ᓯᕗᓪᓕᐅᑎᑕᐅᖁᔭᐅᔪᑦ, ᓇᖕᒥᓂᖅ ᐱᐅᓂᐅᔪᑦ ᑕᑯᒃᓴᐅᓂᐅᕗᖅ ᕿᐅᓘᑎᓂᐅᔪᒥ

For English version, see NTI candidates talk priorities, personal qualities at Iqaluit debate

ᑎᓴᒪᑦ ᓂᕈᐊᒐᒃᓴᐃᑦ ᐱᓇᓱᐊᖅᑐᓂ ᓄᓇᕗᒻᒥ ᑐᙵᕕᒃᑯᓐᓄᑦ ᐊᖓᔪᖅᑳᙳᕐᓂᐊᖅᑐᒥ ᑭᐅᓚᐅᖅᐳᑦ ᐊᐱᖅᑯᑕᐅᔪᓂ ᓄᕕᐱᕆ 30−ᒥ ᓯᕗᓪᓕᐅᑎᑕᐅᖁᔭᐅᔪᑦ, ᓇᖕᒥᓂᖅ ᐱᐅᓂᐅᔪᓂᑦ ᐊᒻᒪ ᒐᕙᒪᒃᑯᓐᓂ ᐱᓕᕆᓂᐅᔪᓂ.

@body: ᓂᑰᓪ ᑳᒻᐸᐅ, ᐆᓐᑐᕉ ᓇᑲᓱᒃ ᐊᒻᒪ ᔨᐊᕋᒥ ᑑᕐᙶᓗᒃ ᖁᙱᐊᕐᕕᖕᒦᓚᐅᖅᐳᑦ ᕿᐅᓘᑎᓂᐅᔪᒥ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ ᐃᖃᓗᖕᓂ, ᑳᑎ ᑕᐅᑐᙱ ᐃᓚᐅᖃᑕᐅᓪᓗᓂ ᑲᕐᕆᔭᓕᐊᖑᔪᒥ ᑲᑎᒪᓂᐅᔪᒥ ᑲᖏᖅᖠᓂᕐᒥ.

CBC−ᑯᑦ ᐅᖃᖅᑎᐅᔪᒥ ᐄᕙ ᒪᐃᑯᓪ ᐊᐅᓚᑦᑎᓚᐅᖅᐳᖅ ᕿᐅᓘᑎᓂᐅᔪᒥ, 35−ᓂ ᖁᙱᐊᖅᑐᓂ ᐃᓚᐅᖃᑕᐅᓪᓗᑎᒃ. ᖃᕋᓴᐅᔭᒃᑰᖅᑎᑕᐅᓚᐅᕆᕗᖅ ᓄᓇᕗᒻᒥ ᑐᙵᕕᒃᑯᑦ ᕙᐃᔅᐳᒃᑯᑦ ᒪᒃᐱᒐᖓᓂ.

ᖃᓄᐃᓐᓂᐅᔪᖅ ᒪᓕᓚᐅᖅᐳᖅ ᐊᐱᖅᓱᕐᓂᐅᔪᒥ-ᐊᒻᒪ-ᑭᐅᓂᐅᔪᒥ ᐋᖅᑭᒃᓯᒪᓂᖓᓂ, ᐊᒻᒪ ᓂᕈᐊᒐᒃᓴᐃᑦ ᑐᓂᔭᐅᓚᐅᖅᐳᑦ 3 ᒥᓂᑦᓂ ᐊᑐᓂ ᑭᐅᓂᕐᒧᑦ ᐊᐱᖅᑯᑕᐅᔪᓂ ᓇᓕᐊᑐᐃᓐᓇᒥ ᒪᐃᑯᓪᒥ ᐅᕝᕙᓘᓐᓃᑦ ᖁᙱᐊᖅᑐᓂ ᐃᓚᒋᔭᐅᔪᒥ.

