ᓄᓇᕗᒻᒥ ᑐᙵᕕᒃᑯᑦ ᑮᓇᐅᔭᓂ ᐊᑐᖅᑐᒃᓴᓕᐅᓲᖑᕗᖅ $2 ᒥᓕᐊᓐᓂ ᓂᐅᕕᕈᓐᓇᐅᑎᓂᒃ ᖁᕝᕙᕆᐊᖅᑎᑦᑎᓂᕐᒥ ᓂᕈᐊᖅᑐᓂ ᓴᖅᑭᑦᑐᓂ

For the English version of this story, please see NTI budgets $2 million for vouchers to encourage voter participation.

ᓄᓇᕗᒻᒥ ᑐᙵᕕᒃᑯᑦ ᓂᕆᐅᒃᐳᑦ ᐊᑐᐃᓐᓇᖃᖅᑎᑦᑎᓂᕐᒥ $100−ᓂ ᓂᐅᕕᕈᓐᓇᐅᑎᓂᒃ ᐃᓄᖕᓄᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᓴᖅᑭᑦᑐᓄᑦ ᓂᕈᐊᕐᕕᐅᔪᓂ ᑎᓯᐱᕆ 9−ᒥ ᐊᖓᔪᖅᑳᙳᕋᓱᖕᓂᕐᒧᑦ ᓂᕈᐊᕐᓂᐅᔪᒥ “ᓵᓚᒃᓴᕐᓂᕐᒥ-ᓵᓚᒃᓴᕐᓂᕐᒧᑦ ᖃᓄᐃᓐᓂᐅᓂᐊᕐᓂᖓᓂ.”

“ᐃᓕᓯᓂᕐᒥ ᐱᕚᓪᓕᕈᑎᒃᓴᓂ ᐃᓄᖕᓄᑦ ᐊᖏᕐᕋᐅᔪᓄᑦ ᐊᖏᒡᓕᒋᐊᖅᑎᑦᑎᐅᔮᕐᔪᒃᑎᓪᓗᒋᑦ ᓂᕈᐊᕐᓂᕐᒧᑦ ᐃᓚᐅᖃᑕᐅᓂᐅᔪᒥ ᓂᕈᐊᕐᓂᐅᔪᒥ,” ᐃᕙᓗᐊᕐᔪᒃ ᒥᐊᕆᑦ, ᐅᖃᖅᑎᐅᔪᖅ ᓄᓇᕗᒻᒥ ᑐᙵᕕᒃᑯᓐᓄᑦ, ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐅᓂᒃᑳᕆᓪᓗᓂ ᓅᓐᓂᐅᔪᒥ.

ᑎᓯᐱᕆ 9−ᒥ, ᐃᓄᐃᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᑦ ᓄᓇᕗᒻᒥ ᓂᕈᐊᖅᓯᓂᐊᖅᐳᑦ ᓄᑖᖑᔪᒥ ᐊᖓᔪᖅᑳᒃᓴᒥ ᓄᓇᕗᒻᒥ ᑐᙵᕕᒃᑯᓐᓄᑦ, ᑲᑐᔾᔨᖃᑎᒌᖑᔪᒥ ᑲᒪᒋᔭᖃᖅᑐᒥ ᓇᓗᓇᐃᖅᓯᓂᕐᒧᑦ ᐱᓕᕆᐊᒃᓴᐅᔪᑦ ᓴᓇᔭᐅᔪᓄᑦ ᓄᓇᕗᒻᒥ ᐃᓄᖕᓄᑦ ᐅᕘᓇ ᓄᓇᕗᒻᒥ ᐊᖏᕈᑕᐅᔪᒥ ᐃᑲᔪᖅᓯᖅᑕᐅᓂᖏᓐᓂ.

ᐊᑐᖅᑕᐅᒐᔪᒃᑐᒥ, ᓂᕈᐊᖅᑎᓄᑦ ᓴᖅᑭᑦᑐᓄᑦ ᓂᕈᐊᕐᓂᐅᔪᓂ ᓄᓇᕗᒻᒥ ᑐᙵᕕᒃᑯᓐᓂᑦ ᐊᒻᒪ ᐊᕕᒃᑐᖅᓯᒪᓂᐅᔪᓄᑦ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ 30 ᐳᓴᓐᑎᐅᒐᔪᒃᐳᑦ. ᒫᓐᓇᓕᓴᐅᔪᓂ ᐊᕐᕌᒍᓂᑦ, ᑕᒪᓐᓇ ᑲᑕᒃᓯᒪᕗᖅ 20 ᐳᓴᓐᑎᒥ ᐊᑖᓄᑦ, ᒥᐊᕆᑦ ᐅᖃᓚᐅᖅᐳᖅ.

