐅᓚᐅᖅᑐᖅ ᐆᒥᖓ ᐱᓕᕆᐊᒃᓴᐅᔪᒥ ᑲᒪᓇᖅᑐᓂ ᑕᕐᕆᔭᐅᓕᖅᑕᐅᖃᑎᒋᔭᓐᓂ.”

ᓛᒻᑎᑐᑦ, ᐊᕐᓇᖅᑯᖅ−ᐳᕆᐅᓪ ᖁᕕᐊᕐᔪᐊᖅᐳᖅ ᐃᓚᓯᒋᐊᓚᐅᕐᓂᖓᓂ ᐱᖅᑯᓯᑐᖃᖅᑎᒍᑦ ᐊᑐᖅᑕᐅᕙᒃᑐᓂ ᐃᓚᐅᖃᑕᐅᓂᕐᒧᑦ ᐃᔪᕐᓇᖅᑐᒥ ᑲᑎᙵᓂᐅᔪᒥ.

“ᖁᕕᐊᓇᕐᔪᐊᖅᐳᖅ,”ᐅᖃᓚᐅᖅᐳᖅ.

“ᐃᓱᒪᓚᐅᖅᐳᖓ ᐱᔪᓐᓇᔾᔮᕋᓱᒋᙱᖦᖢᖓ. ᑭᓯᐊᓂ ᔅᑕᐃᓯᐅᑉ ᐱᓕᕆᑎᓚᐅᖅᐹᖓ. ᐊᒻᒪ ᖁᕕᐊᓱᑦᑎᐊᖅᐳᖓ. ᓱᓕ ᐊᓕᐊᓇᐃᒋᔮᓗᒐ ᓱᓕᔪᒥᒃ ᐊᑐᖅᑕᐅᓚᐅᖅᓯᒪᔪᓂ ᑕᕐᕆᔭᓕᐅᕈᑎᓂ. ᐊᓕᐊᓇᐃᒋᑦᑎᐊᖅᑕᕋ ᑕᓚᕖᓴᒃᑰᖅᖢᓂ. ᐊᓕᐊᓇᐃᒋᑦᑎᐊᖅᑕᕋ ᑭᓱᓕᒫᑦ. ᑭᓯᐊᓂ ᐊᓕᐊᓇᐃᒋᓕᑦᑎᐊᖅᑕᕋ ᐃᔪᕐᓇᖅᑐᓂ ᐊᒻᒪ ᐅᕙᓐᓂᒃ ᐃᓱᒪᒋᔪᓐᓃᖅᐳᖓ ᐃᓅᓪᓗᖓ ᑕᐃᑲᓂ ᐃᓂᖃᙱᓐᓂᖓᓂ ᑕᐃᑲᓂ ᐃᓂᐅᔪᒥ.

“ᐳᓚᕋᖅᑎᐅᔮᓚᐅᐳᖓ ᓯᕗᓪᓕᕐᒥ. ᑭᓯᐊᓂ ᐊᓕᐊᓇᐃᒋᕐᔪᐊᖅᐸᖃ ᐊᒻᒪ ᐅᑎᒧᑦ ᑕᑯᒋᐊᔾᔮᕈᓐᓃᖅᐳᖓ.”

ᐊᕐᓇᖅᑯᖅ−ᐳᕆᐅᓪ ᐅᖃᓚᐅᖅᐳᖅ ᖁᕕᐊᓚᐅᖅᐳᖅ ᑕᑯᒃᓴᐅᑎᑦᑎᓂᕐᒥ ᑕᑯᕙᖕᓂᖓᓂ ᐃᓄᐃᑦ ᐃᓅᓯᖓᓐᓂ.

“ᐱᐅᙱᑦᑐᒻᒪᕆᐊᓗᖕᓂ ᐱᓕᕆᓂᖃᖅᐳᖅ ᑕᖅᑳᓂ ᐃᓄᖕᓂ ᑕᒻᒪᖅᓯᒪᓂᕐᔪᐊᖑᔪᒥ,” ᐅᖃᓚᐅᖅᐳᖅ.

“ᓯᕗᓪᓕᖅᐹᒥ, ᐃᓄᐃᑦ ᖁᒃᓴᓪᓚᒃᐳᑦ ᐱᑕᖃᕐᓂᑦᑎᓐᓂ, ᓯᕗᓪᓕᐅᔪᒥ ᐊᒻᒪ ᐱᒻᒪᕆᐅᔪᒥ, ᒫᓐᓇᐅᔪᒥ ᐅᓪᓗᒥᒥ. ᑭᓯᐊᓂ ᐊᒥᓱᐊᓗᖕᓂ ᑕᒻᒪᖅᓯᒪᔪᓂ ᐃᓱᒪᒋᔭᖃᕐᓂᖃᖅᐳᖅ ᐊᒻᒪ ᐃᓱᒪᒋᔭᐅᒐᔪᒃᑐᒥ ᐊᔾᔨᒋᙱᕐᔪᐊᖅᑕᖓᓂ ᐃᓄᖕᒥ ᖃᓄᐃᑦᑐᒥᓪᓗ ᐊᕐᕌᒍᓄᑦ 100-ᓂ ᑕᕐᕆᔭᐅᓕᕐᓂᕐᒥ. ᑕᐃᒫᒃ, ᖁᕕᐊᕐᔪᐊᖅᐳᒍᑦ ᐃᓅᓪᓗᑕ ᐊᕐᓇᐅᓪᓗᑕ ᑲᑐᔾᔨᖃᑎᒌᖕᓂᕐᒧᑦ ᐆᒥᖓ ᐱᓕᕆᐊᒃᓴᐅᔪᒥ ᐊᒻᒪ ᑕᑯᑎᑦᑎᓗᑕ ᓄᓇᕐᔪᐊᕐᒥ ᖃᓄᖅ ᑕᑯᕙᖕᓂᑦᑎᓐᓂ.”

Share This Story

(0) Comments

Join the Conversation

Your email address will not be published. Required fields are marked *

*