ᓄᓇᕗᒻᒥ ᑐᙵᕕᒃᑯᑦ ᐊᖏᒡᓕᒋᐊᖅᑎᑦᑎᕗᖅ ᑕᖅᑭᑕᒫᒥ ᐃᑲᔪᖅᓱᐃᓂᐅᔪᒥ ᐃᓄᑐᖃᕐᓄᑦ ᐊᖑᒻᒪᑎᓯᒪᓂᕐᒧᑦ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓂ

For the English version of this story, please see NTI increases monthly support for elders to keep up with inflation.

ᐅᖃᐅᓯᖃᖅᖢᓂ ᐊᒃᑐᐃᓂᐅᔪᓂ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓂ, ᐃᓄᑐᖃᐃᑦ ᐃᓚᒋᔭᐅᖃᑕᐅᔪᓂ ᐅᖅᑯᔾᔭᐃᑦ ᐃᓐᓇᕐᓄᑦᐃᓄᑐᖃᕐᓄᑦ ᐃᑲᔪᖅᓯᖅᑕᐅᓂᕐᒧᑦ ᐱᓕᕆᐊᖑᔪᒥ ᐱᖃᑦᑕᕐᓂᐊᓕᖅᐳᑦ $175 ᑕᖅᑭᑕᒫᑦ, ᐊᖏᒡᓕᒋᐊᕐᓂᐅᔪᒥ $25−ᒥ $55−ᒧᑦ ᑕᒪᒃᑭᒐᓚᖕᓄᑦ ᐃᓚᒋᔭᐅᔪᓄᑦ, ᓄᓇᕗᒻᒥ ᑐᙵᕕᒃᑯᑦ ᐅᖃᐅᓯᖃᓚᐅᖅᐳᑦ ᐱᓇᓱᐊᕈᓯᐅᓚᐅᖅᑐᒥ.

ᐅᓇ ᑭᒡᒐᖅᑐᐃᕗᖅ ᐊᖏᒡᓕᒋᐊᕐᓂᐅᔪᒥ ᑕᒪᒃᑭᓄᑦ ᐊᕕᒃᑐᖅᓯᒪᓂᐅᔪᓂ ᐃᓄᑐᖃᕐᓂ ᐱᕙᒃᑐᓂ ᐊᑭᓕᐅᑎᐅᔪᓂ ᐱᓕᕆᐊᖑᔪᒥ, ᓄᓇᕗᒻᒥ ᑐᙵᕕᒃᑯᑦ ᐅᖃᖅᑎᐅᔪᖅ ᒎᕐᓴᒻ ᒧᔪ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᔭᓄᐊᕆ 26−ᒥ.

ᓯᕗᓂᐊᓂ, ᐃᓄᑐᖃᐃᑦ ᐃᓅᓚᐅᖅᓯᒪᔪᓂ 1944−ᒥ ᓯᕗᓂᐊᓂᓪᓘᓐᓃᑦ ᐱᕙᓚᐅᖅᐳᑦ ᑕᖅᑭᑕᒫᒥ ᐃᑲᔪᖅᓱᐃᓂᐅᔪᒥ $150−ᓂ, ᐃᓄᑐᖃᐃᑦ ᐃᓅᓂᑯᓂ 1945−ᒥ ᐱᕙᓚᐅᖅᐳᑦ $135−ᓂ, ᐊᒻᒪ ᐃᓄᑐᖃᐃᑦ ᐃᓅᓚᐅᖅᑐᓂ ᕿᑎᐊᓂ 1946−ᒥ ᐊᒻᒪ 1955−ᒧᑦ ᐱᕙᓚᐅᖅᐳᑦ ᑕᖅᑭᑕᒫᒥ ᐊᑭᓕᖅᑕᐅᓂᐅᔪᓂ $120−ᓂ.

