ᓄᓇᕗᒻᒥ ᑐᙵᕕᒃᑯᑦ ᓇᓗᓇᐃᖅᓯᕗᑦ ᑎᓴᒪᓂ ᓂᕈᐊᒐᒃᓴᐅᔪᓂ ᐊᖓᔪᖅᑳᙳᕋᓱᐊᖅᑐᓂ

For English version, see NTI confirms 4 candidates seek presidency

ᓂᕈᐊᕐᓂᕐᒥ ᐊᕐᕌᒎᑉ ᐃᓚᖓᓐᓂ ᐱᓕᕆᐊᖑᕙᓪᓕᐊᕗᖅ ᓂᕈᐊᖅᓯᓂᕐᒥ ᐊᖓᔪᖅᑳᙳᕐᓂᐊᖅᑐᒥ ᓄᓇᕗᒻᒥ ᑐᙵᕕᒃᑯᓐᓄᑦ

ᑎᓴᒪᓂ ᓂᕈᐊᒐᒃᓴᓂ ᓂᕈᐊᒐᒃᓴᙳᓪᓚᕆᒃᐳᑦ ᐱᓇᓱᐊᖅᑐᓂ ᖁᑦᑎᓛᖑᔪᒥ ᐃᓂᒃᓴᐅᔪᒥ ᓄᓇᕗᒻᒥ ᑐᙵᕕᒃᑯᓐᓂᑦ, ᑲᑐᔾᔨᖃᑎᒌᖑᔪᑦ ᑲᒪᒋᔭᖃᖅᑐᒥ ᓇᓗᓇᐃᖅᓯᓂᕐᒥ ᒪᓕᒋᐊᖃᖅᑕᖏᓐᓂ ᓴᓇᔭᐅᔪᓄᑦ ᐃᓄᖕᓄᑦ ᐅᕘᓇ ᓄᓇᕗᒻᒥ ᐊᖏᕈᑕᐅᔪᒥ ᐊᑐᖅᑕᐅᑦᑎᐊᕐᓂᖏᓐᓂ.

ᓂᕈᐊᕐᓂᖅ ᐱᓪᓚᕆᙳᖅᑎᑕᐅᓚᐅᖅᐳᖅ ᐅᓐᓄᖓᓂ ᓄᕕᐱᕆ 4−ᒥ, ᐃᓱᓕᕝᕕᒃᓴᖓ ᓂᕈᐊᒐᒃᓴᐅᔪᓄᑦ ᐲᖅᓯᓂᕐᒥ ᐊᑎᖏᓐᓂ ᐊᓂᒍᓚᐅᖅᑎᓪᓗᒍ.

ᓂᑰᓪ ᑳᒻᐴ, ᐋᓐᑐᕉ ᓇᑲᓱᒃ, ᑳᑎ ᑕᐅᑐᙱ, ᐊᒻᒪ ᔨᐊᕋᒥ ᑑᕐᙶᓗᒃ ᕿᓂᕐᓂᐊᖅᐳᑦ ᐃᓄᖕᓂ ᐱᔪᓐᓇᕐᓂᖅᑖᖅᑎᑕᐅᓯᒪᔪᓂ ᓂᕈᐊᕐᓂᐅᔪᒥ ᑎᓯᐱᕆ 9−ᒥ ᐱᔨᑦᑎᕐᓂᕐᒥ ᐊᕐᕌᒍᓄᑦ−ᑎᓴᒪᓄᑦ ᐊᖓᔪᖅᑳᖑᓂᕐᒥ.