ᖁᓛᓂ ᐅᓐᓄᖓᓂ, ᓂᕈᐊᒐᒃᓴᐃᑦ ᐊᐱᕆᔭᐅᓚᐅᖅᐳᑦ ᓯᕗᓪᓕᐅᑎᑕᐅᖁᔭᖏᓐᓂ.

ᑳᒻᐸᐅ ᑭᐅᔾᔪᑎᖓ ᐃᓚᖃᓚᐅᖅᐳᖅ ᐃᑲᔪᖅᓱᐃᓂᕐᒥ ᐃᓄᑐᖃᕐᓂ, ᒪᒃᑯᒃᑐᓂ ᐃᖅᑲᓇᐃᔮᖃᖅᑎᑦᑎᓂᕐᒥ ᐊᒻᒪ ᓇᓗᓇᐃᖅᓯᓂᕐᒥ ᓄᓇᕗᒻᒥ ᑐᙵᕕᒃᑯᑦ ᐃᓕᓯᒪᐃᓐᓇᕐᓂᖓᓂ “ᖁᙱᐊᕐᕕᓪᓚᕆᐅᔪᒥ” ᑲᑐᔾᔨᖃᑎᒌᖑᔪᓂ ᐃᑲᔪᖅᓱᐃᕙᒃᑐᓂ ᓄᓇᕗᒻᒥ ᐃᓄᖕᓂ.

ᑳᒻᐸᐅ ᐃᖃᓗᖕᓂᕐᒥᐅᑕᐅᕗᖅ ᒫᓐᓇᓕᓴᐅᔪᒥ ᓄᖅᑲᖓᓚᐅᑲᖕᓂᖃᖅᑐᒥ ᓄᓇᕗᒻᒥ ᑐᙵᕕᒃᑯᓐᓂ ᐊᐅᓚᑦᑎᔨᒻᒪᕆᐅᓂᖓᑕ ᑭᓕᒃᕙᒃ ᑭᐊᕆᓐ ᖃᕐᓗᓈᑉ ᐃᓱᒻᒥᖅᑐᐃᔨᓄᑦ ᐃᑲᔪᖅᑎᒋᔭᐅᓂᖓᓂ ᐱᓇᓱᐊᕐᓂᕐᒧᑦ ᐊᖓᔪᖅᑳᖑᓂᕐᒥ ᑲᑐᔾᔨᖃᑎᒌᖑᔪᓂ.

ᐸᖕᓂᖅᑑᕐᒥᐅᑕᒥ ᓇᑲᓱᒃ, ᐃᒃᓯᕙᐅᑕᐅᑉ-ᑐᒡᓕᖓ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ, ᐋᔩᖃᑎᒌᖕᓂᐅᔪᒥ ᓄᓇᕗᒻᒥ ᑐᙵᕕᒃᑯᓐᓂ ᐱᓕᕆᓂᐅᔪᒥ ᐃᓄᓕᒫᓄᑦ ᐊᒻᒪ ᖁᕝᕙᖅᓴᐃᓂᕐᒥ ᐃᓄᐃᑦ ᐅᖃᐅᓯᖓᓐᓂ ᓯᕗᓪᓕᐅᑎᑕᐅᖁᔭᖓᓂ ᑎᑎᕋᖅᓯᒪᓂᐅᔪᒥ.

ᓄᓇᕗᒻᒥ ᑐᙵᕕᒃᑯᓐᓂ ᐊᖓᔪᖅᑳᖑᓚᐅᖅᓯᒪᔪᖅ ᑕᐅᑐᙱ, ᑐᙵᕕᖃᖅᑐᒥ ᑲᖏᖅᖠᓂᕐᒥ, ᓇᓗᓇᐃᖅᓯᓚᐅᖅᐳᑦ ᑕᑯᒃᓴᐅᑎᑦᑎᑦᑎᐊᕐᓂᕐᒥ ᐱᓗᐊᖅᑐᒥ ᐅᓇᐅᑎᓪᓗᒍ ᓄᓇᕗᒻᒥ ᑐᙵᕕᒃᑯᓐᓂ ᑮᓇᐅᔭᓕᕆᓂᖏᓐᓂ.