2021−ᒥ, ᐊᓗᑭ ᑰᑦᑎᖅ ᓵᓚᒃᓴᐅᓚᐅᖅᐳᖅ ᒪᕐᕈᖓᓂ ᑲᑎᒪᔨᐅᓂᖓᓂ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖑᓂᖓᓂ ᓂᕈᐊᕐᓂᐅᔪᒥ 17.5 ᐳᓴᓐᑎᑐᐃᓐᓇᕐᒥ ᐱᔪᓐᓇᖅᑐᓂ ᓂᕈᐊᖅᑎᐅᔪᓂ ᓂᕈᐊᓚᐅᖅᐳᑦ. ᑰᑦᑎᖅ ᐱᓇᓱᙱᓚᖅ ᓂᕈᐊᖅᑕᐅᒃᑲᓐᓂᕋᓱᐊᙱᓚᖅ, ᕿᒪᐃᓪᓗᓂ ᐃᓂᖓᓂ ᒪᑐᐃᖓᓪᓗᓂ ᑎᓴᒪᓄᑦ ᓂᕈᐊᒐᒃᓴᐅᔪᓄᑦ.

ᐆᒧᖓ ᓂᕈᐊᕐᓂᐅᔪᒥ, ᓄᓇᕗᒻᒥ ᑐᙵᕕᒃᑯᑦ ᑲᑎᒪᔨᖏᑦ ᓂᕈᐊᓚᐅᖅᐳᑦ ᑐᓐᓂᖅᓴᐃᓂᕐᒥ $2 ᒥᓕᐊᓐᓂ ᓂᐅᕕᕈᓐᓇᐅᑎᓄᑦ — ᓈᒻᒪᒃᑐᓂ 20,000−ᓄᑦ ᐃᓄᖕᓄᑦ — ᐱᓕᕆᓂᐅᔪᒥ ᑲᔪᖏᖅᓴᐃᓂᕐᒧᑦ ᐱᔪᓐᓇᖅᑐᓂ ᓂᕈᐊᖅᑎᓂ ᓂᕈᐊᕆᐊᖅᑐᕐᓂᕐᒧᑦ.

ᑕᒪᒃᑭᑦ ᓂᕈᐊᖅᑏᑦ ᓴᖅᑭᑦᑐᓂ ᓯᕗᓂᐊᒍᑦ ᓂᕈᐊᕐᓂᐅᔪᓂ ᑎᓯᐱᕆ 3−ᒥ ᑎᓯᐱᕆ 6−ᒧᑦ ᐅᕝᕙᓘᓐᓃᑦ ᓂᕈᐊᕐᓂᕐᒥ ᐅᓪᓗᖓᓂ ᑎᓯᐱᕆ 9−ᒥ ᐱᓂᐊᖅᐳᑦ ᓂᐅᕕᕈᓐᓇᐅᑎᒥᒃ ᓴᖑᑎᑕᐅᔪᓐᓇᖅᑐᒥ $100−ᒥ ᑐᓐᓂᖅᑯᓯᐊᖑᔪᒧᑦ ᐊᐅᒃᑕᔫᒧᑦ ᑯᐊᐸᒃᑯᖏᓐᓂ ᐅᕝᕙᓘᓐᓃᑦ ᓂᐅᕕᖅᑎᒃᑯᓐᓂ ᐊᑐᕆᐊᓕᖕᒥ ᐊᕐᕌᒎᑉ ᓄᙳᐊᓂ.