ᓄᓇᕗᒻᒥ ᑐᙵᕕᒃᑯᑦ ᐅᖓᕙᕆᐊᖅᓯᓚᐅᕆᕗᑦ ᐱᓕᕆᐊᖑᔪᒥ ᐃᓚᖃᕐᓂᕐᒥ ᐃᓄᑐᖃᕐᓂ ᐃᓅᓂᑰᔪᓂ ᕿᑎᐊᓂ ᔭᓄᐊᕆ 1, 1956−ᒥ, ᐊᒻᒪ ᑎᓯᐱᕆ 31, 1958−ᒧᑦ. ᑕᒪᒃᑭᑦ ᐊᓯᔾᔨᕐᓂᐅᔪᑦ ᐊᑐᓕᕐᓂᐊᖅᐳᑦ ᐊᐃᑉᕆᓕ 1−ᒥ. ᓄᓇᕗᒻᒥ ᑐᙵᕕᒃᑯᑦ ᑲᑎᒪᔨᖏᑦ ᐃᓱᒪᓕᐅᕆᒪᐅᖅᐳᑦ ᐊᖏᒡᓕᒋᐊᖅᓯᓂᕐᒥ ᐊᑭᓕᐅᑎᐅᔪᒥ ᑲᑎᒪᑎᓪᓗᒋᑦ ᐱᓇᓱᐊᕈᓯᐅᓚᐅᖅᑐᒥ ᐃᖃᓗᖕᓂ.

ᐃᓄᑐᖃᐃᑦ’ ᐃᑦᑐᖅᓯᐅᑎᓂ ᓂᖏᐅᖅᓯᐅᑎᓂ ᑐᓂᔭᐅᕙᒃᐳᑦ ᓄᓇᕗᒻᒥ ᑐᙵᕕᒃᑯᓐᓂᑦ ᐅᕘᓇ ᓄᓇᕗᒻᒥ ᐃᓄᑐᖃᕐᓄᑦ ᐃᑦᑐᖅᓯᐅᑎᓂ ᓂᖏᐅᖅᓯᐅᑎᓂ ᑮᓇᐅᔭᑦ ᐸᐸᑕᐅᓯᒪᔪᓂ ᐊᒻᒪ ᓄᓇᕗᒻᒥ ᐃᓄᑐᖃᕐᓄᑦ ᐃᓚᒋᐊᕈᒻᒥ ᑮᓇᐅᔭᑦ ᐸᐸᑕᐅᓯᒪᔪᓂ.

ᑭᖑᓪᓕᐅᔪᖅ ᑮᓇᐅᔭᑦ ᐸᐸᑕᐅᓯᒪᔪᓂ ᑮᓇᐅᔭᖃᖅᑎᑦᑎᓲᖑᕗᖅ ᐅᖅᑯᔾᔭᐃᑦ ᐃᓐᓇᕐᓄᑦ ᐱᓕᕆᐊᖑᔪᒥ ᐊᒻᒪ ᑐᓂᓯᓲᖑᕗᖅ ᑕᖅᑭᑕᒫᒥ ᐃᑦᑐᖅᓯᐅᑎᓂ ᓂᖏᐅᖅᓯᐅᑎᓂ ᐃᓄᖕᓄᑦ ᐃᓄᑐᖃᕐᓄᑦ ᐃᓅᓚᐅᖅᓯᒪᔪᓂ ᕿᑎᐊᓂ ᔭᓄᐊᕆ 1, 1949−ᒥ, ᐊᒻᒪ ᑎᓯᐱᕆ 31, 1955−ᒧᑦ.

ᐅᑯᐊ ᐃᑦᑐᖅᓯᐅᑎᓂ ᓂᖏᐅᖅᓯᐅᑎᓂ ᑮᓇᐅᔭᖃᖅᑎᑕᐅᕗᑦ ᓄᓇᕗᒻᒥ ᑐᙵᕕᒃᑯᑦ ᓇᖕᒥᓂᖃᖃᑕᐅᓂᖏᓐᓂ ᐅᔭᕋᐅᔭᓄᑦ ᐃᑲᔪᕈᑎᒃᓴᓂ ᑮᓇᐅᔭᖅᑖᕆᔭᐅᕙᓪᓕᐊᔪᓂ ᓲᕐᓗ ᐅᔭᕋᐅᔭᓄᑦ ᓂᖏᖅᑕᕐᓂᓄᑦ ᐊᒻᒪ ᕿᓂᕐᓂᕐᒧᑦ ᐊᑭᓕᐅᑎᓂᑦ, ᒨᔪ ᐅᖃᓚᐅᖅᐳᑦ.