ᑳᒻᐴ, ᑲᖏᖅᖠᓂᕐᒥᐅᑕᖅ, ᐅᖃᖅᐳᖅ ᐅᓄᕐᓂᖅᓴᐅᔪᒥ ᐊᕐᕌᒍᓂ 25−ᓂ ᐱᓕᕆᓕᒪᓂᖃᖅᖢᓂ ᐱᓕᕆᓂᕐᒥ ᐊᔾᔨᒌᙱᑦᑐᓂ ᐊᑐᕐᓂᖃᐅᑎᓂ ᐃᑲᔪᖅᓱᐃᓪᓗᓂ ᒥᓂᔅᑕᐅᔪᓂ ᐊᒻᒪ ᓯᕗᓕᖅᑎᒥ ᓄᓇᕗᒻᒥ ᒐᕙᒪᒃᑯᓐᓄᑦ, ᐃᓚᖃᖅᑐᒥ ᐊᖓᔪᖅᑳᖑᓂᕐᒥ ᒪᓕᒃᑕᐅᔭᕆᐊᓕᖕᓂ, ᐊᒻᒪ ᒫᓐᓇᓕᓴᐅᓛᖑᔪᒥ ᓄᓇᕗᒻᒥ ᑐᙵᕕᒃᑯᓐᓄᑦ ᐃᓱᒻᒥᖅᑐᐃᔨᐅᑉ ᐃᑲᔪᖅᑎᖓ ᐊᐅᓚᑦᑎᔨᒻᒪᕆᖕᒧᑦ.

“ᐱᓇᓱᐊᖅᐳᖓ ᐅᐱᒋᔭᖃᕐᓂᕐᒥ ᐃᓄᑐᖃᑦᑎᓐᓂ ᐱᖅᑯᓯᑐᖃᑦᑎᓐᓂ ᐊᒻᒪ ᐃᓕᖅᑯᓯᑦᑎᓐᓂ ᐆᒪᑎᑦᑎᔪᓂ ᐊᒻᒪ ᑲᔪᖏᖅᓴᐃᓂᕐᒥ ᒪᒃᑯᒃᑐᖁᑎᑦᑎᓐᓂ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

ᓇᑲᓱᒃ, ᐸᖕᓂᖅᑑᕐᒥᐅᑕᖅ, ᐃᒃᓯᕙᐅᑕᐅᑉ−ᑐᒡᓕᕆᔭᐅᕗᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᑎᒥᖁᑕᐅᔪᓂ ᑲᑎᒪᔨᖏᓐᓂ ᐊᒻᒪ ᐃᒃᓯᕙᐅᑕᐅᓪᓗᓂ ᓄᓇᕗᒻᒥ ᐸᕐᓇᐃᔨᓄᑦ. ᓯᕗᓂᐊᓂ ᐱᓇᓱᐊᓚᐅᖅᓯᒪᕗᖅ ᓄᓇᕗᒻᒥ ᑐᙵᕕᒃᑯᓐᓄᑦ ᐊᖓᒧᖅᑳᙳᕋᓱᐊᕐᓂᕐᒧᑦ 2021−ᒥ. ᓵᓚᐅᓚᐅᖅᓯᒪᕗᖅ ᐊᓗᑭ ᑰᑦᑎᕐᒧᑦ, ᐅᖃᐅᓯᖃᓚᐅᖅᑐᒥ ᐅᒃᑐᐱᕆᒥ ᐱᓇᓱᒃᑲᓐᓂᔾᔮᕈᓐᓃᕐᓂᖓᓂ ᐱᖓᔪᖓᓂ ᐊᖓᔪᖅᑳᖑᓂᕐᒥ.

ᓇᓗᓇᐃᖅᓯᓂᕐᒥ ᐃᓄᐃᑦ ᐱᔪᓐᓇᑦᑎᐊᖅᑐᒥ ᐊᑐᐃᓐᓇᖃᕐᓂᖏᓐᓂ ᓂᕿᓪᓚᑦᑖᓄᑦ, ᐊᒻᒪ ᑐᓂᓯᓂᕐᒥ ᐱᐅᓂᖅᓴᐅᔪᒥ ᐋᔩᖃᑎᒌᖕᓂᐅᔪᒥ ᓄᓇᕗᒻᒥ ᑐᙵᕕᒃᑯᓐᓂᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ, ᐱᔾᔪᑕᐅᕗᑦ ᓇᑲᓱᒃ ᐅᖃᓚᐅᖅᐳᖅ ᐱᓇᓱᐊᕐᓂᖓᓂ.

“ᐱᓕᕆᑎᓪᓗᖓ ᐃᓄᓕᒫᓄᑦ ᑐᓵᑎᑦᑎᓂᐅᔪᓂ 2017−ᒥ ᐊᒻᒪᓗ ᒫᓐᓇᓕᓴᐅᓂᖅᓴᐅᔪᒥ, ᑐᓴᓚᐅᖅᐳᖓ ᐃᓄᖕᓂ ᓄᓇᕗᓕᒫᒥ ᐋᔩᖃᑎᖃᕐᓂᖅᓴᐅᔭᕆᐊᖃᕐᓂᖓᓂ ᓄᓇᕗᒻᒥ ᑐᙵᕕᒃᑯᓐᓂᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ,” ᐅᖃᓚᐅᖅᐳᖅ, ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ.