ᑑᕐᙶᓗᒃ ᓄᓇᖃᖅᐳᖅ ᐃᖃᓗᖕᓂ ᐊᒻᒪ ᑎᒍᒥᐊᖅᓯᒪᕗᖅ ᖃ[ᓯᒐᓚᖕᓂ ᓄᓇᓕᖕᓂ ᓯᕗᓕᐅᖅᑎᐅᓂᕐᒥ ᐊᑐᕐᓂᖃᐅᑎᓂ.

ᐅᖃᓚᐅᖅᐳᖅ ᐃᒃᐱᒍᓱᖕᓂᖓᓂ “ᓲᕐᓗ ᓄᓇᕗᒻᒥ ᑐᙵᕕᒃᑯᑦ ᐊᑭᕋᖅᑐᐃᓐᓇᐅᔭᕐᓂᖏᓐᓂ ᒐᕙᒪᒃᑯᓐᓂ,” ᐊᒻᒪ ᑕᒪᓐᓇ ᓄᖅᑲᖁᕙᐅᒃ.

ᓂᕈᐊᒐᒃᓴᐃᑦ ᐊᐱᕆᔭᐅᓚᐅᕆᕗᑦ ᖃᓄᖅ ᑐᕌᒐᕆᔭᖃᕋᔭᕐᒪᖔᑕ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒻᒥ ᒐᕙᒪᐅᔪᓂ ᐱᓕᕆᖃᑎᒌᖕᓂᐅᔪᓂ.

ᑳᒻᐸᐅ ᐅᖃᓪᓚᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᓐᓂ ᐃᒃᓯᕙᐅᑕᖓᓐᓂ ᐃᓄᖕᓄᑦ-ᑭᖕᒧᑦ ᐱᓕᕆᖃᑎᒌᖕᓂᐅᔪᒥ ᑲᑎᒪᔨᕋᓛᖑᔪᓄᑦ, ᓄᓇᕗᒻᒥ ᑐᙵᕕᒃᑯᑦ ᑐᕌᖓᔪᒥ ᐊᑐᐃᓐᓇᖃᕐᓂᖃᕈᓐᓇᕐᓂᖏᓐᓂ ᒐᕙᒪᑐᖃᒃᑯᑦ ᒥᓂᔅᑕᖏᓐᓄᑦ ᐊᒻᒪᓗ ᑲᓇᑕᒥ ᐊᖓᔪᖅᑳᕐᔪᐊᖓᓂ ᔭᔅᑎᓐ ᑐᕉᑑᒧᑦ.

ᖄᒃᑲᓐᓂᐊᒍᑦ ᐱᐅᓯᒋᐊᖅᑎᑦᑎᓂᕐᒥ ᐱᓕᕆᓂᐅᔪᓂ ᒐᕙᒪᑐᖃᒃᑯᓐᓂ, ᓇᑲᓱᒃ ᐅᖃᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᑦ ᑕᐅᑐᒃᑕᑐᐊᖃᑲᐃᓐᓇᓪᓗᐊᖅᐳᑦ ᐱᐅᓯᒋᐊᖅᑎᑦᑎᓂᕐᒥ ᐱᓕᕆᓂᐅᔪᓂ ᕼᐋᒻᓚᐅᔪᓂ.

ᑕᐅᑐᙱ ᓇᓗᓇᐃᖅᓯᓚᐅᖅᐳᖅ ᐱᔭᕆᐊᖃᕐᓂᐅᔪᒥ ᐱᓕᕆᖃᑎᖃᕐᓂᕐᒥ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒻᒥ ᒐᕙᒪᐅᔪᓂ ᐅᓇᑕᕐᓂᕐᒧᑦ ᐊᑲᐅᙱᓕᐅᕈᑕᐅᔪᓂ ᓲᕐᓗ ᓂᖀᑦ ᐊᑭᖏᓐᓂ ᐊᒻᒪ ᐃᓄᒃᑎᑐᑦ ᐃᓕᓐᓂᐊᕐᓂᐅᔪᒥ.