ᖄᒃᑲᓐᓂᐊᒍᑦ ᐊᖏᒡᓕᒋᐊᕐᓂᐅᔪᒥ $175 ᑕᖅᑭᑕᒫᑦ, ᓄᓇᕗᒻᒥ ᑐᙵᕕᒃᑯᑦ ᐃᓚᐅᑎᑦᑎᓕᓚᐅᖅᐳᑦ ᓄᑖᖑᔪᓂ ᐊᕕᒃᑐᖅᓯᒪᓂᐅᔪᓂ 496 ᐃᓄᑐᖃᕐᓂ ᐃᓅᓚᐅᖅᓯᒪᔪᓂ ᕿᑎᐊᓂ ᔭᓄᐊᕆ 1, 1956−ᒥ, ᐊᒻᒪ ᑎᓯᐱᕆ 31, 1958−ᒧᑦ, ᑲᑎᓪᓗᒍ ᐅᓄᕐᓂᖓᓂ ᐱᓕᕆᐊᖑᔪᒥ ᐱᕙᒃᑐᓂ 1,137−ᖑᓕᖅᖢᑎᒃ 641−ᒥ.

ᓄᓇᕗᒻᒥ ᐃᓄᑐᖃᕐᓄᑦ ᐃᑦᑐᖅᓯᐅᑎᓂ ᓂᖏᐅᖅᓯᐅᑎᓂ ᑮᓇᐅᔭᑦ ᐸᐸᑕᐅᓯᒪᔪᓂ ᑐᓂᓯᕗᖅ ᖄᒃᑲᓐᓂᐊᒍᑦ $175 ᑕᖅᑭᑕᒫᑦ ᐊᓯᖏᓐᓄᑦ 560−ᓄᑦ ᐃᓄᑐᖃᕐᓄᑦ.

ᒨᔪ ᐅᖃᓚᐅᖅᐳᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᑭᖑᓪᓕᖅᐹᖅ ᐊᖏᒡᓕᒋᐊᕐᓂᐅᔪᖅ ᐅᖅᑯᔾᔭᐃᑦ ᐃᓐᓇᕐᓄᑦ ᐱᓕᕆᐊᖑᔪᒥ ᐊᐅᓚᑕᐅᕗᖅ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓂ, “ᓱᕋᑦᑎᓯᒪᔪᒥ ᑮᓇᐅᔾᔭᒃᓴᓂᐅᔪᓂ ᐃᓚᖃᖅᑐᒥ ᐃᓄᑐᖃᕐᓄᑦ ᑕᖅᑭᑕᒫᒥ ᐊᑭᓕᐅᑕᐅᔪᓂ.”

ᔫᓂ 2022−ᒥ, ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᓐᓂ ᑎᑭᐅᑎᓚᐅᖅᐳᖅ ᐊᕐᕌᒍᓂ−40-ᓂ ᖁᑦᑎᖕᓂᐅᔪᒥ 8.1 ᐅᓴᓐᑎᒥ.