ᑕᐃᒃᑯᐊ ᓄᓇᖃᖅᑐᓂ ᓄᓇᕘᑉ ᓯᓚᑖᓂ ᓂᕈᐊᕈᓐᓇᖅᐳᑦ ᓂᕈᐊᕐᕕᐅᔪᓂ ᔭᓗᓇᐃᕝᒥ, ᐋᑐᕚᒥ, ᐃᐊᑦᒪᓐᑕᓐᒥ ᐅᕝᕙᓘᓐᓃᑦ ᐅᐃᓂᐊᒡᒥ ᐊᒻᒪ ᑎᑎᖅᑲᒃᑯᕕᒃᑎᒍᑦ−ᓇᒃᓯᐅᔾᔭᐅᔪᓂ $100 ᕖᓴᒥ ᐊᑭᓕᖅᑕᐅᑲᐅᑎᒋᓯᒪᔪᒥ ᐊᐅᒃᑕᔫᒥᒃ ᓂᕈᐊᕐᓂᐅᑉ ᑭᖑᓂᐊᓂ ᑕᑕᑎᕆᓗᑎᒃ ᓂᐅᕕᕈᓐᓇᐅᑎᒥᒃ ᑐᒃᓯᕋᐅᑎᒥᒃ ᑕᑕᑎᕆᐊᓕᖕᒥ.

ᑲᑐᔾᔨᖃᑎᒌᖑᔪᑦ ᑐᓂᓯᓂᐊᕆᕗᑦ ᐊᑐᓂ ᓯᕗᓕᐅᖅᑎᐅᔪᓂ ᓂᕈᐊᒐᒃᓴᐅᔪᒥ $5,000−ᒥ ᐊᑭᓕᒃᓴᓂᒍᓐᓇᐅᑎᒥᒃ ᓂᕈᐊᒐᒃᓴᐅᓂᖓᓂ ᒪᓂᓴᕐᓗᓂ ᐊᐅᓪᓛᕐᓂᐅᔪᓄᑦ ᐊᒻᒪ ᐋᖅᑭᒃᓱᐃᕗᑦ ᑕᓚᕖᓴᒃᑰᕐᓂᐅᔪᒥ ᑕᒪᒃᑭᓂ-ᓂᕈᐊᒐᒃᓴᐅᔪᓂᑦ ᐅᖃᓪᓚᖕᓂᖃᕐᓂᕐᒥ “ᑲᔪᖏᖅᓴᐃᓂᕐᒥ ᓂᕈᐊᖅᑎᓂ ᐃᓚᐅᖃᑕᐅᓂᖏᓐᓂ,” ᓄᓇᕗᒻᒥ ᑐᙵᕕᒃᑯᑦ ᐅᖃᐅᓯᖃᓚᐅᖅᐳᑦ ᓄᕕᐱᕆ 14−ᒥ ᑐᓴᒐᒃᓴᓕᐊᖑᔪᒥ.

ᒥᐊᕆᑦ ᐅᖃᓚᐅᖅᐳᖅ ᕿᓚᒻᒥᐅᓗᐊᖅᐳᖅ ᓇᓚᐅᑦᑖᕆᓂᕐᒥ ᐊᑑᑎᖃᑦᑎᐊᕐᓂᐊᕐᓂᖓᓂ ᐱᓕᕆᐊᖑᔪᒥ ᐊᒻᒪ ᐊᑐᖅᑕᐅᒃᑲᓐᓂᕋᔭᕐᓂᖓᓂ ᓯᕗᓂᒃᓴᒥ ᓂᕈᐊᕐᓂᐅᔪᓂ.

ᑳᕈᑎᓐ ᓯᓚᑦᑐᖅᓴᕐᕕᒡᔪᐊᖓᑕ ᐃᓕᓴᐃᔨ ᒐᐃᐳᕆᐅᓪ ᒪᕋᑯᓪ ᐅᖃᓚᐅᖅᐳᖅ ᐊᑐᖅᑕᐅᓂᐅᔪᒥ ᓂᐅᕕᕈᓐᓇᐅᑎᓂᒃ ᒪᓕᖕᓂᖃᓪᓚᕆᙱᓐᓂᖓᓂ, “ᐊᔾᔨᐅᙱᓐᓂᖓᓂ ᓄᓇᒥ [ᓄᓇᕗᒻᒥ] ᐱᔭᕆᐊᖃᖅᐳᖅ ᐊᔾᔨᐅᙱᓐᓂᐅᔪᒥ ᐋᖅᑭᒃᓯᓂᕐᒥ ᐊᑲᐅᙱᓕᐅᕈᑕᐅᔪᒥ.”