ᑑᕐᙶᓗᒃ ᐅᖃᐅᓯᖃᓚᐅᕆᕗᖅ ᓂᕈᐊᒐᒃᓴᐅᖃᑎᖏᓐᓂᑦ ᐱᔪᒪᓂᐅᔪᓂ ᐱᐅᓂᖅᓴᐅᔪᒥ ᐱᓕᕆᖃᑎᖃᕐᓂᕐᒥ ᒐᕙᒪᐅᔪᓂ, ᓇᓗᓇᐃᕆᓪᓗᓂ ᐱᔭᕆᐊᖃᕐᓂᐅᔪᒥ ᐱᓕᕆᖃᑎᒌᖕᓂᕐᒥ.

ᓂᕈᐊᒐᒃᓴᐃᑦ ᐅᖃᐅᓯᖃᓚᐅᖅᐳᑦ ᐃᓱᒪᒋᔭᖏᓐᓂ ᐃᑲᔪᖅᓱᐃᓂᕐᒥ ᐊᑦᑎᖕᓂᖅᓴᐅᔪᓄᑦ ᖃᖓᑦᑕᐅᑎᓂ, ᐃᑲᔪᖅᓱᐃᓂᕐᒥ ᖃᓪᓗᓈᑦ ᓄᓇᖓᓐᓂ ᓄᓇᕗᒻᒥᐅᑕᓂ ᐃᓄᖕᓂ ᐃᓂᐅᔪᓂ ᓲᕐᓗ ᐃᐊᑦᒪᓐᑕᓐ ᐊᒻᒪ ᐋᑐᕚᒥ, ᐊᒻᒪ ᖃᐃᖁᔨᓂᐅᔪᒥ ᐱᐅᓂᖅᓴᐅᔪᒥ ᐃᑲᔪᖅᓱᐃᓂᐅᔪᒥ ᐃᓄᖕᓄᑦ ᐃᓕᓐᓂᐊᕐᓂᖓᓂ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᐅᔪᒥ.

ᐊᐱᕆᔭᐅᒐᒥᒃ, ‘ᖃᓄᐃᒻᒪᑦ ᐊᖓᔪᖅᑳᙳᓪᓗᐊᖅᐱᑦ ᓄᓇᕗᒻᒥ ᑐᙵᕕᒃᑯᓐᓄᑦ’:

ᑑᕐᙶᓗᒃ ᓱᓕᓂᕋᐃᓚᐅᖅᐳᖅ ᑐᕌᖅᑎᑦᑎᓂᖓᓂ ᑲᑐᔾᔨᖃᑎᒌᖕᓂᐅᔪᒥ ᐊᒻᒪ ᑲᑎᙵᓗᑎᒃ ᐱᓕᕆᓂᐅᔪᒥ.

“ᖃᐅᔨᒪᕗᒍᑦ ᐊᕕᒃᓯᒪᓂᖃᕐᓂᖓᓂ,” ᐅᖃᓚᐅᖅᐳᖅ.

“ᑐᓴᕈᓐᓇᕈᑦᑕ ᐃᓄᖕᓂ ᑕᖅᑳᓂ, ᑭᓱᑐᐃᓐᓇᐃᑦ ᐱᐅᓯᒋᐊᖅᑎᑕᐅᔪᓐᓇᖅᐳᑦ.”

ᑕᐅᑐᙱ ᐱᓇᓱᐊᖅᐳᖅ “ᐊᓯᔾᔨᖅᓯᓇᓱᖕᓂᕐᒧᑦ,”ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ, “ᐊᓯᔾᔨᕐᓂᖃᙱᑉᐸᑦ, ᐱᕚᓪᓕᕈᑎᖃᔾᔮᙱᓚᖅ ᓇᓕᐊᑐᐃᓐᓇᑦᑎᓐᓄᑦ.”