“ᖄᖏᖅᓯᒪᔪᓂ ᐊᕐᕌᒍᓂ ᐱᖓᓱᓂ, ᑮᓇᐅᔾᔭᒃᓴᓂᕐᒧᑦ ᐊᒃᑐᐃᓂᖓᓂ ᓄᕙᒡᔪᐊᕐᓇᕐᒥ ᒥᒃᖠᒋᐊᖅᑎᑕᐅᒐᓛᓚᐅᖅᐳᖅ ᐊᔾᔨᒌᙱᑦᑐᓂ ᐱᓕᕆᐊᖑᔪᓂ ᑐᓂᔭᐅᔪᒥ ᐅᕘᓇ ᓄᓇᖃᖅᑳᖅᓯᒪᔪᓄᑦ ᓄᓇᓕᖕᓂ ᐃᑲᔪᖅᓱᐃᓂᕐᒥ ᑮᓇᐅᔭᓂᑦ. ᐅᑯᐊ ᐱᓕᕆᐊᖑᔪᑦ ᐊᑐᐃᓐᓇᐅᔪᓐᓃᖅᐳᑦ,” ᒨᔪ ᐅᖃᓚᐅᖅᐳᑦ.

ᐊᖏᒡᓕᒋᐊᕐᓂᐅᔪᖅ ᐃᑦᑐᖅᓯᐅᑎᓂ ᓂᖏᐅᖅᓯᐅᑎᓂ ᐊᒻᒪᓗ ᐅᓄᕐᓂᐅᔪᓂ ᐃᓄᑐᖃᕐᓂ ᐱᕙᒃᑐᓂ ᐊᑭᖃᖅᑎᑦᑎᓂᐊᖅᐳᖅ ᖄᒃᑲᓐᓂᐊᒍᑦ $1,721,400 ᐊᕐᕌᒍᑕᒫᒥ ᐅᑯᓄᖓ ᒪᕐᕉᔪᓂ ᐱᓕᕆᐊᖑᔪᓂ: ᓄᓇᕗᒻᒥ ᐃᓄᑐᖃᕐᓄᑦ ᐃᓚᒋᐊᕈᒻᒥ ᑮᓇᐅᔭᑦ ᐸᐸᑕᐅᓯᒪᔪᓂ ᐱᑎᑦᑎᓂᐊᖅᐳᖅ $1,464,660−ᓂ ᖄᒃᑲᓐᓂᐊᒍᑦ ᐊᑭᐅᔪᓂ ᐊᒻᒪ ᓄᓇᕗᒻᒥ ᐃᓄᑐᖃᕐᓄᑦ ᐃᑦᑐᖅᓯᐅᑎᓂ ᓂᖏᐅᖅᓯᐅᑎᓂ ᑮᓇᐅᔭᑦ ᐸᐸᑕᐅᓯᒪᔪᓂ ᐃᓚᒋᐊᖅᓯᓂᐊᖅᐳᖅ $256,740−ᓂ ᐊᑭᐅᔪᓂ.

“ᐊᖏᒡᓕᕙᓪᓕᐊᔪᒥ ᐊᑭᐅᔪᒥ ᐆᒪᓇᓱᐊᕐᓂᕐᒥ, ᐱᓗᐊᖅᑐᒥ ᖁᕝᕙᖅᐸᓪᓕᐊᔪᒥ ᐊᑭᐅᔪᒥ ᓂᕿᓄᑦ, ᐱᒻᒪᕆᐅᕗᖅ ᑐᓂᓯᓂᑦᑎᓐᓂ ᐃᑲᔪᖅᓱᐃᔪᓐᓇᕐᓂᑦᑎᓐᓂ ᐊᔪᕐᓇᙱᓐᓂᖓᓂ,” ᐅᖃᓚᐅᖅᐳᑦ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑎ ᑰᑦᑎᖅ ᐅᖃᐅᓯᒃᓴᓕᐊᖑᔪᒥ.

“ᖁᕕᐊᓱᒃᐳᖓ ᓄᓇᕗᒻᒥ ᑐᙵᕕᒃᑯᑦ ᑐᓂᓯᔪᓐᓇᖅᓯᓂᖏᓐᓂ ᐊᖏᓂᖅᓴᐅᔪᒥ ᐃᑲᔪᖅᓱᐃᓂᐅᔪᒥ ᐆᒧᖓ ᐊᓐᓂᕆᔭᐅᔪᓄᑦ ᐃᓚᖓᓐᓂ ᐃᓅᖃᑎᑦᑎᓐᓂ.”