“ᑐᑭᓯᐅᒪᕗᖓ ᑐᕌᒐᕆᔭᐅᔪᒥ ᐊᒻᒪ ᐃᓱᒪᓂᐅᔪᒥ ᑲᔪᖏᖅᓴᐅᒻᒥ ᐃᓄᖕᓂ ᓴᖅᑭᓐᓂᕐᒧᑦ ᓂᕈᐊᕆᐊᖅᑐᕐᓂᕐᒧᑦ,” ᐅᖃᓚᐅᖅᐳᖅ ᒪᕋᑯᓪ , ᐃᑲᔪᖅᑎᐅᔪᖅ ᐃᓕᓴᐃᔨᒧᑦ ᑳᕈᑎᓐ ᓯᓚᑦᑐᖅᓴᕐᕕᒡᔪᐊᖓᓂ ᑲᑎᒪᔨᐅᔪᓄᑦ ᖃᐅᔨᓴᕐᓂᕐᒥ ᐱᓕᕆᐊᖃᓪᓚᕆᒃᑐᓂ ᓄᓇᖃᖅᑳᖅᓯᒪᔪᓄᑦ ᑲᑎᒪᔨᐅᓂᕐᓄᑦ, ᐊᐅᓚᑕᐅᓂᖓᓂ ᐊᒻᒪ ᐱᓕᕆᕝᕕᐅᔪᓄᑦ.

ᐅᖃᓚᐅᖅᐳᖅ ᐊᑕᐅᓯᖅ ᐅᓂᒃᑳᕆᓂᐅᔪᒥ ᐊᑦᑎᒃᑯᒥ ᓂᕈᐊᖅᑎᓄᑦ ᓴᖅᑭᓐᓂᐅᔪᓂ ᐃᓄᐃᑦ ᐱᕈᖅᐸᓪᓕᐊᔪᒥ ᐅᒃᐱᕈᓱᓗᐊᙱᓐᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᑲᑐᔾᔨᖃᑎᒌᖑᔪᓂ ᓲᕐᓗ ᓄᓇᕗᒻᒥ ᑐᙵᕕᒃᑯᓐᓂᑦ, ᐃᓚᒋᔭᐅᖃᑕᐅᔪᒥ ᑕᒪᐃᑎᒍᑦ ᖁᕝᕙᕆᐊᕐᓂᐅᔪᒥ ᐅᒃᐱᕈᓱᓗᐊᙱᓐᓂᐅᔪᒥ ᐱᓕᕆᕝᕕᐅᔪᓄᑦ ᑕᒪᐃᑎᒍᑦ.

ᑭᓯᐊᓂ, ᐊᓯᖏᑦ ᐅᖃᐅᓯᖃᖅᓯᒪᕗᑦ ᐃᓱᒫᓘᑕᐅᔪᓂ ᐱᓕᕆᐊᖑᓂᐅᔪᒥ, ᑕᐃᓪᓗᓂᒡᔪᒃ ᐱᓕᕆᔾᔪᓯᐅᙱᓐᓂᖓᓂ ᒐᕙᒪᐅᔪᓄᑦ.

ᐃᓚᒋᔭᐅᓚᐅᖅᓯᒪᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ, ᓯᕗᓪᓕᖅᐹᖑᓪᓗᓂ ᐃᓄᒃ ᓂᕈᐊᖅᑕᐅᓚᐅᖅᓯᒪᔪᒥ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᔨᕐᔪᐊᖏᓐᓄᑦ, ᐅᖃᓚᐅᖅᐳᖅ ᐱᒋᐊᕈᑕᐅᔪᖅ “ᐃᓕᖅᑯᓯᖃᑦᑎᐊᕋᓱᙱᓐᓂᐅᕗᖅ ᐊᒻᒪ ᓈᒻᒪᙱᓚᖅ” ᐊᒻᒪ ᐅᖃᓪᓚᐅᓯᖃᖅᐳᖅ “ᓴᖑᑎᑦᑎᓂᐅᔪᒥ ᒐᕙᒪᑦ−ᓇᖕᒥᓂᕆᔭᐅᔪᓂ ᑎᒥᖁᑕᐅᔪᓄᑦ” ᓄᓇᕗᒻᒥ ᑐᙵᕕᒃᑯᓐᓂᑦ.