ᓇᑲᓱᒃ ᐅᖃᐅᓯᖃᓚᐅᖅᐳᖅ ᐊᒥᓱᓂ ᐊᑐᕐᓂᑯᖏᓐᓂ ᐃᓄᓕᒫᓄᑦ ᐱᔨᑦᑎᕋᕐᓂᕐᒧᑦ, ᐃᓚᖃᖅᑐᒥ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒻᒥ ᐸᕐᓇᐃᔨᓄᑦ ᑲᑎᒪᔨᐅᔪᓄᑦ. ᐅᖃᓚᐅᖅᐳᖅ ᐱᓕᕆᓇᓱᐊᕈᒪᓂᖓᓂ ᓂᕿᒃᓴᖃᑦᑎᐊᕐᓂᐅᔪᒥ

“ᐃᓄᐃᑦ ᑭᒡᒐᖅᑐᖅᑕᐅᙱᓚᑦ ᑕᐃᒪᐃᓪᓗᓕᐊᕐᓂᖏᓐᓂ,” ᐅᖃᓚᐅᖅᐳᖅ.

ᑳᒻᐸᐅ ᐅᖃᓪᓚᓚᐅᕆᕗᖅ ᐊᕐᕌᒍᓄᑦ 30−ᓂ ᐃᖅᑲᓇᐃᔭᕐᓂᖓᓂ ᐃᓄᓕᒫᓄᑦ ᐱᔨᑦᑎᕋᕐᓂᕐᒥ. ᑭᓯᐊᓂ, ᐅᖃᓚᐅᖅᐳᖅ ᐅᑯᐊ ᐊᑐᕐᓂᖃᐅᑕᐅᔪᑦ ᐱᕕᒃᓴᖃᖅᑎᑦᑎᓯᒪᙱᓚᖅ ᐃᑲᔪᕐᓂᕐᒧᑦ ᐃᓄᖕᓂ — ᑐᕌᒐᒃᓴᕆᔭᖓᓂ.

“ᐃᖏᕐᕋᕙᓪᓕᐊᓂᖃᕈᒪᕗᖓ ᐊᒻᒪ ᓂᕆᐅᖕᓂᖃᕐᓗᖓ ᒪᒃᑯᒃᑐᓄᑦ, ᓯᕗᓂᒃᓴᒧᑦ,” ᐅᖃᓚᐅᖅᐳᖅ.

ᓂᐱᖃᕐᓂᖓ ᕿᐅᓘᑎᓂᐅᔪᒥ ᐃᒃᐱᒍᓱᑦᑎᐊᕐᓂᖃᓚᐅᖅᐳᖅ ᐊᒻᒪ ᓂᕈᐊᒐᒃᓴᐃᑦ ᖄᖏᐅᑎᒐᔪᓚᐅᙱᓚᑦ ᐱᖓᓱᓂ ᒥᓂᑦᓂ ᑭᒡᓕᖃᕐᓂᕆᔭᖓᓂ. ᐃᓱᐊᓂ, ᐱᖓᓱᑦ ᓂᕈᐊᒐᒃᓴᐃᑦ ᐃᒡᓗᕈᓯᕐᒥ ᐃᕿᖃᑦᑕᐅᑎᓚᐅᖅᐳᑦ ᐊᒻᒪ ᑕᓯᐅᖃᑦᑖᖅᖢᑎᒃ.

ᓯᕗᓂᐊᓂ ᓂᕈᐊᕐᓂᐅᔪᒥ ᒪᑐᐃᓚᐅᖅᐳᑦ ᓇᒡᒐᔾᔭᐅᒥ, ᓯᕗᓂᐊᓂ ᓄᓇᕗᒻᒥ ᑐᙵᕕᒃᑯᑦ ᓂᕈᐊᕐᓂᕐᒧᑦ ᐅᓪᓗᖓᓂ ᑎᓯᐱᕆ 9−ᒥ.