ᑑᕐᙶᓗᒃ ᐅᖃᓚᐅᖅᐳᖅ ᐱᔨᑦᑎᕋᖅᓯᒪᕗᖅ ᑎᑎᕋᖅᑎ−ᑮᓴᐅᔭᓕᕆᔨᐅᓪᓗᓂ ᐊᒻᒪ ᐃᓚᒋᔭᐅᓪᓗᓂ ᑲᑎᒪᔨᑐᐃᓐᓇᕐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ, ᓄᓇᓕᖕᓂ ᑐᑭᒧᐊᒃᑎᑦᑎᔨᐅᓂᕐᒥ ᐃᒃᐱᐊᕐᔪᖕᒥ, ᐊᒻᒪ ᑲᑎᒪᔨᓄᑦ ᐃᒃᓯᕙᐅᑕᐅᓪᓗᓂ ᑲᑭᕙᒃ ᑲᑐᔾᔨᖃᑎᒌᖑᔪᓂ.

“ᐊᒥᓱᓂ ᐱᔾᔪᑎᒃᓴᖃᖅᐳᖓ ᐱᓇᓱᐊᕐᓂᕐᒥ ᓄᓇᕗᒻᒥ ᑐᙵᕕᒃᑯᓐᓄᑦ, ᐊᒻᒪ ᐃᓚᖓ ᑕᑯᒃᓴᐅᑦᑎᐊᕐᓂᐅᔪᒥ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ,” ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ.

ᑕᐅᑐᙱ ᓯᕗᓂᐊᓂ ᐱᔨᑦᑎᕋᓚᐅᖅᐳᖅ ᒪᕐᕉᖕᓂ ᓂᕈᐊᖅᑕᐅᓯᒪᓂᐅᔪᓂ ᓄᓇᕗᒻᒥ ᑐᙵᕕᒃᑯᓐᓄᑦ ᐊᖓᔪᖅᑳᖑᓂᕐᒥ ᐊᒻᒪ ᒪᓕᒐᓕᐅᖅᑎᐅᓚᐅᖅᓯᒪᕗᖅ ᑲᖏᖅᖠᓂᖅ ᐅᐊᖕᓇᒧᑦ-ᐃᒡᓗᓕᒑᕐᔪᖕᒧᑦ. ᓇᓂᔭᐅᔪᓐᓇᓚᐅᙱᓚᖅ ᐅᖃᐅᓯᒃᓴᓕᐅᕐᓂᕐᒧᑦ ᐆᒧᖓ ᐅᓂᒃᑳᓕᐊᖑᔪᒧᑦ.

ᑕᓪᓕᒪᓂ ᐱᓕᕆᓂᖃᖅᐳᖅ ᓂᕈᐊᕐᓂᕐᒥ ᓂᕈᐊᒐᒃᓴᒥ ᐊᖓᔪᖅᑳᖑᔪᒧᑦ — ᓂᕈᐊᕐᓂᕐᒥ ᐅᓪᓗᖓᓂ, ᓯᕗᓂᐊᓂ ᓂᕈᐊᕐᓂᐅᔪᒥ ᑎᓯᐱᕆ 2−ᒥ, ᐅᖃᓘᑎᕋᓛᒃᑯᑦ ᓂᕈᐊᕐᓂᕐᒥ, ᑭᒡᒐᖅᑐᖅᑕᐅᓗᓂ ᓂᕈᐊᕐᓂᕐᒥ, ᐅᕝᕙᓘᓐᓃᑦ ᑎᑎᖅᑲᒃᑯᕕᒃᑎᒍᑦ ᓇᒃᓯᐅᔾᔨᓗᓂ ᓂᕈᐊᕐᓂᐅᔪᒥ, ᐅᖃᐅᓯᐅᓪᓗᓂ ᓄᓇᕗᒻᒥ ᑐᙵᕕᒃᑯᑦ ᐃᑭᐊᖅᑭᕕᖓᓐᓂ.