ᑎᓴᒪᐅᔪᓂ ᐊᖓᔪᖅᑳᙳᕋᓱᖕᓂᕐᒧᑦ ᓂᕈᐊᒐᒃᓴᐅᔪᓂᑦ ᐱᓇᓱᐊᖅᑐᓂ, ᑳᑎ ᑕᐅᑐᙱᑐᐊᖅ ᐊᑭᕋᖅᑐᖅᖢᓂ ᐅᖃᓪᓚᓚᐅᖅᐳᖅ ᐱᓕᕆᐊᖑᓂᐅᔪᒥ, ᐅᖃᖅᖢᓂ ᐃᓱᒪᒋᔭᐅᑐᐃᓐᓇᕆᐊᖃᕐᓂᖓᓂ “ᓂᐅᕕᕐᓂᕐᒧᑦ ᓂᕈᐊᕐᓂᐅᔪᓂ.”

ᓂᑰᓪ ᑳᒻᐸᐅ ᐊᒻᒪ ᔨᐊᕋᒥ ᑑᙶᓗᒃ ᑕᒪᒃᑭᑦ ᐅᖃᓚᐅᖅᐳᑦ ᓈᒻᒪᒍᓱᖕᓂᖏᓐᓂ, ᐋᓐᑐᕉ ᓇᑲᓱᒃ ᐅᖃᕈᒪᓚᐅᙱᓚᖅ ᐅᖃᐅᓯᒃᓴᒥᓂ “ᐃᓱᒪᓕᐊᖑᓂᐅᔪᖅ ᐱᓕᕆᐊᖑᐊᓂᓚᐅᕐᒪᑦ.”

“ᐊᑭᕋᖅᑐᖅᑕᐅᓂᐅᔪᑦ ᐱᓪᓚᕆᐅᑎᑕᐅᔭᕆᐊᖃᖅᐳᑦ ᐊᑯᓂᒻᒪᕆᐊᓗᒃ ᐊᒻᒪ ᐱᓕᕆᓯᒪᓂᖃᑦᑎᐊᙱᑦᑐᒥ ᐊᑐᖅᑕᐅᓂᑯᖃᖅᐳᖅ, ᐃᓛᒃ, ᑲᑎᒪᔨᐅᔪᑦ ᓂᐅᕕᕋᓱᖕᓂᖏᓐᓂ ᓂᕈᐊᕐᓂᕐᓂᑦ,” ᒪᕋᑯᓪ ᐅᖃᓚᐅᖅᐳᖅ.

ᓂᐅᕕᕈᓐᓇᐅᑎᒥᒃ ᑲᔪᖏᖅᓴᐅᑦ ᐊᑐᖅᑕᐅᒍᓂ ᓯᕗᓂᒃᓴᒥ ᓂᕈᐊᕐᓂᐅᔪᓂ, ᐱᕚᓪᓕᕈᑎᖃᕈᓐᓇᖅᐳᖅ ᐃᓂᖃᖅᑐᒥ ᐅᕝᕙᓘᓐᓃᑦ ᓂᕈᐊᒐᒃᓴᐅᔪᓂᑦ ᖃᓂᓐᓂᖅᓴᒥ ᐃᓚᒋᔭᐅᔪᒥ ᐃᓂᖃᖅᑐᒥ, ᐅᖃᓚᐅᖅᐳᖅ, ᓂᕈᐊᖅᑏᑦ ᑕᑯᑐᐃᓐᓇᕆᐊᖃᕐᒪᑕ ᐅᑯᓂᖓ ᑲᔪᖏᖅᓴᐅᑎᓂᑦ ᐅᕙᙶᕐᓂᖓᓂ ᓄᓇᕗᒻᒥ ᑐᙵᕕᒃᑯᑦ ᓯᕗᓕᐅᖅᑎᐅᔪᓂ ᓇᖕᒥᓂᖅ.

“ᑭᓯᐊᓂ ᐃᓛᒃ, ᐱᓪᓚᕆᐅᔪᒥ, ᖃᔅᓯᓂ ᐃᓄᖕᓂ ᐅᖃᐅᓯᖃᖅᐱᑕ ᐱᔾᔪᑎᖃᖅᑐᒥ ᓂᐅᕕᕐᓂᕐᓂ ᓂᕈᐊᕐᓂᐅᔪᓂ 17 ᐳᓴᓐᑎᑐᐃᓐᓇᕐᒥ ᑲᑎᓪᓗᒍ ᐱᔪᓐᓇᖅᑐᓂ ᐃᓄᒋᐊᖕᓂᐅᔪᓂ ᓴᖅᑭᒃᑯᑎᒃ,” ᒪᕋᑯᓪ ᐅᖃᓚᐅᖅᐳᖅ.

ᐅᓇ ᓯᕗᓪᓕᖅᐸᐅᙱᓚᖅ ᐊᔾᔨᐸᓗᐊᓂ ᐃᓕᖅᑯᓯᖃᑦᑎᐊᕋᓱᖕᓇᕐᓂᕐᒥ ᐊᐱᖅᑯᑕᐅᔪᓂ ᓴᖅᑭᑕᐅᓚᐅᖅᐳᑦ ᓄᓇᕗᒻᒥ ᑲᑎᒪᔪᓕᕆᓂᕐᒥ.

2021−ᒥ, ᕼᐋᒻᓚᑦ ᐊᕐᕕᐊᓂ ᐊᑐᐃᓐᓇᖃᖅᑎᑦᑎᓚᐅᖅᐳᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᖅᑕᐃᓕᔾᔪᒻᒥ ᑲᐱᔭᐅᓂᐅᔪᒥ ᓵᓚᖃᕋᓱᐊᕐᓂᐅᔪᒥ. ᑕᓪᓕᒪᓂ ᓄᓇᖃᖅᑎᐅᔪᓂ ᐊᑎᖏᓐᓂ ᐊᒧᔭᐅᓚᐅᖅᐳᑦ ᓵᓚᖃᕐᓂᕐᒥ $2,000−ᓂ ᑮᓇᐅᔭᓂ ᐅᐸᒃᑎᑦᑎᓇᓱᐊᕐᓂᕐᒥ ᐃᓄᖕᓂ ᑲᐱᔭᐅᓂᖏᓐᓂ.

ᑕᐃᔅᓱᒪᓂ, ᐃᓚᖏᑦ ᓄᓇᖃᖅᑎᐅᔪᑦ ᐃᓱᒪᓚᐅᖅᐳᑦ ᐊᒧᔭᐅᓂᖅ ᓈᒻᒪᙱᓐᓂᖓᓂ.

ᒪᕋᑯᓪ ᐅᖃᓚᐅᖅᐳᖅ ᖃᐅᔨᔪᒪᕗᖅ ᑕᑯᓂᕐᒥ ᓄᓇᕗᒻᒥ ᑐᙵᕕᒃᑯᑦ ᓂᐅᕕᕈᓐᓇᐅᑎᒥᒃ ᐸᕐᓇᐅᑎᖓᓂ ᐊᖏᒡᓕᒋᐊᖅᑎᑦᑎᓂᐊᕐᒪᖔᑦ ᓂᕈᐊᖅᑎᓄᑦ ᓴᖅᑭᑦᑐᓂ. ᑲᑐᔾᔨᖃᑎᒌᖑᔪᑦ ᑕᐃᒪᐃᑦᑐᓂ ᐱᓪᓚᕆᐅᓂᐅᔪᒥ, ᐅᕙᙶᖅᑐᒥ ᐃᓄᖕᓂ ᑭᒡᒐᖅᑐᖅᑕᖏᓐᓂ.

“17 ᐳᓴᓐᑎ ᓴᖅᑭᑦᑐᓂ ᐱᐅᙱᕐᔪᐊᖅᐳᖅ, ᐊᒻᒪ ᐱᐅᙱᓚᖅ ᐱᓕᕆᐊᒃᓴᖏᓐᓄᑦ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᒫᓐᓇᐅᔪᒥ, ᐱᓇᓱᐊᕐᓂᐅᔪᒥ ᐱᓕᕆᐊᖑᓪᓗᐊᖅᐳᖅ ᐋᖅᑭᒃᓯᓂᕐᒥ ᖃᓄᐃᓐᓂᐅᔪᒥ.